Ghazal

"har ek shakhs miraa shahr mein shanaasaa thaa magar jo ghaur se dekhaa to main akelaa thaa vo khvaab aish-e-tarab kaa jo ham ne dekhaa thaa haqiqaton se pare thaa hasin dhokaa thaa khudaa hamein bhi dikhaa de vo daur kaisaa thaa khulus-o-mehr kaa har shakhs jis mein dariyaa thaa sitam bhi mujh pe vo kartaa rahaa karam ki tarah vo mehrbaan to na thaa mehrbaan jaisaa thaa guzishta raat bhi ham ne yunhi guzaari thi zamin ko farsh kiyaa aasmaan oDhaa thaa usi ko matlabi 'taabaan' kahaa zamaane ne duaa salaam jo chhoTe baDe se rakhtaa thaa"

"lab par un kaa naam nahin hai chain nahin aaraam nahin hai laakh bachaao mujh se daaman meri mohabbat khaam nahin hai dil hai pareshaan un ki khaatir pal bhar ko aaraam nahin hai meri mohabbat un par kaamil ishq miraa naakaam nahin hai mushkil hai har koi dekhe us kaa jalva aam nahin hai paikar-e-ulfat huun main 'taabaan' nafrat meraa kaam nahin hai"

"vafaa kaa miri kyaa silaa dijiyegaa gham-e-dil ki lazzat baDhaa dijiyegaa mujhe dekh kar muskuraa dijiyegaa yunhi meri hasti miTaa dijiyegaa sila dil lagaane kaa kyaa dijiyegaa sitam dijiyegaa sazaa dijiyegaa sukun ki talab mujh ko hargiz nahin hai bas ik dard kaa silsila dijiyegaa khushi baanTne ke nahin aap qaail to gham hi mujhe kuchh sivaa dijiyegaa mujhe kyaa khabar thi ki khud lauh-e-dil par miraa naam likh kar miTaa dijiyegaa sukun qalb ko jis se mil jaae 'taabaan' ghazal koi aisi sunaa dijiyegaa"

"pyaar kaa ik pal sukun-e-zindagi de jaaegaa khatm jo hone na paae vo khushi de jaaegaa vo khulus-o-mehr kaa paikar banaam-e-dostaan dushmanon ko bhi shuur-e-dosti de jaaegaa husn-e-fitrat jalva-gar ho kar yaqinan ik din rang kaliyon ko gulon ko dilkashi de jaaegaa aaegaa vo din hamaari zindagi mein bhi zarur jo andheron ko miTaa kar raushni de jaaegaa vo bhi lamha aaegaa 'taabaan' rah-e-hasti mein jo tere pazhmurda labon ko ko de jaaegaa"

"mere lab par agar kabhi aai raqs karti hui hansi aai un ke mujh par sitam baDhe jab se dard dil mein bahut kami aai hanste hanste nikal paDe aansu rote rote kabhi hansi aai raqs karne lage mire armaan yaad jab un ki jhumti aai mishal-e-raah ban ke ai 'taabaan' un ke jalvon ki raushni aai"

"bahaar ban ke mire har nafas pe chhaai ho ajab adaa se miri zindagi mein aai ho tumhaaraa husn vo tasvir-e-husn-e-kaamil hai khudaa ne khaas hi lamhon mein jo banaai ho sharaab hai na subu hai magar ye aalam hai kisi ne jaise nigaahon se mai pilaai ho tiri tarah hi gurezaan hai niind bhi mujh se qasam hai teri jo ab tak qarib aai ho tu us nigaah se pi vaqt-e-mai-kashi 'taabaan' ki jis nigaah pe qurbaan paarsaai ho"

"honge vo jalva-gar kabhi na kabhi aaeinge baam par kabhi na kabhi ye yaqin hai ki meri ulfat kaa hogaa un par asar kabhi na kabhi khinch laaegaa meraa jazba-e-dil tujh ko ai be-khabar kabhi na kabhi laakh ham se chhupaa to phir kyaa hai DhunD legaa nazar kabhi na kabhi sher-goi ko aap ki 'taabaan' hogaa haasil samar kabhi na kabhi"

"sitam hai apnaa kisi ne banaa ke luuT liyaa miri nazar se nazar ko milaa ke luuT liyaa harim-e-naaz ke parde mein jo nihaan thaa kabhi usi ne shokh adaaein dikhaa ke luuT liyaa rahaa na hosh mujhe us ke baad phir kuchh bhi ki jab kisi ne muqaabil mein aa ke luuT liyaa ajiib naaz se ulTi naqaab-e-rukh is ne ki mujh ko ruh-e-munavvar dikhaa ke luuT liyaa lo ham bhi aaj to 'taabaan' fareb khaa baiThe kisi ne yunhi mohabbat se jaa ke luuT liyaa"

"ilaahi khair ho ab apne aashiyaane ki nigaahein us ki taraf phir uThin zamaane ki havaa-e-tund guzar jaae sar-nigun ho kar ik aisaa aashiyaan koshish karo banaane ki khizaan ke aane se ho jaaein gham-zada jo phuul unhein qasam hai bahaaron mein muskuraane ki kisi ki barq-e-nazar se na bijliyon se jale kuchh is tarah ki ho taamir aashiyaane ki vo puchhte hain ki din kis tarah guzarte hain ye koi baat hai 'taabaan' unhein bataane ki"

"rahbaro bolo maajraa kyaa hai ye fasaadon kaa silsila kyaa hai sidq dil se agar na ho aabid un duaaon kaa aasraa kyaa hai kuchh samajh mein miri nahin aataa dil lagaane se faaeda kyaa hai Thokarein gardishein gham-o-aalaam aur taqdir mein likhaa kyaa hai ji to ye chaahtaa hai mar jaaein zindagi ab tiri razaa kyaa hai ishq imaan hai miraa naaseh dil dukhaane se faaeda kyaa hai aaj maghmum kyuun ho ai 'taabaan' kuchh to bolo ki maajraa kyaa hai"

"vo koi husn hai jis husn kaa charchaa na huaa us kaa kyaa ishq hai jo ishq mein rusvaa na huaa teraa aanaa jo mire paas masihaa na huaa thaa jo bimaar kisi se magar achchhaa na huaa yuun to mushtaaq rahe kitnaa hi us kuche ke par guzar mere sivaa aur kisi kaa na huaa shaayad aa jaae kabhi dekhne vo rashk-e-masih main kisi aur se is vaaste achchhaa na huaa sher kahte hue ik umr hui 'taabaan' ko haae afsos ki is kaam main pukhta na huaa"

"aap ko apnaa banaate hue Dar lagtaa hai dil ki duniyaa bhi basaate hue Dar lagtaa hai lag na jaae kahin in phulon ko duniyaa ki nazar daagh-e-dil apne dikhaate hue Dar lagtaa hai ho na jaae kahin hangaama-e-mahshar barpaa apni rudaad sunaate hue Dar lagtaa hai tapish-e-husn na parvaana banaa de mujh ko us ke nazdik bhi jaate hue Dar lagtaa hai gharq ho jaae na duniyaa-e-tasavvur apni ashk-e-gham aankh mein laate hue Dar lagtaa hai shaghl thaa dasht-navardi kaa kabhi ai 'taabaan' ab gulistaan mein bhi jaate hue Dar lagtaa hai"

"kahin charchaa hamaaraa ho na jaae mohabbat aashkaara ho na jaae kahin us kaa nazaaraa ho na jaae ye dil qurbaan hamaaraa ho na jaae na dekho tirchhi nazron se khudaaraa miraa dil paaraa paaraa ho na jaae na paD jaaein jigar ke apne laale kahin us kaa ishaaraa ho na jaae na dekho pyaar ki nazron se Dar hai hamaaraa dil tumhaaraa ho na jaae fidaa dil zulf-e-shab-gun par tumhaari kahin aafat kaa maaraa ho na jaae tumhein dil de to de 'taabaan' ye Dar hai hamesha ko tumhaaraa ho na jaae"

"nae charaagh nai raushni ataa karte agar puraane diye un se kuchh vafaa karte main zindagi tere ehsaan mein dabaa hi rahaa ik umr guzri tiraa qarz bhi adaa karte tujhe bhi aate musaafir salaam manzil ke ba-sad-khulus jo tere qadam uThaa karte khudi pasand anaasir hayaat ki khaatir jo ehtijaaj na karte to aur kyaa karte samajh se kaam jo letaa har ek bashar 'taabaan' na haahaa-kaar hi machte na ghar jalaa karte"

"mujh se hi mujh ko ab to milaataa nahin koi ik aaina bhi mujh ko dikhaataa nahin koi kyaa jaane kyaa hue vo sharaafat pasand log ab khairiyat bhi un ki bataataa nahin koi is khauf mein ki khud na bhaTak jaaein raah mein bhaTke huon ko raah dikhaataa nahin koi sachchaaiyon ke raaste sunsaan ho gae bhule se bhi yahaan nazar aataa nahin koi hassaas hain jo aap to chehre paDhaa karein zakhmon ko apne aap dikhaataa nahin koi naakaamiyon ki sej pe baiThaa huun is liye 'taabaan' yahaan se mujh ko uThaataa nahin koi"