Ghazal

"uf intihaa-e-shauq mein ab kyaa kare koi kahte hain pahle apni tamanna kare koi bedaad-e-husn ye hai to phir kyaa kare koi rusvaaiyon ke baad bhi parda kare koi tum bhi kaho to dil ko bataa dein ab us kaa haal ab vaqt vo nahin hai ki parda kare koi khul jaaein husn-o-ishq ki nairangiyon ke raaz dekhun jo phir kisi ki tamanna kare koi bad-naamiyaan nasib mein hain sab ke varna yaan koi na kuchh miTaae na paidaa kare koi kuchh aisaa haal hai kisi bimaar-e-ishq kaa vo khud bhi kah rahe hain ki ab kyaa kare koi jhalkegaa ikhtiyaar mein mahbubiyon kaa rang meri nazar se gul kaa tamaashaa kare koi zarron mein gunjti hai sadaa-e-shikast-e-dil hai shart gosh-e-dil ko magar vaa kare koi jab kuchh samajhne dein na kisi ki tajalliyaan phir kyon mire khayaal ko rusvaa kare koi hai zarra zarra mahshar-e-aashob-e-shauq-e-der ab vaqt aagyaa hai ki pardaa kare koi gum ho chuki hai qudrat-e-abdaa-e-aarzu 'bekhud' harim-e-naaz to hai kyaa kare koi"

"vahi aashiq hai qaatil kaa na jo shaaki vahaan hogaa jise daar-e-jazaa samjhe hain daar-e-imtihaan hogaa judaa sab aalamon se ek din teraa jahaan hogaa mohabbat ki zamin hogi vafaa kaa aasmaan hogaa na main dair-o-haram samjhun na main arsh-o-iram jaanun jahaan sajde ko dil jhuk jaae teraa aastaan hogaa umidein dil ki vaabasta hain maidaan-e-qayaamat se na us jaa ye zamin hogi na vaan ye aasmaan hogaa chhuDaayaa jis ne daaman kaash us ko ye khabar hoti ki unvaan-e-qayaamat dard-e-dil ki daastaan hogaa vo jannat hai jo zaahid ke safar ki aakhiri manzil usi mein pahli manzil par hamaaraa kaarvaan hogaa asiri mein giri hain aah laakhon bijliyaan dil par jahaan bijli giri samjhe hamaaraa aashiyaan hogaa firaaq-e-jaavedaani intiqaam-e-vasl-e-jaanaan hai magar sadqe tire jaane bhi de ai aasmaan hogaa fasaana dahr-o-gulzaar-o-bahaar-o-gul kaa rahne de agar kuchh hai bhi ai 'bekhud' sivaae aashiyaan hogaa"

"peshaani-e-mohabbat jhuk jaae jis zamin par kaabe kaa zikr kyaa hai bas ho khudaa vahin par thaa vahshi-e-adaa kaa naqsh-e-qadam yahin par peshaani-e-malak phir jhukti na kyon zamin par ik umr marte jiite guzri hai tere chalte jab miT chalaa tabassum bal aa chukaa jabin par aflaak par zamin hi bhaari rahi hamesha baalaa-e-arsh saajid masjud thaa zamin par hon laakh hashr to bhi kam ho na us ki lazzat donon jahaan sadqe zaalim tiri nahin par rahtaa hai yuun baraabar bim-o-rajaa kaa palla pyaari hansi labon par qaatil shikan jabin par mahshar se kyon main puchhun dil se na puchh dekhun sajde kaa ye nishaan hai yaa daagh hai jabin par hon laakh hashr to bhi ghaTti nahin kahin par lazzat tiri nahin ki sadqe tiri nahin par is gul ke aage dil ne jannat ko daagh paayaa uf zakhm ki bahaarein divaane ki jabin par guzri hai umr 'bekhud' rote lahu ke aansu fard-e-amal kaa dhokaa ho kyon na aastin par"

"jab naaz-e-ishq husn ke qaabil nahin rahaa phir vo kuchh aur hi hai miraa dil nahin rahaa kahti hai dil ke haal pe ghabraa ke be-khudi ye aap mein bhi aane ke qaabil nahin rahaa ik jalva pesh pesh hai aur baDh rahe hain ham ab kuchh khayaal-e-duri-e-manzil nahin rahaa duniyaa yahi hai shak hai to is ko miTaa ke dekh phir kuchh nahin jahaan mein jab dil nahin rahaa puuri jazaa milegi isi dil ko hashr mein jis ko khayaal-e-shikva-e-qaatil nahin rahaa tamkin ghazab hai saaqi-e-daur-e-alast mein shaayad khayaal-e-garmi-e-mahfil nahin rahaa duniyaa se puchh dekh koi zarra dahr kaa tazin-e-kaaenaat se ghaafil nahin rahaa zinat pe kaaenaat ki jaane lagi nazar ab main tire khayaal ke qaabil nahin rahaa bas kar ujaD chuki hain umangon ki bastiyaan duniyaa mein shaad aaj koi dil nahin rahaa afsurdagi ki jaan hai aazurdagi ki ruuh jo valvalon ki jaan thaa vo dil nahin rahaa hai kal ki baat thaa yahi duniyaa-e-husn-o-ishq viraana-e-malaal hai ab dil nahin rahaa 'bekhud' kisi ke naaz-e-dui-soz ki qasam kaisi nazar khayaal bhi haail nahin rahaa"

"aalam ko us ne naqsh-e-kaf-e-paa banaa diyaa yaani banaa diyaa kabhi gaahe miTaa diyaa hoti na taab-e-jalva-e-pinhaan kalim ko kyon tu ne parda-e-rukh-e-zebaa uThaa diyaa puchhaa jo us se hasti-e-aalam ke raaz ko zaalim ne apnaa naqsh-e-kaf-e-paa dikhaa diyaa ham ibtidaa-e-soz-e-mohabbat mein jal bujhe vo shama hain ki shaam se mujh ko bujhaa diyaa goyaa ki ham bhi naqsh-e-tamannaa-e-ghair the banne na paae the ki kisi ne miTaa diyaa"

"kyon ai khayaal-e-yaar tujhe kyaa khabar nahin main kyon bataaun dard kidhar hai kidhar nahin nashtar kaa kaam kyaa hai ab achchhaa hai dard-e-dil sadqe tire nahin nahin ai chaaraagar nahin kahti hai ahl-e-zauq se betaabi-e-khayaal jis mein ye iztiraab ki khu ho bashar nahin divaangaan-e-ishq pe kyaa jaane kyaa bani vaaraftagi-e-husn ko apni khabar nahin duniyaa-e-dard dil hai to duniyaa-e-shauq ruuh hon aur bhi jahaan mujhe kuchh bhi khabar nahin sahraa-e-ishq-o-hasti-e-mauhum-o-raaz-e-husn in manzilon mein dil saa koi raahbar nahin har zarra jis se ik dil-e-muztar na ban sake vo koi aur chiiz hai teri nazar nahin is be-dili se kahne kaa 'bekhud' maaal kyaa alfaaz kuchh hain jama maaani magar nahin"

"kahte hain teri laash pe aaya na jaaegaa to un se khaak mein bhi milaayaa na jaaegaa rahmat pe tujh ko naaz hai isyaan pe mujh ko naaz sar tere saamne to jhukaayaa na jaaegaa nazron se girne vaale ko kaafi hai ik nazar kuchh naqsh-e-paa nahin ki uThaayaa na jaaegaa taklif kar tabassum-e-pinhaan se puchh le zakhm-e-nihaan ko mujh se dikhaayaa na jaaegaa miTtaa hai koi hasti-e-mauhum kaa khayaal vo parda paD gayaa ki uThaayaa na jaaegaa vaaraftagi-e-shauq mein lazzat yahi hai gar 'bekhud' se apne aap mein aaya na jaaegaa"

"dahr-o-tajalliyaat-e-rab ek hain chashm-e-raaz mein jakDe hue hain sab ke sab silsila-e-niyaaz mein kuchh vo nazar kaa taur hai nargis-e-ishva-saaz mein sab kaa jahaan hi aur hai parda-saraa-e-naaz mein farq hai ijz-o-naaz mein dida-e-imtiyaaz mein farq-e-haram-niyaaz mein paa-e-haram-navaaz mein mehr-e-abad se kaaenaat baqqa-e-nur taa-jihaat raat hai aur andheri raat chasm-e-sitaara-saaz mein haae re muntahaa-e-shauq dast-e-hayaa gale kaa tauq sar ko hai aastaan se zauq us ki harim-e-naaz mein zarron ki khutba-khvaaniyaan balki khudaa-bayaaniyaan uf tiri lan-taraaniyaan khaak-e-hama-niyaaz mein shakl har ik ujaal di baat vahi nikaal di shauq ne khaak Daal di dida-e-imtiyaaz mein aur kisi kaa zikr kyaa jab na mujhi pe khul sakaa dard se mar rahaa huun yaa hasrat-e-chaara-saaz mein jo bhi hai khizr-e-raah hai phir bhi ghazab tabaah hai ek si aah-aah hai qaafila-e-majaaz mein subh-e-azal se hashr tak mahv-e-rukua thaa falak sajde ki rah gai falak phir bhi dil-e-niyaaz mein shauq se kyaa bichhaD gae khel bane bigaD gae baal hi baal paD gae aaina-e-niyaaz mein sahn-e-zamin makaan-e-naaz charkh hai aasmaan-e-naaz dahr hai ik jahaan-e-naaz husn ke daur-e-naaz mein chhinTe sahaab ne diye raah-e-talab mein soz se shoale jahaan bhaDak uThe barq-e-zabaana-taaz mein"

"ab to hujum-e-yaas ki kuchh intihaa nahin yaani mujhe umiid kaa bhi aasraa nahin kab ham se be-dilon pe nigaah-e-jafaa nahin ham khuub jaante hain ki tu be-vafaa nahin ai rashk-e-parda-soz shikaayat ki jaa nahin vo bazm-e-naaz hai dil-e-be-muddaaa nahin dikhlaae phir khudaa na vo maayusiyon ke din hotaa thaa ye khayaal ki hai yaa khudaa nahin allah-re be-niyaazi-e-aasudagaan-e-khvaab is qurb par kisi se koi boltaa nahin aati hai zarre zarre se aavaaz-e-baazgasht phir bhi ye kah rahaa hai abhi kuchh kahaa nahin vo khud bhi dafn ho gai ahl-e-vafaa ke saath be-kaar DhunDhtaa hai jahaan mein vafaa nahin hai jalva-rez bazm-e-tasavvur jamaal-e-yaar ai shauq-e-did ab ye taghaaful ravaa nahin sadqe tire karam ke na de zahmat-e-savaal kashkol hai faqir kaa dast-e-duaa nahin mahrumiyon se zauq hai majburiyon se ishq main kaamyaab huun ye miraa muddaaa nahin vo did-haa-e-shauq ki dekhein tiraa jamaal kis kaa bahisht kuchh bhi unhein dikhtaa nahin kyon us ke chumte hi na mearaaj ho nasib 'bekhud' khudaa kaa haath hai dast-e-duaa nahin"

"banti hai din mein duniyaa aksar nigaar-khaana phirtaa hai jab nazar mein guzraa huaa zamaana fard-e-amal na dikhlaa kyon mujh ko yaad aae guzraa huaa zamaana bhulaa huaa fasaana sar ko qafas pe rakkhe sayyaad kah rahaa hai bulbul ki jaan niklaa ujDaa saa aashiyaana un par paDi to aise taDpe ki phir na sanbhle kahte the jo yahi hai duniyaa kaa kaar-khaana ab baaghbaan bhi aksar hasrat se dekhtaa hai hai yaadgaar-e-bulbul sunsaan aashiyaana jallaad tere sadqe qismat se mil gayaa tu muddat se DhunDhti thi meri ajal bahaana ik laa-javaab hasti sajdon mein miT chuki thi phir qibla kyon na bantaa 'bekhud' kaa aastaana putli jo phir chali thi 'bekhud' to ban chalaa thaa chhuTtaa huaa zamaana miTtaa huaa zamaana"

"paaband-e-hukm-e-girya-e-be-ikhtiyaar huun main sail-e-aabshaar huun abr-e-bahaar huun abr-e-bahaar huun na fazaa-e-bahaar huun main gard-e-daaman-e-chaman-e-rozgaar huun ai baaghbaan-e-gulshan-e-hasti bataa mujhe apni bahaar huun ki chaman ki bahaar huun hain yaan ke zarre zarre mein be-taabiyaan miri main jaan-e-be-qaraar-o-dil-e-be-qaraar huun kahtaa hai husn-e-yaar se husn-e-nigaah-e-misr chaDhti bahaar tu main utarti bahaar huun ab main kahaan zamin-o-fazaa-e-vatan kahaan 'bekhud' main aandhiyon kaa uDaayaa ghubaar huun"

"aankhon par aah yaas kaa parda saa paD gayaa duniyaa ujaD gai ki miraa dil ujaD gayaa allaah kaisaa tafraqa marne se paD gayaa main ek saath saare jahaan se bichhaD gayaa ab soz-e-dil ke naaz uThaae na jaaeinge aansu jahaan giraa vahin naasur paD gayaa mahshar isi kaa naam hai parvaa nahin unhein duniyaa bigaD gai ki gharaundaa bigaD gayaa marnaa paDaa kise tire zauq-e-gunaah se ai dil khabar bhi hai koi ghairat se gaD gayaa aankhon mein ab to aur bhi phirtaa hai aashiyaan haan sun liyaa bahaar kaa khema ukhaD gayaa ab aasmaan chiir ke niklegaa kis kaa dil taar-e-khayaal mein koi mujh ko jakaD gayaa vaqt-e-vidaaa dil pe kuchh aisi guzar gai ab tak khabar nahin ki main kis se bichhaD gayaa ai naakhun-e-fanaa tiri shokhi ke main nisaar qudrat ne jo kiyaa thaa vo bakhiya ukhaD gayaa vo koi aur chiiz hai aashiq kaa dil nahin jis dil mein ban ke naqsh-e-tamannaa bigaD gayaa hasrat se dekhtaa hi rahaa pir-e-mai-kada aur josh-e-mai mein shisha se paimaana laD gayaa qudrat ne haath chuum liye us ke vajd mein jo naqsh-e-kaaenaat par aaina jaD gayaa duniyaa karaahne ki sadaa ban ke rah gai main dil ko marte dekh kar aafat mein paD gayaa"

"yuun bhi dekhaa na kabhi dard kaa darmaan honaa haae vo nashtar-e-mizhgaan kaa rag-e-jaan honaa vo tamannaaon kaa rah rah ke pareshaan honaa vo tiri yaad kaa dil mein tire mehmaan honaa parde parde mein tire vasl kaa saamaan honaa dard-e-pinhaan kaa tiraa ghamza-e-pinhaan honaa mahshar-e-naaz hain zarraat-e-fazaa-e-kaunain allah allah kisi kaafir kaa khiraamaan honaa har ghaDi ik nae aalam ki khabar detaa hai miraa hansnaa miraa ronaa miraa hairaan honaa josh-e-aabaadi-e-duniyaa se mohabbat yaani dil-e-hasrat-zada kaa mahshar-e-hirmaan honaa aah main huun vo siyah-bakht ki taqdir mein thaa barq se mere nasheman kaa charaaghaan honaa khair apni nahin tujh ko ye kahe detaa hai apni har ek adaa par tiraa hairaan honaa jalva-e-bazm-e-azal jalva-e-tur-e-mahshar hai mire shauq ke ajzaa kaa pareshaan honaa dekhiye naaz-e-taghaaful ko dikhaae kyaa rang ashk hasrat kaa sar-e-daaman-e-mizhgaan honaa vaadi-e-maarifat-o-shauq ke allah re nasib jis ki qismat mein thaa 'bekhud' kaa bayaabaan honaa"

"hangaama-khez daavaa-e-mansur ho gayaa lab ham-navaa-e-khaatir-e-maghrur ho gayaa bazm-e-khayaal-e-yaar mein hai mahv-e-aarzu mujh se miraa khayaal bahut duur ho gayaa miTnaa thaa kab taraavish-e-zakhm-e-jigar kaa rang haan riste riste zakhm se naasur ho gayaa thaa jalva-gaah-e-yaar miraa daaman-e-nigaah jis zarre par nigaah paDi tuur ho gayaa bas ai sukun-e-yaas ziyaada sitam na kar vo iztiraab-e-shauq to kaafur ho gayaa naakaami-e-azal ki sitam-raaniyaan na puchh main apne ikhtiyaar se majbur ho gayaa uf iztiraab-e-shauq ki hasrat-faroshiyaan husn-e-hayaa-parast bhi majbur ho gayaa main aur ye sarnavisht-e-malaamat ki jaa nahin main us ke intikhaab se majbur ho gayaa hangaama-haa-e-ghalghala-e-maa-o-man na puchh 'bekhud' bhi apne ahd kaa mansur ho gayaa"

"kahaan sar piTne kaa vaqt ab bedaad-e-qaatil par kaleje par miraa ik haath hai ik haath hai dil par asiri ko miri sab qaid hi samjhein magar main to jo pyaar aataa hai bose dene lagtaa huun salaasil par ye naale nikle jis dil se na jaane us pe kyaa guzri ki jis ke kaan tak pahonche chhuri si chal gai dil par nahin ab aah saahil dekhnaa bhi apni qismat mein nazar aai hain maujein jab nazar Daali hai saahil par tabassum ne abhi in rang uDe honTon ko chumaa hai khinchi tasvir kis ki parda-haa-e-chashm-e-qaatil par ye hain kaisi balaaein is se ho saktaa hai andaaza ki chikh uTThe hain vo bhi jaan jo dete the mushkil par tamaashaa aakhiri hai ab nahin mauqa taghaaful kaa ki rangat lauTti phirti hai qaatil ru-e-bismil par hamaari zindagi ik naam thaa timaar-daari kaa kabhi uTThaa na 'bekhud' jab se rakkhaa haath ko dil par"

"ajal ne kar diyaa khaamosh to kyaa hai zabaan huun main ki hasti kaa fasaana huun adam ki daastaan huun main zamin vaale jo kahte hain ki ab kyaa piis Daalegaa to miltaa hai javaab is kaa ki daur-e-aasmaan huun main main samjhaataa huun jab dil ko to kahtaa hai mataanat se zamaane ki zabaan to hai haqiqat ki zabaan huun main miri tasvir meraa but miraa marqad hai tan meraa kabhi thaa to isi duniyaa mein lekin ab kahaan huun main tiri ghairat ko ai naaz-e-sitamgar kyaa huaa aakhir tire hote hue mamnun-e-jaur-e-aasmaan huun mein qayaamat kar gayaa baar-e-amaanat kaa uThaa lenaa harif-e-maa-sivaa huun mubtalaa-e-imtihaan huun main na jab uTThaa thaa dil duniyaa se zarra zarra dilkash thaa magar ab aashiyaan har jaa hai par be aashiyaan huun main nazar aataa hai har mimbar pe mujh ko ik nayaa vaaiz jahaan rindon kaa majmaa ho vahaan pir-e-mughaan huun main miri qismat mein ai 'bekhud' kahaan manzil ki aasaaish ghubaar-e-raah huun baang-e-daraa-e-kaarvaan huun main"

"main naqsh-e-maa-o-man hotaa ki naqsh-e-maa-sivaa hotaa jo pahle se khabar hoti ki kyaa hotaa to kyaa hotaa miri hasti kaa nuqta gar na naqsh-e-maa-sivaa hotaa azal ki ibtidaa hotaa abad ki intihaa hotaa samajh le raah-e-ulfat mein kuchh aisi hi paDi varna na dil mujh se judaa hotaa na main dil se judaa hotaa bani jo kuchh bani ham par magar phir bhi ye hasrat hai ki pahlu dil mein hotaa aur dil mein muddaaa hotaa ye aalam thaa kabhi dil kaa mire josh-e-takhayyul se jo naqsha aankh mein phirtaa vahi meraa khudaa hotaa fazaa ke zarre zarre mein tamavvuj hai talaatum hai asar dard-aafrin dil ki sadaa mein aur kyaa hotaa khayaal-e-hasti-e-mauhum aafat hai qayaamat hai ki hone par buraa Thahraa na hotaa to buraa hotaa na agli si khalish hai ab na vo pichhli si kaavish hai uluhi qalb mein khaar-e-tamannaa rah gayaa hotaa ye manzar majmaa-e-mahshar kaa aur mahrum hai 'bekhud' khudaayaa parda-e-josh-e-tamannaa uTh gayaa hotaa"

"parvaana soz-e-shama se yuun baa-khabar na ho dil se lagi na ho to zabaan mein asar na ho kaahe ko yuun basi kabhi basti khayaal ki duniyaa ujaD bhi jaae to ham ko khabar na ho uf uf bani hai ek zamaane ki jaan par ab dil-jalon ki aah mein yaa-rab asar na ho yaa uThti mauj chalti havaa se thi barhami yaa ab mujhe malaal kisi baat par na ho aaiina-e-jamaal-e-jahaan ko bahut na dekh Dartaa hai dil kahin tujhe apni nazar na ho nairangi-e-malaal bahut naagavaar hai duniyaa-e-gham mein shaam na ho yaa sahar na ho duniyaa se uTThe dil ki kahaani bandhi rahi yuun bhi kisi malaal-zada ki basar na ho har su hai ik malaal ki duniyaa basi hui ru-e-khayaal aah kidhar ho kidhar na ho haan haan har ek zarra hai aaina-e-jamaal kyaa dekhe tujh ko jis ki tiri si nazar na ho"

"taa-hashr to firaaq kaa ehsaan hai aur ham kyaa baad-e-hashr bhi shab-e-hijraan hai aur ham duniyaa to jaanti hai ki zindaan hai aur ham ham jaante hain khalvat-e-jaanaan hai aur ham piiri hai aur koshish-e-darmaan hai aur ham maidaan hai aur umr-e-gurezaan hai aur ham kis ko bhalaa nasib hui aisi saltanat hadd-e-khayaal tak ye bayaabaan hai aur ham ik naam zindagi bhi hai qaid-e-hayaat kaa taa-marg aab-o-gil kaa ye zindaan hai aur ham mahshar hai intizaar-e-savaal-o-javaab hai lekin fasaana-e-gham-e-hijraan hai aur ham le-de ke rah gayaa hai yahi ek mashghala fikr-e-javaab-e-daftar-e-isyaann hai aur ham"

"kyon ai khayaal-e-yaar tujhe kyaa khabar nahin main kyon bataaun dard kidhar hai kidhar nahin nashtar kaa kaam kyaa hai ab achchhaa hai dard-e-dil sadqe tire nahin nahin ai chaara-gar nahin kahti hai ahl-e-zauq se betaabi-e-khayaal jis mein ye iztiraab ki khu ho bashar nahin hasti kaa qaafila sar-e-manzil pahunch gayaa aur ham kahaa kiye abhi vaqt-e-safar nahin divaan-gaan-e-ishq pe kyaa jaane kyaa bani vaaraftagi-e-husn ko apni khabar nahin duniyaa-e-dard-e-dil hai to duniyaa-e-shauq-e-ruh hon aur bhi jahaan mujhe kuchh bhi khabar nahin sahraa-e-ishq-o-hasti-e-mauhum-o-raaz-e-husn in manzilon mein dil saa koi raahbar nahin har zarra jis se ik dil-e-muztar na ban sake vo koi aur chiiz hai teri nazar nahin is be-dili se kahne kaa 'bekhud' maaal kyaa alfaaz kuchh hain jama maaani magar nahin"

"na bhulegaa khayaal o rang-e-rukh kaa naama-bar honaa hadis-e-shauq se harf-o-zabaan kaa be-khabar honaa muhit-e-dahr ki har mauj hai ik lahr bijli ki mubaarak aah-e-muztar ko tiri barq-e-nazar honaa shikaayat-sanj-e-qudrat kyon na ho majburi-e-bulbul qafas hi mein thaa kyaa josh-e-numu se baal-o-par honaa miri aahon ki halchal hai nizaam-e-dahr barham hai nidaaein aa rahi hain aaj mushkil hai sahar honaa khule hain dil ke haathon aah asraar-e-junun kyaa kyaa qayaamat kar gayaa is raazdaan kaa parda-dar honaa ye baDhte valvale ye josh-e-gul ye apni majburi qafas se chhuT kar qismat mein thaa be-baal-o-par honaa rah-e-vahshat ki uThti aandhiyon kaa haal kahtaa hai saraapaa kaarvaan-e-shauq kaa gard-e-safar honaa qafas mein fasl-e-gul ki kyaa khabar haan kuchh to kahtaa hai faqat ik vaqt mein josh-e-numu-e-baal-o-par honaa zamaana mahv-e-hairat aur vo majbur-e-tabassum hai tilism-e-raaz hai 'bekhud' miri mizhgaan kaa tar honaa"

"mujh ko kabhi zoaf ne biThaayaa un ko kabhi naaz ne uThaayaa thi sharm agar yahi hayaa ko jalva tiraa kyon mujhe dikhaayaa hasti ne mujhe adam mein jaa kar DhunDhaa to bahut magar na paayaa jo miT gayaa tere lab pe us se eajaaz-e-masih ko jalaayaa kasrat mein bhi thaa tiraa hi jalva vahdat ne jab aaina dikhaayaa allaah re be-khudi-e-'bekhud' vo aae pa aap mein na aaya"

"abhi chaman hai qafas to abhi qafas hai chaman nazaara-e-chaman-e-rozgaar kartaa jaa chalaa hai baadiya-e-justuju ko tai karne shugun-e-girya-e-be-ikhtiyaar kartaa jaa naqaab-e-aariz-e-rangin haTaa ke ai dilbar jahaan ke ban ko hamesha bahaar kartaa jaa ghash aa gayaa hai tamaashaaiyon ko jalve se sadaa sunaa ke unhein hoshiyaar kartaa jaa tajalliyon ke liye koi vaqt khaas nahin kiyaa hai aur yunhi intizaar kartaa jaa shikanja naz' kaa jis dam haTaa sadaa aai ki jism-e-zaar ko nazr-e-fishaar kartaa jaa yunhi balaa se qayaamat kaa din guzar jaae gunaah apne bataaun shumaar kartaa jaa samajhne paae kabhi aasmaan na ai 'bekhud' ye jitnaa jabr kare inkisaar kartaa jaa"

"abhi chaman abhi gul bas yahi samaan dekhaa qafas ko bhi miri aankhon ne aashiyaan dekhaa qafas ko dekh ke jab su-e-aashiyaan dekhaa zamin se charkh tak uThtaa huaa dhuaan dekhaa jo kah ke lafz-e-vafaa chup rahaa to vo bole kahaan se chhoD di zaalim ne daastaan dekhaa taDap ke aap hi baahar thaa aap parde ke nigaah-e-yaas se yuun su-e-paasbaan dekhaa na puchh dasht-e-tamannaa ki vaardaat na puchh har ek zarre ke parde mein aasmaan dekhaa taDap naqaab ki thi yaa jhalak thi parde ki abhi kalim ne jalva tiraa kahaan dekhaa chhupe the abr ki rag rag mein taar bijli ke bhari bahaar mein jab su-e-asmaan dekhaa"