Ghazal

"ab main ash'aar ke pairaae mein Dhal jaaungaa varna is raushni-e-tab’ se jal jaaungaa bakhshiye mujh ko ye pagDanDi ghanimat hai mujhe shaah-raahon pe chalungaa to kuchal jaaungaa apne saae se tasaadum na kahin ho jaae soch rakkhaa hai ki paTri hi badal jaaungaa meri khvaahish ko to khurshid bhi paasang nahin ye na samjho ki sitaaron se bahal jaaungaa ai 'muzaffar' mire ahbaab ko khush-fahmi hai jaise main un ke sanbhaale se sanbhal jaaungaa"

"mil kar har ek shakhs se dil itnaa bhar gayaa ab apnaa hi vajud nazar se utar gayaa kyaa jaane kyon ye hotaa hai mahsus in dinon main ji rahaa huun mujh mein koi thaa jo mar gayaa pahlaa saa vo kharosh samundar mein ab kahaan sailaab khatm ho gayaa tufaan guzar gayaa mausam ne jab bhi chupke se kuchh gul khilaae hain ilzaam shokh tez havaaon ke sar gayaa paani ki tarah bah gaiin sadiyaan kabhi kabhi aksar huaa hai yuun bhi ki lamha Thahar gayaa muddat ke baa'd aaina kal saamne paDaa dekhi jo apni shakl to chehra utar gayaa"

"khushk aankhon se nikal kar aasmaan par phail jaa ai ghubaar-e-aarzu taa-hadd-e-manzar phail jaa motiyon ki aabruein luTne vaale bahut siip ke qaidi samundar-dar-samundar phail jaa yuun palak par jagmagaanaa do ghaDi kaa aish hai raushni ban kar mire andar hi andar phail jaa aa mire siine se lag jaa tu agar sailaab hai aur khushbu hai to jaa basti mein ghar ghar phail jaa naqsh-e-paa paamaal raahon par lagaa degaa tujhe raaste mein gard ki maanind uD kar phail jaa"

"jo honTon pe mohr-e-khamoshi lagaa di to mil kar nigaahon ne taali bajaa di kisi ke liye main pareshaan nahin huun raqibon ne jaane kahaan ki uDaa di junun apni taqdir se kheltaa hai miTaai banaa di banaai miTaa di abhi nuur o zulmat mein chalti rahegi na vo is ke aadi na main us kaa aadi khabar kaarvaan ki na ho rahzanon ko yahi soch kar main ne mishal bujhaa di gulon ne jab ilzaam rakkhaa khizaan par to vo khaar ko dekh kar muskuraa di tavaqqoa nahin thi 'muzaffar' se un ko khari baat sun kar qayaamat uThaa di"

"bachche laae anokhi titli aur niraale phuul khushbu dene vaali titli uDne vaale phuul jis din gulshan mein nafrat ki aandhi chalti hai shaakhon par ugne lagte hain kaale kaale phuul us ke pairon mein kaanTe the chhaale haathon mein uupar se pariyon ne us bachche par Daale phuul hamraa aur samra ne saalgirah par aiman ki khuub chhuDaai aatish-baazi khuub uchhaale phuul meri god mein poti hai to potaa kandhe par jaise jhilmil jhilmil jugnu bhole-bhaale phuul lafzon ke is jaadugar ke pyaare pyaare sher angaare daaman mein rakkhe aur nikaale phuul"

"taalaab se nikal ke samandar mein aa gayaa is baar sindbaad mire ghar mein aa gayaa be-chehra gardanon ki shikaayat fuzul hai maa'sum haath qabza-e-khanjar mein aa gayaa dekhaa hi thaa khalaa se palaT kar zamin ko har qatra-e-lahu mire shahpar mein aa gayaa dariyaa ke laakh haath mujhe rokte rahe main ne lagaam uThaai bahattar mein aa gayaa aisi bulandiyon ki tamannaa kabhi na thi zarra huun gard-baad ke chakkar mein aa gayaa sar par gunaahgaar ke pheinkaa nahin abhi dhabba kahaan se haath ke patthar mein aa gayaa is 'ahd mein jahaan bhi havaa tez-o-tund ho tufaan saa bayaaz-e-'muzaffar' mein aa gayaa"

"ab du-ba-du tujh se baat hove jo kuchh bhi hamaare saath hove baazicha bani hui hai duniyaa tu chaal chale to maat hove chehre pe giraa ke apni zulfein tu hukm kare to raat hove sharmaae tu kaifiyat se labrez paimaana kaaenaat hove tujh nur-sifaat ke muqaabil hove to hamaari zaat hove hai qaid-e-hayaat pech-dar-pech mar jaaein agar najaat hove vo sher kaho miyaan-'muzaffar' aaina shash-jahaat hove"

"is ek baat mein hai miri daastaan tamaam suniye to sar se paanv talak huun zabaan tamaam dar aae chor chaand kaa darvaaza toD kar din-bhar dhuaan-dhuaan saa rahaa aasmaan tamaam honTon pe phuul haathon mein khanjar liye hue ghere mujhe khaDe hain mire mehrbaan tamaam bachche ne is adaa se chavanni baDhaai hai jaise ki vo kharid rahaa ho dukaan tamaam jin ko koi qubul na kartaa ho sharm se likh do hamaare naam vo rusvaaiyaan tamaam do-chaar qahqahon mein nikal jaaegi bhaDaas siine mein kyon sameT rahe ho dhuaan tamaam hai zud-goi jurm 'muzaffar' 'ilaaj kar yuun to na hogi aamad-e-tab'-e-ravaan tamaam"

"ik masraf-e-auqaat-e-shabina nikal aayaa zulmat mein tiri yaad kaa ziina nikal aayaa har-chand ki mahfil ne miri qadr bahut ki uktaa ke anguThi se nagina nikal aayaa phir koh-kani Dhaal rahi hai nae teshe phir fakhr se chaTTaan kaa siina nikal aayaa sach-much vo taghaaful se kinaara hi na kar le main sochne baiThaa to pasina nikal aayaa ghota jo lagaayaa hai to maayus huaa huun har mauj ke daaman mein safina nikal aayaa ghabraayaa huaa dekh ke patjhaD ke aqab se mere liye saavan kaa mahina nikal aayaa jab vaqt ne chhaani hain 'muzaffar' ki bayaazein har she'r mein nudrat kaa dafina nikal aayaa"

"basaaraton pe bhanvar inkishaaf kartaa hai ki bulbule kaa samundar tavaaf kartaa hai ajiib bhul-bhulayyaan hai justuju khud ki har ek naqsh-e-qadam inhiraaf kartaa hai mazaa to jab hai ki ham us ko naa khudaa kar lein havaa kaa rukh jo hamaare khilaaf kartaa hai jise gunaah ki taufiq hi na ho taa-umr use khudaa na zamaana muaaf kartaa hai lahu ki maar se bachiye ki josh mein aae to qatra qatra badan mein shigaaf kartaa hai balaa se rang-e-taghazzul miri ghazal mein nahin nukilaa lahja ghuTan ko to saaf kartaa hai"

"kyaa kartaa main ham-asron ne tanhaa mujh par chhoD diyaa sab ne bosa de kar sach kaa bhaari patthar chhoD diyaa Dhilaa paDtaa thaa suuli kaa phandaa us ki gardan par mere qaatil ko munsif ne fidya le kar chhoD diyaa dariyaa ke rukh bahne vaali machhli murda machhli hai us kashti ki khair nahin hai jis ne langar chhoD diyaa shoalon ki is hamdardi par dil mein laavaa paktaa hai jab saari basti phunki thi kyuun meraa ghar chhoD diyaa suraj ne bhi soch samajh kar jaal bichhaae kirnon ke shabnam shabnam Daaka Daalaa aur samundar chhoD diyaa saaraa ghar sotaa hai do ghanTe mein aaegaa akhbaar aaj 'muzaffar' paanch baje hi kaise bistar chhoD diyaa"

"tinkon ke armaan labbaik labbaik tufaan tufaan labbaik labbaik be-dast-o-paa main be-dast-o-paa tu jangal bayaabaan labbaik labbaik vahshat ki basti kotaah-dasti meraa garebaan labbaik labbaik aazaad-dida mardum-guzida aaina hairaan labbaik labbaik titli shagufe jugnu sitaare sab teri pahchaan labbaik labbaik unchaa huaa sar neza-ba-neza yaaron kaa ehsaan labbaik labbaik"

"sukhaa baanjh mahina maulaa paani de saavan piiTe siina maulaa paani de saari jhilein dhuul uDaane vaalon ki andhaa har aaina maulaa paani de dariyaa neki sukhi kheti khud-gharzi bhukaa peT kamina maulaa paani de faslein aate jaate lashkar kaaTegaa apne bhaag pasina maulaa paani de machhli haanp rahi hai saansein lene ko kichaD mein kyaa jiinaa maulaa paani de miTTi par bauchhaar 'muzaffar' sheron ki daana muul nagina maulaa paani de"

"aalaam-e-rozgaar kaa munh zard ho gayaa har zakhm kaa ilaaj tiraa dard ho gayaa chehre ki hai talaash har ik fard ko jahaan us anjuman se jo bhi uThaa fard ho gayaa khilte hain dil mein phuul tiri yaad ke tufail aatish-kada to der hui sard ho gayaa gumraahiyon ne dhuul uDaa di mazaaq mein har naqsh-e-paa-e-raah-numaa gard ho gayaa is ahd-e-nau ko lahja-e-mardaana chaahiye jis ne bhi mere sher paDhe mard ho gayaa"

"us ne ham ko jhiil taraai aur pahaaD diye ham ne in sab ki gardan mein panje gaaD diye zanjiron mein jakDi us munh-zor havaa ne phir toD diye khiDki darvaaze par de phaaD diye shabnam shabnam moti bo kar aashaa baiThi thi lashkar aayaa khet jalaae peD ukhaaD diye ret bhari nahron ko dekho bahnaa bhuul gaiin nafrat ki aandhi ne kitne shahr ujaaD diye ham to giili ret the jis ko raundaa jaanaa thaa us ne bhi kuchh naqsh banaae aur bigaaD diye"

"ye iztiraab dekhnaa ye intishaar dekhnaa sahar na ho kahin zaraa pas-e-ghubaar dekhnaa ye khastagi kaa faiz hai ki jis ne aankh muund kar sikhaa diyaa mujhe badan ke aar-paar dekhnaa shikast khaa chuke hain ham magar aziiz faateho hamaare qad se kam na ho faraaz-e-daar dekhnaa guzar gai jo mauj us ki yaad hi fuzul hai magar ho us kaa muD ke mujh ko baar baar dekhnaa miraa khulus dekhnaa ki mahv-e-intizaar huun use bhalaa chukaa huun kaif-e-intizaar dekhnaa"

"ghaughaa khaTpaT chikham dhaaD uf aavaazon ke jhankaaD raat ghanaa jangal aur main ek chanaa kyaa phoDe bhaaD majnun kaa anjaam to soch yaar mire mat kapDe phaaD zulmat maaregi shab-khun raushniyon ki le kar aaD apnaa ganjaa chaand sambhaal mere sar par dhuul na jhaaD aakhir tujh ko maaneinge naqqaadon ko khuub lataaD dekho kab tak baaqi hain dariyaa jangal aur pahaaD hamdam-e-derina hans-bol yaadon ke murde na ukhaaD phir suraj se Takraanaa dharti mein to panje gaaD"

"shaamiyaane miri ghibat mein havaa taanti hai gaanv mein mere na hone se baDi shaanti hai vo bagulaa hai ki uDne pe sadaa aamaada main jo miTTi huun to miTTi bhi kahaan maanti hai dekhnaa kaise humakne lage saare patthar meri vahshat ko tumhaari gali pahchaanti hai phuul banti hai kali hanste-hansaate lekin us ke dil pe jo guzarti hai vahi jaanti hai meri koshish hai ki duniyaa ko banaa duun firdaus aur duniyaa mujhe naakaaron mein gardaanti hai ham ko ik haal mein qismat nahin rahne deti kabhi miTTi mein milaati hai kabhi chhaanti hai"

"aaj tak aazmaa rahi hai mujhe karbalaa phir bulaa rahi hai mujhe khuun lalkaartaa hai baDh baDh kar saaf aavaaz aa rahi hai mujhe khanjar-e-shimr to vasila hai khud-shanaasi miTaa rahi hai mujhe zarra zarra mire liye kuufa zindagi varghalaa rahi hai mujhe aaj bhi lau buland hai meri maut kab se bujhaa rahi hai mujhe"

"aaankhon mein viraani si hai palkein bhigi baal khule tu be-vaqt pashemaan kyuun hai ham par bhi kuchh haal khule tark-e-vafaa par sochaa thaa haafiz-saahib se baat karun ab Dartaa huun jaane kaisi ulTi sidhi faal khule laakhon kaa haq maar chuke ho chain kahaan se paaoge paidal aage sarkaao to farzin ki bhi chaal khule baaton se to naaseh ko ham sidhaa-saada samjhe the vo to ik din mai-khaane mein hazrat ke ahvaal khule fariyaadon ne aur baDhaa di muddat bad-unvaani ki baazu phailaane se shaayad bandhan TuTein jaal khule hasti ki is bhul-bhulayyaan mein jab tham kar sochaa to ik pechida lamhe mein sad-baab-e-maah-o-saal khule aap 'muzaffar'-hanafi se mil kar shaayad maayus na hon dil ke saaf basirat gahri zehan rasaa aamaal khule"

"ye sach hai koi rahnumaa Thiik naiin mire bhaai tu bhi chalaa Thiik naiin adibon ko sach bolnaa chaahiye siyaasat ki aab-o-havaa Thiik naiin nigaahon se melaa na ho jaae vo use der tak dekhnaa Thiik naiin hamein to vahi samt marghub hai balaa se udhar raasta Thiik naiin chalo dhuup se aashnaai karein ye divaar kaa aasraa Thiik naiin nami aankh mein haath mein tharthari tire maangne ki adaa Thiik naiin zamaana mukhaalif thaa qismat kharaab 'muzaffar' yahaan kuchh bhi thaa Thiik naiin"

"divaaron par giili rekhaaein roti hain tinon par ghunghru ki bundein naach rahi hain pairon mein makDi ne jaalaa taan rakhaa hai par phailaa kar chiDiyaan kaandhe par baiThi hain Dol rahe hain aankhon mein patthar ke saae shiryaanon mein bahti nadiyaan suukh chuki hain dar par viraani kaa parda jhuul rahaa hai khunTi se tanhaai ki belein laTki hain mujh se mat bolo main aaj bharaa baiThaa huun cigarette ke donon paikeT bilkul khaali hain dushman kyuun zahmat farmaaein meri khaatir khud ko mukhlis kahne vaale hi kaafi hain bachpan mein aakaash ko chhutaa saa lagtaa thaa is pipal ki shaakhein ab kitni nichi hain zakhmon ki chhalni mein un ko chhaan rahaa huun kirnein apne saath andhere bhi laai hain chaliye saahab aur koi darvaaza dekhein aaj 'muzaffar' ki baatein bahki bahki hain"

"suraakh kashti munh-zor dariyaa taslim chaahe jis or dariyaa ye tisraa kaun apne milan mein sangam ke niche ik chor dariyaa apni taraf se ham bhi gurezaan bosida saahil ghanghor dariyaa jangal mein mangal mangal mein ketu ik mor shoala ik mor dariyaa jabbaar maujein qahhaar maujein munh-zor dariyaa pur-shor dariyaa yuun bhi 'muzaffar' dekhe gae hain kaanTe mein to’ma lam-Dor dariyaa"

"jo na mahsus kiyaa ho use kyunkar kahte varna aasaan thaa qatre ko samundar kahte khil nahin sakte kabhi siine mein zakhmon ke gulaab ham jo sukhe hue kaanTon ko gul-e-tar kahte khaak ho kar bhi chamakne se gurezaan hain ham log zarron ko sitaaron ke baraabar kahte ham subuk-sar na hue apne lahu ke haathon jaane kyaa dil mein palaTte hue khanjar kahte koi ranjida nahin aks ganvaa kar apnaa aaina aaina ye raaz bhi patthar kahte"