shaikh ki daavat mein mai kaa kaam kyaa — Akbar Allahabadi

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo

dukhtar-e-raz ne uThaa rakkhi hai aafat sar par
khairiyat guzri ki angur ke beTaa na huaa

log kahte hain badaltaa hai zamaana sab ko
mard vo hain jo zamaane ko badal dete hain

shaikh apni rag ko kyaa karein reshe ko kyaa karein
mazhab ke jhagDe chhoDein to peshe ko kyaa karein

jis taraf uTh gai hain aahein hain
chashm-e-bad-dur kyaa nigaahein hain

ham aisi kul kitaabein qaabil-e-zabti samajhte hain
ki jin ko paDh ke laDke baap ko khabti samajhte hain

na tum hosh mein ho na ham hosh mein hain
chalo mai-kade mein vahin baat hogi

sau fasaad ek ishq mein uTThe
boyaa ik tukhm uge hazaar darakht

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

khudaa ke haath hai biknaa na biknaa mai kaa ai saaqi
baraabar masjid-e-jaame ke ham ne ab dukaan rakh di

khair dozakh mein mai mile na mile
shaikh-saahab se jaan to chhuTegi

ishq phir ishq hai aashufta-sari maange hai
hosh ke daur mein bhi jaama-dari maange hai