Ghazal

"khvaabon ki kaaenaat mein khone nahin diyaa tere khayaal ne mujhe sone nahin diyaa gardish mein rakkhaa teri kashish ne mujhe sadaa ab tak kisi Thikaane kaa hone nahin diyaa har maarke se ziist ke niklaa huun surkh-ru bas ye ki dil mein khauf samone nahin diyaa zakhmon se thaa niDhaal magar mauj-e-vaqt ko chaahat kaa naqsh siine se dhone nahin diyaa ik haadse ki yaad ne dil ki zamin mein khvaahish kaa tukhm phir kabhi bone nahin diyaa 'kaashif' kamaal-e-zabt ne rakkhaa miraa bharam zaalim ke saamne mujhe rone nahin diyaa"

"jo teri aankh hai pur-nam yahi mohabbat hai ki tujh ko hai jo miraa gham yahi mohabbat hai hazaaron miil ki duuri ke baavajud ai dost jo ham mein rabt hai paiham yahi mohabbat hai tiri judaai ke mausam mein jaan-e-jaan mujh ko jo bhuuk pyaas hai kam kam yahi mohabbat hai tire baghair jo khvaabon ke shahr mein bhi dost miraa mizaaj hai barham yahi mohabbat hai visaal-rut ho ki furqat hamaare dil mein sanam jo bekali si hai dam dam yahi mohabbat hai miraa yaqin ki yaum-e-alast mein 'kaashif' kiyaa gayaa hamein baaham yahi mohabbat hai"

"sar-chashma-e-khumaar ne dekhaa na meri samt yaani ki chashm-e-yaar ne dekhaa na meri samt main gulsitaan-e-dahr se bad-zan huun is liye gul-haa-e-dil-bahaar ne dekhaa na meri samt jis ke har ek ashk se dikhtaa thaa meraa dil us chashm-e-sogvaar ne dekhaa na meri samt vaabasta meri jaan thi us ki nigaah se lekin sitam-shiaar ne dekhaa na meri samt 'kaashif' mujhe dilaase ki haajat thi jis ghaDi kyon mere gham-gusaar ne dekhaa na meri samt"

"hairaan udaas be-sadaa hai kis khauf mein shahr mubtalaa hai aasaab pe tirgi hai taari kyon dil kaa charaag bujh gayaa hai hai koi to baat us ke dil mein vo mujh se yunhi nahin khafaa hai kyaa kiije malaal haasidon kaa kaun in kaa ilaaj kar sakaa hai afkaar kaa zaaviya badal kar imkaan se aage sochnaa hai"

"kahaan khvaabon ki taabiron talak hai ye saaraa husn tasviron talak hai pas-e-parda havas hai kaar-farmaa mohabbat sirf tahriron talak hai kisi par khul sake haalat hamaari ye chashm-e-nam ki tafsiron talak hai hamaari bad-nasibi kaa mudaavaa kahaan aadam ki tadbiron talak hai miraa shauq-e-asiri shaah-zaadi tiri zulfon ki zanjiron talak hai kahaan ham se faqiron ki rasaai tire sapnon ki jaagiron talak hai vafaa ki daastaan duniyaa mein 'kaashif' rah-e-ulfat ke nakhchiron talak hai"

"tausan-e-vaqt ki raftaar baDhaa di jaae muddat-e-hijr kisi taur ghaTaa di jaae un se milne pe hai qadghan magar itnaa to ho roz un ki nai tasvir dikhaa di jaae koi sarhad na ho viize ki zarurat na rahe kaash duniyaa mire khvaabon si banaa di jaae shaayad is tarah judaai ki aziyyat kam ho arsa-e-vasl ki har yaad miTaa di jaae lamha-bhar fasl bhi khatra hai ta'alluq ke liye junhi divaar uThe ghar mein giraa di jaae isi duniyaa mein uThaai hai saubat 'kaashif' isi duniyaa mein mohabbat ki jazaa di jaae"

"aaya thaa apni ziist mein ik aisaa baab bhi thaa khvaab apne saamne taabir-e-khvaab bhi aane se us ke phail gai chaar-su mahak jaise ki khil gae hon saman aur gulaab bhi main kyaa bataaun kitnaa hasin lag rahaa thaa vo hairat se tak rahaa thaa use maahtaab bhi sun kar miraa savaal use chup si lag gai mujh ko hi sochnaa paDaa us kaa javaab bhi kis tarah bhuul jaaun main us ko jo mere paas khushbu bhi apni chhoD gayaa aur kitaab bhi 'kaashif' rasaai us talak aasaan hai kahaan koh-e-giraan hai raah mein aur phir chanaab bhi"

"roz-e-avval se mahv-e-yaas huun main apne har karb ki asaas huun main aaj ke din khushi mili thi mujhe aaj ke din bahut udaas huun main kaun dekhegaa mere khvaab miyaan khubsurat na khush-libaas huun main aaj mere gumaan mein tum ho aaj goyaa tumhaare paas huun main fikr meri na kijiye saahib khud-nigar aur khud-shanaas huun main gulshan-e-shaaeri mein ai gul-chin gul-e-nau-khaasta ki baas huun main khush-gumaani hai is qadar 'kaashif' ye ki shahr-e-sukhan ki aas huun main"

"duniyaa mein kis ko ham se adaavat nahin hui lekin hamein kisi se shikaayat nahin hui hamdardiyaan zamaane ki haasil na kar sake ham se tumhaare gham ki tijaarat nahin hui dil saa nagin vaar dein husn-e-majaaz par sad-shukr ham se aisi himaaqat nahin hui ham ne adu ki tegh bhi rakkhi sanbhaal kar ham se kisi ki shai mein khayaanat nahin hui sach hai ki zindagi ko sazaa jaante the ham jab tak kisi ko ham se mohabbat nahin hui ham sarkashi ki saari hadein paar kar gae ham ko kisi khataa pe nadaamat nahin hui 'kaashif' faqat fareb hai apnaa fan-e-sukhan haq-goi ki agar hamein jurat nahin hui"

"ye vahshat-e-tanhaai saughaat hai ulfat ki ye karb ki pahnaai saughaat hai ulfat ki kahte hain sabhi mujh ko aavaara-o-naakaara ye daulat-e-rusvaai saughaat hai ulfat ki vo haar ke bhi jitein ham jiit ke bhi haarein ye maat ye paspaai saughaat hai ulfat ki ham log haqiqat se vaaqif the kahaan pahle ye ramz-e-shanaasaai saughaat hai ulfat ki ham hans ke jo sahte hain har zulm zamaane kaa ye dil ki shakebaai saughaat hai ulfat ki har shakhs ke honTon par naghme jo tumhaare hain 'kaashif' ye paziraai saughaat hai ulfat ki"

"mujhe kuchh bhi nahin huaa ai dost aadatan huun bujhaa bujhaa ai dost main mizaajan khamosh rahtaa huun main kisi se nahin khafaa ai dost dosh qismat ko de diyaa main ne mujh se jab kuchh na ban paDaa ai dost kyaa mujhe vo aziz-az-jaan hai main ne jis ko ganvaa diyaa ai dost khud-farebi mein mubtalaa huun main kaun mujh saa hai bevafaa ai dost lauT jaaun main shahr-e-khvaab ai kaash dasht mein dil nahin lagaa ai dost dost apnaa koi nahin 'kaashif' kyaa kisi ko pukaarnaa ai dost"

"yaaro tumhein khabar nahin kitnaa buraa huun main kamzoriyon ko apni faqat jaantaa huun main mujh ko kabhi gunaah kaa mauqa nahin milaa aisaa bhi ab nahin ki baDaa paarsaa huun main apnaa hi aks dekhti hai mujh mein teri aankh ai khush-gumaan dost kahaan baa-safaa huun main pal-bhar bhi us pe dil miraa ghaalib nahin huaa kab se anaa ke saath nabard-aazmaa huun main logon se meraa faasla kuchh aur baDh gayaa shohrat ke saath aur bhi tanhaa huaa huun main har lahza mujh se kahtaa hai andar kaa mohtasib matlab-parast ahd-shikan bevafaa huun main raushan kiyaa thaa dil mein kabhi aarzu kaa diip 'kaashif' usi ki aag mein ab jal rahaa huun main"

"tabib kahte hain juz vahm-e-khvaab kuchh bhi nahin to kyaa jo ham ne sahe vo azaab kuchh bhi nahin hamaari dasht-navardi tumhaare kaam aai tumhein ye kaun bataataa saraab kuchh bhi nahin nazir us ki main kyaa duun ki saamne us ke charaagh maah sitaara gulaab kuchh bhi nahin tamaam umr kiyaa main ne kaar-e-laa-haasil ki madh-e-husn-e-butaan kaa savaab kuchh bhi nahin koi latif si shai ho to ham piyein saaqi ham ahl-e-dil ki nazar mein sharaab kuchh bhi nahin agar mein jazb na kar paanv raushni 'kaashif' to maah kuchh bhi nahin aaftaab kuchh bhi nahin"

"ik to ye zindagi hi saraasar fareb hai aur us pe aagahi bhi baraabar fareb hai rahne do un ko ishq-o-junun ke saraab mein talkhi hai utni sach mein ki behtar fareb hai taabir tere khvaab ki maalum hai mujhe tujh kushta-e-gumaan kaa muqaddar fareb hai ik aur aasmaan bhi hai is aasmaan par goyaa yahaan fareb ke uupar fareb hai hai vaaqia kuchh aur hi 'kaashif' pas-e-hijaab jo aankh dekhti hai vo manzar fareb hai"

"khvaabon ki tarah goyaa bikhar jaaeinge ham bhi chup-chaap kisi roz guzar jaaeinge ham bhi ham jaise kai log chale jaate hain har roz kyaa hogaa kisi roz jo mar jaaeinge ham bhi ham log nahin kuchh bhi magar lauh-e-zamaa par ik naqsh koi apnaa saa dhar jaaeinge ham bhi oDhe hue hain ruuh pe ham daaghon bhari khaak jab utregi ye khaak nikhar jaaeinge ham bhi ik aaina aisaa ki jo baatin bhi dikhaa de aaegaa muqaabil to sanvar jaaeinge ham bhi rahnaa hai kise khvaab si duniyaa mein hamesha 'kaashif' kisi din lauT ke ghar jaaeinge ham bhi"

"maayusi ki kaifiyyat jab dil par taari ho jaati hai rafta rafta din-o-duniyaa se be-zaari ho jaati hai avval avval khush aataa hai pariyon ke khvaabon mein rahnaa baad mein lekin ye haalat zehni bimaari ho jaati hai aql pe parda paD jaataa hai aur ham sab kuchh kho dete hain jab koi shakhsiyyat ham ko had se pyaari ho jaati hai rizq muqaddar mein likhaa hai phir ye kaarobaar-e-jahaan kyaa ik ik daana kamaane mein kis darja khvaari ho jaati hai baaz maqaam aise hote hain jin se aage baDh jaaein to un tak vaapas aane mein behad dushvaari ho jaati hai ham to sheri canvas par bas dil kaa haal raqam karte hain sachche jazbon se is par khud naqsh-nigaari ho jaati hai aksar mujh se mahinon 'kaashif' koi sher nahin ho paataa taaza zakhm magar lagte hi taaza-kaari ho jaati hai"

"kuchh bhi kar lijiye vo vaza badalne ke nahin yaani ham karb-o-aziyyat se nikalne ke nahin ham bhale kucha-e-viraan mein akele bhaTkein is zamaane ki ravish par kabhi chalne ke nahin aaina hai hamein jab tak tiri khandaan surat ham kisi ranj ki tasvir mein Dhalne ke nahin haan kabhi soz-e-darun un ko ghulaa de shaayad varna naalon se hamaare vo pighalne ke nahin ho chuke khaak jo jal kar vo patange ai shama dusri baar tire shoale se jalne ke nahin sehn-e-dil mein jo lagaae the tamannaa ke shajar aisaa lagtaa hai vo imsaal bhi phalne ke nahin jab talak manzil-e-ulfat pe nazar hai 'kaashif' paanv apne kisi Tiile se phisalne ke nahin"