Ghazal

"meri hasti ko miTaa kar dekho khaak mein khaak milaa kar dekho aag mein aag to lag jaaegi aag paani mein lagaa kar dekho vasl kaa shahd chakhaa hai tum ne hijr kaa zahr bhi khaa kar dekho sang koi bhi uThaa letaa hai aasmaan sar pe uThaa kar dekho meraa daa'vaa hai bharegaa hi nahin phuul kaa zakhm to khaa kar dekho donon 'aalam mein na sar kham hogaa sar namaazon mein jhukaa kar dekho ye bhi mumkin hai havaa ho jaae dard mein dard milaa kar dekho dhuup dahshat ki chali jaaegi amn kaa peD lagaa kar dekho rote rote bhi kabhi hans denaa dhuup mein chhaanv milaa kar dekho"

"amir-e-shahr ke ban kar vazir baiThe hain to kyaa vo bech ke apnaa zamir baiThe hain qalandaron ki ye 'azmat karam khudaa kaa hai faqir-e-shahr ke dar par amiir baiThe hain hain pattharon se pareshaan machhliyaan saari nadi kinaare jo bachche sharir baiThe hain nigaah-e-naaz ne dil teraa intikhaab kiyaa hadaf banaae kamaan mein vo tiir baiThe hain fasil-e-'ishq mein be-shak daraar aaegi anaa ki khinch ke donon lakir baiThe hain hasad ki aag mein jalne lage raqib tamaam jo ru-baru mire vo be-nazir baiThe hain tiri nigaah ne chheDaa koi fasaana kyaa qalam ko toD ke jo sab 'dabir' baiThe hain rafiq-e-vaqt mein vo saahib-e-khulus kahaan mafaad-e-hirs-o-havas hain haqir baiThe hain tire khulus ko 'shaadaab' kyaa vo samjheinge jo ho ke apni anaa ke asiir baiThe hain"

"dil musaafir banaa ke chhoDegaa paagal aakhir banaa ke chhoDegaa teri aankhon kaa ye tilism sanam mujh ko shaa'ir banaa ke chhoDegaa tujh se be-intihaa ye 'ishq miraa mujh ko kaafir banaa ke chhoDegaa roz-o-shab ye mutaale'a karnaa fan mein maahir banaa ke chhoDegaa dil vo degaa magar sharaait par mujh ko taajir banaa ke chhoDegaa aaj phir us ne dil ko daa'vat di qais vo phir banaa ke chhoDegaa qaid kar legaa dil ke pinjre mein apnaa taair banaa ke chhoDegaa"

"baarhaa Duub ke har baar ubhar aane kaa zindagi naam hai mar mar ke jiye jaane kaa mustarad jis ko kiyaa tu ne bahaana kar ke vahi kirdaar aham thaa tire afsaane kaa main to suraj ko hatheli pe liye phirtaa huun main charaaghon se miyaan khauf nahin khaane kaa ahl-e-daanish hain takabbur mein karein kyaa saahib un mein jazba hai samajhne kaa na samjhaane kaa ham ne majzub mizaaj apnaa banaa rakkhaa hai hai yahi ek bahaana tire yaad aane kaa dil-e-muztar ye taDap ishq kaa eazaaz samajh chain mil jaae to har haal mein Thukraane kaa is liye chaand si raushan hain bujhi ho kar bhi meri aankhon mein hai jo khvaab tujhe paane kaa mai-kashi naam-o-nasab ki jo ghulaam aaj hui saaqiyaa raaz khulaa ab tire maikhaane kaa tu na majnun hai na farhaad na raanjhaa 'shaadaab' haan magar aks hai tujh mein kisi divaane kaa"

"bikhar bikhar gae sab mere khvaab tere baghair har ek saans hui hai azaab tere baghair tire baghair tabassum haraam kar Daalaa masarraton se kiyaa ijtinaab tere baghair baDe sukun se makin hain udaasiyaan ghar mein huaa hai jaan miraa khaana-kharaab tere baghair tiri nigaahon ke vo jaam khuub hote the lage hai zahr hamein ab sharaab tere baghair shab-e-visaal mein to tirgi bhi nuur lagi bujhaa bujhaa saa lagaa maahtaab tere baghair rafaaqaton mein tiri khaar goyaa komal the chubhe hain khaar ki surat gulaab tere baghair"

"dil mein ik shor machaa ho jaise dard phir chikh rahaa ho jaise teri furqat mein ye mahsus kiyaa jism se ruuh judaa ho jaise in havaaon mein ghuTan hai aisi phuul khushbu se khafaa ho jaise yuun mujhe yaad kiyaa hai us ne sang par phuul khilaa ho jaise so gayaa shahr magar khvaab miraa niind ko DhunD rahaa ho jaise dard yuun ruuh ki taskin huaa zakhm khaane mein mazaa ho jaise us ki tanqid ke lahje ki miThaas zahr mein shahd ghulaa ho jaise jaam piitaa hai ghazal ke 'shaadaab' shaaeri koi nasha ho jaise"

"sang par phuul khilaane kaa hunar aataa hai mujh ko ehsaas jagaane kaa hunar aataa hai aaine mujh se khafaa rahte hain kyunki mujh ko sher mein shakl dikhaane kaa hunar aataa hai kaun hai koi nahin rab ke alaava jis ko aag ko phuul banaane kaa hunar aataa hai aankh ko khvaab dikhaaein sabhi lekin mujh ko khvaab ko khvaab dikhaane kaa hunar aataa hai is tavassut se bhi pariyaan mujhe pahchaanti hain chaand par rang jamaane kaa hunar aataa hai aankh ke paar mire dekh nahin saktaa koi dard-e-dil mujh ko chhupaane kaa hunar aataa hai ye hunar mujh ko viraasat mein milaa purkhon se dasht mein khaak uDaane kaa hunar aataa hai main samundar nahin ik abr huun 'shaadaab' jise dasht ki pyaas bujhaane kaa hunar aataa hai"

"tiraa husn koi tilism hai to qubul dil kaa payaam kar jise chaahe apnaa aziiz rakh jise chaahe apnaa ghulaam kar mire dil-kushaa mire dil-nashin mire ham-navaa mire ham-nashin mire dil mein pal ko Thahar kabhi kisi shaam is mein qiyaam kar kabhi niind ki tu kitaab mein kisi roz aa mire khvaab mein miri khaamushi se kalaam kar koi guftugu mire naam kar baDi paak hai miri aashiqi na havas ki hai ise tishnagi na sharaab-e-husn pilaa mujhe mire naam diid kaa jaam kar ye libaas-e-hijr utaar kar tu libaas-e-vasl pahan kabhi na khusuf ho na amaas ho vo visaal maah-e-tamaam kar"

"chaman mein phuul jo bhi khil rahaa thaa faqat vo baaghbaan ko mil rahaa thaa laraz uThtaa huun us ke naam se ab kabhi ghazlon mein vo shaamil rahaa thaa tujhe qimat chukaani paD rahi hai mujhe vo muft mein hi mil rahaa thaa mujhe mahsus bhi hotaa nahin ab kabhi pahlu mein mere dil rahaa thaa tire guldaan ki zinat banaa hai mujhe jo phuul kal haasil rahaa thaa judaa saahil pe jab ham ho rahe the kinaare se kinaara mil rahaa thaa mire qadmon ki bas ab gard hai vo ki jo kal tak miri manzil rahaa thaa main rukhsat ho rahaa thaa gaanv se jab shajar par ek pattaa hil rahaa thaa jise paane mein ki tum ne khayaanat tumhein us se ziyaada mil rahaa thaa"

"main chikh chikh ke mar jaaun jab talak rakhnaa mire tabib mire zakhm par namak rakhnaa ye chaand taare ye suraj bahut hi halke hain ki mere kaandhon pe saaton bhi tum falak rakhnaa yahaan to jhuuT bhi chillaa ke bolte hain log jo sach kaho to phir aavaaz mein khanak rakhnaa rivaayaton ki mahak se shanaakht ho jaae tum apne lahje mein ajdaad ki jhalak rakhnaa samaa'aton ki nazar sun ke khira ho jaae ghazal ke fan mein nai vo chamak-damak rakhnaa"

"jab bhi armaan tire khvaab se juD jaate hain sukhte zakhm bhi zardaab se juD jaate hain naakhudaa kaise bachaaegaa kisi kashti ko khud kinaare hi jo girdaab se juD jaate hain ashk bahte hain nadaamat ke jo taariki mein besh-qimat dur-e-naayaab se juD jaate hain ahl-e-‘irfaan ki rifaaqat se muqaddar chamke ham se darvesh bhi alqaab se juD jaate hain chaand par baiTh ke likhte hain ghazal jaanaan par jab bhi arbaab-e-sukhan khvaab se juD jaate hain yaad aataa hai jo pal bhar ko use kyaa maa'lum kitne sadme dil-e-betaab se juD jaate hain shaa'iri siikh liyaa karte hain tuk-band kai jab bhi vo mahfil-e-'shaadaab' se juD jaate hain"

"miri chhat par kabutar aa rahe hain mujhe ye kis ke letter aa rahe hain liyaa thaa naam hi us bevafaa kaa hamaare munh mein kankar aa rahe hain unhein mahbub kah kar kyaa pukaaraa har ik jaanib se patthar aa rahe hain puraane gham hain dil mein aur nae bhi binaa puchhe hi andar aa rahe hain hamein baanhon kaa tum taa'viz de do ki dil mein vasvase dar aa rahe hain miri tishna-labi afvaah thi bas mire dar par samundar aa rahe hain qadam paDte hi dhaDkan ruk na jaae vo mere dil ke andar aa rahe hain tire tir-e-nazar par naam thaa to hasinaaon se bach kar aa rahe hain khushi se ho na jaaun aaj paagal sunaa hai vo mire ghar aa rahe hain"

"khud-numaai mein hi Dhaalaa nahin jaataa mujh se jaam mahfil mein uchhaalaa nahin jaataa mujh se pahle muTThi mein liye phirtaa thaa suraj kitne ab to jugnu bhi sanbhaalaa nahin jaataa mujh se log shohrat pe hi marte hain 'ajab duniyaa hai main ki shohrat ko sanbhaalaa nahin jaataa mujh se phuul yaadon kaa mahaktaa bhi hai chubhtaa bhi magar baagh se dil ke nikaalaa nahin jaataa mujh se log raaton ko bhi kar dete hain raushan lekin khaana-e-dil ki ujaalaa nahin jaataa mujh se zakhm sah letaa huun jitne bhi zamaane se milein ik tiraa dard ki paalaa nahin jaataa mujh se shaa'iri kal miri pahchaan huaa karti thi ab to ik she'r nikaalaa nahin jaataa mujh se"

"vafaa khulus bahut khud se duur rakhtaa hai jo sar mein apne balaa kaa ghurur rakhtaa hai khumaar sar pe chaDhaa jis ke shohraton vaalaa tamaam 'umr use be-shu'ur rakhtaa hai usi ko milti hai masnad yahaan hukumat mein jo lab pe apne faqat ji-huzur rakhtaa hai 'ajib vaqt kaa haakim hai jabr-o-zulm-pasand vo jis ke sar pe bhi chaahe qusur rakhtaa hai jo nim-shab mein tahajjud ke vaaste uTThein jabin pe un ki khudaa khaas nuur rakhtaa hai"

"nujumi bas lakirein paDh rahe hain ye kis duniyaa ki jaanib baDh rahe hain siyaasat mein yuun aage baDh rahe hain pahaaDon par makoDe chaDh rahe hain tumhaaraa lams hai yaa barq koi badan par mere kaanTe chaDh rahe hain mohabbat falsafa hypnotism tak tiri aankhon mein kyaa kyaa paDh rahe hain zaraa aavaaz T v ki karo kam abhi bachche kitaabein paDh rahe hain nazar-andaaz karte the jo kal tak ghazal 'shaadaab' ki vo paDh rahe hain"

"agar mausam suhaanaa chaahiye thaa tumhein baarish mein aanaa chaahiye thaa andheron kaa agar thaa khauf dil mein tumhein suraj ugaanaa chaahiye thaa tumhaari yaad aae be-sabab kyon ghazal ko to bahaana chaahiye thaa masal kar phuul aakhir mil gayaa kyaa hamaaraa khuun bahaanaa chaahiye thaa chhupaa mat khaak mein aansu giraa kar samundar ko dikhaanaa chaahiye thaa amir-e-shahr barham is liye hai use khaatir mein laanaa chaahiye thaa agar haq baat ki taaid ki thi falak sar par uThaanaa chaahiye thaa agarche khaar raah-e-'ishq mein the tumhein chalnaa bhi aanaa chaahiye thaa banaa kar aaina kyon zulm Dhaayaa hamein patthar banaanaa chaahiye thaa sitaare TuTte rahte hain khud hi falak se chaand laanaa chaahiye thaa"

"urdu ho yaa misri ho kitni miThi lagti ho phulon kaa dil dukhtaa hai kaanTon par jab chalti ho chaand se tum ko kyaa nisbat chhat par raah Tahalti ho shauq niraale hain saare phuul se shabnam chunti ho kitni naazuk aur maasum kaanch ki guDiyaa jaisi ho tum ko chhunaa naa baabaa chalti phirti bijli ho qatra qatra shaahid hai rag rag mein tum bahti ho rang bhi tum mein khushbu bhi phuul ho yaa phir titli ho jab un ki taabir nahin khvaabon mein kyon aati ho kitnaa sastaa hai 'shaadaab' aur tum kitni mahngi ho"

"gayaa vo chhoD kar kamre hamaare so ab hain band darvaaze hamaare vo har qimat pe ham ko chaahtaa hai use manzur hain nakhre hamaare vo jis ke vaaste pahne the ham ne pasand aae use kapDe hamaare bichhaD kar tujh se ghazlon se hue hain maraasim aur bhi gahre hamaare hamaari pagDiyaan tak bik chuki hain magar utre nahin nashshe hamaare kabhi to naam chaltaa thaa hamaaraa ki ab chalte nahin sikke hamaare ghazal ke sher sab achchhe nahin hain magar achchhe hain kuchh misre hamaare tumhaare ahd bhi sachche kahaan the chalo jhuTe the kuchh vaade hamaare ham apne gaanv ke majnun hain 'shaadaab' bahut mashhur hain qisse hamaare"

"kahaan kahaan pe lage zakhm kyaa dikhaaun use main kis zabaan se kahun haal-e-dil sunaaun use vo mujh ko bhuul ke duniyaa basaa chukaa hai magar main ab bhi soch rahaa huun ki bhuul jaaun use har ek shab main yahi sochtaa huun bistar par jo ahd khud se kiyaa hai kabhi nibhaaun use anaa ne ishq ke pairon mein Daal di zanjir main naaz kaise karun raqs kar dikhaaun use miraa ghurur miri raah ki rukaavaT hai main sirf soch rahaa huun ki ab haTaaun use kase na taana use tamkanat se tez huaa charaagh bujh gayaa jo khuun se jalaaun use gulaab kaise khilaaein agar ho sakht zamin hunar ghazal kaa ye 'shaadaab' main sikhaaun use"