Ghazal

"gham-e-nashaat do-'aalam se maavaraa saa lagaa vo jhurriyon se bharaa chehra aaina saa lagaa tilism lutf-o-'inaayat kaa TuTtaa saa lagaa tumhaaraa ruuTh ke jaanaa baDaa bhalaa saa lagaa vo kyaa hai kaise bataaein bas is qadar samjho kabhi badan kabhi khushbu kabhi khalaa saa lagaa main jis kaa naam pata puchhtaa rahaa sab se vo ajnabi to mujhi mein chhupaa huaa saa lagaa koi to baat yaqinan thi us ke chehre mein jise ragon kaa lahu jhaanktaa huaa saa lagaa ye meraa vahm sahi lekin aisaa vahm bhi kyaa har ek shakhs mujhe khud se kuchh khafaa saa lagaa jo naam vird-e-zabaan aaj tak rahaa 'hairat' vo naam aaj achaanak nayaa nayaa saa lagaa"

"qarnon puraanaa vaqt ko lalkaartaa huaa ik shahr hai hamaare bhi andar basaa huaa suljhaa rahaa thaa arz-o-samaa ki vo gutthiyaan sabhi sab ke liye khud ek mo'amma banaa huaa shaayad nizaam-e-shamsi ke siine kaa khvaab thaa main dekhtaa rahaa jise aankhein banaa huaa ab us ko aaftaab mein Dhalne kaa hukm do ik ashk-e-gham hai nok-e-mizha par khaDaa huaa khud mein na jazb kar luun kahin teri zaat ko sar-taa-qadam main zauq-e-talab mein rachaa huaa phir chhaa rahaa hai zehn par ik saaya dosto sab kuchh sameTtaa huaa khud phailtaa huaa tanhaa tumhin to markaz-e-asraar-e-dil na the main bhi vahin kahin thaa tumhein dekhtaa huaa ruhein na jaane kaun si duniyaa mein kho gaiin ik jism chikhtaa hai saDak par paDaa huaa kab tak rahun hazaar jahaan-dar-jahaan liye main darmiyaan azal aur abad ke khaDaa huaa ummid koi harf-o-hikaayat se thi kise lekin nigaah-e-naaz tujhe bhi ye kyaa huaa aankhon mein aa ke jaan khaDi dekhti rahi haathon se daaman-e-gham-e-dil chhuTtaa huaa 'hairat' kahaan the dast-ba-dil dekhte hue'' baarish mein bhigtaa huaa sho'la banaa huaa"

"taslim un aankhon kaa ejaaz-e-masihaai lekin ye bataa aakhir kis kis ne shifaa paai viraana-e-hasrat mein tum kaise chale aae ho jaae na phir barham mujh se miri tanhaai har shahr-e-nigaaraan kaa dastur yahi dekhaa chup rahiye to mahrumi kuchh kahiye to rusvaai malhuz-e-nazar jab tak aadaab rahe gham ke jiine se bhi sharmaae marte bhi hayaa aai tafsir-e-junun 'hairat' mauzu’ hi aisaa thaa duniyaa miri baaton par mushkil se yaqin laai"

"kal aasmaan jaise koi sho'la-zaar thaa suraj ke Dubne mein bhi kitnaa vaqaar thaa is anjuman mein chhanti hamaari to kis ke saath kamzoriyon kaa naam vahaan inkisaar thaa hotaa bhalaa na 'arsh pe us kaa dimaagh kyon aakhir vo barg-e-khushk havaaon kaa yaar thaa har chand us ki aanch se ruhein jhulas gaiin jismon kaa lams phir bhi baDaa khush-gavaar thaa itnaa bhi koi shakhs na tanhaa ho ziist mein saaraa jahaan raat miraa gham-gusaar thaa 'hairat' kuchh us kaa haal hamein bhi sunaaiye jis baada-kash ko baada-parasti se 'aar thaa"

"kisi nashshe se beshtar to na thaa rishta-e-gham bhi mo'atabar to na thaa mere anjaam unhein fareb na de kam-basar thaa main kam-nazar to na thaa kam to pahle bhi the na ahl-e-junun lekin ab tak junun hunar to na thaa apni har khud-supurdagi ki qasam main jahaan thaa vo meraa ghar to na thaa ham the raahein taraashne ke liye shaamil is farz mein safar to na thaa saae logon ke sar pe kis ne kiye duur tak ek bhi shajar to na thaa khaak par gir ke miT gayaa aakhir ashk phir ashk thaa guhar to na thaa vaadi-e-marg kyon adam Thahri zindagi se vahaan mafar to na thaa vaqt ki baat hai miyaan 'hairat' dil lagaane mein aisaa Dar to na thaa"

"aankh mein aansu nazar mein dard paidaa kar gayaa meraa hansne kaa iraada kyaa ghazab Dhaa kar gayaa main ne barsaaton mein jalte ghar kabhi dekhe na the main isi baa'is tire gham ko gavaaraa kar gayaa meri koshish thi muqaddar ko nai jihatein milin aur isi koshish mein khud ko be-sar-o-paa kar gayaa khush-yaqini bhi khilaa deti hai kaise kaise gul ek din vallaah main khud par bharosaa kar gayaa baat usulon ki nahin hai baat kuchh qadron ki hai khvaab jhuTe the magar main un ko sachchaa kar gayaa bas yahi surat chhupaane ki inhein nikli ki main har kisi ke saamne zakhmon ko nangaa kar gayaa muddaton meri hayaat ummid kaa mehvar rahi phir koi shakhs aa ke 'hairat' sab kuchh ulTaa kar gayaa"

"naadaaniyon ko ek nayaa rang de diyaa daanista main ne haath tah-e-sang de diyaa meraa khayaal thaa ye koi nek kaam hai main ne tumhaare dard ko aahang de diyaa duniyaa mein aur mujh mein phir ik baar Than gai fitrat ne mere haath mein phir chang de diyaa ai zindagi bas ab mire daaman ko chhoD de jab tak banaa khushi se tiraa sang de diyaa patthar hi thaa vo jis pe main bikhraa thaa TuuT kar logon ne us ko rutba-e-aurang de diyaa 'hairat' jab apnaa jaadu jagaane pe aae hain jiine ko ham ne martaba-e-jang de diyaa"

"kahin khalaa mein koi ruuh chikhti hogi miraa khayaal hai ab shaam Dhal chuki hogi paDhaa to thaa kahin main ne kisi faqir kaa qaul baghaavaton ki nigahbaan supurdagi hogi main khud se mahv-e-takallum thaa be-hijaabaana mujhe khabar na thi duniyaa bhi sun rahi hogi mire vajud ko aahang bhi usi ne diyaa mire adam kaa sabab bhi yahi sadi hogi abhi abhi jo sar-e-rahguzar mili thi mujhe vo dhuup chhaanv ki murat kahaan gai hogi safina-e-vaqt kise apne munh lagaataa hai hamin ne phir koi baat aisi vaisi ki hogi hayaat mein vo maqaam aa rahaa hai ab ki jahaan na e'tiqaad muaavin na aagahi hogi ajiib khauf musallat dil-o-dimaagh pe hai mire safar ki ye shab shaayad aakhiri hogi ye january kaa mahina bhi kaT gayaa 'hairat' khudaa ke fazl se kal ek farvari hogi"

"aql ke dushman bhi ham Thahre dil kaa bhi nuqsaan kiyaa zauq-e-talab ki aaD mein 'hairat' nafs ne kyaa hairaan kiyaa khalq kiyaa hogaa aadam ko vaaqai hazrat-e-yazdaan ne lekin us kaa naam bataao jis ne use insaan kiyaa raam the maryaada purushottam raam ki baatein rahne do aur bataao is duniyaa mein kis ne kis kaa maan kiyaa ham kuchh bhi to nahin the lekin aapaa yaar buri shai hai pahron apni yaad mein roe jab bhi teraa dhyaan kiyaa ab ye takalluf bhi duniyaa mein log kahaan farmaate hain tu ne puchhaa haal hamaaraa yaar baDaa ehsaan kiyaa dil to isi khaatir hotaa hai kyaa ye tumhein maalum na thaa 'hairat' kyon barbaadi-e-dil par ji itnaa halkaan kiyaa"

"hassaas dil thaa sharm se nam-dida ho gayaa naahaq main us ki baat pe ranjida ho gayaa tujh se mafaariqat kaa nahin gham to is kaa hai main khud bhi apne vaaste naadida ho gayaa saaghar uchhalte dekh ke kyon ro paDi ghaTaa maahaul daf'atan baDaa sanjida ho gayaa buDhi havaa ne pyaar se pheraa thaa sar pe haath pattaa 'ajib khauf se larzida ho gayaa 'hairat' kisi kaa apne muqaddar pe bas nahin parvaana khud hi sham' kaa girvida ho gayaa"

"khaDe hain saamne ahbaab ajgaron ki tarah bulaa rahaa hai bayaabaan khule daron ki tarah subuk-khiraam tanaazur muqaddaron ki tarah faraaz-e-vaqt pe kyaa hai kaTe saron ki tarah vo shakhs itnaa hi pyaasaa bhi hogaa andar se hilore le to rahaa hai samundaron ki tarah khalaa mein Duub na jaaun kahin mahak ban kar mujhe sameT lo aankhon mein manzaron ki tarah shikast-e-khvaab ki aavaaz-e-baazgasht huun main mujhe sanbhal ke baratnaa muhaavaron ki tarah na jaane kaun hai khaaliq in aabginon kaa khayaal zehn mein aate hain paikaron ki tarah ab aur hi koi duniyaa mujhe 'ataa farmaa bisaat-e-dasht bhi mahdud hai gharon ki tarah amaan milegi mujhe bahr-o-bar mein jaane kahaan giraa huun TuuT ke uDte hue paron ki tarah jhinjhoD mat mujhe aise mein karb-e-nim-shabi navaa-e-'mir' bhi chubhti hai nashtaron ki tarah kamaal-e-‘asr hai be-chehragi magar 'hairat' sukhanvaron se to miliye sukhanvaron ki tarah"

"main ne kab chaahaa muraadon kaa safar aisaa na ho bas mire ehsaas ko jiine se Dar aisaa na ho noch Daalun main sab apne baal-o-par aisaa na ho zakhm-e-dil aise na hon saudaa-e-sar aisaa na ho kyaa kahun main ne to logon ko ye kahte bhi sunaa is tarah kaa ho gham-e-divaar-o-dar aisaa na ho ghaaliban ham sab ki taqdirein hain baaham munsalik lekin us surat mein kyaa hogaa agar aisaa na ho mausamon ke saath badlun yaa na badlun kyaa karun baat phir aa jaae mere zarf par aisaa na ho tajrabe ki raushni mein dosto kahtaa huun main zindagi se bhi koi nazdik-tar aisaa na ho"

"apne ranj-o-gham baanTe ham se baa-khabar nikle saath chalne vaalon mein koi ham-safar nikle be-saaadati Thahre khvaah ab hunar nikle sab ne jis se rokaa thaa ham vo kaam kar nikle ik ajiib sannaaTaa mahv-e-sher-khvaani thaa ham jahaan-jahaan pahonche ham jidhar jidhar nikle jaane kis ke haath aaein aur kyaa fazaa paaein phir alaamatein ban kar mere baal-o-par nikle gahre paaniyon se kyaa aur dosto miltaa meri khaali aankhon mein sainkaDon bhanvar nikle manzilon ke pichhe bhi aur manzilein hongi rahguzar se aage bhi koi rahguzar nikle kaaenaat ki hasti ik fazaa-e-sarmasti jaise chaandni shab mein zehn gasht par nikle ham ne un ko dekhaa hai ham ne un ko parkhaa hai jitne dida-var nikle khaase kam-nazar nikle sirf main na thaa tanhaa zad mein dhuup ki aisaa meri tarah ke har-su anginat shajar nikle kyaa bhare zamaane mein bas yahi nahin mumkin main kahin Thahar jaaun koi meraa ghar nikle dusron ne kyaa 'hairat' gham ko gham nahin samjhaa ham magar ghalat nikle aur kis qadar nikle"

"na teri shakl se vaaqif na teri baas se log shanaakht kaise kareinge tujhe qayaas se log kise khabar thi ki raahein qadam jakaD leingi chale the tere tajassus mein kitni aas se log na koi tuf kaa Tahokaa na tanz ke patthar takaa kiye mujhe kyon aaj bad-havaas se log ye ghar bhi meraa hai is ki tamaam chizein bhi har ek goshe mein lekin ye naa-shanaas se log sunaa ye hai ki payambar hain daur-e-zarrin ke dhuaan dhuaan saa ye maahaul udaas udaas se log na jaane bo'd ne kyaa kyaa banaa diyaa thaa unhein miraa hi 'aks the dekhe jo main ne paas se log hazaarhaa mah-o-khurshid haath pakDeinge bhaTak na jaaein khalaa mein ye bad-havaas se log khud aagahi inhein aisaa banaa gai varna the naa-shanaas na 'hairat' ye naa-shanaas se log"

"chhoD de karb-e-anaa mauja-e-pur-kham bannaa zindagi siikh gai gesu-e-barham bannaa kyaa koi aur tasarruf na thaa us kaa mumkin kaisi miTTi ke muqaddar mein thaa aadam bannaa haan khamir ek hi darkaar hai donon ke liye chashm-e-jaanaan ho ki paimaana-e-zamzam bannaa muddai marham-e-har-zakhm ke hone vaale aa gayaa raas tujhe kyaa gham-e-aalam bannaa har sanvarti hui taqdir hai maathe pe shikan har ubharti hui tasvir ko mubham bannaa aur bhi dahke raho dahke raho dahke raho aa hi jaaegaa kabhi phuul pe shabnam bannaa kyon mujhe yaad dilaataa hai azal ke din ki meri surat kaa tire zehn mein kam-kam bannaa har tabassum rahaa marhun-e-fughaan kaa 'hairat' har masarrat ko paDaa baar-gah-e-gham bannaa"

"tark-o-talab ke hangaamon ko ishq samajhnaa vahshat hai ishq tahayyur be-paayaan hai ishq mujassam hairat hai tum to yaqinan jaante hoge vaaqai kyaa ye haqiqat hai aksar log kahaa karte hain ishq baDaa bad-qismat hai qaafile vaalo naa-vaaqif ho shaayad in asraar se tum raah-e-talab mein gaahe-gaahe gumraahi bhi neamat hai ham divaane kyaa batlaaein ham se na puchho kyon yaaro har tahzib ki mehraabon mein khun-e-bashar ki rangat hai fikr nahin hai us unsur kaa naam mohabbat hai shaayad jis se tahzibein banti hain jis se ziist ibaarat hai raat ne saaz-e-mah-o-anjum par kitni loriyaan chheDi hain ji kartaa hai ab so jaaein ai gham-e-hijr ijaazat hai duniyaa ko irfaan-e-mohabbat dene vaalon mein 'hairat' jaane kitne log hain jin ko apne aap se nafrat hai"

"ik faakhta ye puchh rahi hai havaaon se kab tak chalegaa kaam tumhaari du'aaon se moti luTaa rahe hain sitaare adaaon se khairaat zau ki laae hain suraj ke gaaon se ai intihaa-e-shauq zaraa sabr kar abhi uljhaa huaa hai zehn abhi ibtidaaon se ai tirgi ke saanp mire dil pe loT jaa teraa hi zikr-e-khair thaa dhundli fazaaon se di hain jo aah-e-nim-shabi ne basiratein kaafur ho na jaaein sahar ki du'aaon se nanhaa saa ik farishta khaDaa dekhtaa rahaa kuchh kah rahaa thaa aadmi bargad ki chhaaon se shab-bhar bhanbhoDtaa rahaa kuttaa qayaas kaa aisi bhi dil-lagi na kiyaa kar gadaaon se 'hairat' ye e'tiqaad kaa andhaa kuaan nahin bach kar nikal shu'ur ki jalti chitaaon se"

"karishma kyaa na huaa baat kaun si na hui magar charaagh tale raushni kabhi na hui koi bhi chuul to sidhi nahin mili us ki tiraa mizaaj huaa bisvin sadi na hui vo pyaas thi ki ham apnaa lahu bhi pi jaate ye ittifaaq thaa us samt fikr hi na hui jo kaam haath mein ham ne liyaa sire na chaDhaa jo baat soch ke tum hans diye kabhi na hui salaam-e-shauq har ik raat ki zabaan pe thaa sharik-e-haal magar koi raat bhi na hui nigal gayaa use meraa mizaaj-e-tira-shabi vo chaand hi thaa magar us se chaandni na hui us aakhiri tag-o-dau kaa bhi hashr dekh liyaa khushi se mil ke bhi 'hairat' koi khushi na hui"

"sakht naa-hamvaar o mushkil thaa magar aisaa na thaa main ne jab raahein taraashi thiin safar aisaa na thaa kis zamaane kaa havaala de rahe ho dosto aaj se pahle to jiine kaa hunar aisaa na thaa shaamil-e-haalaat agar hotin na kuchh khush-fahmiyaan meri qismat mein bhaTaknaa dar-ba-dar aisaa na thaa mujh se kyon mansub ho baiThin vafaa ki neamatein main to apne vaaste bhi mo'atabar aisaa na thaa main kahaan aisaa ki jhuTlaaun tumhein lekin ye hai main ne jab dekhaa jahaan dekhaa bashar aisaa na thaa aaj tak bainassutur uljhi hui tahrir huun main ki patthar thaa magar patthar-nazar aisaa na thaa main ne kis buute pe di 'hairat' sadaa tufaan ko mere khvaabon kaa shabistaan meraa ghar aisaa na thaa"

"khud hi apnaa raaz khud hi raazdaan ban jaaungaa ek lamhe kaa yaqin huun phir gumaan ban jaaungaa harf ki surat zabaan par ek baar aane to do dekhte hi dekhte main daastaan ban jaaungaa ibtidaa mein ik alaamat thaa guzarte vaqt ki intihaa tak agle vaqton kaa nishaan ban jaaungaa jab taraashaa jaa rahaa thaa zehn mein meraa badan kis ne sochaa thaa ki main suunaa makaan ban jaaungaa hote hote vahm mein tahlil ho jaaoge tum aur main bhi ek sai-e-raaegaan ban jaaungaa 'hairat' aisaa hi mashiyyat kaa hai shaayad qaaeda jhilmilaati lau se ubhraa huun dhuaan ban jaaungaa"