Ghazal

"kab talak istikhaara karein aap kuchh to ishaara karein aap kyon chaahte hain ki ham aaine par guzaaraa karein dil ko samjhaaein sab khel hai aur phir dil ko haaraa karein yaad aate hain vo din bahut kyon na vo din dobaara karein khvaab mein hi sahi par kabhi aap khud ko pukaaraa karein aap hi jab nahin hain to phir kyon na ham bhi kinaara karein"

"yaqin kaun karegaa gumaan pe aayaa huun main apne aap se chhup kar yahaan pe aayaa huun mujhe bhi aql pareshaan karti rahti hai nahin nahin se guzar kar main haan pe aayaa huun mujhe vo dekh ke hairaan kyuun nahin hogaa zamin oDh ke main aasmaan pe aayaa huun ye baat tu hi bataa kis tarah bataaun tujhe main dil ke raaste teri zabaan pe aayaa huun na jaane kab se nahin mil sakaa huun main khud se main khud se milne tire aastaan pe aayaa huun ye iztiraab haqiqat mein iztiraab nahin khushi khushi main is aah-o-fughaan pe aayaa huun mujhe talaash na kar tu yahaan vahaan 'momin' nazar uThaa ki tire khvaab-daan pe aayaa huun"

"mujhe kisi ne bataayaa khudaa hai mere saath main kyaa bataaun use aur kyaa hai mere saath tujhe yaqin nahin aaegaa par haqiqat hai ye tu nahin hai koi dusraa hai mere saath ye mushkilaat bhi ab mere saath rahti hain ye jaanti hain ki mushkil-kushaa hai mere saath main kyaa bataaun tujhe yaad kyaa dilaaun tujhe tu jaantaa hai jo tu ne kiyaa hai mere saath agar vafaa ko bataaun vafaa bhi chikh paDe vafaa ke naam pe jo kuchh huaa hai mere saath sitam to ye hai ki main ne use bhi chhoD diyaa jo sab ko chhoD ke tanhaa khaDaa hai mere saath kisi se koi shikaayat nahin mujhe 'momin' jo honaa chaahiye vo ho rahaa hai mere saath"

"zamaane ko zamaane ki paDi hai hamein vaada nibhaane ki paDi hai ye duniyaa chaand par pahunchi hui hai tujhe lahore jaane ki paDi hai zaraa dekho idhar main jal rahaa huun tumhein aansu chhupaane ki paDi hai fasaana hi haqiqat ban gayaa hai haqiqat ko fasaane ki paDi hai abhi jo sher likkhaa bhi nahin hai abhi se vo sunaane ki paDi hai tire mehmaan vaapas jaa rahe hain tujhe mehmaan-khaane ki paDi hai vo tere dil mein aa baiThaa hai 'momin' tujhe divaar Dhaane ki paDi hai"

"tu agar meraa tazkira karegaa jhuuT bolegaa aur kyaa karegaa khud ko tu jaantaa nahin shaayad tu samajhtaa hai sab khudaa karegaa zakhm khaa kar bhi jo duaaein de kaun us kaa muqaabla karegaa kyaa use yaad bhi na aaungaa kyaa mujhe yaad vo kiyaa karegaa phir kahaan mil sakegaa vo mujh se jo mujhe aap se judaa karegaa apni jhuTi anaa ki khaatir to jaane kis kis se raabta karegaa dil hi aisaa hai baa-vafaa 'momin' bevafaa se bhi jo vafaa karegaa"

"main ne jab khvaab nahin dekhaa thaa tujh ko betaab nahin dekhaa thaa us ne simaab kahaa thaa mujh ko main ne simaab nahin dekhaa thaa hijr kaa baab hi kaafi thaa hamein vasl kaa baab nahin dekhaa thaa chaand mein tu nazar aayaa thaa mujhe main ne mahtaab nahin dekhaa thaa vo jo naayaab huaa jaataa hai us ko kamyaab nahin dekhaa thaa ek machhli hi nazar aai mujhe main ne taalaab nahin dekhaa thaa"

"dil denaa mushkil hotaa hai dil kaa bhi ik dil hotaa hai ham hote hain jab mahfil mein tu jaan-e-mahfil hotaa hai mauj mein aa kar sahraa bolaa mujh mein bhi saahil hotaa hai jis raste mein tum mil jaao vo rasta manzil hotaa hai dekh mujhe sab dekh rahe hain tu hi kyuun ghaafil hotaa hai koi nazar ho yaa khanjar ho qaatil to qaatil hotaa hai 'momin' tere chup hone se ik aalam saail hotaa hai"

"bandagi hogi maut se pahle maut ke baa'd zindagi hogi ham ko jis raah se guzarnaa hai koi mushkil vahaan khaDi hogi aaina bhi nazar jhukaa legaa haae kaisi barahnagi hogi aaj kar lo jo baat karni hai aaj divaar so rahi hogi Tuut jaaegaa khvaab aakhir-e-shab aur haqiqat vahin khaDi hogi dil to us ki sazaa bhi bhugtegaa ghalati aankh ne jo ki hogi aaj suraj ne kah diyaa 'momin' tu jalegaa to raushni hogi"

"ab kisi par nazar nahin jaati ek surat magar nahin jaati ye sadaa-e-faqir us dil tak jaane kyaa soch kar nahin jaati vo guzarti zarur hai dil se par vo dil se guzar nahin jaati chhoD aae hain vo gali lekin vo gali chhoD kar nahin jaati ek lamha kabhi nahin aataa ik ghaDi 'umr-bhar nahin jaati saath chalti hai saath chalne tak Therne par Thahar nahin jaati ek aavaaz ek hi aavaaz jo kabhi be-asar nahin jaati 'ishq ke saath 'aql bhi 'momin' ab kisi aur dar nahin jaati"

"jo hai vo kyuun hai aur jo nahin hai vo kyuun nahin ye jaan luun abhi mujhe aisaa junun nahin main kyaa huun aur kyuun huun mujhe is se kyaa gharaz is se bhi kyaa gharaz mujhe huun bhi ki huun nahin main chaahtaa huun maut jo aae miri taraf main maut ko gale se lagaa luun marun nahin jiine ki aarzu mujhe le aai hai yahaan main varna ek pal bhi yahaan par rahun nahin jis par hai kaaenaat kaa har raaz aashkaar vo kah rahaa hai haan to main kaise kahun nahin 'momin-miyaan' ye kaam nahin hai ye ishq hai kyaa soch mein paDe ho karun yaa karun nahin"

"kafan ki jeb bhi khaali nahin hai ye bad-hali hai khush-haali nahin hai to kyaa ye phuul khud hi khil gayaa thaa jo kahtaa hai koi maali nahin hai unhein mat dekh khush rahne de un ko tiri khaatir ye divaali nahin hai tiri tasvir jhuTi hai musavvir mire shahron mein hariyaali nahin hai vo ghar girne lagaa hai jis ki ham ne abhi buniyaad bhi Daali nahin hai to kyaa mujh ko sazaa degaa vo jis ne miri ik baat bhi Taali nahin hai tire baare mein jab sochaa to dekhaa ye raat aisi bhi ab kaali nahin hai na kar 'momin' yahaan koi tamaashaa ye duniyaa dekhne vaali nahin hai"

"phir se kahnaa kyaa samjhe ho tum mujh ko aisaa samjhe ho tum se pahle bhi yaan tum the tum khud ko pahlaa samjhe ho tum to azal se saath ho mere kyon khud ko tanhaa samjhe ho ye koi achchhi baat nahin hai tum jis ko achchhaa samjhe ho khvaab mein kyon aate ho mere kyaa mujh ko andhaa samjhe ho dar par pahre-daar biThaa kar darvaaze ko vaa samjhe ho yaa'ni main jitnaa samjhaa thaa tum bhi bas utnaa samjhe ho meri jaan yahi lamha hai tum jis ko lamha samjhe ho"

"main ne jis ko bhulaayaa huaa hai vo mujhe yaad aayaa huaa hai ye sitaare kahaan jaa rahe hain aasmaan saTpaTaayaa huaa hai aise hairat se mat dekh dil ko dil ne ye gham bhi khaayaa huaa hai mujh se puchho vo kyon muztarib hai us ne mujh ko bataayaa huaa hai jo ye kahtaa hai sab ban gayaa khud us ne khud ko banaayaa huaa hai tu mujhe DhunDtaa hi rahegaa tu ne khud ko chhupaayaa huaa hai bik gai hai vo tasvir 'momin' jis mein tu muskuraayaa huaa hai"

"bhalaa ab aur kahaan zindagi nazar aae tumhaare baa'd hamein kyaa koi nazar aae talaash jis ki hai bas vo nazar nahin aataa ye aur baat nazar ko vahi nazar aae ye hoshiyaar tujhe hoshiyaar samjheinge inhein kahaan tiri divaangi nazar aae guzar to aae hain teri gali se ham lekin jahaan bhi jaaein tiri hi gali nazar aae ye rah-guzar jo mire saath saath chalti thi tiri gali mein Thaharti hui nazar aae nazar gai thi hamaari jab aaine ki taraf use lagaa ki hamein bhi hami nazar aae vo to nahin thaa to phir kaun saath thaa mere koi to hogaa magar kab koi nazar aae tujhe dikhaai nahin de rahi magar 'momin' kalaam kar ki tujhe khaamushi nazar aae"

"aap ne jab kahaa ki khush huun main mujh ko aisaa lagaa ki khush huun main aaina dekhtaa huun hairat se khush hai ye aaina ki khush huun main laakh samjhaa rahaa huun main dil ko dil nahin maantaa ki khush huun main jaane kyaa kah rahaa thaa vo mujh se main ne bhi kah diyaa ki khush huun main dil to ye chaahtaa thaa vo bhi kahe main hi kahtaa rahaa ki khush huun main khush huun main jis ke lauT aane se vo nahin jaantaa ki khush huun main ab vo tujh se agar miraa puchhe tu bas itnaa bataa ki khush huun main aur kyaa chiiz hai khushi 'momin' khush hai mujh se khudaa ki khush huun main"

"chaand dhire se muskuraayaa hai chaand ko kaun yaad aayaa hai khvaab mein bhi nazar nahin aayaa raat jis ne mujhe jagaayaa hai ham nahin aae to gilaa kaisaa aap ne kab hamein bulaayaa hai jo likhaa hi nahin gayaa mujh se dil ne vo giit gungunaayaa hai tu ne mujh ko banaa diyaa insaan main ne tujh ko khudaa banaayaa hai tum se mil kar main us ko bhuul gayaa jis ne tum se mujhe milaayaa hai Thair kar dekh to zaraa 'momin' main nahin huun ye teraa saaya hai"

"aaj phir us dil-nashin par aa gayaa hai dil jahaan thaa phir vahin par aa gayaa hai ek shahzaade khudaa ke aasare par kufiyon ki sarzamin par aa gayaa hai sar nigun jab se kiyaa hai tere aage aasmaan meri jabin par aa gayaa hai vo jo kal tak haan mein haan kartaa thaa meri aaj to vo bhi nahin par aa gayaa hai khvaab mein iblis ne aa kar bataayaa aadmi aadam ke diin par aa gayaa hai tujh se pahle bhi makaan khaali nahin thaa tu magar is ke makin par aa gayaa hai mujh se 'momin' kaa pata kyaa puchhte ho aankh kholo vo yahin par aa gayaa hai"

"raasta ye bataa rahaa hai mujhe ve bahut DhunDhtaa rahaa hai mujhe paas rah kar na paas aayaa to duur se kyaa bulaa rahaa hai mujhe jhaank kar dekh apni aankhon mein chhup ke tu dekhtaa rahaa hai mujhe bhuul baiThaa huun us ki sab baatein ve magar yaad aa rahaa hai mujhe kyaa bataaun chhupaa hai mujh mein kaun kaun mujh mein chhupaa rahaa hai mujhe main ne chaahaa sunaaun kuchh dil ko dil bhi apni sunaa rahaa hai mujhe main jahaan bhi gayaa tujhe paayaa tu bhi kyaa yuun hi paa rahaa hai mujhe kuchh nazar mein nahin rahaa 'momin' hijr kyaa kyaa dikhaa rahaa hai mujhe"

"ab vo pahli si shiddat kahaan hai hijr mein ve tamaazat kahaan hai ham to Thahre sadaa ke gadaagar tu bataa teri daulat kahaan hai dekh kar chaand jaltaa thaa jis ko aaj vo khubsurat kahaan hai saans khud hi chali aa rahi hai saans lene ki fursat kahaan hai aaina main ne dekhaa to dekhaa saare 'aalam ki hairat kahaan hai ab to bas ek dil hi bachaa hai aur vo bhi salaamat kahaan hai aadmi to nazar aa rahe hain haan magar aadmiyyat kahaan hai DhunDne se jo mil jaae 'momin' DhunD lenaa mohabbat kahaan hai"

"sab mujhe aarzi saa lagtaa hai tu magar zindagi saa lagtaa hai aaina hai magar na jaane kyuun aadmi aadmi saa lagtaa hai khud ko kitnaa bhulaa diyaa main ne tu bhi ab ajnabi saa lagtaa hai ishq mein zindagi basar karnaa aql ko khud-kushi saa lagtaa hai jo tire hijr mein milaa 'momin' bas vahi gham khushi saa lagtaa hai"

"vaqt saakin hai main guzar rahaa huun main to is aagahi se mar rahaa huun bol kar jo mujhe dabaa rahaa hai us ki aavaaz se ubhar rahaa huun aaina mujh ko dekh kar chup hai jaane main kis se baat kar rahaa huun main ye samjhaa thaa vo Thahar rahaa hai ve ye samjhaa thaa main Thahar rahaa huun ik parinda banaayaa kaaghaz par aur ab us ke par katar rahaa huun us ne vaada nahin liyaa mujh se aur kahtaa hai main mukar rahaa huun teri tasvir naa-mukammal hai main abhi is mein rang bhar rahaa huun jo tujhe jaantaa nahin 'momin' vo samajhtaa hai tujh se Dar rahaa huun"

"jab dekho chhup jaataa hai tu mujh se kyaa sharmaataa hai tu tere yaar hain tere jaise khud ko kaisaa paataa hai tu main ne us ko bhi dekhaa hai jis ki qasmein khaataa hai tu haan mujh ko maalum nahin hai meri ghazlein gaataa hai tu dil to apne aap mein gum hai ab kis ko taDpaataa hai tu khvaab mein hi jab milnaa hai to aankhein kyuun khulvaataa hai tu kaise kaise main bhulaa huun kaise yaad aa jaataa hai tu aisaa bhi kyaa chhupnaa 'momin' DhunDo to mil jaataa hai tu"

"is ki aankhon pe vaar dein aankhein ik nazar hi mein haar dein aankhein dil mujhe us ne be-qaraar diyaa aur be-ikhtiyaar diin aankhein pahle chehra chhupaa liyaa us ne baad mein ishtihaar diin aankhein dil vahin rah gayaa jahaan ham ne sarsari si guzaar diin aankhein khvaab mere churaa liye us ne jis ko main ne udhaar diin aankhein main ne aankhon mein jhaanknaa chaahaa us ne dil mein utaar diin aankhein main to khaamosh hi rahaa lekin vaqt-e-rukhsat pukaar diin aankhein tu bhi 'momin' kamaal kartaa hai tu ne suraj se chaar diin aankhein"

"main apne aap ko pahchaan hi nahin paayaa isi liye main tujhe jaan hi nahin paayaa ye dekh kar vo pareshaan hai teri mahfil mein kisi ko us ne pareshaan hi nahin paayaa abhi se tujh ko paDi hai visaal ki miri jaan abhi to hijr ne unvaan hi nahin paayaa vo ek lamha miri zindagi pe taari hai jo ek lamha abhi aan hi nahin paayaa khushi khushi tiri duniyaa ko chhoD aae ham khushi kaa jab koi saamaan hi nahin paayaa javaaz mil na sakaa mujh ko apne hone kaa so apne aap ko insaan hi nahin paayaa ajiib hijr kiyaa ham ne hijr mein 'momin' visaal-e-yaar kaa armaan hi nahin paayaa"