Ghazal

"zanjir mein hain dair-o-haram kaun-o-makaan bhi hai ishq hamein un se nahin jin kaa gumaan bhi jo jism ke zarron mein khudaa DhunD rahi hai yusuf ki zulekhaa mein hai vo ruh-e-tapaan bhi is mohr-e-khamoshi mein nihaan ruh-e-takallum is soe hue shahr ki hai apni zabaan bhi har lahr ke siine se lipaTtaa hai miraa dil manjdhaar ke is paar ho saahil kaa nishaan bhi kyon vaqt ki lahrein mujhe le jaaein kisi or daaim dil-e-dariyaa huun main maujon mein ravaan bhi ham ziist ki sarhad pe mile maut se lekin hai dasht-e-talab bhi vahi aur manzil-e-jaan bhi"

"baarhaa ho ke gae abr-e-bahaaraan khaali dasht mein phuul khile aur gulistaan khaali ab to khalvat-e-kada-e-aalam-e-imkaan se nikal ab yahaan koi nahin ishq kaa unvaan khaali phir kisi jannat-e-gum-gashta ko dekhaa us ne jism phir chhoD chalaa jism kaa zindaan khaali vaadi-e-zist mein dil DhunDhtaa hai nuur kaa rang chaar su ghurti hai chashm-e-pareshaan khaali ai sabaa ab tu yahaan koi nayaa phuul khilaa ek muddat se hai daamaan-e-ghazal-khvaan khaali"

"raat phir jaanib-e-sahar aai kitni dushvaar rahguzar aai chaand taaron ke phuul murjhaae jab bhi shabnam ki aankh bhar aai hasraton kaa safed-faam kafan kaun pahne hue kidhar aai kis tamannaa ki chashm-e-aavaara Thokarein khaa ke dar-ba-dar aai aaj rang-e-shafaq ajiib saa thaa dil ki tasvir si utar aai ik zamaana huaa khizaan guzre dil ujaDne ki ab khabar aai kyaa huaa dil ki aabru na rahi zindagi kuchh to raah par aai"

"nazar nazar se mili dil pukaar uThaa ki nahin nahin khabar mujhe us vaqt hosh thaa ki nahin phir aarzuon ki basti mein qaafile aae dar-e-fusun-e-tamannaa abhi khulaa ki nahin nae safar hain nae raah-rau nai raahein nae zamin-o-zamaan ki hai ibtidaa ki nahin tiri talaash mein ham khud se aashnaa na rahe abhi hui hai mohabbat ki intihaa ki nahin tire visaal ke raston mein ham khirad se mile junun ne dil se kahaa hai vahi fazaa ki nahin"

"manzar-e-hosh se aage bhi nazar jaane de jaa rahaa hai ye musaafir to udhar jaane de teri aavaaz ki parvaaz mein hai meraa vajud apni guftaar ke pardon mein bikhar jaane de na koi chashm-e-tamannaa na koi dast-e-duaa zindagi tu mujhe be-laus guzar jaane de tere qaabil bhi nahin tere muqaabil bhi nahin ham-safar saath mujhe apne magar jaane de tu to hai husn-e-azal aur miraa rang-e-ghazal meri aavaaz mein bhi kuchh to asar jaane de mere ashaar mein sadiyon ke talaatum kaa shuur kaash tu un ko zaraa dil mein utar jaane de"

"mausam badal sake na tire intizaar ke ab ke bhi din guzar gae yunhi bahaar ke gham-khez-o-gham-shanaas miri pur-shikoh raat kab aaogi pahaaD saa ye din guzaar ke aayaa huzur-e-yaar se shaair ko ye payaam aae sharaab-o-sher kaa choghaa utaar ke dil mein tire utar na saki meri koi baat likkhe hain laakh sher ghazal ke sanvaar ke ek musht-e-khaak ban ke uDaa dil kaa kaarvaan dasht-e-talab mein ab bhi nishaan hain ghubaar ke"

"kyaa kare haal-e-dil bayaan koi na rahaa zeb-e-daastaan koi phir hai qalb-o-nazar mein yaksui kaash aa jaae naa-gahaan koi aankh shabnam ki dekhti hai kise chaandni mein huaa javaan koi shahr se duur din kaa phuul khilaa dasht mein bhi hai gulsitaan koi dil bhi hamraaz-e-aarzu niklaa ab nahin apnaa raaz-daan koi chhoD dukh-sukh ki manzilon kaa tavaaf dil miyaan DhunD aastaan koi duur apnon se ho rahe hain log dekhiye kab mile kahaan koi"

"ahd-e-ghazab hai shor bahut qil-o-qaal kaa ye daur hai bahaa-e-adab ke zavaal kaa ghaaron mein chhup ke so raho ai sakinaan-e-dil sadiyon talak na aaegaa jhonkaa khayaal kaa viraan apne haath se ki kaar-gaah-e-zist zarre se khuub kaam liyaa hai kamaal kaa aae the is zamin pe jaaeinge ab kahaan degaa javaab kaun hamein is savaal kaa ye sai-e-raaegaan to na thi apni justuju ai zul-jalaal ham ko dikhaa rukh jamaal kaa baiThe hain sau baras se tire intizaar mein aao bhi ab to faasla hai ek saal kaa"

"jism jab maail-e-parvaaz-e-digar hotaa hai manzil-e-shauq ko phir meraa safar hotaa hai saahil-e-hosh pe hai dard ki divaar aziim aankh jhapkaao to divaar mein dar hotaa hai dil samajhtaa hai ki lo aa gai manzil apni qaafila yaad ki vaadi mein magar hotaa hai dil ne is vaadi-e-viraan ko kyon apnaayaa aisi sunsaan jagah bhi koi ghar hotaa hai kaun jaane ki yahaan vo kabhi milne aae kaun jaane ki yahaan us kaa guzar hotaa hai"

"laakh kartaa rahe tavaaf-e-haram dil ba-dastur hai khud ek sanam jin rafiqon ke gham ko apnaayaa vo bhi aae baraa-e-pursish-e-gham zulmat-e-shab ki aankh kaa taaraa meraa dil jis pe din ke laakh sitam raushni ki ramaq nahin dil mein tere maathe ki chaandni ki qasam muntashir ho rahaa hai zauq-e-nazar rifat-e-aarzu kahaan hain ham"

"patte nahin kahin hari shaakh-e-shajar nahin is shahr mein bahaar ki koi khabar nahin rang-e-khizaan mein laakh milaaun dilon ke rang mauj-e-sharaab-o-sher mein koi asar nahin Duube paDe hain qulzum-e-khvaab-o-khayaal mein mauj-e-ravaan kahaan hai kisi ko khabar nahin dariyaa mein mauj ban ke kahaan tak rahe koi mauj-e-ravaan ba-surat-e-divaar-o-dar nahin ab manzil-e-vajud nahin dil ki kaaenaat is ghar mein ek main huun koi baam par nahin tu raahat-e-vajud hai tu ruh-e-kaaenaat is ghar mein tu nahin hai to ye meraa ghar nahin dasht-e-talab hai khatm yahaan naaqa-e-nigaah ye vo zamin hai jis mein tumhaaraa guzar nahin"

"dekhaa nahin vo aadmi tanhaa kahun jise vo aaj tak milaa nahin apnaa kahun jise sadiyon se intizaar hai us ek shakhs kaa aae ho kitni der se itnaa kahun jise nazrein taras ke rah gaiin taa-aks-e-aabshaar dekhaa nahin hai paani kaa qatra kahun jise kaun-o-makaan mein maujzan hai teri aagahi ik lamha bhi milaa nahin teraa kahun jise dariyaa huun mauj ban ke ravaan huun tiri taraf us paar koi ghar bhi hai apnaa kahun jise afsun-e-intizaar tamannaa kaa naam hai husn-e-talab mein aarzu goyaa kahun jise"

"kyaa kare qaidi-e-zindaan-e-khayaal taab-e-aavaaz-e-salaasil na rahi jab tiri yaad ne ghar chhoD diyaa justuju ki koi manzil na rahi bujh gayaa shahr gae raat ke log ik ramaq thi sar-e-mahfil na rahi ham tire saath rahe paas rahe teri qurbat hamein haasil na rahi ab tiraa gham bhi tujhe saunp diyaa ab koi baat bhi mushkil na rahi ab tiri yaad mein ji lagtaa hai zindagi jab kisi qaabil na rahi"

"apne ghar se mere ghar tak kuchh lamhon mein aaegaa itni masaafat mein logon ko kitne rang dikhaaegaa dhuup thi sarson ki kyaari mein donon mil kar soe the ye manzar bhi saath hamaare dar dar Thokar khaaegaa phir vo shaair raat gae us shahr mein tanhaa phirtaa hai us ko kahnaa sabr kare milne kaa mausam aaegaa saari raat vo saath rahe saae ki tarah ham se duur ham bhi saath lage rahte hain kabhi to mil hi jaaegaa raat ki kaali chaadar le kar din bhar soe rahte hain dekhein kab vo suraj ban kar hamein jagaane aaegaa"