'riyaaz' tauba na TuuTe na mai-kada chhuTe — Riyaz Khairabadi

sayyaad teraa ghar mujhe jannat sahi magar
jannat se bhi sivaa mujhe raahat chaman mein thi

ye sar-ba-mohr botalein hain jo sharaab ki
raatein hain un mein band hamaari shabaab ki

khudaa ke haath hai biknaa na biknaa mai kaa ai saaqi
baraabar masjid-e-jaame ke ham ne ab dukaan rakh di

aap aae to khayaal-e-dil-e-naashaad aayaa
aap ne yaad dilaayaa to mujhe yaad aayaa

baDe paak tinat baDe saaf baatin
'riyaaz' aap ko kuchh hamin jaante hain

ham jaante hain lutf-e-taqaazaa-e-mai-farosh
vo naqd mein kahaan jo mazaa hai udhaar mein

na tum hosh mein ho na ham hosh mein hain
chalo mai-kade mein vahin baat hogi

zindagi zor hai ravaani kaa
kyaa thamegaa bahaav paani kaa

aae kuchh abr kuchh sharaab aae
is ke baa'd aae jo azaab aae

'ghaalib' chhuTi sharaab par ab bhi kabhi kabhi
piitaa huun roz-e-abr o shab-e-maahtaab mein

kahaan milegi misaal meri sitamgari ki
ki main gulaabon ke zakhm kaanTon se si rahaa huun

kaun sukhe hue phulon ki taraf dekhtaa hai
zakhm thoDe se hare hon to numaaish karein ham