Ghazal

"ajiib tarah kaa ik gham hai jaan se lipTaa huaa bagulaa jaise koi baadbaan se lipTaa huaa main likhne baiThun to kaaghaz hi bhiig jaataa hai vo shakhs yuun hai miri daastaan se lipTaa huaa talab sukun mein kartaa huun be-sukuni se ki meraa suud hai mere ziyaan se lipTaa huaa main niind mein huun magar khvaab kis tarah dekhun miraa shuur hai mere gumaan se lipTaa huaa agarche niind mujhe ab bhi aa hi jaati hai magar vo niind ki sotaa thaa maan se lipTaa huaa baghair puchhe mujhe raasta bataataa hai koi to hai ki mire kaarvaan se lipTaa huaa"

"vahin pe gham hai jahaan par khushi paDi hui hai aur un ke biich mein bhi dushmani paDi hui hai nimaT luun us se to sochungaa apne baare mein abhi to mere gale zindagi paDi hui hai nigaah mujh pe karegaa zarur dasht-e-junun zaraa si khaak mire sar mein bhi paDi hui hai jo baat ho na saki us ki baat ki jaae vo baat jo ki abhi an-kahi paDi hui hai main is liye bhi nahin kholtaa vo almaari puraane kapDon mein divaangi paDi hui hai"

"taaj mein ho bhi saktaa hai hiiraa kho bhi saktaa hai jaage bhaag to maan na kar bakht hai so bhi saktaa hai aankh mein rahne vaale sun ashk Dubo bhi saktaa hai vo qahhaar bhi hai lekin banda ro bhi saktaa hai jis mein kaaTne kaa dam ho vo hi bo bhi saktaa hai kaun kisi kaa hai 'ejaaz' kyaa koi ho bhi saktaa hai"

"baat jhuTi asar khayaali hai sarfaroshi kaa sar khayaali hai kaT gai khvaab TuTne mein umr yaani saaraa safar khayaali hai bhaai-chaara khulus aashti amn hai sabhi kuchh magar khayaali hai jalte rahnaa charaagh-e-shab mire saath hijr bhaari sahar khayaali hai aate jaate rahaa karo is par dil mein ik rahguzar khayaali hai nange paaon koi nahin aataa ab to har dopahar khayaali hai"

"hijr-e-paiham hai kyaa kiyaa jaae mustaqil gham hai kyaa kiyaa jaae ek tasvir saamne hai magar aankh pur-nam hai kyaa kiyaa jaae us ki aadat hai der kar denaa zindagi kam hai kyaa kiyaa jaae saunp detaa havaa ko khaak apni par abhi nam hai kyaa kiyaa jaae kaisaa jhagDaa hai mere andar ye shor har dam hai kyaa kiyaa jaae main huun tanhaa aur aap ke haq mein ek aalam hai kyaa kiyaa jaae jhuuT kaa aur adl kaa 'haidar' rabt-e-baaham hai kyaa kiyaa jaae"

"khushi ki baat thi lekin mujhe rulaa gai hai kahaan se baat chali thi kahaan tak aa gai hai miraa khudaa to yaqinan bharam rakhegaa miraa main jaantaa huun ki us tak miri duaa gai hai main aam taur pe chaltaa huun us se aage magar kahin kahin mire aage miri anaa gai hai main apne naam ki takhti nahin lagaataa kahin miraa pata miri be-maaegi bataa gai hai sanbhal ke baiTh tu masnad pe saahib-e-mansab kisi ki jaan kisi ki yahaan qabaa gai hai tujhe ye zoam faqat tu thaa raunaq-e-mahfil jaras ki guunj tire baad jaa-ba-jaa gai hai"

"hijr kuchh is tarah guzaaraa hai vasl kah kar use pukaaraa hai ek tanhaai thi miri apni is pe bhi us kaa hi ijaara hai umr itni abhi hui to nahin jitnaa main ne use guzaaraa hai faisla ho nahin sakaa ab tak kaun se gham ne mujh ko maaraa hai zindagi phir bhi mere jaisi rahi main ne to is ko hi sanvaaraa hai meri jaanib hai aap ki ungli par kisi aur kaa ishaara hai"

"gar nahin kuchh bhi aap se milnaa aap se phir nahin mujhe milnaa vaqt maangaa na kar tu milne kaa asl milnaa hai bin kahe milnaa yaar kuchh intizaam aisaa kar aakhiri saans tak rahe milnaa roz milne kaa main nahin kahtaa zindagi bhar gahe gahe milnaa is se pahle ki ye bhi kho jaaein qahqahe kuchh rahe sahe milnaa"

"sustaa rahaa huun main abhi halkaan to nahin ye zindagi hai itni bhi aasaan to nahin ai kaash ittifaaq se mil jaae vo magar is husn-e-ittifaaq kaa imkaan to nahin ai mustaqil udaasi na mujh mein qiyaam kar viraan huun par itnaa bhi viraan to nahin ai dost kaise tujh se main kartaa koi gila apne kiye pe main bhi pashemaan to nahin ik dusre pe marne ke vaade to hain magar ik dusre pe koi bhi qurbaan to nahin"

"nae baras bhi jo melaa lagaayaa jaanaa hai gae dinon ko hi is mein bulaayaa jaanaa hai puraane ghar ko nayaa gar banaayaa jaanaa hai zaruratan use pahle giraayaa jaanaa hai mujhe pata hai ki pahle hansaayaa jaanaa hai aur us ke baad bahut hi rulaayaa jaanaa hai jahaan pe jaanaa mire bas ki baat hai hi nahin main jaantaa huun vahin par bulaayaa jaanaa hai baDe hi shauq se baiThaa huaa huun mahfil mein zarur mujh ko yahaan se uThaayaa jaanaa hai bhaTak rahe hain jo kuchh log aate jaate hue unhein bhi raasta aakhir dikhaayaa jaanaa hai adheD umr ke nisyaan kaa masala hai yahi vo yaad aataa hai jis ko bhulaayaa jaanaa hai"

"ab koi baat mulaaqaat pe mat chhoDiyegaa haal kah dijegaa haalaat pe mat chhoDiyegaa gaate rahiyegaa kaDi dhuup mein bhi naghma-e-ishq ab junun mausam-e-barsaat pe mat chhoDiyegaa chashm-e-hairat mein nami rakhiyegaa vijdaan ki bhi raaz saare hi karaamaat pe mat chhoDiyegaa shahr mein rakhiyegaa kuchh peD lagaane ki jagah ye fariza bhi mazaafaat pe mat chhoDiyegaa yaar jab dhyaan mein aa jaae vahin kijiye raqs jashn ab surat-e-haalaat pe mat chhoDiyegaa be-sabab TuuT bhi jaati hai kabhi baat kahin dost achchhaa ho to is baat pe mat chhoDiyegaa jo bhi honaa hai vo ho kar hi rahegaa 'haidar' yaani dil vahm-o-khayaalaat pe mat chhoDiyegaa"