sher-e-tar mere chhalakte hue saaghar hain 'riyaaz' — Riyaz Khairabadi

mai-khaane mein mazaar hamaaraa agar banaa
duniyaa yahi kahegi ki jannat mein ghar banaa

aap aae to khayaal-e-dil-e-naashaad aayaa
aap ne yaad dilaayaa to mujhe yaad aayaa

ghurur bhi jo karun main to aajizi ho jaae
khudi mein lutf vo aae ki be-khudi ho jaae

ham jaante hain lutf-e-taqaazaa-e-mai-farosh
vo naqd mein kahaan jo mazaa hai udhaar mein

baDe paak tinat baDe saaf baatin
'riyaaz' aap ko kuchh hamin jaante hain

aisi hi intizaar mein lazzat agar na ho
to do ghaDi firaaq mein apni basar na ho

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main ne anjaam se pahle na palaT kar dekhaa
duur tak saath mire manzil-e-aaghaaz gai

ai shaam-e-gham ki gahri khamoshi tujhe salaam
kaanon mein ek aai hai aavaaz duur ki

daaman ko chaak kijiye is ehtiyaat se
ahl-e-jahaan ko zakhm-e-jigar kaa gumaan na ho

milne ko hai khamoshi-e-ahl-e-junun ki daad
uThne ko hai zamin se dhuaan dekhte raho