Ghazal

"main kyaa kahun ki tiri chashm-e-iltifaat nahin hayaat-e-shauq pe taari gham-e-hayaat nahin jo dil pe guzrin mohabbat ke khaas lamhon mein hudud-e-sharh-o-bayyan mein vo vaaqiaat nahin gham-e-davaam-e-mohabbat hai tishna-e-maani fanaa ke baad agar manzil-e-hayaat nahin tire baghair bhi ehsaas-e-zist hai lekin taDap mein dard ki vo shorish-e-hayaat nahin maqaam-e-be-khudi ishq ai maaaz-allaah main us jagah huun jahaan mujh ko hosh-e-zaat nahin nigaah-e-dost tiri dil-navaaziyaan maalum khataa muaaf main khvaahaan-e-iltifaat nahin jamaal tak hi na mahdud rakh nazar 'maani' ki aashiqi ki yahi saari kaaenaat nahin"

"dil-e-tabaah bhi hai aalam-e-kharaab bhi hai nigaah-e-dost yahi vaqt-e-inqalaab bhi hai do-aatisha sar-e-rukhsaar ho gae aansu gulon pe qatra-e-shabnam nahin sharaab bhi hai nigaah-e-shauq larazte hain taar chilman ke talaash kar inhi kirnon mein aaftaab bhi hai kahaan se dekhiye mauj-e-surur uThti hai nigaah-e-naaz bhi hai saaghar-e-sharaab bhi hai khilaaf-e-ahl-e-safina hi naakhudaa se nahin jabin-e-bahr pe larzaan khat-e-itaab bhi hai havaa-e-dahr ne phir daamanon pe Daal diyaa vo gard jis mein nihaan bu-e-inqalaab bhi hai ai jastgaan-e-rah-e-gham chale chalo aage koi maqaam ba-naam-e-bahisht-e-khvaab bhi hai yahi vo 'maani' hai salmaa-e-gonDvaana tiraa jo faiz-e-rukh se tire saahib-e-kitaab bhi hai"

"bujhaa detaa havas ki tishnagi vo jaam hai saaqi jahaan main jis se miltaa huun vahi naakaam hai saaqi nasha gahraa kahaan itnaa ki hon chaudah tabaq raushan taraqqi-yaafta mulkon ki baada khaam hai saaqi mire atraaf hai tira-shabi mein nuur kaa halqa ki sham-e-raah maikhaane se ghar tak jaam hai saaqi kitaab-e-sirat-o-akhlaaq de insaan ke haathon mein taraqqi daanish-o-ijaad ki naakaam hai saaqi sunaa iqbaal-e-isyaan khalvaton mein vajh-e-bakhshish hai kalisaaon mein ye tarz-e-ibaadat aam hai saaqi vahi zaalim hain shoala-baar insaanon ki basti par vo israel jin par baarish-e-ikraam hai saaqi amal-pairaa vahi hain khush-khor-o-khush-zi pe sakhti se zabaan pe jin ki faaqa-kash kaa har dam naam hai saaqi kahaan naan-e-javin aur roghan-e-zaitun-o-shaikh-e-din rausaa ke yahaan milaan-e-daavat aam hai saaqi rivaaj-e-madrasa hai dopahar ke vaqt qailula yahaan shab zinda-daari maail-e-aaraam hai saaqi khafaa hai madrasa ik sidq-go-e-naagpuri se tiraa mai-khvaar is maahaul mein badnaam hai saaqi"

"aish-e-rafta kaa yahi hai vo shabistaan ai dost yahin khvaabida thi aaraam-e-dil-o-jaan ai dost be-khabar sone mein vo jism khulaa shaanon tak jaise jannat kaa na ho koi nigahbaan ai dost saaz haathon mein uThaayaa tiri angDaai ne chuDiyaan pahlu badalte hi ghazal-khvaan ai dost pesh-e-aaina masahri pe khule gesu-e-naaz duur baadal mein koi hur-e-pareshaan ai dost mukhtalif vaz' tire husn ko malbus ne di shauq ke main ne taraashe kai 'unvaan ai dost roknaa ghar tujhe jaane se ba-khauf-e-hijraan jaaguzin dil mein tire yaad azizaan ai dost jo umangon ko udaasi ke havaale kar de aah vo tund-mizaaji-e-buzurgaan ai dost naqsh hai vaqt ki peshaani pe ahd-e-rangin ham se go ruk na saki 'umr-e-gurezaan ai dost"

"qaid jab ham pe lagi vusat-e-daamaan ke liye kitni kasrat se khile phuul gulistaan ke liye vo munaajaatein kahaan hain tire ehsaan ke liye kasrat-e-shauq nahin aalam-e-hirmaan ke liye jaise har husn se mumtaaz hai vo husn tamaam ham hain e'zaaz ke qaabil nahin jaanaan ke liye qaarin-e-nigah-e-naaz hi samjhe vo khat surkh Doron mein jo tahrir hai armaan ke liye rind laae mai-o-saaghar ki hasin tashbihein isti'aara nigah-e-husn thi paikaan ke liye khauf kyaa ho rah-e-taarik-e-bayaabaan kaa hamein kam nahin kirmak-e-shab-taab charaaghaan ke liye ashk-e-gham roke rahein faaqa-guzaaron se kaho paani gulkhan se chalaa nuuh ke tufaan ke liye ki na jab ahl-e-siyaasat ne sitam se tauba ham utaare gae is qaum-e-bad-unvaan ke liye dar jahaan-e-gul-e-be-khaar nachidast kase gham na kar 'maani'-e-nashtar-kash-e-dauraan ke liye"

"lutf be-baak mulaaqaat kaa mushkil se uThaa ek parda thaa bil-aakhir jo muqaabil se uThaa husn-e-khalvat-talabi ke liye mahfil se uThaa ghair az ishq jo jazba ho use dil se uThaa kaif-e-viraani-e-khalvat se na mahfil se uThaa zauq-e-dil-bastagi jab tak na tah-e-dil se uThaa ishq jaisi koi shakhsiyyat-e-jaamaa na mili ek bhi harf is afsaane kaa mushkil se uThaa aql se gesu-e-geti nahin suljhe yaarab koi divaana isi aab isi gil se uThaa paa-shikasta gham-e-vaamaandagi-r-raah na kar paas aane ko tire khud koi manzil se uThaa raat guldasta-e-afsurda-dili chhoD gai gul-ba-kaf vaqt-e-sahar jo tiri mahfil se uThaa ham-safar kaun hama-vaqt hai saae ki tarah main uThaa huun to koi saath muqaabil se uThaa chaand taare bhi the mushtaaq ki 'maani' ko sunein subh-dam tak na koi raat ki mahfil se uThaa"

"ishq ifshaa ho gayaa ham raushni mein aa gae kitne parde kaam ik be-pardagi mein aa gae raah-e-mamnuaa ki jaanib bhi qadam uTh hi gae jis taraf aanaa na thaa ham be-khudi mein aa gae naa-khudaa kaa kaam bhi mauj-e-talaatum ne kiyaa Dubne vaale had-e-saahil-rasi mein aa gae gham ki kaifiyyat ne aansu zeb-e-mizhgaan kar diye shaam hote hi sitaare raushni mein aa gae 'maani' kah do shaairi-juzvest-az-paighambari ham pa-e-tabligh mulk-e-dilbari mein aa gae"

"nazar aae kyaa ghubaar mah-o-kahkashaan se aage koi kaarvaan hai shaayad mire kaarvaan se aage koi sar ho sarf-e-sajda kahaan aaj be-iraada ki zamin hi be-kashish hai tire aastaan se aage tiri yaad dastgir-e-dil-e-gham-zadaa hui hai mujhe saath le chali hai gham-e-do-jahaan se aage ye jahaan ba-naam-e-jannat kahin phir na pesh aae vahi qasr-o-baagh jo hain mah-o-kahkashaan se aage tire gesuon ki khushbu ye payaam de gai hai ki nashaat-baar saae hain gham-e-tapaan se aage kahein kis se ho gai hai yahin aa ke khatm duniyaa ki nahin hai koi manzil haram-e-butaan se aage kaTi ek umr-e-furqat sar-e-barzakh-e-mohabbat ki chalaa na jaa rahaa thaa dil-e-naa-tavaan se aage vahin daaimi khushi ke hain chhupe hue khazaane jo pahaaDi silsila hai yam-e-be-karaan se aage his-e-baasira ko 'maani' jo samia-e-kaif kar de vo sukhan-taraaz nargis hai kahin zabaan se aage"

"dast-e-pur-shauq mile sab ko ye dastur nahin khaar se varna yahaan daaman-e-gul duur nahin ishq bhi haamil-e-aayaat-e-mohabbat na rahaa chashm-e-pur-aab nahin zakhm se dil chuur nahin marg-e-aalim ko kahaa jaataa hai marg-e-aalam maut taari hai zamaane pe jo mansur nahin haath hai ik pas-e-parda miraa daaman thaame kabhi majbur huun main aur kabhi majbur nahin nuur taaron kaa bujhaa de na miri ham-bazmi mujh se zulmat mire saae ki tarah duur nahin 'maani' aalaam se ye kah ke chhuDaayaa daaman meri qismat hai vahi jo unhein manzur nahin"

"dil ki lagi se iksir honaa ik haath chaandi ik haath sonaa lutf to jab hai vo khud navaaze kahaa bahti gangaa mein haath dhonaa phir be-rukhi hai aur 'aarzi hai kufr-e-saraasar maayus honaa baiThnaa uThnaa nazm-o-adab se ain 'ibaadat hai un kaa honaa 'ishq kaa maslak saaf-dili hai rasm-e-numaaish daaman ko dhonaa anjuman-aaraaiyon ke liye ab farz nahin hai un kaa bhi honaa 'maani' ko bai'at hai ik sanam se kajlaai aankhein rang salonaa"

"manzilon ke baad dil us raaz kaa mahram huaa dar-haqiqat vo khushi thi naam jis kaa gham huaa pesh-e-aaina sanvarne mein badal kar zaaviye tum ne jis aalam ko dekhaa ik alag aalam huaa un ke gesu hain zamaane par mukammal tabsira baarhaa aaraasta ho kar jahaan barham huaa jazba-e-hamdardi-e-ulfat tiraa mashkur huun jab kisi ki aankh bhigi meraa daaman nam huaa chashm-e-saaqi se giraa jaataa hai zarf-e-mai-kashaan toD dein saaghar jinhein ehsaas-e-besh-o-kam huaa kitne khaake the hayaat-e-kaamraan ke zehn mein dil to is aalam mein bhi masrur thaa jab gham huaa shor-e-tahsin-e-sukhan ki rau bahaane aai thi zeb-e-lab 'maani' ke man aanam ki man daanam huaa"

"mahke gesu aariz nauras shaam-e-avadh aur subh-e-banaras un se milnaa mushkil az-bas chaandni raatein darbaan chaukas aansu ko daaman mein le lo phuul ki khushbu jaae rach-bas khaame farishton ke lahraaein amdan un ke shaane se mas vo jin ke qabze mein khudaai ishq ki duniyaa mein hain bebas ijz-e-vafaa bhi jurm hai shaayad shahr-badar ho jaaein bekas 'maani' do-aalam sajde mein palkein bojhal nazrein alkas"

"niind mein hai zamin aasmaan so gayaa aa bhi jaao ki saaraa jahaan so gayaa aao khalvat-saraa-e-haram chhoD kar baam-o-dar so gae paasbaan so gayaa subh-dam naqsh-e-paa un ke dhundlaa gae chaand bar-jaada-e-kahkashaan so gayaa baal bikhre hue chehra utraa huaa shab ki aaghosh mein gulsitaan so gayaa gham ki lau tez hangaama-e-shauq kam aag sulgaa di aur kaarvaan so gayaa zulf-o-rukh kyaa kahein din kahin raat hai ik jahaan jaag uThaa ik jahaan so gayaa 'maani' sham-e-harim-e-ghazal bujh gai vo 'jigar' shaair-e-khush-bayaan so gayaa"

"shaairi haasil-e-divaangi-e-dil to nahin narm halqe tiri zulfon ke salaasil to nahin qaus-e-abru kham-e-gesu shikan-e-peshaani aaj bhi ishq ke pechida masaail to nahin ik jhalak duur se dikhlaa ke vo chhup jaate hain sang-e-mil aae hain kuchh raah mein manzil to nahin tez-rau chaand ghaTaaon mein tah-o-baalaa hai muztarib koi safina pae saahil to nahin tishnagi mein nazar aate hain saraab-e-sahraa har nazar par ye gumaan hai koi maail to nahin faasle tai na hue raa-navardi ke baghair gaamzan jaanib-e-rahrav koi manzil to nahin kyuun na ghaafil ho faraaez se zamaana 'maani' kam yahaan vaqt guzaari ke mashaaghil to nahin"

"shahr pe chhaai hui khatra-e-yalghaar ki raat zeb-e-taarikh rahegi karam-e-yaar ki raat shukriya tum ko rahaa paas-e-hijaab-e-jaanaan ai shab-e-kucha-o-barzan dar-o-divaar ki raat dhuup mein kucha-navardi nahin jin kaa maslak un pe naazil na hui gesu-e-khamdaar ki raat main ne dekhe hain vahaan kitne nizaam-e-shamsi din ko kis tarah kahun anjuman-e-yaar ki raat chhu na paaeinge vo resham se mulaaim gesu sakht lagti hai jinhein vaada-e-dil-daar ki raat shart hai dusre aalam mein rasaai varna raat zaahid ki vahi hai jo qadah-khvaar ki raat qaabil-e-rashk hai ai dost hayaat-e-'maani' teri yaadon kaa shabina kabhi afkaar ki raat"

"soz-e-darun ne raah ko aasaan banaa diyaa jab aag mein gire to gulistaan banaa diyaa kuchh log apni rau mein sahar-khez ho gae khush-posh ne haris-e-garebaan banaa diyaa is ko adaa-e-husn ki husn-e-adaa kahun us shokh ne sitam ko bhi ehsaan banaa diyaa saakin thi mauj zulf ke bahr-e-siyaah mein baad-e-sabaa ne chheD ke tufaan banaa diyaa duniyaa-e-tang-dil ne mohabbat ke aas-paas divaar vo uThaai ki zindaan banaa diyaa dil ki kali khilaa di gham-e-taaza-kaar ne mauj-e-nafas ko baad-e-bahaaraan banaa diyaa ai rahrav-e-tajassus-e-hal khatm hai safar dushvaariyon ko vaqt ne aasaan banaa diyaa divaangi-e-ishq kaa 'maani' pe hai karam aavaara-gard-e-ku-e-nigaaraan banaa diyaa"

"sukun nahin hai mohabbat mein baat baat ke baad vo kis libaas mein aate hain iltifaat ke baad na rukh pe ghaaza-e-gulgun na maang mein taare jamaal-e-saadgi-e-husn hai sifaat ke baad ajab nahin mujhe mil jaae munsif-e-mansur labon tak aa ke ruki hai us ek baat ke baad farogh-e-jaam se ik subh-e-mustaqil maango sahar mile na agar mai-kade mein raat ke baad kali ko dekh ke sarshaar khvaab kyaa guzri nasim-e-subh jagaane jo aai raat ke baad dar-e-shabistaan pe 'maani' kisi ne dastak di hayaat le ke faraaez vo aai raat ke baad"

"kaif-e-sahbaa se nahin husn tarahdaari kaa dusraa naam javaani bhi hai sarshaari kaa halqa-e-daam-e-siyaasat kham-e-gesu-e-butaan har taraf daam bichhaa dil ki giraftaari kaa shaana-kush reshmi baalon ke zaraa aahista kufr pukhta hai kahaan aaj ki zunnaari kaa lazzat-e-zakhm se aagaah nahin thi duniyaa silsila gul se chalaa hai jigar-afgaari kaa ashk palkon pe sajaa lene do ahl-e-gham ko in sitaaron ko bhi mauqa do ziyaa-baari kaa baaz rahiye sar-e-gul-gasht-e-chaman se kab tak sang-baari kaa jo mausam vahi gul-baari kaa shaikh kaabe se koi rang na le kar uTThe titliyaan kar ke tavaaf aai hain phulvaari kaa bujh ke rah jaataa hai girte hi kisi daaman par ishq mein soz-e-jigar chaahiye chingaari kaa nim-baaz aankhein larazti hui palkein 'maani' jaise ehsaas shagufon mein ho bedaari kaa"

"pur-soz tarannum mein kyaa shama ghazal-khvaan hai lau jhumti jaati hai parvaana bhi raqsaan hai derina kharaabon par taamir-e-gulistaan hai baa-vasf hujum-e-gul rangini-e-viraan hai shoala ho ki khushbu ho taasir mein yaksaan hai har shama mahakti hai har phuul farozaan hai dil ke kisi jazbe ko kyaa naam abhi se duun jo un ki nigaahon se Takraae vo armaan hai aasuda zamaane ki be-raah-ravi tauba vo mashq-e-sitam jab tak jaari rahe ehsaan hai yaad aati hai raahon mein shaadaabi-e-nakhlistaan phir paa-e-barahna hai pur-khaar bayaabaan hai khaamoshi ke aalam mein dil Dubtaa jaataa hai Thahri hui maujon ke daaman mein bhi tufaan hai ai bazm-e-sukhan teraa aise mein khudaa-haafiz palkein vo jhuki si hain 'maani' bhi ghazal-khvaan hai"

"gardish-e-arz ruke shab hai guzarne ke liye koi uTThaa hai sitaaron se utarne ke liye zindagi tere masaail kaa sulajhnaa to alag kis ko fursat hai yahaan ghaur bhi karne ke liye shakhsiyat-saaz mohabbat ne badal di duniyaa ab vo surat kahaan baaqi hai mukarne ke liye laakh kar jaae taraqqi fan-e-marham-saazi baat ke zakhm to khulte nahin bharne ke liye mushkilein majmaa-nigaaron pe hui hain aasaan raasta khud kahin miltaa hai guzarne ke liye kaukab-e-jaam-o-subu farsh pe Dhalke honge shaam ham anjumani subh bikharne ke liye shorish-e-dahr ko dahliz se Takraane de dar khulaa chhoD na 'maani' koi jharne ke liye"

"nam hain vo aankhein buraa ho ishq ki taasir kaa dusraa rukh kitnaa dard-angez hai tasvir kaa vo mujassam husn-o-tamkin dil saraapaa dard-o-gham jaise 'saudaa' ke qasaaed aur taghazzul 'mir' kaa hind ke laala-rukho az ru-e-taamir-e-vatan rang har khitte ko de do jannat-e-kashmir kaa shauq ki aankhein hain akkaas-e-bahaar-e-husn-e-dost dil sadaa band-e-ghinaa-e-lahn hai taqrir kaa tere khat mein bil-mushaafa ham-kalaami ke maze tarz hai maktub-e-ghaalib mein yahi tahrir kaa iddaaa-e-khud-shanaasi hai saraasar be-mahal mukhtalif chehra ho jab har daur ki tasvir kaa 'maani' fan mein shakhsiyat hoti hai har fankaar ki shaairi parda uThaati hai miri tasvir kaa"

"kanaar-e-chashm se abru tak aa gayaa kaajal ki aaj sehn-e-haram mein utar gae baadal nigaah-e-shauq gai jab bhi khush-libaason tak durust ho gaiin zulfein sanvar gae aanchal na puchh husn ke andesha-haa-e-rusvaai zahe junun ki jise yaad maslahat na mahal magar kisi se numaaindagi-e-haq na hui sanam-kade ne taraashe hazaar laat-o-hubal ba-sad-nashaat hain vo mujh pe mehrbaan 'maani' nazar nazar mein taraana nafas nafas mein ghazal"

"kharaab-e-shauq huaa jab se is nigaah kaa dil charaagh-e-mai-kada hai gaah khaanqaah kaa dil na-jaane khaak-nashin kis ke intizaar mein hain kanaar-e-raah dhaDaktaa hai kab se raah kaa dil navaazish-e-gham-e-dauraan sabhi pe yaksaan hai gunaahgaar kaa dil ho ki be-gunaah kaa dil bahaar se bhi numaayaan hai ishq kaa kirdaar ye lahlahaataa chaman hai ki be-gunaah kaa dil falaah-e-khalq mein uThte hain naa-gahaan tufaan dhaDak rahaa hai havaaon mein sham-e-raah kaa dil duaaein karte chalo taa-ba-manzil-e-maqsud ki rahzanon se na mil jaae khizr-e-raah kaa dil tumhaari raah mein aasaar-e-zindagi to mile hai zarra zarra kisi aashiq-e-tabaah kaa dil sunaa hai shaair-e-khush-fikr ho gayaa 'maani' niyaaz-mand hai ik husn-e-khush-nigaah kaa dil"

"khush-kaam karo khaatir-e-naakaam hamein do khaali ho ki labrez koi jaam hamein do maayus nahin ham abhi islaah-e-bashar se har ku-e-ghalat manzil-e-badnaam hamein do jaulaan-gah-e-khaasaan-e-mohabbat se guzaaro kahte nahin ham shaahrah-e-aam hamein do aaraasta gesu se 'ataa ho fan-e-saadi nazron se adab-paara-e-khayyaam hamein do maslak hai mohabbat kaa val-itmaam minallaah kyon kashmakash-e-khaatir-e-naakaam hamein do gunjaan huaa gesuon vaalon se mohalla ham-tarz-e-hasinaan-e-avadh shaam hamein do 'maani' yahi suqraat kaa sajjaada-nashin hai denaa hai use zahr bharaa jaam hamein do"