hasrat-e-mausam-e-gulaab huun main — Neena Sahar

kal tire ehsaas ki baarish tale
meraa sunaa-pan nahaayaa der tak

zakhm bhi ab hasin lagte hain
tere haathon fareb khaane par

miri pyaas kaa taraana yuun samajh na aa sakegaa
mujhe aaj sun ke dekho miri khaamoshi se aage

maaro patthar bhi to nahin hiltaa
jam chukaa hai ab is qadar paani

kaise hoti hai shab ki sahar dekhte
kaash ham bhi kabhi jaag kar dekhte

tire vajud ko chhu le to phir mukammal ho
bhaTak rahi hai khushi kab se dar-ba-dar mujh mein

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

kabhi faaslon ki masaafaton pe ubuur ho to ye kah sukun
miraa jurm hasrat-e-qurb hai to yahi kami yahaan sab mein hai

ik nazar ne kiyaa hai kaam tamaam
aarzu bhi to thi yahi dil ki

hai ek umr se khvaahish ki duur jaa ke kahin
main khud ko ajnabi logon ke darmiyaan dekhun

abhi hain qurb ke kuchh aur marhale baaqi
ki tujh ko paa ke hamein phir tiri tamannaa hai

tiraa visaal baDi chiiz hai magar ai dost
visaal ko miri duniyaa-e-aarzu na banaa