Ghazal

"ek dhokaa hai ye shab-rang saveraa kyaa hai ye ujaalaa hai ujaalaa to andheraa kyaa hai tu mire gham mein na hansti hui aankhon ko rulaa main to mar mar ke bhi ji saktaa huun meraa kyaa hai zarre zarre mein dhaDakti hai koi shai jaise tiri nazron ne fazaaon mein bikheraa kyaa hai dard-e-duniyaa ki taDap dil mein mire rahne de tu to aankhon mein bhi rah sakti hai teraa kyaa hai tang hai 'shaad' mire zauq ki vusat ke liye halqa-e-zulf hai aafaaq kaa gheraa kyaa hai"

"naaravaa hai kisi ki hamraahi raah mein jaa rahaa huun tanhaa hi phir bhi kaisaa nafis dhokaa hai rang-o-bu hai agarche dhokaa hi dil tiri yaad mein taDaptaa hai jaise be-aab ho koi maahi faiz saaqi kaa aam thaa har-chand ham ko rahnaa magar thaa pyaasaa hi aadmi to faqir hi saa hai ThaaT hain 'shaad' ke magar shaahi"

"kaun sulagte aansu roke aag ke TukDe kaun chabaae ai ham ko samjhaane vaale koi tujhe kyuun kar samjhaae jivan ke andhiyaare path par jis ne teraa saath diyaa thaa dekh kahin vo komal aashaa aansu ban kar TuuT na jaae is duniyaa ke rahne vaale apnaa apnaa gham khaate hain kaun paraayaa rog kharide kaun paraayaa dukh apnaae haae miri maayus ummidein vaae mire naakaam iraade marne ki tadbir na sujhi jiine ke andaaz na aae is duniyaa ke gham-khaane mein gham se itni fursat kab hai kaun sitaaron kaa munh chume kaun bahaaron mein lahraae zabt bhi kab tak ho saktaa hai sabr ki bhi ik had hoti hai pal bhar chain na paane vaalaa kab tak apnaa rog chhupaae 'shaad' vahi aavaara shaaer jis ne tujh se pyaar kiyaa thaa shahron shahron ghuum rahaa hai armaanon ki laash uThaae"

"kisi ke jaur-o-sitam kaa to ik bahaana thaa hamaare dil ko bahar-haal TuuT jaanaa thaa tiri nazar ne nai ruuh phunk di varna hamaare dard kaa qissa bahut puraanaa thaa hamin ko baar-e-tarab naagavaar thaa lekin hamin ko shiddat-e-gham mein bhi muskuraanaa thaa ye kam-shanaas talaatum kise Daraataa hai vo log Duub gae jin ko Duub jaanaa thaa bajaa ki dair-o-haram bhi qarib the lekin hamaari raah mein haail sharaab-khaana thaa gunaah se hamein raghbat na thi magar yaa-rab tiri nigaah-e-karam ko to munh dikhaanaa thaa"

"Duub kar paar utar gae hain ham log samjhe ki mar gae hain ham ai gham-e-dahr teraa kyaa hogaa ye agar sach hai mar gae hain ham khair-maqdam kiyaa havaadis ne zindagi mein jidhar gae hain ham yaa bigaD kar ujaD gae hain log yaa bigaD kar sanvar gae hain ham maut ko munh dikhaaein kyaa yaa rab zindagi hi mein mar gae hain ham haae kyaa shai hai nashsha-e-mai bhi farsh se arsh par gae hain ham aarzuon ki aag mein jal kar aur bhi kuchh nikhar gae hain ham jab bhi ham ko kiyaa gayaa mahbus misl-e-nikhat bikhar gae hain ham shaadmaani ke rang-mahlon mein 'shaad' baa-chashm-e-tar gae hain ham"

"raunaq baDhegi ru-e-nashaat-e-jamaal ki thoDi si gard Daal do is par malaal ki deti rahi fareb unhein bhi tiri vafaa aaghaaz mein bhi jin ko khabar thi maaal ki ab is maqaam par hai miri zindagi jahaan kaifiyyat ek si hai nashaat o malaal ki allaah-re jazb-e-did ki ahl-e-nigaah se khud husn bhiik maang rahaa hai jamaal ki dil phir bhi aa gayaa gham-e-dauraan ke pher mein har-chand maslahat ne baDi dekh-bhaal ki phulon ki dilkashi ho ki taaron ki raushni parchhaaiyaan hain sab mire husn-e-khayaal ki"

"hayaat hai ki musalsal safar kaa aalam hai har ek saans mein vahshi ghazaal kaa ram hai jahaan azal se ghaTaa-Top zulmatein hain muhit vahaan bhi aaj farozaan nigaah-e-aadam hai unhin ke khuun se damkegaa kal rukh-e-giti hayaat jin ke liye aaj saaghar-e-sam hai usi ki aanch se pighlegaa zindagi kaa jumud jo soz aaj ba-zaahir dilon mein kam kam hai jahaan-e-soz hai mere khunuk taraanon mein main vo sharaar huun jis par ridaa-e-shabnam hai na jaane jaag uThe 'shaad' kab nasib-e-jahaan bahut dinon se mizaaj-e-hayaat barham hai"

"tiraa tazkira su-ba-su kyuun karein ham mohabbat ko be-aabru kyuun karein ham likhi hai muqaddar mein naa-kaamyaabi karein to gham-e-aarzu kyuun karein ham agar rang-o-bu is chaman kaa hai faani nazar maail-e-rang-o-bu kyuun karein ham hasinon kaa paas-e-vafaa ghair-mumkin hasinon se ye aarzu kyuun karein ham adaavat hi jab haasil-e-dosti hai mohabbat ki phir aarzu kyuun karein ham karein kyuun tumhaare sitam ki shikaayat mohabbat ko be-aabru kyuun karein ham agar 'shaad' ham khud hi khoe hue hain kisi aur ki justuju kyuun karein ham"

"jab be-khudi se hosh kaa yaaraana ho gayaa dair-o-haram kaa naam bhi mai-khaana ho gayaa in gul-rukhon ko jab se huaa shauq-e-mai-kashi jo phuul thaa chaman mein vo paimaana ho gayaa ai ham-nashin aziyyat-e-farzaangi na puchh jis mein zaraa bhi 'aql thi divaana ho gayaa bas us nigaah-e-naaz se milne ki der thi jo gham bhi dil mein thaa gham-e-jaanaana ho gayaa mere hi dil ki aag kaa sho'la thaa vo koi jo intihaa-e-shauq mein parvaana ho gayaa jab aap aa gae rukh-e-taabaan liye hue pur-nur zindagi kaa siyah-khaana ho gayaa ye raunaqein kahaan mire dil ko nasib thiin aabaad tere gham se ye kaashaana ho gayaa tai ho sakaa na marhala-e-shauq 'aql se lekin ba-faiz-e-laghzish-e-mastaana ho gayaa mai-khvaar shaad bhi hai bas itni si baat hai itni si baat kaa magar afsaana ho gayaa"

"bijliyon ki hansi uDaane ko khud jalaataa huun aashiyaane ko ro rahaa hai agarche dil phir bhi muskuraataa huun muskuraane ko mutlaqan dilkashi na thi us mein kaun suntaa mire fasaane ko chhin li us ne taaqat-e-parvaaz aag lag jaae aashiyaane ko 'shaad' itnaa hi ham samajhte hain ham samajhte nahin zamaane ko"

"bad-gumaan mujh se na ai fasl-e-bahaaraan honaa meri aadat hai khizaan mein bhi gul-afshaan honaa mere gham ko bhi dil-aavez banaa detaa hai teri aankhon se mire gham kaa numaayaan honaa kyuun na pyaar aae use apni pareshaani par siikh le jo tiri zulfon se pareshaan honaa mere vijdaan ne mahsus kiyaa hai aksar teri khaamosh nigaahon kaa ghazal-khvaan honaa ye to mumkin hai kisi roz khudaa ban jaae ghair mumkin hai magar shaikh kaa insaan honaa apni vahshat ki numaaish mujhe manzur na thi varna dushvaar na thaa chaak-girebaan honaa rahrav-e-shauq ko gumraah bhi kar detaa hai baaz auqaat kisi raah kaa aasaan honaa kyuun gurezaan ho miri jaan pareshaani se dusraa naam hai jiine kaa pareshaan honaa jin ko hamdard samajhte ho hanseinge tum par haal-e-dil kah ke na ai 'shaad' pashimaan honaa"

"shaam-e-vaada kaa Dhal gayaa saaya aane vaalaa abhi nahin aayaa zindagi ke ghamon ko apnaa kar ham ne dar-asl tum ko apnaayaa justuju hi dilon ki manzil thi ham ne kho kar tujhe, tujhe paayaa zindagi naam hai judaai kaa aap aae to mujh ko yaad aayaa ham ne teri jafaa ke parde mein khud bhi dil par bahut sitam Dhaayaa zindagi se to khair shikva thaa muddaton maut ne bhi tarsaayaa 'shaad' ahhl-e-tarab ko bhi aksar meri afsurdagi pe pyaar aayaa"

"phir is duniyaa se ummid-e-vafaa hai tujhe ai zindagi kyaa ho gayaa hai baDi zaalim nihaayat bevafaa hai ye duniyaa phir bhi kitni khushnumaa hai koi dekhe to bazm-e-zindagi mein ujaalon ne andheraa kar diyaa hai khudaa se log bhi khaaif kabhi the magar logon se ab khaaif khudaa hai maze puchho kuchh us se zindagi ke havaadis mein jise jiinaa paDaa hai mire pahlu mein dil hai to yaqinan azal hi se magar TuuTaa huaa hai zabaan-o-fan se main vaaqif nahin huun magar vijdaan meraa rahnumaa hai mire naqqaad meri shaairi to mire TuuTe hue dil ki sadaa hai kahaan huun 'shaad' main to shaad saa huun vo shaad-e-khush-navaa to mar chukaa hai"