main zakhm zakhm nahin huun magar masihaai — Khalid Ebadi

shahr kaa bhi dastur vahi jangal vaalaa
khojne vaale hi akasr kho jaate hain

kabhi kabhi chup ho jaane ki khvaahish hoti hai
aaise mein jab tir-e-sitam ki baarish hoti hai

zaraa saa dard aur itni davaaein
pasand aai nahin chaaragari tak

zaraa Thahro use aane do us ki baat bhi sun lein
hamein jo ilm hai go dil ko dahlaane hi vaalaa hai

ye kaisaa tanaaza hai ki faisal nahin hotaa
haq teraa ziyaada hai ki hukkaam kaa tere

abhi marne ki jaldi hai 'ibaadi'
agar zinda rahe to phir mileinge

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

is ko kahte hain khudaa ki den ye hoti hai den
ab civil-surgeon banegaa jaanashin-e-taan-sen

anjaane logon ko har su chaltaa phirtaa dekh rahaa huun
kaisi bhiiD hai phir bhi khud ko tanhaa tanhaa dekh rahaa huun