tire vajud ko chhu le to phir mukammal ho — Neena Sahar

zakhm bhi ab hasin lagte hain
tere haathon fareb khaane par

hasrat-e-mausam-e-gulaab huun main
sach na ho paaegaa vo khvaab huun main

kal tire ehsaas ki baarish tale
meraa sunaa-pan nahaayaa der tak

miri pyaas kaa taraana yuun samajh na aa sakegaa
mujhe aaj sun ke dekho miri khaamoshi se aage

maaro patthar bhi to nahin hiltaa
jam chukaa hai ab is qadar paani

kaise hoti hai shab ki sahar dekhte
kaash ham bhi kabhi jaag kar dekhte

gham hai na ab khushi hai na ummid hai na yaas
sab se najaat paae zamaane guzar gae

nahin nahin main bahut khush rahaa huun tere baghair
yaqin kar ki ye haalat abhi abhi hui hai

vo to khushbu hai har ik samt bikharnaa hai use
dil ko kyuun zid hai ki aaghosh mein bharnaa hai use

chaman mein khushk-saali par hai khush sayyaad ki ab khud
parinde peT ki khaatir asir-e-daam hote hain

jab bhi tiri qurbat ke kuchh imkaan nazar aae
ham khush hue itne ki pareshaan nazar aae

nahin karte vo baatein aalam-e-ruyaa mein bhi ham se
khushi ke khvaab bhi dekhein to be-taabir hote hain