ye zakhm-e-anaa kaafi hai ai yusuf-e-dauraan — Baharunnisa Bahar

viraan zindagi ke ye lamhe ajiib hain
bazm-e-tarab mein dhuum hai furqat dhamaal se

munjamid ho zindagi mein jab kabhi shahr-e-khayaal
phir charaagh-e-dil se us ko jagmagaanaa chaahiye

ghaayal vajud soch ki baisaakhiyaan liye
milne chalaa hai guzre hue maah-o-saal se

harf saare bol uTThein jab bhi main likhne lagun
ab koi jazba miraa mahv-e-duaa lagtaa nahin

ashk ke abr-e-ravaan mein DhunDhti huun main tujhe
aas ki in titliyon ko bhi Thikaanaa chaahiye

havaa hai ret hai dasht-e-vafaa hai
ruton ko aataa jaataa dekhti huun

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ye aansu ponchh lijiye aur muskuraaiye
chaara nahin hai koi bhi rukhsat kiye baghair

main ne apni palkon par gham-kade sajaae hain
aarzu ke maatam mein sogvaar hasti hai

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

husn jalva dikhaa gayaa apnaa
ishq baiThaa rahaa udaas kahin