Ghazal

"jab hamein masjid jaanaa paDaa hai raah mein ik mai-khaana paDaa hai jaaiye ab kyuun jaanib-e-sahraa shahr to khud viraana paDaa hai ham na piyeinge bhiik ki saaqi le ye tiraa paimaana paDaa hai harj na ho to dekhte chaliye raah mein ik divaana paDaa hai khatm hui sab raat ki mahfil ek par-e-parvaana paDaa hai"

"salaam us par agar aisaa koi fankaar ho jaae siyaahi khuun ban jaae qalam talvaar ho jaae zamaane se kaho kuchh saaiqa-raftaar ho jaae hamaare saath chalne ke liye tayyaar ho jaae zamaane ko tamannaa hai tiraa didaar karne ki mujhe ye fikr hai mujh ko miraa didaar ho jaae vo zulfein saanp hain be-shak agar zanjir ban jaaein mohabbat zahr hai be-shak agar aazaar ho jaae mohabbat se tumhein sarkaar kahte hain vagarna ham nigaahein Daal dein jis par vahi sarkaar ho jaae"

"dar-o-divaar pe shaklein si banaane aai phir ye baarish meri tanhaai churaane aai zindagi baap ki maanind sazaa deti hai rahm-dil maan ki tarah maut bachaane aai aaj kal phir dil-e-barbaad ki baatein hain vahi ham to samjhe the ki kuchh aql Thikaane aai dil mein aahaT si hui ruuh mein dastak gunji kis ki khush-bu ye mujhe mere sirhaane aai main ne jab pahle-pahal apnaa vatan chhoDaa thaa duur tak mujh ko ik aavaaz bulaane aai teri maanind tiri yaad bhi zaalim nikli jab bhi aai hai miraa dil hi dukhaane aai"

"tujhe kaun jaantaa thaa miri dosti se pahle tiraa husn kuchh nahin thaa miri shaairi se pahle idhar aa raqib mere main tujhe gale lagaa luun miraa ishq be-mazaa thaa tiri dushmani se pahle kai inqilaab aae kai khush-khiraam guzre na uThi magar qayaamat tiri kam-sini se pahle miri subh ke sitaare tujhe DhunDti hain aankhein kahin raat Das na jaae tiri raushni se pahle"

"gardish-e-arz-o-samaavaat ne jiine na diyaa kaT gayaa din to hamein raat ne jiine na diyaa kuchh mohabbat ko na thaa chain se rakhnaa manzur aur kuchh un ki inaayaat ne jiine na diyaa haadsa hai ki tire sar pe na ilzaam aayaa vaaqia hai ki tiri zaat ne jiine na diyaa 'kaif' ke bhulne vaale ko khabar ho ki use sadma-e-tark-e-mulaaqaat ne jiine na diyaa"

"etakaaf mein zaahid munh chhupaae baiThaa hai ghaaliban zamaane se maat khaae baiThaa hai vaae-aashiq-e-naadaan kaaenaat ye teri ik shikasta shishe ko dil banaae baiThaa hai taalibaan-e-did un ke dhuup dhuup phirte hain ghair un ke kuche mein saae saae baiThaa hai is taraf bhi ai saahab iltifaat-e-yak-mizhgaan ik gharib mahfil mein sar jhukaae baiThaa hai dur-baash ai gulchin vaa hai dida-e-nargis aaj har gul-e-naazuk khaar khaae baiThaa hai kyuun sunaa nahin detaa faisla muqaddar kaa naama-bar mire aage khat chhupaae baiThaa hai subh ki havaa un se sirf itnaa kah denaa koi shama ki ab tak lau baDhaae baiThaa hai"

"daagh duniyaa ne diye zakhm zamaane se mile ham ko tohfe ye tumhein dost banaane se mile ham taraste hi taraste hi taraste hi rahe vo falaane se falaane se falaane se mile khud se mil jaate to chaahat kaa bharam rah jaataa kyaa mile aap jo logon ke milaane se mile maan ki aaghosh mein kal maut ki aaghosh mein aaj ham ko duniyaa mein ye do vaqt suhaane se mile kabhi likhvaane gae khat kabhi paDhvaane gae ham hasinon se isi hiile bahaane se mile ik nayaa zakhm milaa ek nai umr mili jab kisi shahr mein kuchh yaar puraane se mile ek ham hi nahin phirte hain liye qissa-e-gham un ke khaamosh labon par bhi fasaane se mile kaise maanein ki unhein bhuul gayaa tu ai 'kaif' un ke khat aaj hamein tere sirhaane se mile"

"jis pe tiri shamshir nahin hai us ki koi tauqir nahin hai us ne ye kah kar pher diyaa khat khuun se kyuun tahrir nahin hai zakhm-e-jigar mein jhaank ke dekho kyaa ye tumhaaraa tiir nahin hai zakhm lage hain khulne gulchin ye to tiri jaagir nahin hai shahr mein yaum-e-aman hai vaaiz aaj tiri taqrir nahin hai uudi ghaTaa to vaapas ho jaa aaj koi tadbir nahin hai shahr mohabbat kaa yuun ujDaa duur talak taamir nahin hai itni hayaa kyuun aaine se ye to miri tasvir nahin hai"

"teraa chehra subh kaa taaraa lagtaa hai subh kaa taaraa kitnaa pyaaraa lagtaa hai tum se mil kar imli miThi lagti hai tum se bichhaD kar shahad bhi khaaraa lagtaa hai raat hamaare saath tu jaagaa kartaa hai chaand bataa tu kaun hamaaraa lagtaa hai kis ko khabar ye kitni qayaamat Dhaataa hai ye laDkaa jo itnaa bechaara lagtaa hai titli chaman mein phuul se lipTi rahti hai phir bhi chaman mein phuul kanvaaraa lagtaa hai 'kaif' vo kal kaa 'kaif' kahaan hai aaj miyaan ye to koi vaqt kaa maaraa lagtaa hai"

"thoDaa saa aks chaand ke paikar mein Daal de tu aa ke jaan raat ke manzar mein Daal de jis din miri jabin kisi dahliz par jhuke us din khudaa shigaaf mire sar mein Daal de allaah tere saath hai mallaah ko na dekh ye TuuTi phuTi naav samundar mein Daal de aa tere maal o zar ko main taqdis bakhsh duun laa apnaa maal o zar miri Thokar mein Daal de bhaag aise rahnumaa se jo lagtaa hai khizr saa jaane ye kis jagah tujhe chakkar mein Daal de is se tire makaan kaa manzar hai bad-numaa chingaari mere phuus ke chhappar mein Daal de main ne panaah di tujhe baarish ki raat mein tu jaate jaate aag mire ghar mein Daal de ai 'kaif' jaagte tujhe pichhlaa pahar huaa ab laash jaise jism ko bistar mein Daal de"

"jhuum ke jab rindon ne pilaa di shaikh ne chupke chupke du'aa di ek kami thi taaj-mahal mein main ne tiri tasvir lagaa di aap ne jhuTaa vaa'da kar ke aaj hamaari 'umr baDhaa di haae ye un kaa tarz-e-mohabbat aankh se bas ik buund giraa di"

"is tarah mohabbat mein dil pe hukmaraani hai dil nahin miraa goyaa un ki raajdhaani hai ghaas ke gharaunde se zor-aazmaai kyaa aandhiyaan bhi pagli hain barq bhi divaani hai shaayad un ke daaman ne ponchh diin miri aankhein aaj mere ashkon kaa rang zaafraani hai puchhte ho kyaa baabaa kyaa huaa dil-e-zinda vo miraa dil-e-zinda aaj aan-jahaani hai 'kaif' tujh ko duniyaa ne kyaa se kyaa banaa Daalaa yaar ab tire munh par rang hai na paani hai"

"na aayaa maza shab ki tanhaaiyon mein sahar ho gai chand angDaaiyon mein na ranginiyon mein na raanaaiyon mein nazar ghir gai apni parchhaaiyon mein mujhe muskuraa muskuraa kar na dekho mire saath tum bhi ho rusvaaiyon mein ghazab ho gayaa un ki mahfil se aanaa ghiraa jaa rahaa huun tamaashaaiyon mein mohabbat hai yaa aaj tark-e-mohabbat zaraa mil to jaaein vo tanhaaiyon mein idhar aao tum ko nazar lag na jaae chhupaa luun tumhein dil ki gahraaiyon mein are sunne vaalo ye naghme nahin hain mire dil ki chikhein hain shahnaaiyon mein vo ai 'kaif' jis din se mere hue hain to saaraa zamaana hai shaidaaiyon mein"

"ye daaDhiyaan ye tilak dhaariyaan nahin chaltin hamaare ahd mein makkaariyaan nahin chaltin qabile vaalon ke dil joDiye mire sardaar saron ko kaaT ke sardaariyaan nahin chaltin buraa na maan agar yaar kuchh buraa kah de dilon ke khel mein khuddaariyaan nahin chaltin chhalak chhalak paDin aankhon ki gaagarein aksar sambhal sambhal ke ye panhaariyaan nahin chaltin janaab-e-'kaif' ye dilli hai 'mir' o 'ghaalib' ki yahaan kisi ki taraf-daariyaan nahin chaltin"

"tan-e-tanhaa muqaabil ho rahaa huun main hazaaron se hasinon se raqibon se ghamon se gham-gusaaron se unhein main chhin kar laayaa huun kitne daavedaaron se shafaq se chaandni raaton se phulon se sitaaron se sune koi to ab bhi raushni aavaaz deti hai pahaaDon se guphaaon se bayaabaanon se ghaaron se hamaare daagh-e-dil zakhm-e-jigar kuchh milte-julte hain gulon se gul-rukhon se mah-vashon se maah-paaron se kabhi hotaa nahin mahsus vo yuun qatl karte hain nigaahon se kanakhiyon se adaaon se ishaaron se hamesha ek pyaasi ruuh ki aavaaz aati hai kuon se panghaTon se naddiyon se aabshaaron se na aae par na aae vo unhein kyaa kyaa khabar bheji lifaafon se khaton se dukh bhare parchon se taaron se zamaane mein kabhi bhi qismatein badlaa nahin kartin umidon se bharoson se dilaason se sahaaron se vo din bhi haae kyaa din the jab apnaa bhi taalluq thaa dashahre se divaali se basanton se bahaaron se kabhi patthar ke dil ai 'kaif' pighle hain na pighleinge munaajaaton se fariyaadon se chikhon se pukaaron se"

"bimaar-e-mohabbat ki davaa hai ki nahin hai mere kisi pahlu mein qazaa hai ki nahin hai suntaa huun ik aahaT si baraabar shab-e-vaada jaane tire qadmon ki sadaa hai ki nahin hai sach hai ki mohabbat mein hamein maut ne maaraa kuchh is mein tumhaari bhi khataa hai ki nahin hai mat dekh ki phirtaa huun tire hijr mein zinda ye puchh ki jiine mein maza hai ki nahin hai yuun DhunDte phirte hain mire baad mujhe vo vo 'kaif' kahin teraa pata hai ki nahin hai"

"ham un ko chhin kar laae hain kitne daavedaaron se shafaq se chaandni-raaton se phulon se sitaaron se hamaare zakhm-e-dil daagh-e-jigar kuchh milte-julte hain gulon se gul-rukhon se mahvashon se maah-paaron se zamaane mein kabhi bhi qismatein badlaa nahin kartin umidon se bharoson se dilaason se sahaaron se sune koi to ab bhi raushni aavaaz deti hai guphaaon se pahaaDon se bayaabaanon se ghaaron se baraabar ek pyaasi ruuh ki aavaaz aati hai kuon se pan-ghaTon se naddiyon se aabshaaron se kabhi patthar ke dil ai 'kaif' pighle hain na pighleinge munaajaaton se fariyaadon se chikhon se pukaaron se"

"ham ko divaana jaan ke kyaa kyaa zulm na Dhaayaa logon ne diin chhuDaayaa dharm chhuDaayaa des chhuDaayaa logon ne teri gali mein aa nikle the dosh hamaaraa itnaa thaa patthar maare tohmat baandhi aib lagaayaa logon ne teri laTon mein so lete the be-ghar aashiq be-ghar log buDhe bargad aaj tujhe bhi kaaT giraayaa logon ne nur-e-sahar ne nikhat-e-gul ne rang-e-shafaq ne kah di baat kitnaa kitnaa meri zabaan par qufl lagaayaa logon ne 'mir-taqi' ke rang kaa ghaaza ru-e-ghazal par aa na sakaa 'kaif' hamaare 'mir-taqi' kaa rang uDaayaa logon ne"

"allaah ye kis kaa maatam hai vo zulf jo bikhri jaati hai aankhein hai ki bhigi jaati hain duniyaa hai ki Duubi jaati hai kuchh biite dinon ki yaadein hain aur chaaron taraf tanhaai si mehmaan hain ki aae jaate hain mahfil hai ki ujDi jaati hai tadbir ke haathon kuchh na huaa taqdir ki mushkil hal na hui naakhun hain ki TuuTe jaate hain gutthi hai ki uljhi jaati hai kyaa koi mohabbat mein yuun bhi benaam-o-nishaan ho jaataa hai main huun ki abhi tak zinda huun duniyaa hai ki bhuli jaati hai"

"khaanqaah mein suufi munh chhupaae baiThaa hai ghaaliban zamaane se maat khaae baiThaa hai qatl to nahin badlaa qatl ki adaa badli tiir ki jagah qaatil saaz uThaae baiThaa hai un ke chaahne vaale dhuup dhuup phirte hain ghair un ke kuche mein saae saae baiThaa hai vaae aashiq-e-naadaan kaaenaat ye teri ik shikasta shishe ko dil banaae baiThaa hai duur baarish ai gulchin vaa hai dida-e-nargis aaj har gul-e-nargis khaar khaae baiThaa hai"

"sirf itne jurm par hangaama hotaa jaae hai teraa divaana tiri galiyon mein dekhaa jaae hai aap kis kis ko bhalaa suuli chaDhaate jaaeinge ab to saaraa shahr hi mansur bantaa jaae hai dilbaron ke bhes mein phirte hain choron ke giroh jaagte rahiyo ki in raaton mein luuTaa jaae hai teraa mai-khaana hai yaa khairaat-khaana saaqiyaa is tarah miltaa hai baada jaise bakhshaa jaae hai mai-kasho aage baDho tishna-labo aage baDho apnaa haq maangaa nahin jaataa hai chhinaa jaae hai maut aai aur tasavvur aap kaa rukhsat huaa jaise manzil tak koi rah-rau ko pahunchaa jaae hai"

"dosto ab tum na dekhoge ye din khatm hain ham par sitam-aaraaiyaan chun liyaa ik ek kaanTaa raah kaa ho mubaarak ye barahna-paaiyaan ku-ba-ku mere junun ki azmatein us ki mahfil mein miri rusvaaiyaan azmat-e-suqraat-o-isaa ki qasam daar ke saae mein hain daaraaiyaan chaaraagar marham bharegaa tu kahaan ruuh tak hain zakhm ki gahraaiyaan 'kaif' ko daagh-e-jigar bakhshe gae allaah allaah ye karam-farmaaiyaan"

"kaam yahi hai shaam savere teri gali ke sau sau phere saamne vo hain zulf bikhere kitne hasin hain aaj andhere ham to hain tere pujne vaale paanv na paDvaa tere mere dil ko churaayaa khair churaayaa aankh churaa kar jaa na luTere"

"jism par baaqi ye sar hai kyaa karun dast-e-qaatil be-hunar hai kyaa karun chaahtaa huun phunk duun is shahr ko shahr mein in kaa bhi ghar hai kyaa karun vo to sau sau martaba chaahein mujhe meri chaahat mein kasar hai kyaa karun paanv mein zanjir kaanTe aable aur phir hukm-e-safar hai kyaa karun 'kaif' kaa dil 'kaif' kaa dil hai magar vo nazar phir vo nazar hai kyaa karun 'kaif' mein huun ek nuraani kitaab paDhne vaalaa kam-nazar hai kyaa karun"