Ghazal

"talaash dariyaa ki thi ba-zaahir saraab dekhaa vo kaun aankhein thiin jin ki khaatir ye khvaab dekhaa jo rut bhi aae hamin se girya kaa rizq maange hamaari surat kise zamin intikhaab dekhaa nadaamatein bahte aansuon se sharh na paaein safina apni duaa kaa maqtal rikaab dekhaa barasti aankhon se sukhe taalaab bhar na paaein ye gham kaa dariyaa misaal-e-qarz-e-sahaab dekhaa kabhi to aankhon mein un ki aabaadiyaan khileingi vo bastiyaan umr bhar jinhein zer-e-aab dekhaa abhi to bakhiya-gari ko sozan hi kaam aae hinaa ki dahliz pe tulu-e-hijaab dekhaa yaqin ki tishna-labi muqaddar raqam rahegi vufur-e-dariyaa bhi misl-e-dariyaa-e-khvaab dekhaa jataa gayaa saari aadatein bas gale se lag ke us ek anjum ko chaandni ke hisaab dekhaa khayaal us ke badan ki galiyon ko DhunDtaa hai vo jis ko dekhaa to hairaton ko naqaab dekhaa"

"main tasht-e-khvaab liye haath mein guzar gai huun samajh sakaa na vo jis ke liye main ghar gai huun bahut ajab thi samundar se guftugu lekin pahan ke pyaas palaTne kaa sabr kar gai huun miraa mizaaj rahaa dasht-aashnaa shab bhar ki din mein bastiyaan dekhin to jaise Dar gai huun husul-e-khvaahish-e-naayaab garche naa-mumkin kisi ke vaada-e-be-aab pe Thahar gai huun bahut nihaal hai dil aankh mein hai sarmasti lage ki shahar-e-khush-anjaam se guzar gai huun balaa se bhuul gae vo jo aashnaa the kabhi main aaj apne shabistaan mein be-khatar gai huun khushaa hatheli pe yaadon kaa qaafila Thahraa khushaa ki yaad thi aisi khushi se mar gai huun bahut aziiz thaa aashuftagi kaa pairaahan ye jaan kar dam-e-aazurdagi bikhar gai huun saraab-aasaa rahaa vo taalluq-e-khubaan palaT palaT ke bulaataa hai phir bhi Dar gai huun"

"apne lahu se naam likhaa ghair kaa bhi dekh zinda hai to shaqaavat-e-dasht-e-balaa bhi dekh aankhon ke aainon kaa to paani utar gayaa ab jism chob-e-khushk hai ye saaneha bhi dekh hoti hai zindagi ki haraarat ragon mein sard sukhe hue badan pe ye chamDaa kasaa bhi dekh betaabiyon ko siine ke andar sameT le fitne ko apni had se musalsal baDhaa bhi dekh har zarra ibraton ke samundar ki shakl hai sahraa-navard-e-shauq kabhi naqsh-e-paa bhi dekh pahchaan apni ho to mile manzil-e-muraad 'naahid' gaahe gaahe sahi aaina bhi dekh"

"kabhi to aa miri aankhon ki raushni ban kar zamin-e-khushk ko sairaab kar nami ban kar rachaa huaa hai tiri kam-nigaahiyon kaa karam nashe ki tarah mire dil mein sarkhushi ban kar kabhi to aa tapish-e-jaan-gusal hi dene ko kabhi guzar inhi raahon se ajnabi ban kar khushaa ki aur milaa gham kaa taaziyaana hamein khushaa vo dard jo chhaayaa hai naghmagi ban kar tumhein aziiz nahin hai to ho aziiz kise na mil sakegaa koi vajh-e-zindagi ban kar palaT ke dekh na us ko vo khaak kar degaa tire ghurur ko zahraab ki ani ban kar hui na us se vafaa tum se kyaa huaa 'naahid' abhi talak jiye jaati ho baaoli ban kar"

"bigDi baat banaanaa mushkil bigDi baat banaae kaun kunj-e-tamannaa viraana hai aa kar phuul khilaae kaun tan ki daulat man ki daulat sab khvaabon ki baatein hain nau man tel na ho to ghar mein raadhaa ko nachvaae kaun apnaa gham ab khud hi uThaa le varna rusvaai hogi teraa bhed chhupaa kar dil mein naahaq bojh uThaae kaun chalti gaaDi naam kaa rishta kyaa mohan kyaa raadhaa aaj ban ke sanvar ke raas rachaa ke mohan aaj manaae kaun saagar paar ki khabrein dekhe ham-saae kaa pataa nahin aaj kaa insaan aalam faazil us ko ab samjhaae kaun naa-ummidi naam-e-tamannaa apnaa muqaddar hijr-e-musalsal dard ke khaaristaan mein aa ke daaman-e-dil uljhaae kaun raat bhi kaali chaadar oDhe aa pahunchi hai ziine mein mehndi lagaae baiThi soche laT uljhi suljhaae kaun"

"kuchh din to malaal us kaa haq thaa bichhDaa to khayaal us kaa haq thaa vo raat bhi din si taaza rakhtaa shabnam kaa jamaal us kaa haq thaa vo tarz-e-bayaan mein chaandni thaa taaron se visaal us kaa haq thaa thaa us kaa khiraam mauj-e-dariyaa lahron kaa jalaal us kaa haq thaa baarish kaa badan thaa us kaa hansnaa ghunche kaa khisaal us kaa haq thaa rakhtaa thaa sanbhaal shisha-e-jaan tajsim-e-kamaal us kaa haq thaa baadal ki misaal us ki khu thi taabir-e-hilaal us kaa haq thaa ujlaa thaa chanbeliyon ke jaisaa yusuf saa jamaal us kaa haq thaa"

"havaa kuchh apne savaal tahrir dekhti hai ki baadalon ko bhi misl-e-zanjir dekhti hai mujhe bulaataa hai phir vahi shahr-e-naa-muraadi ki aarzu aablon mein tasvir dekhti hai jo kashtiyon mein na baiTh paae vo ghar na pahunche safar ki taaid shaam-e-taqsir dekhti hai bahut dinon mein sitam ke dariyaa kaa zor TuuTaa sarisht-e-shab bhi barahna taazir dekhti hai samundaron kaa uruuj phir ret ban gayaa hai shahaab-e-saaqib mein raat tafsir dekhti hai havaa chali thi pa shahr-e-jaan ke the dar muqaffal ye aankh apne hi khvaab taakhir dekhti hai subu liye tishnagi khaDi thi ye jaanti thi ki jaan-faroshon ko qaus-e-shamshir dekhti hai niyaabat-e-shahr un ke haathon mein ab na hogi kamaan-daaron ko shab ki zanjir dekhti hai"

"aage sarak rahe hain ki sakta bhi hai ajab divaar-o-dar ko shauq-e-tamaashaa bhi hai ajab shaayad udaas shaakhon se lipTaa huaa mile apni gali mein us kaa Thikaana bhi hai ajab bikhre huruf joD ke likh do koi to naam is dil ke dukh ajab hain masihaa bhi hai ajab harf-e-visaal harf-e-gumaan tak na ban sakaa tahzib-e-jaan mein gham kaa mudaavaa bhi hai ajab bheji hain us ne phulon mein munh band sipiyaan inkaar bhi ajab hai bulaavaa bhi hai ajab"

"na koi rabt ba-juz khaamushi o nafrat ke mileinge ab to khulaase yahi mohabbat ke main qaid-e-jism mein rusvaa tu qaid mein meri badan pe daagh liye qaid-e-be-saubat ke ajiib baat girebaan pe haath un kaa hai jo tosha-gir-e-tamannaa the harf-e-ghairat ke bas ab to harf-e-nadaamat ko sabt-e-daaem de sabaa-sifat the risaale gham-e-mohabbat ke duaa se tazkiya-e-nafas tak safar hai bahut libaas badloge kitne bhi ab zarurat ke siyah safed ke maalik ko farq-e-rang se kyaa paDe na us pe bhi sadme kabhi hazimat ke zamaam-e-kaar-e-jahaan kis ke haath hai yaa-rab badal gae hain taqaaze bhi aadmiyat ke zamaana darpa-e-aazaar hai to kyaa 'naahid' bikharte aae hain moti sadaa mashaqqat ke"

"vidaaa kartaa hai dil satvat-e-rag-e-jaan ko khabar karo mire khvaabon ke shab-sulaimaan ko muhit-e-jaan na koi zaaiqa na sabza-e-shab talaash karti hai khushbu kisi garebaan ko mujhe ye fasl-e-khizaan-khvaab kaaT lene do ki phir na nikle koi dusraa bayaabaan ko lahu ko aankh mein rahne kaa zom thaa varna Tapak bhi saktaa thaa bahlaa ke dil ke tufaan ko mujhe to gham bhi panah zaad hi lage ab to ki aa nikalti hai hasrat bhi sair-e-mizhgaan ko kisi udu ki muravvat se ab bhi taaza hain vo zakhm-e-khvaab ki jo DhunDte hain paikaan ko hisaab us ki mohabbat kaa harf harf karun jo aa gayaa thaa miri tishnagi ke saamaan ko"

"mujh ko daryuza-gar-e-khvaab banaa detaa hai jab bhi aataa hai miri pyaas baDhaa detaa hai puchh letaa hai miraa haal vo divaaron se apne hi haath se tasvir banaa detaa hai us ne sikhaa hi nahin khvaab mein rahne kaa safar aisaa koi nahin jo aa ke jagaa detaa hai shaam hote hi sanvartaa hai miri aankhon mein ye nazaara hi mujhe aag banaa detaa hai aaina DhunD hi letaa hai mujhe aakhir-kaar lutf-e-taaid mujhe tujh se sivaa detaa hai"

"surkhi badan mein rang-e-vafaa ki thi kuchh dinon taasir ye bhi us ki duaa ki thi kuchh dinon DhunDe se us ke naqsh ulajhte the aur bhi haalat tamaam karb-o-balaa ki thi kuchh dinon kaaghaz pe thaa likhaa huaa har harf-e-lab-kushaa tahrir jism-e-saut-o-sadaa ki thi kuchh dinon shaakhon pe konpalon ko zabaanein ataa huiin ye dilbari bhi dast-e-sabaa ki thi kuchh dinon dil-sozi-e-vafaa ko shakebaai ki ataa shaaistagi ye rang-e-hinaa ki thi kuchh dinon ab hai kuduraton kaa khulaa dasht aur main chaahat tamaam teri razaa ki thi kuchh dinon kaifiyat-e-nashaat thi khud hi se guftugu 'naahid' ye ridaa bhi hayaa ki thi kuchh dinon"

"nazar to aa kabhi aankhon ki raushni ban kar zamin-e-khushk ko sairaab kar nami ban kar rachaa huaa hai tiri kam nigaahiyon kaa karam nashe ki tarah mire dil mein sarkhushi ban kar kabhi to aa sitam-e-jaan-gusil hi dene ko kabhi guzar unhi raahon se ajnabi ban kar khushaa ki aur milaa gham kaa taaziyaana hamein khushaa vo dard jo chhaayaa hai naghmagi ban kar hui na un se vafaa tum se kyaa huaa 'naahid' abhi talak jiye jaati ho baavli ban kar"

"khush bayaabaan mein magar shahr mein Darnaa us kaa kaasa haathon mein liye ghar mein bhi phirnaa us kaa dil dukhaa ke kabhi hansnaa kabhi ronaa us kaa mere aangan mein likhaa thaa nahin basnaa us kaa us ne tanhaai mein bhi anjuman-aaraai ki chaand ne dekh liyaa aankhon ko bharnaa us kaa main ne dekhaa hai sar-e-shaam udaasi kaa khiraam paanv mein chhaale pahan ke na Thaharnaa us kaa aaina dekhnaa manzur nahin thaa us ko lutf detaa thaa havaa ban ke guzarnaa us kaa har khalish aan ke rukti thi miri baanhon mein zindagi dekhti rahti thi taDapnaa us kaa hai ajab tarz-e-mulaaqaat ajab tarz-e-safar paas aa ke na Thaharnaa na guzarnaa us kaa"

"aaghosh-e-gul mein lazzat-e-sohbat nahin rahi kis se kahun ki qaus-e-mohabbat nahin rahi maujud huun bisaat-e-tamannaa ke dasht mein pahlu mein aabru-e-hazimat nahin rahi dekhaa use to qarz-e-vafaa yaad aa gayaa baaton mein us ki khu-e-iraadat nahin rahi main bhuul ke bhi us ki gali mein na jaaungi pahchaanti huun dil mein muravvat nahin rahi shaamon ke saae DhunDne nikle the kal yahin kahte hain aaj ishq ki mohlat nahin rahi bikhre hue hain lafz bhi nauhagari kahaan dil mein havaa-e-khalvat-o-jalvat nahin rahi ab bas karo ki aankhon mein paani nahin rahaa is zindagi mein ab koi tohmat nahin rahi"

"tishnagi achchhi nahin rakhnaa bahut rauzan-e-gul se use taknaa bahut dekh kar jis shakhs ko hansnaa bahut sar ko is ke saamne Dhaknaa bahut jis ki aankhon mein na jhaankaa jaaegaa is ki hi tahrir ko paDhnaa bahut mauja-e-reg-e-ravaan hai zer-e-aab apni hasti dekh kar baDhnaa bahut barf ki maanind jiinaa umr bhar ret ki surat magar tapnaa bahut umr bhar ki bandishein khvaab-o-khayaal do qadam bhi saath hai chalnaa bahut khastagi 'naahid' ban jaae na jurm apni hasti dekh kar baDhnaa bahut"

"har naqsh-e-paa ko manzil-e-jaan maannaa paDaa muddat ke baad jab bhi tiraa saamnaa paDaa aksar naqaab-e-zabt hamein thaamnaa paDaa jab bhi fasil-e-shab ko hamein phaandnaa paDaa har baar bhulne ko ghamon ki aziyyatein har rishta-e-umid nayaa baandhnaa paDaa har aarzu se ham ko mili taaza zindagi har aarzu kaa ham ko lahu chaaTnaa paDaa ki thi haraam khud-kushi mere khudaa ne kyuun be-vajh zindagi kaa safar kaaTnaa paDaa"

"dukh ki gutthi kholeinge apne aap ko samjheinge teri aankh jhapakne mein laakhon tufaan uTTheinge jaane kis din tujh ko ham paas biThaa kar dekheinge sun ke qadmon ki aahaT maang mein afshaan bhar leinge dekheinge be-mehri-e-dahar chup ki chaadar oDheinge teri khaatir mausam-e-gul mein kaanTe dil mein chubho leinge meri chamakti aankh mein log teri surat dekheinge"

"kabhi sochaa na thaa itni bhi sarshaari kabhi hogi ki teraa naam paDhte hi talabgaari kabhi hogi kabhi rote hue hans duun kabhi hanste hue ro duun kabhi mahfil sajaaungi azaa-daari kabhi hogi sitam-ijaado divaarein junun atvaar hi Thahrin tire mahfil mein aa jaane pe be-zaari kabhi hogi bahut maaruf rakkhaa thaa tire khvaabon ne dar-parda sunaanaa chaahein haal-e-dil to dushvaari kabhi hogi nahin maalum thaa ghaul-e-raqibaan saath chaltaa hai na koi haal puchhegaa na gham-khvaari kabhi hogi"

"sulagti ret pe aankhein bhi zer-e-paa rakhnaa nahin hai sahl havaa se muqaabla rakhnaa use ye zom ki aaghosh-e-gul bhi us ki hai jo chaahtaa hai parindon ko be-navaa rakhnaa subuk na ho ye nigah-daari-e-junun ham se ye dekhne ko use saamne biThaa rakhnaa bikhar na jaanaa jaraahat-navaazi-e-shab par mashaam-e-jaan ko abhi khvaab aashnaa rakhnaa vo fursatein ki jinhein aahaTon ki khvaahish ho unhein jaras ki tamannaa se maa-sivaa rakhnaa tamaam manzar-e-jaan us ki khvaahishon se banaa vo khvaab hai to use khvaab mein sajaa rakhnaa udaasiyon ko to aangan hi chaahiye khaali chhaton pe chaandni raaton kaa silsila rakhnaa vo jab bhi aayaa bahut tez baarishon jaisaa vo jis ne chaahaa mujhe surmai ghaTaa rakhnaa bas ik charaagh masaafat kaa bojh sah legaa sukhan ke biich talabgaari-e-vafaa rakhnaa"

"hari thi shaakh to baiThaa na us pe panchhi kyuun lage hai ujDe hue khvaab si ye basti kyuun mujhe khabar hai mire ghar mein saanp aankhein hain vagarna gham ke khazine chhupaa ke rakhti kyuun tumhi se tohmat-e-aalam ko nisbatein mausum tumhein ko kahte hain sab log sab se achchhi kyuun khizaan ko mere hi khvaabon ke naam kyuun likkhaa zamin ne apni ye daulat mujhi ko saunpi kyuun miraa vajud bhi kyaa kuchh khudaa se miltaa hai savaal-e-shak se hai begaana meri hasti kyuun ye ashk silsila-e-jaan ke bolte lab hain chhupaa ke daulat-e-naayaab tum ne rakkhi kyuun vajud apnaa kise kab aziiz thaa 'naahid' hui hai shaam se pahle hi shaam gahri kyuun"

"zakhm bhi taaza thaa aur us pe havaa bhi taaza dil ne rakkhaa thaa magar rakhsh-e-duaa bhi taaza tar-ba-tar hai mire haathon mein vahi jaamuni rang tum ne puchhaa thaa ki hoti hai ghaTaa bhi taaza ab talak hai vahi jaltaa huaa sahraa vahi main ab talak hai tapish-e-shauq-e-nidaa bhi taaza kis bahaane se tujhe bhuul rahun aur khush huun phir banaa legaa ye dil ek khudaa bhi taaza kis bahaane se main jaagun tujhe DhunDun ab ke ab to is sahn mein Thahre na havaa bhi taaza aaina maangtaa rahtaa hai vahi aks tiraa aankh rakhti hai tiraa rang-e-qabaa bhi taaza bas bahut hausla rakhne ki kahaani kah li raat ko phuul masalti hai havaa bhi taaza"

"dil ki divaar mein aaina rakhaa thaa kis ne mujh ko pahchaante rahne ko kahaa thaa kis ne dushman-e-jaan tire haathon mein to patthar bhi na thaa lazzat-e-khvaab ko nam-dida kiyaa thaa kis ne ab bahut duur nikal jaane ko ji chaahtaa hai mujh ko jaate hue divaana kahaa thaa kis ne us ki aankhon mein bulaavaa hi na thaa sach ye hai ai shab-e-hijr tujhe saath kiyaa thaa kis ne anjuman anjuman qisse the hamaare kal tak aaj viraani ko aankhon mein rakhaa thaa kis ne naam to us kaa bhalaa saa thaa magar yaad nahin siskiyaan le ke tujhe yaad kiyaa thaa kis ne"

"ye dasht-e-faraamoshi Thaharne nahin detaa lekin dar-e-khvaahish ko bhi khulne nahin detaa ye rasm hai divaar-o-dar-e-girya ki lekin daryuza-gar-e-khvaab to rone nahin detaa aashob hai aisaa ki saraasima hai vahshat ye ijz-e-bayaan zakhm bhi dhone nahin detaa haan manzil-e-ummid bhi nazdik thi lekin gham-khaana-e-jaanaanaan bahalne nahin detaa aankhon mein vahi ranj-e-asiri hai musallat jo hashr bapaa honaa thaa hone nahin detaa be-naam rahi khvaahish-e-didaar hamesha shabnam ki tarah vo mujhe hansne nahin detaa aangan mein lahu dekh ke roti nahin aankhein ye dil to sulagtaa hai pa jalne nahin detaa"