Ghazal

"tahzibi aqdaar se mahkaa basta pichhe chhuT gayaa jaane kis vahshat mein ghar kaa rasta pichhe chhuT gayaa bachche meri ungli thaame dhire dhire chalte the phir vo aage dauD gae main tanhaa pichhe chhuT gayaa 'ahd-e-javaani ro-ro kaaTaa 'mir' miyaan saa haal huaa lekin un ke aage apnaa qissa pichhe chhuT gayaa pichhe muD kar dekhegaa to aage baDhnaa mushkil hai main ne kitni baar kahaa thaa dekhaa pichhe chhuT gayaa ik do baatein kahni hon to kahnaa sunnaa aasaan hai ab ham tum ko kyaa batlaaein kyaa kyaa pichhe chhuT gayaa sar-taa-paa sairaab the 'khaalid' chaaron jaanib dariyaa thaa pyaas mein jis dam shiddat aai dariyaa pichhe chhuT gayaa"

"khataa gayaa jo nishaana kamaan badaltaa hai nahin tamiz-e-rihaaish makaan badaltaa hai kahaani ye thi ki sab saath mil ke rahte hain phir is ke baad achaanak samaan badaltaa hai ham us ki raah mein aankhein bichhaa ke dekh chuke magar vo jaan kaa dushman kahaan badaltaa hai amir-e-shahr tanavvo-pasand hai 'khaalid' libaas-e-nau ke mutaabiq zabaan badaltaa hai"

"rang-o-raamish zamzame gul-haa-e-tar hote hue dil akelaa aur itne ham-safar hote hue aansuon se sard ho jaati hai har siine ki aag meraa dil aatish-kada hai chashm-tar hote hue dil ki duniyaa mein andheraa ho to kuchh raushan nahin aankh chashm-e-sang hai shams o qamar hote hue chashm aage ek chehra paanv go chakkar mein hain dar-ba-dar hotaa nahin dil dar-ba-dar hote hue hausla TuuTaa to vo ibrat kaa manzar aa gayaa uD nahin paayaa parinda baal-o-par hote hue nisf duniyaa bhuuk se aur pyaas se maghlub hai dast o baazu zehn o dil laal-o-gohar hote hue har kas-o-naa-kas pe kar letaa hai fauran e'tibaar be-khabar kitnaa hai 'khaalid' baa-khabar hote hue"

"raasta pur-khaar dilli duur hai sach kahaa hai yaar dilli duur hai kaam dilli ke sivaa hote nahin aur naa-hanjaar dilli duur hai ab kisi jaa bhi sukun miltaa nahin aasmaan qahhaar dilli duur hai phunk detaa hai har ik ke kaan mein subh kaa akhbaar dilli duur hai kal talak kahte hain dilli duur thi aaj bhi sarkaar dilli duur hai subh guzri shaam hone aai miir tez kar raftaar dilli duur hai kaun dilli se masihaa laaegaa ai dil-e-bimaar dilli duur hai"

"jo suraj ho to har manzar ujaalaa kyuun nahin karte ye aaThon pahr ki raatein saveraa kyuun nahin karte taajjub hai mujhi ko apni mahfil mein nahin dekhaa nahin dekhaa agar tum ne to dekhaa kyuun nahin karte churaataa hai vo pahle niind phir shokhi se kahtaa hai ye shab bhar jaagte rahte ho soyaa kyuun nahin karte hisaab-e-dostaan ai dil khayaal-e-nek hai lekin tumhaare paas bhi dil hai tum aisaa kyuun nahin karte mire bhaai agar tairaak bannaa chaahte ho tum to dariyaa ke kinaare se kinaara kyuun nahin karte uThaa kar roz le jaataa hai mere khvaab kaa manzar vo mujh se roz kahtaa hai bharosa kyuun nahin karte to din ko ishq ki baatein samajh hi mein nahin aaein samajh hi mein nahin aaiin to samjhaa kyuun nahin karte dilon kaa qarz raqmon se adaa hotaa nahin 'khaalid' bahut aasaan hai ye kahnaa taqaazaa nahin karte"

"shaayad ki mar gayaa mire andar kaa aadmi aankhein dikhaa rahaa hai baraabar kaa aadmi suraj sitaare koh o samundar falak zamin sab ek kar chukaa hai ye gaz bhar kaa aadmi aavaaz aai pichhe palaT kar to dekhiye pichhe palaT ke dekhaa to patthar kaa aadmi is ghar kaa telephone abhi jaag jaaegaa saahab ko le ke chal diyaa daftar kaa aadmi zarre se kam-bisaat pe suraj-nigaahiyaan 'khaalid' bhi apnaa hai to muqaddar kaa aadmi"

"jhapaTte hain jhapaTne ke liye parvaaz karte hain kabutar bhi vahi karne lage jo baaz karte hain vahi qisse vahi baatein ki jo ghammaaz karte hain tire hamraaz karte hain mire dam-saaz karte hain ba-sad hiile bahaane zulm kaa dar baaz karte hain vahi jaan-baaz jin par har ghaDi ham naaz karte hain ziyaada dekhte hain jab vo aankhein pher lete hain nazar mein rakh rahe hon to nazar-andaaz karte hain sataaish-ghar ke pankhon se havaa to kam hi aati hai magar chalte hain jab zaalim bahut aavaaz karte hain zamaane bhar ko apnaa raaz-daan karne ki Thahri hai to behtar hai chalo us shokh ko hamraaz karte hain Daraataa hai bahut anjaam-e-namrudi mujhe 'khaalid' khudaa lahje mein jab bande sukhan aaghaaz karte hain"

"hunar-mandi se jiine kaa hunar ab tak nahin aayaa safar karte rahe tarz-e-safar ab tak nahin aayaa ghalat hai tere ashkon mein asar ab tak nahin aayaa tujhe ronaa ai meri chashm-e-tar ab tak nahin aayaa hazaaron falsafi qabza kiye baiThe hain zehnon par mire qaabu mein yaa-rab meraa sar ab tak nahin aayaa paDaa rahtaa hai har dam khauf kaa saaya rag-e-jaan par koi be-khauf lamha be-khatar ab tak nahin aayaa hamaare sar pe hai saaya-fagan ummid kaa suraj hamaari raah mein koi shajar ab tak nahin aayaa hamein to qaafiya-paimaai karnaa bhi nahin aataa baDaa fan hai jo aa jaataa magar ab tak nahin aayaa vo kahte hain duaaein baa-asar hoti hain 'khaalid' ki main kahtaa huun koi zer-e-asar ab tak nahin aayaa"

"ThanDi ThanDi narm havaa kaa jhonkaa pichhe chhuT gayaa jaane kis vahshat mein ghar kaa rasta pichhe chhuT gayaa bachche meri ungli thaame dhire dhire chalte the phir vo aage dauD gae main tanhaa pichhe chhuT gayaa ahd-e-javaani ro ro kaaTaa 'mir'-miyaan saa haal huaa lekin un ke aage apnaa qissa pichhe chhuT gayaa pichhe muD kar dekhegaa to aage baDhnaa mushkil hai main ne kitni baar kahaa thaa dekhaa? pichhe chhuT gayaa sar-taa-paa sailaab the 'khaalid' chaaron jaanib dariyaa thaa pyaas mein jis din shiddat aai dariyaa pichhe chhuT gayaa"

"muqaabla ho to siine pe vaar kartaa hai vo dushmani bhi baDi pur-vaqaar kartaa hai jo ho sake to use mujh se duur hi rakhiye vo shakhs mujh pe baDaa e'tibaar kartaa hai nagar mein us ki bahut dushmani ke charche hain magar vo pyaar bhi divaana-vaar kartaa hai main jis khayaal se daaman-kashida rahtaa huun vahi khayaal miraa intizaar kartaa hai shikaayatein use jab doston se hoti hai to doston mein hamein bhi shumaar kartaa hai"

"har kamand-e-havas se baahar hai taair-e-jaan qafas se baahar hai maut kaa ek din muayyan hai zindagi dastaras se baahar hai qaafile mein ham us maqaam pe hain jo sadaa-e-jaras se baahar hai koi shai ghar ki khush nahin aati vo baras do baras se baahar hai"

"baraae tishna-lab paani nahin hai samundar kaa koi saani nahin hai hamaaraa ghar bhi sahraa ho gayaa hai magar 'ghaalib' si viraani nahin hai ragon mein khuun shokhi kar rahaa hai sitaara si vo peshaani nahin hai main apne ghar ke andar chain se huun kisi shai ki faraavaani nahin hai nizaam-e-jism jamhuri hai 'khaalid' kisi jazbe ki sultaani nahin hai"

"nahin hai agar un mein baarish havaa uThaa baadalon ki numaaish havaa gahe barf hai gaah aatish havaa tujhe kyuun hai dilli se ranjish havaa main gunjaan shahron kaa maaraa huaa navaazish navaazish navaazish havaa tire saath chalne ki aadat nahin hamaari na kar aazmaaish havaa shikasta safina musaafir niDhaal talaatum shab-e-taar baarish havaa ab ashk o tapish chashm o dil mein nahin the yakjaa kabhi aab o aatish havaa"

"jahaan-daar pe vaar chalne lagaa ghulaamon kaa darbaar chalne lagaa azal se kisi shai mein gardish na thi chalaa main to sansaar chalne lagaa khudaa rakkhe america-o-rus ko miyaan apnaa akhbaar chalne lagaa tabassum takallum javaan ho gae mubaarak ho ghar-baar chalne lagaa abhi dhuup 'khaalid' pe aai na thi ki divaar divaar chalne lagaa"

"yahaan se hai kahaani raat vaali ki vo ik raat thi barsaat vaali kahaa thaa jo vahi kar ke dikhaayaa vo barq-e-be-amaan thi baat vaali baDi lambi planning kar rahi hai hamaari zindagi lamhaat vaali kisi ki bhi nahin hoti ye duniyaa ki is ki zaat hai bad-zaat vaali hamaaraa hausla hai zindagi se laDe jaate hain kushti maat vaali na ab ghar mein vo tahzibi tavaazun na ab vo koThari jinnaat vaali jise dekho chhupaa phirtaa hai 'khaalid' jamaaat aa gai mevaat vaali"

"vaqt-e-qayaam dast-e-qazaa ne nahin diyaa chalne lage to saath havaa ne nahin diyaa pahle hi marhale mein qalam ho ke rah gae dast-e-hunar ko haath dikhaane nahin diyaa girnaa to kyaa buraa thaa magar us ko kyaa kahein jo gir gayaa to uThne uThaane nahin diyaa ab un ki kaj-ravi se shikaayaat hain hamein ham ne hi un ko raah pe aane nahin diyaa do chaar kaarein koThiyaan das biis laakh bas is se ziyaada khauf-e-khudaa ne nahin diyaa main sirf telephone kaa ehsaanmand huun un kaa payaam baad-e-sabaa ne nahin diyaa us yaar-e-shokh-chashm se 'khaalid' kaa irtibaat ik raaz thaa ki jis ko chhupaane nahin diyaa"

"aankhon mein dhuup dil mein haraarat lahu ki thi aatish javaan thaa to qayaamat lahu ki thi zakhmi huaa badan to vatan yaad aa gayaa apni girah mein ek rivaayat lahu ki thi khanjar chalaa ke mujh pe bahut gham-zada huaa bhaai ke har suluk mein shiddat lahu ki thi koh-e-giraan ke saamne teshe ki kyaa bisaat ahd-e-junun mein saari sharaarat lahu ki thi rukhsaar o chashm-o-lab gul o sahbaa shafaq hinaa duniyaa-e-rang-o-bu mein tijaarat lahu ki thi 'khaalid' har ek gham mein baraabar sharik thaa saare jahaan ke biich rifaaqat lahu ki thi"