Ghazal

"dikhaa ke apni hasin aan-baan pal bhar mein vo duur kar gayaa meri thakaan pal bhar mein baghair aag lagaae bhi kuchh hasinon ne jalaa diye hain kai jism-o-jaan pal bhar mein tamaam log isi Dar mein mar rahe hain yahaan bichhaD na jaaein zamin aasmaan pal bhar mein namaaz-e-ishq bhi paDhtaa vo kaash ruk jaataa jo de gayaa mire dil mein azaan pal bhar mein vo be-zabaan thaa lekin ye vaaqia hai 'kanval' sunaa gayaa hai koi daastaan pal bhar mein"

"ghar nahin rahguzar mein rahtaa hai paanv meraa safar mein rahtaa hai vo chalaa jaae to bhi pahron tak us kaa chehra nazar mein rahtaa hai jaa chukaa hai jo bazm-e-hasti se vo bhi divaar-o-dar mein rahtaa hai chaaraagar kaa karam to hai phir bhi dard hi dard sar mein rahtaa hai jis ne tashkil ki hai meri 'kanval' mere qalb-o-jigar mein rahtaa hai"

"pahle ahbaab ki kahaani likh phir har ik lafz ke maaani likh kyon tire apne gham-gusaaron se zakhm-khurda hai zindagaani likh khubiyaan likh sharaab ki lekin ruh-afzaa hai sirf paani likh dekh kar bahr-o-bar ke hangaame koi dilchasp si kahaani likh dil ke sahraa mein garm ashkon se kaise hoti hai baaghbaani likh harf-e-avval se likh ke naam-e-khudaa dil ki takhti pe harf-e-saani likh vasl ki shaam ke varaq pe 'kanval' shaadmaani hi shaadmaani likh"

"daricha ho ki dar uljhaa huaa hai miraa to ghar kaa ghar uljhaa huaa hai badan ke pech-o-kham to jhel lete qayaamat hai ki sar uljhaa huaa baDi sidhi hai chaahat manzilon ki magar zauq-e-safar uljhaa huaa hai na jaane kyaa huaa hai aadmi ko jidhar dekho udhar uljhaa huaa hai 'kanval' kaTtaa hai meraa vaqt jis mein vo daftar beshtar uljhaa huaa hai"

"jis ki buniyaad ho javaani par der lagti hai us kahaani par aaj phir Dubne kaa khadsha hai aaj dariyaa hai phir ravaani par jaane kyaa soch kar havaaon ne likh diyaa naam meraa paani par aks apnaa use bhi achchhaa lagaa khush huaa main bhi naqsh-e-saani par ji bhi thaa us ke saath chalne kaa shak bhi thaa us ki paasbaani par koi sultaan ho sakaa na 'kanval' hukmraan dil ki raajdhaani par"

"vo sitamgar jidhar gayaa hogaa ik zamaana udhar gayaa hogaa aane vaalaa zamin pe aataa thaa jaane vaalaa kidhar gayaa hogaa gaahe-gaahe to khud samundar bhi apni lahron se Dar gayaa hogaa chaaraagar be-sabab nahin rotaa koi bimaar mar gayaa hogaa jis pe gham ki nazar paDi hogi us kaa chehra nikhar gayaa hogaa dil jo bigDaa huaa thaa muddat se choT khaa kar sanvar gayaa hogaa meraa dushman 'kanval' pas-e-parda jo bhi karnaa thaa kar gayaa hogaa"

"faqiraana sadaa khaamosh kyon hai qalandar ki navaa khaamosh kyon hai jise maqsud thaa bas gungunaanaa vahi baad-e-sabaa khaamosh kyon hai sadaaqat kuchh bataa ab mahfilon mein tiraa naghma-saraa khaamosh kyon hai fanaa jab har taraf manDlaa rahi hai to aise mein baqaa khaamosh kyon hai hai mausam lab-kushaai kaa chaman mein shajar gum-sum havaa khaamosh kyon hai diye jab aur saare jal rahe hain mohabbat kaa diyaa khaamosh kyon hai 'kanval' jis shahr mein sab bolte hain vahaan ibn-e-khudaa khaamosh kyon hai"

"anaa ki qaid se aazaad ho kar kyon nahin aataa jo baahar hai vo mere dil ke andar kyon nahin aataa uDaan us ki agar mere hi jaisi hai fazaaon mein to qad us kaa mire qad ke baraabar kyon nahin aataa main pahle shisha-e-dil ko kisi khiDki mein rakh aauun phir us ke baad sochungaa ki patthar kyon nahin aataa chhupaa leti hai duniyaa kis tarah ye zahr barson tak dhuaan jo dil ke andar hai vo baahar kyon nahin aataa koi taqsim kaa maahir agar mil jaae to puchhun ki har qatre ke hisse mein samundar kyon nahin aataa hazaaron aashnaa hote hain lekin aaDe vaqton mein zarurat jis ki hoti hai mayassar kyon nahin aataa 'kanval' fankaar ke baare mein ye bhi ik muamma hai jo ab tak aa chukaa hai us se behtar kyon nahin aataa"

"din mahina saal behtar ho gayaa rafta rafta haal behtar ho gayaa zindagi kaa unchaa nichaa raasta jab huaa paamaal behtar ho gayaa chhu liyaa jis ko nae sayyaad ne vo puraanaa jaal behtar ho gayaa kar liye jis din qubul apne gunaah naama-e-aamaal behtar ho gayaa aa gayaa jab khubsurat haath mein thaa jo bad-tar maal behtar ho gayaa"

"dil-o-dimaagh mein Dhalte rahe savaal bahut ghazab ki aag thi jalte rahe savaal bahut javaab milne ki surat na thi koi lekin har ek lab se nikalte rahe savaal bahut nigaah-e-husn se aayaa na jab javaab koi nigaah-e-'ishq mein palte rahe savaal bahut vo jis ke paas zakhira thaa sab javaabon kaa usi ki bazm mein Talte rahe savaal bahut khudaa ne bakhshi thi mujh ko kamaal ki garmi mire lahu mein pighalte rahe savaal bahut safar tamaam huaa ruk gae qadam phir bhi rah-e-hayaat mein chalte rahe savaal bahut agarche mil gai aakhir kisi samundar mein nadi ke dil mein sulagte rahe savaal bahut usi ke dam se 'kanval' zindagi mein raunaq thi vo jis ke dam se machalte rahe savaal bahut"

"mire nasib mein thi dosto kitaab ghalat kahin savaal ghalat thaa kahin javaab ghalat mire harif ko ehsaas is kaa thaa shaayad huaa thaa mere muqaabil vo kaamyaab ghalat mire gunaah se baDh kar sazaa mili mujh ko likhaa gayaa thaa yaqinan miraa hisaab ghalat qadam qadam pe mujhe sharmsaar honaa paDaa kahin gunaah ghalat thaa kahin savaab ghalat 'ajib silsila thaa zindagi ki raaton kaa kabhi to niind ghalat thi kabhi thaa khvaab ghalat har ek shakhs ne dhoka miri nazar ko diyaa har ek shakhs thaa oDhe hue naqaab ghalat main apni tishna-labi kaa 'ilaaj kyaa kartaa kahin to jaam ghalat thaa kahin sharaab ghalat miri nazar hi 'kanval' raushni se Darti thi na aaftaab ghalat thaa na maahtaab ghalat"

"nigaah-e-dost savaal-o-javaab mat karnaa main be-hisaab huun mujh se hisaab mat karnaa mujhe khudaa ne chhupaayaa hai laakh pardon mein jo ho sake to mujhe be-hijaab mat karnaa naqaab-poshi mein ye dil hai ik dulhan ki tarah kisi jagah bhi ise be-naqaab mat karnaa main zindagi ke safar kaa hasin aadam huun mujhe sanbhaal ke rakhnaa kharaab mat karnaa mujhe sukun milegaa to sirf paani se so meri pyaas ko vaqf-e-sharaab mat karnaa main khud savaal huun apne khamosh honTon par savaal kar ke mujhe laa-javaab mat karnaa ye zindagi hai mukammal har ek chiiz ke saath kisi bhi shai kaa yahaan intikhaab mat karnaa jo kaamyaab hai vo aarzu se khaali hai tire nisaar mujhe kaamyaab mat karnaa baDaa mazaa hai 'kanval' ruuh ko jagaane mein tum apni zaat ko ab mahv-e-khvaab mat karnaa"

"asir-e-aab-o-gil ko ek din aazaad honaa thaa nai duniyaa mein jaanaa thaa vahaan aabaad honaa thaa mohabbat karne vaalo jaa rahe ho ab kahaan marne jahaan dil ko lagaayaa thaa vahin barbaad honaa thaa khushi milti kahaan se jab ba-naam-e-gardish-e-dauraan use naashaad karnaa thaa mujhe naashaad honaa thaa ye apni khush-nasibi thi ki ham pahle chale aae sitam jo us ko Dhaanaa thaa abhi ijaad honaa thaa 'kanval' shahr-e-nigaaraan mein thaa itnaa hosh kab dil ko kahaan rahnaa thaa bandish mein kahaan aazaad honaa thaa"

"ho navishta ye bhi jaise kaatib-e-taqdir kaa kaaghazi hai pairahan har paikar-e-tasvir kaa halqa-e-ahl-e-zabaan mein khush huun main ye dekh kar munfarid lahja hai mere dost ki taqrir kaa taa-abad samjhe na jis ko ibn-e-aadam kaa dimaagh juz koi aisaa na ho yaa-rab tiri tahrir kaa hai tasavvur paas jis ke sair-e-aalam ke liye kyaa asar ho us ke paanv par kisi zanjir kaa dusron ki pagDiyaan bhi chaahtaa hai chhin luun aadmi bhukaa hai kitnaa apni hi tauqir kaa naam tak aayaa nahin jin mein kahin farhaad kaa tazkira hai un kitaabon mein bhi ju-e-shir kaa main ne tan ki raushni ko kam hi puujaa hai 'kanval' main rahaa shaidaa hamesha ruuh ki tanvir kaa"

"shab vahi lekin nazaaraa aur hai raushni kam hai sitaaraa aur hai kashtiyaan to ek jaisi hain tamaam hain alag dariyaa kinaaraa aur hai is taraf lahron kaa manzar hai alag us taraf paani kaa dhaaraa aur hai mushtarak hain manzilein lekin safar hai judaa un kaa hamaaraa aur hai pahle kahte the sanam ko maahtaab ahd-e-nau kaa istiaaraa aur hai ruuh ke dam se hai us ki kaaenaat jism ko kis kaa sahaaraa aur hai ban rahaa hai ab jo dharti pe 'kanval' vo jahaan saare kaa saaraa aur hai"

"mataa-e-hosh luT jaane ke din hain dil-e-naadaan ko samjhaane ke din hain main har mausam mein un se puchhtaa huun kidhar jaaun kidhar jaane ke din hain nayaa-pan sard hotaa rahaa hai puraani aag sulgaane ke din hain bashar ki zindagi ke chaar din bhi kahaan jiine ke mar jaane ke din hain nahin hamvaar raah-e-zindagaani kabhi khone kabhi paane ke din hain javaani bhi kahaan hai ahd-e-ishrat javaani mein bhi gham khaane ke din hain 'kanval' is ghar mein to maktab na kholo jahaan bachchon ke muskaane ke din hain"

"bahr-o-bar mein kalaam us kaa hai zikr us kaa hai naam us kaa hai sab ko detaa hai vo sharaab apni hai jo gardish mein jaam us kaa hai mahv-e-hairat hain dekhne vaale itnaa unchaa maqaam us kaa hai hai vahi harf harf taabinda jis ke andar payaam us kaa hai vo hai ghaaeb magar azal hi se har qadam par nizaam us kaa hai rahguzar us ke qaafile us ke rakhsh bhi tez gaam us kaa hai ham to sab aarzi musaafir hain jaavedaani qiyaam us kaa hai kaar-gaahon mein dast-o-paa us ke un se vaabasta kaam us kaa hai kaaenaat us ki be-karaan hai 'kanval' jis mein sab ehtimaam us kaa hai"

"maah kitne hain saal kitne hain hijr kitne visaal kitne hain bhiiD to bastiyon mein kaafi hai aadmi baa-kamaal kitne hain jang teri baDi tavil sahi maarke be-misaal kitne hain log barson samajh nahin paate un ke shishe mein baal kitne hain jis ki qismat mein hain uruuj bahut dekh ye bhi zavaal kitne hain tu hai khaamosh aur barson se mere dil mein savaal kitne hain kyaa khabar hai 'kanval' mujhe kho kar us ke dil mein malaal kitne hain"

"ajnabi rahguzar ke the hi nahin ham jidhar the udhar ke the hi nahin chhoD kar apnaa ghar kahaan jaate ham kisi aur ghar ke the hi nahin kaise aate vo ham-safar vaapas jo hamaare safar ke the hi nahin jo na aae hamaare daaman mein phal hamaare shajar ke the hi nahin vo nazaare jo ham se duur rahe vo hamaari nazar ke the hi nahin saath chalte kisi ke ham kab tak ham paraai Dagar ke the hi nahin chal diye chhoD kar jo yaar 'kanval' vo hamaare nagar ke the hi nahin"

"jahaan main huun vahaan haalaat kaa manzar nahin badlaa vahi hain chaand taare raat kaa manzar nahin badlaa usi andaaz se girti hai bijli aashiyaane par havaa gustaakh hai barsaat kaa manzar nahin badlaa agar badlaa hai kuchh kuchh jism-o-jaan kaa ruup baahar se vahi hai ruuh meri zaat kaa manzar nahin badlaa hazaaron log ab bhi haath phailaae hain saDkon par hamaare shahr mein khairaat kaa manzar nahin badlaa 'kanval' ik mehrbaan ne di thi jo mujh ko mohabbat mein khudaa kaa shukr us saughaat kaa manzar nahin badlaa"

"tujh se bichhDe bhi to haalaat ne rone na diyaa dil-shikan vaqt ke lamhaat ne rone na diyaa din ko fursat na mili ashk bahaane ki kabhi raat aai to mujhe raat ne rone na diyaa us ki aankhein bhi rahin khushk hamesha ki tarah mujh ko bhi aaj kisi baat ne rone na diyaa ashk maayus savaali ki tarah lauT gae vo milaa bhi to mulaaqaat ne rone na diyaa un ke hisse kaa 'kanval' shahr mein tum hi ro lo jin ko majburi-e-haalaat ne rone na diyaa"

"nae andaaz se didaar kar luun phir chale jaanaa main apni ruuh ko bedaar kar luun phir chale jaanaa hazaaron khvaab dekhe the miri maasum aankhon ne main un kaa sarsari izhaar kar luun phir chale jaanaa havas ne aaj tak jo aish ke paikar banaae hain unhein puuri tarah mismaar kar luun phir chale jaanaa tumhaari diid ke jo muntazir the ek muddat se muzayyan vo dar-o-divaar kar luun phir chale jaanaa vo jin ko thaam kar tum ne mujhe jumbish ataa ki thi main in haathon se tum ko pyaar kar luun phir chale jaanaa vo jis par Thokarein khaa kar 'kanval' se milne aae ho vo rasta shauq kaa hamvaar kar luun phir chale jaanaa"

"zindagi kaa nisaab be-maani us ke haq mein kitaab be-maani haasil-e-tajrabaat khaamoshi sab savaal-o-javaab be-maani khvaab TuuTaa huaa sitaara-e-shab aur taabir-e-khvaab be-maani husn ke be-shumaar jalve hain zahmat-e-intikhaab be-maani vahi bande vahi chalan un kaa naara-e-inqilaab be-maani ik khayaali bahisht ki khaatir fikr-e-roz-e-hisaab be-maani fard ke ehtisaab se pahle qaum kaa ehtisaab be-maani jis ke rukh par hayaa kaa parda ho us ke rukh par naqaab be-maani mauj-dar-mauj ho to baat bhi hai qatra qatra sharaab be-maani kuchh bhi kar le zamin na hogaa kabhi arsh par aaftaab be-maani khaarzaaron mein ghar banaa ke 'kanval' aarzu-e-gulaab be-maani"