Ghazal

"shisha lab se judaa nahin hotaa nashsha phir bhi sivaa nahin hotaa dard-e-dil jab sivaa nahin hotaa ishq mein kuchh mazaa nahin hotaa har nazar surmagin to hoti hai har hasin dilrubaa nahin hotaa haan ye duniyaa buraa banaati hai varna insaan buraa nahin hotaa asr-e-haazir hai jab qayaamat-khez hashr phir kyuun bapaa nahin hotaa paarsaa rind ho to saktaa hai rind kyuun paarsaa nahin hotaa sher ke fan mein aur bayaan mein 'aziz' 'momin' ab dusraa nahin hotaa"

"tiri mahfil mein farq-e-kufr-o-imaan kaun dekhegaa fasaana hi nahin koi to unvaan kaun dekhegaa yahaan to ek lailaa ke na jaane kitne majnun hain yahaan apnaa garebaan apnaa daamaan kaun dekhegaa bahut nikle hain lekin phir bhi kuchh armaan hain dil mein ba-juz tere miraa ye soz-e-pinhaan kaun dekhegaa agar parde ki jumbish se laraztaa hai to phir ai dil tajalli-e-jamaal-e-ru-e-jaanaan kaun dekhegaa agar ham se khafaa honaa hai to ho jaaiye hazrat hamaare baad phir andaaz-e-yazdaan kaun dekhegaa mujhe pi kar bahakne mein bahut hi lutf aataa hai na tum dekhoge to phir mujh ko farhaan kaun dekhegaa jise kahtaa hai ik aalam 'aziz'-e-vaaris-e-aalam use aalam mein hairaan-o-pareshaan kaun dekhegaa"

"sozish-e-gham ke sivaa kaahish-e-furqat ke sivaa ishq mein kuchh bhi nahin dard ki lazzat ke sivaa dil mein ab kuchh bhi nahin un ki mohabbat ke sivaa sab fasaane hain haqiqat mein haqiqat ke sivaa kaun kah saktaa hai ye ahl-e-tariqat ke sivaa saare jhagDe hain jahaan mein tiri nisbat ke sivaa kitne chehron ne mujhe daavat-e-jalva bakhshi koi surat na mili aap ki surat ke sivaa gham-e-uqbaa gham-e-dauraan gham-e-hasti ki qasam aur bhi gham hain zamaane mein mohabbat ke sivaa bazm-e-jaanaan mein are zauq-e-faraavaan ab tak kuchh bhi haasil na huaa dida-e-hairat ke sivaa vo shab-e-hijr vo taarik fazaa vo vahshat koi gham-khvaar na thaa dard ki shiddat ke sivaa mohtasib aao chalein aaj to mai-khaane mein ek jannat hai vahaan aap ki jannat ke sivaa jo tahi-dast bhi hai aur tahi-daaman bhi vo kahaan jaaegaa tere dar-e-daulat ke sivaa jis ne qudrat ke har iqdaam se Takkar li hai vo pashimaan na huaa jabr-e-mashiyyat ke sivaa mujh se ye puchh rahe hain mire ahbaab 'aziz' kyaa milaa shahr-e-sukhan mein tumhein shohrat ke sivaa"

"dil mein hamaare ab koi armaan nahin rahaa vo ehtimaam-e-gardish-e-dauraan nahin rahaa pesh-e-nazar vo khusrav-e-khubaan nahin rahaa meri hayaat-e-shauq kaa saamaan nahin rahaa samjhaa rahaa huun yuun dil-e-muztar ko hijr mein vo kaun hai jo gham se pareshaan nahin rahaa dekhaa hai main ne gesu-e-kaafir kaa mojaza taar-e-nafas bhi meraa musalmaan nahin rahaa ashkon ke saath saath kuchh armaan nikal gae bechainiyon kaa dil mein vo tufaan nahin rahaa ai chaarasaaz sai-e-musalsal fuzul hai teraa mariz qaabil-e-darmaan nahin rahaa us ki hayaat us ke liye maut ai 'aziz' jis par ki us nigaah kaa ehsaan nahin rahaa"

"us mast-e-nazar kaa uf re sitam jis vaqt idhar ho jaati hai majruh jigar ho jaataa hai betaab nazar ho jaati hai allaah re ye dastur-e-amal allaah re ye qaanun-e-aTal jis samt vo nazrein uThti hain duniyaa hi udhar ho jaati hai ik vo bhi zamaana thaa apnaa phulon pe baseraa hotaa thaa ik ye bhi zamaana hai apnaa kaanTon pe basar ho jaati hai jis shaam-e-alam ki taariki gham dil kaa faraavaan karti ho us shaam ki aksar taariki pur-nur sahar ho jaati hai ik roz qamar ban jaataa hai jis tarh mah-e-nau gardish se us tarh mohabbat mein dil ki har aah sharar ho jaati hai jo 'nuh' se nisbat rakhte hain laa-raib 'aziz' un ki kashti dam bhar mein idhar ho jaati hai dam bhar mein udhar ho jaati hai"

"yurish-e-aalaam hai lekin miraa dil ek hai sainkaDon maujon ki zad mein aaj saahil ek hai yuun to hain laakhon hasin ulfat ke qaabil ek hai chaar-jaanib hain shuaaein maah-e-kaamil ek hai aah-e-sozaan naala-e-shab-gir yaa zabt-o-sukun bad-nasibon ke liye in sab kaa haasil ek hai qais ho farhaad ho vaamiq ho yaa mahmud ho hain nigaahein mukhtalif lailaa-e-mahmil ek hai daaman-e-har-mauj hi apnaa to saahil hai 'aziz' kaun kahtaa hai ki bahr-e-gham mein saahil ek hai"

"ye ham par lutf kaisaa ye karam kyaa badal Daale hain andaaz-e-sitam kyaa zamaana hech hai apni nazar mein zamaane ki khushi kyaa aur gham kyaa jab us mahfil ko ham kahte hain apnaa phir us mahfil mein fikr-e-besh-o-kam kyaa nazar aati hai duniyaa khub-surat mire saaghar ke aage jaam-o-jam kyaa jabin hai be-niyaaz-e-kufr-o-imaan dar-e-but-khaana kyaa sehn-e-haram kyaa tiri chashm-e-karam ho jis ki jaanib use phir imtiyaaz-e-besh-o-kam kyaa mire maah-e-munavvar tere aage charaagh-e-dair kyaa sham-e-haram kyaa nigaah-e-naaz ke do shobade hain 'aziz' apnaa vajud apnaa adam kyaa"

"jaan nazr-e-shabaab ho ke rahi zindagi kaamyaab ho ke rahi meri jaanib jo uTh gai thi kabhi vo nazar laa-javaab ho ke rahi ishq mein raah-e-raast bhi aksar raah-e-pur-pech-o-taab ho ke rahi baad tauba ke aur bhi saaqi meri haalat kharaab ho ke rahi un ki mahfil mein be-kasi meri baais-e-inqalaab ho ke rahi fasl-e-gul mein maze uDaaeinge ye tamannaa bhi khvaab ho ke rahi dahr mein ai 'aziz' apni vafaa aap apnaa javaab ho ke rahi"

"mire farzaana banne kaa bahut imkaan baaqi hai abhi jaib-o-garebaan ki mujhe pahchaan baaqi hai mire siine mein tere tiir kaa paikaan baaqi hai ba-alfaaz-e-digar rudaad kaa unvaan baaqi hai baqaa-e-jaavedaan bakhshi hai jis ko teri nazron ne mire dil mein abhi aisaa bhi ik armaan baaqi hai sarisht-e-husn kaa tabdil honaa ghair-mumkin hai sarisht-e-ishq mein jis vaqt tak armaan baaqi hai 'aziz-vaarsi' us ki haqiqat kis tarah samjhe abhi to zaat kaa apni hi kuchh irfaan baaqi hai"

"ik ham ki un ke vaaste mahv-e-fughaan rahe ik vo ki dast-e-shauq se daaman-kashaan rahe dil mein yahi khalish rahe soz-e-nihaan rahe lekin mazaaq-e-ishq-o-mohabbat javaan rahe ik vaqt thaa ki dil ko sukun ki talaash thi aur ab ye aarzu hai ki dard-e-nihaan rahe ahl-e-vafaa par aaiin hazaaron musibatein ye sab rahin-e-gardish-e-haft-aasmaan rahe un kaa shabaab har gul-e-nauras se phaT paDaa chhupne ke baavajud vo har su ayaan rahe ham ne hazaar tarah kiyaa un ko mutmain har baat par vo ham se magar bad-gumaan rahe allaah re talkh-kaami-e-ulfat ki intihaa mujh se mire 'aziz' bhi daaman-kashaan rahe"

"sina-e-shaair gham se bharaa hai aankh magar namnaak nahin hai roz-e-azal se hai divaana daaman lekin chaak nahin hai hijr ke gham mein rone vaale teraa alam duniyaa ki nazar mein kal bhi ibrat-naak nahin thaa aaj bhi ibrat-naak nahin hai shikva-ba-lab vo rind hain saaqi aaj bhi tere maikhaane mein tishna-dahan baiThe hain lekin arz-e-talab bebaak nahin hai shaair ki aavaara tabiat asl mein hai tazin-e-mohabbat naaseh mushfiq tum sab kuchh ho sirf yahi idraak nahin hai tu hi bataa ham aise insaan teri gali mein kyuun aate hain teri adaaein shokh nahin hain teri nazar bebaak nahin hai main hi kyaa kuchh aur yagaane meri tarah hain tere divaane parvaanon ki khaak mein shaamil lekin meri khaak nahin hai tum ne 'aziz' us ki mahfil mein shab na sahi lamhe tu guzaare mustaqbil ki fikr to kyuun ho haal bhi hasrat-naak nahin hai"

"maanus fitratan hain gham-e-aashiqi se ham phir kyuun na tere naaz uThaaein khushi se ham jab se yaqin huaa hai vahi kaarsaaz hain ab apnaa haal kahte nahin har kisi se ham khaamosh zindagi bhi dalil-e-bahaar hai ye dars le rahe hain chaman mein kali se ham ye aur baat hai ki hamein kuchh gila bhi hai munkir nahin magar tiri dariyaa-dili se ham dil-soz-o-dil-kharaash hai ye jaada-e-hayaat lekin guzar rahe hain baDi saadgi se ham ye fikr ye khayaal 'aziz' aap kaa na ho kuchh sher sun rahe the abhi 'vaarsi' se ham"

"aah-o-naala dard-o-gham shor-e-fughaan hai aaj bhi yaani har bulbul asir-e-baaghbaan hai aaj bhi haae tum us ko samajhte ho gulistaan kaa harif bijliyon ki zad mein jis kaa aashiyaan hai aaj bhi naqsh-e-aazaadi jabinon se numaayaan hai magar daaman-e-dil par ghulaami kaa nishaan hai aaj bhi manzil-e-maqsud par pahunche hain sab ke qaafile sirf meri sai-e-paiham raaegaan hai aaj bhi us ke afsaane pe koi tabsira be-sud hai shaadmaan ho kar bhi jo naa-shaadmaan hai aaj bhi tu abhi apni haqiqat se nahin hai aashnaa tere qabze mein inaan-e-do-jahaan hai aaj bhi main azal hi se samajhtaa huun tujhe apnaa 'aziz' ye tiri fitrat ki tu daaman-kashaan hai aaj bhi"

"pae sajda agar mujh ko na teraa aastaan miltaa jo paiham milne vaalaa thaa sukun-e-dil kahaan miltaa miri masti pe zaahid kis liye ab rashk kartaa hai tiri taqdir mein hotaa to lutf-e-jaavedaan miltaa haram tak hi agar mahdud hoti aashiqi apni tum hi socho ki phir tum saa but-e-kaafir kahaan miltaa miri shaffaaf peshaani ne meri laaj rakh li hai mujhe kyaa kyaa samajhte tum jo sajdon kaa nishaan miltaa 'aziz'-e-vaarsi jo tum bhi ibn-ul-vaqt ho jaate tumhaaraa tazkira bhi daastaan-dar-daastaan miltaa"

"ab vahaan chal kar rahein ai dil jahaan koi na ho ham hon aur vo hon hamaare darmiyaan koi na ho ishq hai vo ishq rusvaai ho jis ke saath saath ishq vo kyaa ishq jis ki daastaan koi na ho main bhi dil vaalon ki barbaadi se vaaqif huun magar meri surat yusuf-e-be-kaarvaan koi na ho mehrbaan ho jaae ik aalam hamaare haal par aap jaisaa dushman-e-dil mehrbaan koi na ho aap bhi har shakhs ko samjhein agar apnaa 'aziz' aap se bhi be-sabab daaman-kashaan koi na ho"

"ishq mein ye hui haalat tire divaane ki ab na jiine ki tamannaa hai na mar jaane ki raqs miinaa kaa kabhi shokhiyaan paimaane ki yaad aati hain fazaaein tire maikhaane ki kuchh is andaaz se tartib diyaa hai main ne tum se tashrih na hogi mire afsaane ki meri qismat hi mein likkhi thi tabaahi ai dost hai shikaayat mujhe apne ki na begaane ki vo bhi bimaar-e-mohabbat kaa uDaate hain mazaaq dekh kar jin ko tavaqqoa thi sambhal jaane ki kyuun na tauqir karein aaj miri ahl-e-haram khaak chhaani hai bahut main ne sanam-khaane ki hijr aalaam khalish soz taDap dard-e-jigar surkhiyaan hain ye mire ishq ke afsaane ki"

"bakhshi hai kaif-e-ishq ne vo be-khudi mujhe main zindagi ko bhuul gayaa zindagi mujhe daur-e-falak pe jab kabhi aai hansi mujhe aalaam-e-rozgaar ne aavaaz di mujhe tere khayaal se hai vo dil-bastagi mujhe hasrat hi ab nahin tire didaar ki mujhe ai marg-e-ishq teri navaazish kaa shukriya duniyaa ki talkhiyon se faraaghat mili mujhe har shai se be-niyaaz hai meraa dil-e-hazin tum kyaa mile ki mil gae kaunain bhi mujhe kal tak jo tegh tishna-e-khun-e-adu rahi aaj us ki pyaas khud hi bujhaani paDi mujhe faizaan-e-vaarsi se 'aziz'-e-jahaan huun main sab kuchh hai ek silsila-e-vaarsi mujhe"

"ai dil-e-dard-aashnaa husn se rasm-o-raah kar ishq hai baais-e-najaat shauq se to gunaah kar lutf bhi gaah-gaah kar zulm bhi be-panaah kar jaise bhi tujh se ho sake mujh se magar nibaah kar mere savaal-e-vasl par aaj vo mujh se kah gae tu abhi chand roz aur hijr mein aah aah kar husn tire huzur khud aae ba-iztiraab-e-dil ai dil-e-dard-aashnaa aisi bhi ek aah kar shauq hai gar vaqaar kaa gulshan-e-rozgaar mein phulon ke saath hi 'aziz' kaanTon se bhi nibaah kar"

"miraa divaana-pan farzaangi se kam nahin hotaa ki main rotaa huun pahron aur daaman nam nahin hotaa tiraa gham sahne vaale par zamaana muskuraataa hai magar har shakhs ki qismat mein teraa gham nahin hotaa mah-o-khurshid ki taabindagi kam hoti rahti hai magar daagh-e-tamannaa kaa ujaalaa kam nahin hotaa abhi ai josh-e-girya tu ne ye sochaa nahin shaayad mohabbat kaa chaman minnat-kash-e-shabnam nahin hotaa qayaamat tak rahe saaqi salaamat teraa mai-khaana pilaai hai kuchh aisi kaif jis kaa kam nahin hotaa vaqaar-e-'ishq par us daur se bhi harf aataa hai 'aziz-vaarsi' vo dard jo paiham nahin hotaa"

"abr chhaaegaa to barsaat bhi ho jaaegi diid hogi to mulaaqaat bhi ho jaaegi ai dil-e-husn-e-talab mashq-e-tasavvur tu baDhaa phir jo chaahegaa vahi baat bhi ho jaaegi sar jhukaae hue baiThe ho abas baada-kasho jaam uThaaoge to barsaat bhi ho jaaegi aaj us ne nae andaaz se dekhaa hai mujhe ghaaliban aaj koi baat bhi ho jaaegi be-khudi sirf dalil-e-gham-e-pinhaan hi nahin ek din kaashif-e-haalaat bhi ho jaaegi bul-havas dahr ke rangin manaazir se na khel din huaa hai to yahaan raat bhi ho jaaegi jaan de kar tiri mahfil mein kabhi jaan-e-'aziz' jaur ki tere mukaafaat bhi ho jaaegi"

"ab tak bhi paa sake na jahaan nukta daan tujhe divaangi ne DhunD liyaa hai vahaan tujhe ye meraa faisla hai kisi kaa bhi to nahin kyon log kah rahe hain miraa mehrbaan tujhe tu ne miri hayaat kaa 'aalam badal diyaa phir kaise bhuul jaaun gham-e-jaavedaan tujhe har mu-e-tan se phuuT paDi hai hasin yaad kuchh bhulne kaa 'azm kiyaa hai jahaan tujhe kab se tiraa 'aziz' hai rusvaa tire liye ab tak yaqin-e-‘ishq nahin bad-gumaan tujhe"

"har aankh mein masti hai kahiye bhi to kyaa kahiye aur aap ki basti hai kahiye bhi to kyaa kahiye har shai se kinaara bhi aur anjuman-aaraa bhi kyaa aap ki hasti hai kahiye bhi to kyaa kahiye but-khaane mein din kaaTaa maikhaane mein shab guzri nasha hai na masti hai kahiye bhi to kyaa kahiye ye daur sanam-parvar har shakhs yahaan aazar sahraa hai na basti hai kahiye bhi to kyaa kahiye vo mahfil-e-rindaan ho yaa bazm-e-sukhan-daan ho ahbaab-parasti hai kahiye bhi to kyaa kahiye zaahid ki subuk-fitrat rindon pe hamesha se aavaaz hi kasti kahiye bhi to kyaa kahiye ahbaab ki aankhon mein jo uns ki naagin hai ahbaab ko Dasti hai kahiye bhi to kyaa kahiye ik jins-e-kudurat thi jo pahle hi sasti thi ab aur bhi sasti hai kahiye bhi to kyaa kahiye duniyaa se 'aziz' us ko hoti hai mohabbat bhi duniyaa jise Dasti hai kahiye bhi to kyaa kahiye"

"aakhir-e-shab vo teri angDaai kahkashaan bhi falak pe sharmaai aap ne jab tavajjoh farmaai gulshan-e-zist mein bahaar aai daastaan jab bhi apni dohraai gham ne ki hai baDi paziraai sajda-rezi ko kaise tark karun hai yahi vajh-e-izzat-afzaai tum ne apnaa niyaaz-mand kahaa aaj meri muraad bar aai aap farmaaiye kahaan jaaun aap ke dar se hai shanaasaai us ki taqdir mein hai vasl ki shab jis ne bardaasht ki hai tanhaai raat pahlu mein aap the be-shak raat mujh ko bhi khuub niind aai main huun yuun ism-ba-musammaa 'aziz' vaaris-e-paak kaa huun shaidaai"

"dard jab ishq mein maail-ba-fughaan hotaa hai vahi aalam to tabiat pe garaan hotaa hai moajiza ishq kaa us vaqt ayaan hotaa hai us ki tasvir pe jab apnaa gumaan hotaa hai ab to har bazm mein haal apnaa bayaan hotaa hai kaun ab kis ke liye girya-kunaan hotaa hai jab kabhi tazkira-e-gul-badnaan hotaa hai rahguzaaron pe bahaaron kaa gumaan hotaa hai chaandni raat mein jab hote hain vo mere qarib vahi aalam to mohabbat mein javaan hotaa hai kis qadar pi hai kahaan pi hai kahaan tak pi hai piine vaale ko ye ehsaas kahaan hotaa hai haan vahi 'vaarsi' kahte hain jise aap 'aziz' koi bhi bazm ho vo pir-e-mughaan hotaa hai"