Ghazal

"hamaaraa zikr jo aaya to yuun pukaaraa vo anaa-parast farebi sukhan kaa maaraa vo dhuein mein Dhaltaa huaa be-imaan dipak main falak-nashin chamaktaa huaa sitaaraa vo shab-e-visaal kaa tum maangte ho ham se hisaab magar jo vaqt tumhaare binaa guzaaraa vo 'ajib rishte ne baandhaa huaa hai donon ko main naqsh dhuup kaa shabnam kaa isti'aara vo samajh rahaa thaa jise main bas ek mauj-e-saraab jaDein ukhaaD gayaa meri tez dhaaraa vo na jaane kis ki nazar ko fareb detaa hai hamaari aankh se ojhal huaa nazaaraa vo jhalak rahaa thaa jo tasvir se miri 'irfaan' hai ek khvaab se mansub rang saaraa vo"

"har kisi se to mohabbat nahin hoti mujh se aur tabdil ye 'aadat nahin hoti mujh se apni vahshat kaa sabab khuub samajhtaa huun magar koi puchhe to vazaahat nahin hoti mujh se ik faqat vo hai miri saari kharaabi kaa sabab ik faqat us se shikaayat nahin hoti mujh se mujh ko har gaam pe rahti hai zarurat apni aur puuri ye zarurat nahin hoti mujh se tirgi thoDi bahut phir bhi main kar letaa huun raushni to kisi surat nahin hoti mujh se 'umr-dar-'umr yuun be-rang huaa jaataa huun apne rangon ki hifaazat nahin hoti mujh se"

"saath bahti nadi ke dhaare se guftugu kijiye nazaare se main ki duniyaa ki samt jaataa thaa us ne rokaa mujhe ishaare se aa giraa raushni kaa ik TukDaa mere ghar TuuT kar sitaare se thi zamin sukhne pe aamaada kyaa shikaayat ho abr-paare se din Dhalaa aur ghar ko lauT aae TuuTe TuuTe se haare haare se Dubti kashtiyon ke hamraahi jaa lage khud-bakhud kinaare se shab-bhar aakaash par chamakte hain din mein phirte hain maare-maare se"

"ho din ki chaahe raat koi masala nahin mere liye hayaat koi masala nahin uljhaa huaa huun kab se savaalon ke dasht mein kaise kahun main zaat koi masala nahin chalnaa hai saath saath ki raahein badal lein ham tu soch mere saath koi masala nahin jo ho mufid aap vahi faisla karein maanein na meri baat koi masala nahin sahraa ki tez dhuup mujhe aa gai hai raas jangal ki sard raat koi masala nahin 'irfaan' apne saath kabhi rah ke dekhnaa khud se taalluqaat koi masala nahin"

"raat ik haadsa huaa mujh mein ek darvaaza saa khulaa mujh mein mere andar charaagh jalte hain raqs karti hai ik havaa mujh mein phir se aakaar le rahaa hai kahin ek chehra nayaa nayaa mujh mein mujh ko ye kaam khud hi karnaa thaa umr bhar kaun jaagtaa mujh mein ab bhi siina jalaa rahaa hai miraa ek suraj bujhaa huaa mujh mein jaane vo kaun hai jo rahtaa hai sahmaa sahmaa Daraa Daraa mujh mein"

"ik saaya mere jaisaa hai jo meraa pichhaa kartaa hai ab shor se aajiz sannaaTaa kaanon mein baatein kartaa hai ik moD hai raste ke aage us moD ke aage rasta hai main ek Thikaana DhunDtaa huun jo sahraa hai na hi dariyaa hai ik khvaab ki vahshat hai jis mein khud ko hi marte dekhaa hai ye qissa jhuuT sahi lekin sunne mein achchhaa lagtaa hai"

"dhund hai yaa dhuaan samajhtaa huun vusat-e-aasmaan samajhtaa huun ishq ki lazzaton se huun vaaqif dard-o-aah-o-fughaan samajhtaa huun gharq hote jahaaz dekhe hain sail-e-vaqt-e-ravaan samajhtaa huun guftugu kartaa huun darakhton se panchhiyon ki zabaan samajhtaa huun vo kamaal-e-shuur-e-paaya hai an-kahi daastaan samajhtaa huun"

"kabhi jo mil na saki us khushi kaa haasil hai ye dard hi to miri zindagi kaa haasil hai main apne aap se pichhaa nahin chhuDaa paayaa miraa vajud miri bebasi kaa haasil hai ye tirgi bhi kisi raushni se nikli hai ye raushni bhi kisi tirgi kaa haasil hai hazaar kaavishein kiin par nahin samajh paayaa koi bataae to kyaa aadmi kaa haasil hai miraa vajud jo patthar dikhaai detaa hai tamaam umr ki shishagari kaa haasil hai maaashre mein jo mashhur ho gayaa 'irfaan' vo ek sher tiri shaairi kaa haasil hai"

"khud apne saath dhoka kyuun karun main kisi saae kaa pichhaa kyuun karun main use main bhuul jaanaa chaahtaa huun magar khud par bharosa kyuun karun main kabhi sochun ki khud mein lauT aauun kabhi sochun ki aisaa kyuun karun main"

"haadsa kaun saa huaa pahle raat aai ki din Dhalaa pahle ab main paani talaash kartaa huun bhuuk thi meraa masala pahle khvaab the meri dastaras mein do main ne dekhaa thaa dusraa pahle ab to vo bhi nazar nahin aataa dikh rahaa thaa jo raasta pahle ab to ye bhi qadim lagtaa hai kis qadar shahr thaa nayaa pahle is se pahle ki TuTti ummid TuuT jaanaa thaa hausla pahle phuul ke zakhm baad mein pochhein haath kaanTon se chhil gayaa pahle"

"balaa ki dhuup thi main jal rahaa thaa badan us kaa thaa aur saaya miraa thaa kharaabe mein thaa ik aisaa kharaaba jahaan main sab se chhup ke baiThtaa thaa bahut nazdik the tasvir mein ham magar vo faasla jo dikh rahaa thaa jahaazi qaafila Duubaa thaa pahle samundar baad mein uupar uThaa thaa zamin-o-aasmaan saakit paDe the mire kamre kaa pankhaa chal rahaa thaa use bhi ishq ki aadat nahin thi miraa bhi pahlaa pahlaa tajraba thaa mujhe jab tak talaashaa raushni ne main puuraa tirgi kaa ho chukaa thaa"

"kyaa kisi baat ki sazaa hai mujhe raasta phir bulaa rahaa hai mujhe zinda rahne ki mujh ko aadat hai roz marne kaa tajraba hai mujhe itnaa gum huun ke ab miraa saayaa mere andar bhi DhunDtaa hai mujhe chaand ko dekh kar yuun lagtaa he chaand se koi dekhtaa hai mujhe pahle to justuju thi manzil ki ab koi kaam dusraa he mujhe ye miri niind kis maqaam pe hai khvaab mein khvaab dikh rahaa hai mujhe aaine mein chhupaa huaa chehra aisaa lagtaa hai jaantaa hai mujhe"

"tanhaa raaton ko bahar-haal javaan karnaa hai raushni kar na sake ham to dhuaan karnaa hai kaash yaad aae koi bichhDaa musaafir ki hamein aankh mein Thahre hue nam ko ravaan karnaa hai aur ik khvaab ko lafzon mein numu deni hai aur ik raat ko aankhon se bayaan karnaa hai ek tasvir banaani hai kisi saae ki aur tasvir ke rangon ko 'ayaan karnaa hai kaun samjhaae bhalaa ye nae divaanon ko khaak uDaani hai kidhar raqs kahaan karnaa hai"

"khiDkiyaan kholin ki dekhein raunaqein us paar ki raushni aane lagi ghar mein magar baazaar ki ik tasalsul hai jo kaanon se judaa hotaa nahin gunjti rahti hon jaise siskiyaan bimaar ki aankh mein chubhne lage hain tirgi ke khaal-o-khad aap ne jangal mein aa ke raushni bekaar ki raat-bhar palkon pe meri ik dhuaan raushan rahaa raat-bhar takti rahi mujh ko nazar divaar ki titliyon mein rang bhi bharne nahin deti hamein zehn mein baiThi hui surat kisi bezaar ki"

"siyaah raat ko rangin karne vaalon mein hamaare khvaab bhi shaamil hain marne vaalon mein kahaan se hausla aaya hai jang laDne kaa havaa-e-sard ki aahaT se Darne vaalon mein zaraa shu'ur jo hotaa to baat bhi karte falaah-e-'aam mein taqrir karne vaalon mein bulandiyon pe khaDe hain jo sab se aage the gumaan-o-vahm kaa ziina utarne vaalon mein bataaeinge kise mujrim ki khud bhi shaamil hain ham apni ruuh ki tadfin karne vaalon mein"

"ham ki har dam tiri khushbu se bhare rahte hain khushk mausam mein isi taur hare rahte hain jin ke hone se huaa diid kaa dariyaa raushan haae vo log hi aankhon se pare rahte hain dasht-e-khaamosh mein ug aaegaa aavaaz kaa phuul isi ummid pe sab kaan dhare rahte hain phir achaanak hi chalaa aataa hai vo hijr kaa din jis ke imkaan se har raat Dare rahte hain bhule jaate hain vahi kaam jo laazim ho bahut aur jo ghair-zaruri ho kare rahte hain sabz ho jaate hain sab khvaab sahar hote hi raat ke vaqt jo kambakht mare rahte hain"

"qalb ki banjar zamin par khvaahishein bote hue khud ko aksar dekhtaa huun khvaab mein rote hue dasht-e-viraan kaa safar hai aur nazar ke saamne moajaze dar moajaze dar moajaze hote hue gaamzan hain ham musalsal ajnabi manzil ki or zindagi ki aarzu mein zindagi khote hue kal mire ham-zaad ne mujh se kiyaa dilkash savaal kis ko detaa huun sadaaein raat bhar sote hue ast hotaa jaa rahaa hai ek suraj us taraf is taraf vo dikh rahaa hai phir uday hote hue"

"ik parinda shaakh par baiThaa huaa hasraton se aasmaan taktaa huaa ik sadi ki daastaan kahtaa huaa ik shajar daalaan mein sukhaa huaa ik zamin pairon talak simTi hui ik samundar duur tak phailaa huaa ik kahaani phir janam leti hui ik fasaana dafn phir hotaa huaa ik kiran aflaak se aati hui ik andheraa chaand par baiThaa huaa ik zamin do buund ko tarsi hui ik nagar sailaab mein Duubaa huaa ek kashti gharq-e-khun hoti hui ik masihaa chhoD kar jaataa huaa ek chiDiyaa chahchahein karti hui ik shikaari taaq mein baiThaa huaa ik gilahri peD par chaDhti hui ik musavvir soch mein Duubaa huaa ik Dagar su-e-falak jaati hui ik sitaara baam par utraa huaa ik ghazal phir dastakein deti hui ik tasavvur phir badan letaa huaa"

"tanhaa tanhaa sahmi sahmi khaamoshi jaisi hain aavaazein vaisi khaamoshi tanhaai mein chaunkaa deti hai aksar sannaaTe se baatein karti khaamoshi be-maqsad mahfil se behtar tanhaai be-matlab baaton se achchhi khaamoshi do aavaaze hamraahi ik raste ki aur donon ke beach mein chalti khaamoshi chupke chupke ghar ko Dasti rahti hai darvaaze ki divaaron ki khaamoshi khaamoshi ke zabt se Darti aavaaze aavaazon ke shor se Darti khaamoshi"

"raat-bhar rone kaa din thaa phir judaa hone kaa din thaa fasl-e-gul aane ki shab thi khushbuein bone kaa din thaa tishnagi piine ki shab thi aabju hone kaa din thaa guftugu karne ki shab thi khaamushi Dhone kaa din thaa qaafila chalne ki shab thi haadsa hone kaa din thaa raat ke jangal se aage chain se sone kaa din thaa"

"aahon ki aazaaron ki aavaazein thiin raah mein gham ke maaron ki aavaazein thiin duur khalaa mein ek siyaahi phaili thi basti mein angaaron ki aavaazein thiin aankhon mein khvaabon ne shor machaayaa thaa aasmaan par taaron ki aavaazein thiin ghar ke baahar aavaazein thiin raston ki aur ghar mein divaaron ki aavaazein thiin ab mujh mein ik sannaaTe ki chikhein hai pahle kuchh bimaaron ki aavaazein thiin us basti pe majburi kaa saaya thaa ghar ghar mein baazaaron ki aavaazein thiin"