Ghazal

"na tahriri shavaahid na zabaani bhalaa kis kaam ki aisi javaani ye jitni neamatein di hain khudaa ne ye parcha hai hamaaraa imtihaani kabhi vo bhi the is duniyaa ki raunaq vo sab jo ho gae hain aan-jahaani hamein thaa ishtiyaaq-e-vasl lekin hamaare shauq se un ko giraani ye kyaa zehnon pe karte ho hukumat karo dil par kisi ke hukmaraani udhar kirdaar par taari kuhulat magar baaton mein shiddat ki ravaani mohabbat pesh-qadmi chaahti hai kabhi tum bhi mire ghar aao jaani muqaabil fauj tufaanon ki 'aaqib' idhar kashti hamaari baadbaani"

"puraane ghar kaa jo sidhaa saa ek naqsha the ye log vo hain jo pahle kabhi farishta the tumhaare husn-e-nazar ne banaa diyaa manzil kabhi na jis pe chalaa koi ham vo rasta the dayaar-e-dushman-e-jaan se bahut sahaaraa milaa tumhaare shahr se nikle to dil shikasta the baDe maze mein rahe maslahat ke shahzaade jo sach ki raah mein the un ke haal khasta the tumhein bulandi-e-qaamat pe thaa ghurur magar the vo to zarf mein aalaa jo qad mein pasta the jo ishtihaar bane phir rahe the ghairat kaa amir-e-shahr ke aage vo dast-basta the yahi hain hazrat-e-'aaqib' jo paarsaa hain bahut yahi to baais-e-afsaana-e-guzishta the"

"darmiyaan apne ab vo baat nahin pahle jaise muaamlaat nahin saari mahfil pe hai nazar teri meri jaanib hi iltifaat nahin ishq laahaq huaa to ho hi gayaa is musibat se ab najaat nahin ahl-e-majlis salaamti tum par guftugu meri mujh se baat nahin ai khudaa main to bas yahi samjhaa main nahin to ye kaaenaat nahin aadmi ki ajiib fitrat hai rishte hain aur ta'alluqaat nahin jaane kis ki duaa mein huun shaamil aaj raahon mein mushkilaat nahin hai to hai tang raah-e-umr-e-hayaat laakh kahiye ki pul-siraat nahin dastakein de ke thak gayaa 'aaqib' ab ye dil shahr-e-mumkinaat nahin"

"tum ko dekhaa vo khvaab thaa jaani niind kaa ik naqaab thaa jaani ishq ko tum gunaah samajhte rahe ye to kaar-e-savaab thaa jaani har shikan mein ibaaratein muzmar us kaa chehra kitaab thaa jaani chhoD kar tum chale gae mujh ko faisla vo kharaab thaa jaani zindagi ki ghuTan are tauba saans lenaa azaab thaa jaani fitratan tum bhi the anaa ke ghulaam main bhi taban navaab thaa jaani tum mujhe chaaho main tumhein chaahun sidhaa saada hisaab thaa jaani"

"beTaa jo honhaar thaa zan ke asar mein hai kis ki nazar kaa nuur thaa kis ki nazar mein hai nazrein to thak ke aa gaiin apne madaar par aur ik khayaal-e-yaar ki ab tak safar mein hai parvaaz kaa khayaal use kar degaa muntashir barson hue jo gard jami baal-o-par mein hai chaltaa nahin hai mujh ko pata kab main bik gayaa khubi kamaal ki ye mire raahbar mein hai sadhaa fareb jis ki ibaadat mein zam hue us shakhs kaa shumaar to ahl-e-hunar mein hai"

"dukh dard gham hain teri inaayaat zindagi tu ne nibhaain khuub rivaayaat zindagi ik tu niyaaz-mand saraapaa main be-niyaaz milte nahin hain apne khayaalaat zindagi fitrat mein aadmi ke taghayyur nahin magar insaan ko badalte hain haalaat zindagi milte rahe hain saare zamaane se umr bhar tujh se na jaane kab ho mulaaqaat zindagi donon ke biich koi taalluq nahin hai khaas jiinaa hai aur chiiz alag baat zindagi aaraam se guzaarti kuchh din hayaat ke sunti kabhi jo tu bhi miri baat zindagi hai mustaaar taar-e-nafas se tiraa vajud is se ziyaada kyaa tiri auqaat zindagi saanson ke vaaste kare dast-e-talab daraaz har roz mujh se maange hai khairaat zindagi auron ke vaaste hai mujassam takallufaat 'aaqib' tire liye hai khuraafaat zindagi"

"kis ke dil mein bastaa huun aksar sochaa kartaa huun sath ke niche kuchh bhi nahin kahne ko main dariyaa huun khud ko kabhi main paa na sakaa jaane kitnaa gahraa huun aaj bhi shaayad tu aae khvaab sajaae baiThaa huun rah kar arse tak be-aab moti ban kar chamkaa huun jaag rahaa hai divaana aur main soyaa rahtaa huun"

"tire dayaar se jins-e-muhaal le aae javaab laane gae aur savaal le aae bahut se log koi tujh saa DhunDne nikle majaal kis ki jo teri misaal le aae shikaari dekhtaa hi rah gayaa ba-hairaani parinde mil ke uDe aur jaal le aae visaal hijr siyaasat masaail-e-duniyaa ghazal mein ham bhi ye kyaa kyaa khayaal le aae sitam-zarifi hai mushkil pasand logon ki darakht kaaT na paae to chhaal le aae rulaa rulaa diyaa yaaron ne aaj phir 'aaqib' gham-e-firaaq mein zikr-e-visaal le aae"

"paas mazhab kaa ho yaa bharam zaat kaa aadmi hai ghulaam apni aadaat kaa dam nikal jaaegaa ab javaabaat kaa silsila chal paDaa hai savaalaat kaa ghar ki divaarein to ho chukin nam magar jaane ab kyaa iraada hai barsaat kaa laakh baatein sunaati hai duniyaa hamein kyaa buraa maannaa teri ik baat kaa do ghaDi mujh se ruThaa hai meraa shuur silsila munqataa hai khayaalaat kaa jab madaari ne chaahaa hanse ro diye ham bhi samjhe nahin khel jazbaat kaa aae baiThe chale baat kuchh ki nahin faaeda kyaa hai aisi mulaaqaat kaa kaise badlegi taqdir 'aaqib' miyaan shikva karte rahoge jo haalaat kaa"

"na satar satar mein talaash kar na ibaaraton mein talaash kar jo hamaari tarah faqir hain unhein haashiyon mein talaash kar jinhein bhulnaa tiraa mashghala unhein silsilon mein talaash kar kabhi faaslon se gurez kar kabhi qurbaton mein talaash kar mujhe naa-pasand qiyaam-e-dil main qaraar-e-jaan ke khilaaf huun mujhe gardishon kaa junun hai mujhe raaston mein talaash kar mire shauq se tiri justuju kaa mukaalima hai ye dam-ba-dam miraa shukr tere qarib hai mujhe neamaton mein talaash kar unhein khud se thoDaa qarib kar jo azaab-e-jaan kaa shikaar hain jo shikast dil ke mariz hain unhein raabton mein talaash kar na vo raunaqein shab-o-roz mein na vo razm mein na vo bazm mein vo jo be-bahaa hai mataa-e-dil use ratjagon mein talaash kar vo jo 'aaqib'-e-tarab-aashnaa thaa khudi mein apni huaa hai gum tujhe justuju hai usi ki to use aashiqon mein talaash kar"

"pakDi na thi kitaab ki ustaad ho gae haath aa gai ghulail to sayyaad ho gae le ham ne khol di hain ye aankhein shuur ki le ham tire fareb se aazaad ho gae tu ne ai zindagi jo sikhaae hamein sabaq aasaani se hamein vo sabaq yaad ho gae duniyaa se Dar gae jo vo duniyaa mein gum hue karte rahe jo ishq vo farhaad ho gae yaadein tiri hamein liye pahunchi thiin jis jagah ham phir usi jazire pe aabaad ho gae maslub ho gae jinhein matlab thaa ishq se daulat ki thi talab jinhein shaddaad ho gae yaani ki ishq chhoD ke sab kuchh kiyaa gayaa kyaa kyaa tariqe ishq ke ijaad ho gae taamir yuun hue the ki hairaan the mahal ujDe bhi yuun ki surat-e-baghdaad ho gae tum ko bhulaa na paaegi taarikh ab kabhi 'aaqib' tum ab havaala-e-buniyaad ho gae"

"mahfil-e-zist bhi saji hai abhi haisiyat dil ki markazi hai abhi ik tamanna bujhi bujhi hai abhi ek khvaahish dabi dabi hai abhi aur thoDe mizaaj mil jaaein ye mulaaqaat sarsari hai abhi tere chehre pe maslahat raushan teraa lahja bhi makhmali hai abhi jhuuT kaa phaT paDegaa ghubbaara is mein kaafi havaa bhari hai abhi vo jo majburiyon se gundhi gai vo hansi mez par rakhi hai abhi kuchh to andaaza ho gayaa qaaem tajziya garche sarsari hai abhi dauDtaa hai ragon mein khuun 'aaqib' aur ravaan saanson ki nadi hai abhi"

"kuchh silsile falak ke paDe hain ujaaD se rishte bane hue hain zamin ke pahaaD se be-jurm be-gunaah asiron ki khair ho aati hain dam-ba-dam ye sadaaein tihaaD se badnaam hotaa hai vo jo aage dikhaai de jalva dikhaataa aur hi koi hai aaD se tum to chale gae miri duniyaa ko chhoD kar lag kar khaDaa hai kaun ye dil ke kivaaD se aandhi chale kabhi to salaamat rahoge naa paude ne sar uThaa ke ye puchhaa hai jhaaD se be-faiz sar-bulandi ke qaail nahin hain ham miltaa nahin hai saaya musaafir ko taaD se kitne ajiib log hain 'aaqib' tumhaare saath hiron se bair ishq hai jin ko kabaaD se"

"zindagi mere khilaaf aaj bhi aisi hai ki bas saans letaa huun to har saans pe kahti hai ki bas kashtiyaan thiin kai aur ham ki musaafir tanhaa kashtiyaan khete hue umr vo guzri hai ki bas ek majbur ke ashkon mein hain tufaan kitne aur honTon mein dabi us ke vo siski hai ki bas sakht dil itnaa ki dil us kaa pasije na kabhi aur zabaan us ki zabaan itni bhi miThi hai ki bas vo thakan hai ki bas ab niind hi aa jaae mujhe sard mausam mire atraaf vo khunki hai ki bas vo jo ehsaas ki baarish thi muallaq kuchh roz ab vo barsi bhi to is tarah se barsi hai ki bas"

"shuaa-e-ishq-o-mohabbat ke jhilmilaane tak charaagh jalte raheinge tumhaare aane tak ye raasta hi sahi is ki khaasiyat ye hai pahunch rahaa hai tumhaare nigaar-khaane tak tujhe har ek ghaDi yaad karne se le kar hai ik tavil masaafat tujhe bhulaane tak na jaane kis ki nazar ne kiyaa hai ishq ravaan ye dariyaa suukh chukaa thaa kabhi dahaane tak vo chaand thaa ki na haath aa sakaa kisi surat chakor phirtaa rahaa pichhe ik zamaane tak vo aasmaan ki bulandi tak aate bhi kaise rasaai fikr ki jin ki thi aab-o-daane tak na jaane faasle kitne sameT kar 'aaqib' ham apne daur se pahunche tire zamaane tak use samajhne mein kitne hi pech hon 'aaqib' ye naqsha vo hai jo le jaaegaa khazaane tak"

"khaana-e-dil ki moattar bhi bahut lagtaa hai teri yaadon se munavvar bhi bahut lagtaa hai garche halkaa saa dhundlakaa hai tasavvur bhi tiraa band aankhon ko ye manzar bhi bahut lagtaa hai sochte hain ki jiyeinge tujhe ji bhar ke magar zindagi tujh se hamein Dar bhi bahut lagtaa hai puchh ham se ki haqiqat mein hai kyaa teraa vajud tere shaanon pe ye ik sar bhi bahut lagtaa hai farq kuchh bhi nahin ehsaas-e-tashakhkhus ke sivaa darmiyaan apne ye antar bhi bahut lagtaa hai ham qanaaat pe guzar karte hain 'aaqib' ham ko kachchi divaaron kaa ik ghar bhi bahut lagtaa hai"

"ham ishq ko faqat ik tajraba samajhte hain ise radif nahin qaafiya samajhte hain jo baat ham kisi mahfil mein yuun hi bol aae bahut se log use falsafa samajhte hain likhe hain apne muqaddar mein itne ishq ki log hamaare sheron ko sab ishqiya samajhte hain muaamlaat ki tafhim bhi zaruri hai bas itni baat to ham shartiya samajhte hain ghamon ke biich jo dil naam kaa jazira hai ham us jazire kaa jughraafiya samajhte hain na mukhlisaana ravayya na vaalihaana suluk ham aise milne ko ik haadisa samajhte hain ab apne biich kahaan aise log hain 'aaqib' jo sirf baat nahin nazriya samajhte hain"

"kitnaa lambaa tiraa safar dariyaa is ko kar thoDaa mukhtasar dariyaa is zamin par hai be-ghari qismat mar ke ban jaae apnaa ghar dariyaa mil gayaa jaa ke ab samundar se vaah tu ho gayaa amar dariyaa baandh kar bandh tujh ko rok liyaa maarka ho gayaa hai sar dariyaa beach apne jo ho gai haail is bulandi se ab utar dariyaa teraa sailaab sang-dil hai bahut is ghamanDi ke par katar dariyaa kuchh nasheb-o-faraaz laazim hain sidhe sidhe na kar safar dariyaa chashm-e-'aaqib' mein aa ke Thahr zaraa yuun na phir ab bhi dar-ba-dar dariyaa"

"khoe hue palon ki koi baat bhi to ho vo mil gayaa hai us se mulaaqaat bhi to ho barbaad main huaa to ye bolaa amir-e-shahr coffē nahin hai itnaa, fanaa zaat bhi to ho duniyaa ki mujh pe laakh navaazish sahi magar mary taraqqiyon mein tiraa haat bhi to ho milti hain gor yaan to sar-e-raah bhi magar panghaT ho gaagari ho vo dehaat bhi to ho haare to laaziman use koi panaah de ham se laDe jo us ki ye auqaat bhi to ho kaTti hai shab visaal ki palkein jhapakte hi jis ki subh na ho kabhi vo raat bhi to ho lafzon ke her-pher se banti nahin ghazal sheron mein thoDi garmi-e-jazbaat bhi to ho"

"daanaaiyaan aTak gaiin lafzon ke jaal mein itne javaab gum hain mire ik savaal mein dariyaa bas ik qadam kabhi saahil ki samt aa dekhungaa zor kitnaa hai tere ubaal mein ki ehtiyaat laakh magar haal ye huaa aanaa thaa jin ko aa hi gae teri chaal mein ji chaahtaa hai tark-e-mohabbat ko baar baar aataa hai ek aisaa bhi lamha visaal mein ab kyaa usul-e-dasht-navardi ki baat ho uljhe paDe hain paanv shikaari ke jaal mein"

"paakizgi nahin hai ridaaon mein in dinon maasumiyat rahi na adaaon mein in dinon raas aa gai hasinon ko shahron ki raushni mausam bahut udaas hai gaanv mein in dinon ashaab-e-kahf ki tarah jo nek log hain gosha-nashin hain vo guphaaon mein in dinon shaffaaf raaston se to lipTi hui hai dhund chhaayaa huaa dhuaan hai fazaaon mein in dinon us ki chubhan se maut hi behtar hai ham-nashin kaanTaa chubhaa hai jo mire paanv mein in dinon puna hai bambai hai safar hai qayaam hai chakkar bandhaa hai ik mire paanv mein in dinon 'aaqib' bujhaa bujhaa saa tu lagtaa hai gar to kyaa suraj chhupaa huaa hai ghaTaaon mein in dinon 'aaqib' tire khulus kaa hai moajiza ki log karte hain yaad tujh ko duaaon mein in dinon"

"tumhaare chehre ki jo chamak hai ye saat rangon ki ik dhanak hai tumhaari chuDi ki jaise chhan-chhan tumhaare lahje mein vo khanak hai subuk-ravi jaise bahtaa paani tumhaare chalne mein vo lachak hai ghazaal si hain ye tumhaari aankhein hayaa bhi jin mein palak palak hai jahaan rakho tum qadam zamin vo mire liye to hasin falak hai agarche baatein tumhaari shirin zaraa saa lafzon mein bas namak hai tumhein mohabbat agar hai mujh se qubul karne mein kyon jhijak hai ravaan-davaan hai tumhaari jaanib mire iraadon ki jo saDak hai ye kaifiyat hai jo donon jaanib ye shoala-e-ishq ki lapak hai hai ishq ke naam se jo maaruf ye tajraba apnaa mushtarak hai hai biich apne agarche duuri magar ye duuri visaal tak hai ghazal miri tum jo paDh rahi ho vo shiddat-e-hijr ki kasak hai"

"tumhaare saath ye jhuTe faqir rahte hain hamaare saath to munkir-nakir rahte hain hamaari kam-nazari se jo ho gae mahdud unhi mazaaron mein raushan zamir rahte hain rivaayaton ke taassur kaa apnaa jaadu hai kahin kahin miri ghazlon mein 'mir' rahte hain bahut udaas hain divaarein unche mahlon ki ye vo khanDar hain ki jin mein amiir rahte hain har ik fasaad zarurat hai ab siyaasat ki har ik ghoTaale ke pichhe vazir rahte hain"

"jin ki aankhon mein tire khvaab huaa karte hain vo tiri diid se sairaab huaa karte hain niind bhi laazmi hai dida-e-hairat ke liye khvaab yuun hi to nahin khvaab huaa karte hain kuchh ki aankhon mein bhi jal uThte hain hasrat ke charaagh aur kuchh chehre bhi mahtaab huaa karte hain kuchh takalluf bhi zaruri hai mohabbat ke liye kuchh mohabbat ke bhi aadaab huaa karte hain ishq khaataa hai qasam jin ki vo aashiq hain ham yaani ham jaise to kamyaab huaa karte hain chaahte hain jo tujhe un ki mohabbat 'aaqib' tujh se mansub jo alqaab huaa karte hain"