Ghazal

"roz-o-shab ham ne ashk-baari ki intihaa hai ye be-qaraari ki meraa daaman siyaah thaa phir bhi ai khudaa tu ne paasdaari ki jaane kab kaa main mar gayaa hotaa un ki yaadon ne aabiyaari ki kostaa hi rahaa mujhe har dam qadr kyaa jaane vo bhikaari ki khaak huun khaak mein hi milnaa hai bu bhi aati hai khaaksaari ki kaam main ne kiyaa musavvir kaa main ne sheron mein dast-kaari ki main to majnun ban gayaa 'bismil' mujh pe logon ne sang-baari ki"

"tum se qad mein bahut hi chhoTaa huun is liye chaar zaanu baiThaa huun shahr kaa shahr jal gayaa haae mar gae sab faqat main zinda huun haath mein tere haath meraa hai main tire saath kitnaa jachtaa huun tum rubaa'i kaa aakhiri misra' nazm kaa main izaafi TukDaa huun is pe jamhur kaa huaa ijmaa’ tu samundar hai aur main dariyaa huun hai tire vaaste ye khush-khabari main tujhe apnaa dil de baiThaa huun main hi huun apne aap kaa baaghi main mubaarak ghaDi mein sotaa huun paa liyaa vasl mein bhi khuub mazaa hijr kaa phir bhi dil se shaidaa huun tu agar kahtaa hai ba'id hai tu phir main kis ke qarib hotaa huun mujh ko behad sukun miltaa hai jab bhi main tere gham mein rotaa huun mujh ko kahte hain ‘murtazaa-bismil' vaadi-e-kaashmir mein rahtaa huun"

"maar do mujh ko be-hayaa huun main tere siine ko taaktaa huun main ab to kuchh yaad hi nahin khud se aakhiri baar kab milaa huun main aap ki shaadmaani ki khaatir baarhaa jhuuT boltaa huun main ashk jo hijr mein bahaae the gham-zadon ko pilaa rahaa huun main zindagi tu nahin khafaa mujh se zindagi tujh se to khafaa huun main surmai aankhon ko zaraa kholo ghaur se dekh lo judaa huun main daavar-e-hashr itnaa kah de bas khush raho teraa aasraa huun main"

"ziist pahchaan kho rahi hai tu qaht-saali mein so rahi hai tu hijr ki shaakh yaad kar kar ke dasht saaraa bhigo rahi hai tu kahte hain ban gai hai tu dhoban kahte hain kapDe dho rahi hai tu chaandni paas-e-aabru rakh ab chaandni sab Dubo rahi hai tu aab-o-gil ki hasin aankh bataa baat kyaa hai jo ro rahi hai tu ai miri saanvli judaai sun kaanTe har dam chubho rahi hai tu hai tazabzub ki laash-e-'bismil' par hans rahi hai ki ro rahi hai tu"

"saaraa din aaftaab soyaa thaa yaar bhi be-hijaab soyaa thaa vasl ki shab ba-fazl-e-allah-miyaan raat bhar maahtaab soyaa thaa ai hamaari kitaab-e-zist bataa kyon tiraa intisaab soyaa thaa peD ke kaandhe par thakaa-maanda subh tak ik 'uqaab soyaa thaa sar judaai ke taaq par rakh ke do dahaai se khvaab soyaa thaa chaand ke dil-fareb saae tale tar-o-taaza gulaab soyaa thaa ek bedaar main hi thaa bas aur 'aalam-e-iztiraab soyaa thaa aaj 'bismil' havaa ke aanchal mein be-jhijak be-hisaab soyaa thaa"

"zakhm saare abhi javaan honge bistar-e-hijr par 'ayaan honge haakim-e-vaqt kab talak aakhir apne gaanv mein khaak-daan honge main ne tum ko kahaan kahaan chhuaa hai jaan maujud vo nishaan honge tujh ko taklif dene vaale log kal ko tere hi paasbaan honge in dukhon ko sanbhaal kar rakhnaa in se haasil kai jahaan honge har taraf hi dhuaan-dhuaan hogaa jab jahaan se sabhi dhuaan honge naaz hai apne aap par jin ko mere jaise vo khush-gumaan honge har ghaDi har-su hazrat-e-'bismil' tere aur gham ke darmiyaan honge"

"palkein zamin pe apni bichhaati hai chaandni aise mein dil hamaaraa lubhaati hai chaandni jab saath chhoD detaa hai suraj to us ghaDi rasta musaafiron ko dikhaati hai chaandni vo dekhte hi dekhte aankhon ke shahr mein har su mohabbaton ko sajaati hai chaandni insaan ho yaa koi darinda zamin par saae mein apne sab ko biThaati hai chaandni har raaz se karaayaa mujhe us ne aashnaa har ek baat mujh ko bataati hai chaandni vo bhi hai mubtalaa-e-mohabbat miri tarah har raat khud ko khud hi jalaati hai chaandni hamraah baadalon ke hain 'bismil' ke daagh-e-dil apni ziyaa mein un ko chhupaati hai chaandni"

"kyaa ajab vaaraftagi hai baal dharti nochti hai kuchh nahin tujh se ta'alluq tu to 'bismil' ajnabi hai siskiyaan ye kah rahi hain muflisi hai muflisi hai ye anaa tum ko mubaarak paas mere nisti hai jaa nahin saktaa main sahraa vaan ajab divaangi hai raabta hai us khudaa se jis ne bakhshi zindagi hai ro rahaa hai hans rahaa hai dost gham hai yaa khushi hai ibtidaa se intihaa tak bebasi hi bebasi hai zindagi mein teri 'bismil' khaamushi hi khaamushi hai"

"hausla khud kaa toD saktaa huun toD kar khud hi joD saktaa huun khaamushi chikhti hai kaanon mein us ko chhu kar jhinjhoD saktaa huun tujh ko maanaa hai zindagi apni kis tarah tujh ko chhoD saktaa huun bah rahe hain jo khuun ke dariyaa un ko ungli se moD saktaa huun kyaa bataaun tire liye 'bismil' kaise sahraa nichoD saktaa huun"

"khoyaa hai tu kin khayaalon mein raqib in siyah baalon yaa gaalon mein raqib haath meraa dekh kar un haathon mein paD gayaa aakhir savaalon mein raqib kyaa bataaun shahr vaalon kaa tumhein sab se achchhaa shahr vaalon mein raqib dosti gahri thi pahle donon mein ho gae do ek saalon mein raqib chhoDne vaalaa hi thaa us ko magar aa gayaa yaksar khayaalon mein raqib huun misaalon mein sar-e-fihrist main gham to ye hai be misaalon mein raqib vo pari haasil hui to hai sabab jaa rahe tu bhi ujaalon mein raqib tu ne 'bismil' fath paai aakhirash rah gayaa naakaam chaalon mein raqib"

"main divaana huun vo bhi divaani hai 'ishq ki ham ko choT khaani hai 'umr-e-rafta ko dekhne ke liye mujh ko 'umr-e-ravaan baDhaani hai zimmedaari kaa bojh uTh na sakaa naa-tavaani hi naa-tavaani hai sansani hijr ki yuun phaili hai lag rahaa hai ki nauha-khvaani hai khol do qufl-e-zang-aaluda tishnagi barson ki bujhaani hai laakh mushkil sahi magar phir bhi zindagaani to zindagaani hai hijr ki raaton kaa shahanshah huun tirgi meri naukraani hai ranj kaa raag kis ne chheDaa hai aaj to meri aqd-khvaani hai dost haq par jo mar gayaa us ki taa-qayaamat amar kahaani hai tiir mizhgaan ke lag gae dil par is liye jism arghavaani hai sar-giraani se khuub lagtaa hai ki mohabbat zarar-fishaani hai teraa kirdaar murtazaa 'bismil' teraa kirdaar jaavedaani hai"