Ghazal

"ishq jab zamzama-pairaa hogaa husn khud mahv-e-tamaashaa hogaa sun ke aavaaza-e-zanjir-e-sabaa qafas-e-ghuncha kaa dar vaa hogaa jaras-e-shauq agar saath rahi har-nafas shahpar-e-anqaa hogaa daaim aabaad rahegi duniyaa ham na honge koi ham saa hogaa kaun dekhegaa tulu-e-khurshi zarra jab dida-e-binaa hogaa ham tujhe bhuul ke khush baiThe hain ham saa bedard koi kyaa hogaa phir sulagne lagaa sahraa-e-khayaal abr ghir kar kahin barsaa hogaa phir kisi dhyaan ke sad-raahe par dil-e-hairat-zadaa tanhaa hogaa phir kisi subh-e-tarab kaa jaadu parda-e-shab se huvaidaa hogaa gul-zaminon ke khunuk ramnon mein jashn-e-raamish-gari barpaa hogaa phir nai rut kaa ishaara paa kar vo saman-bu chaman-aaraa hogaa gul-shab-taab ki khushbu le kar ablaq-e-subh ravaana hogaa phir sar-e-shaakh-e-shuaa-e-khurshid nikhat-e-gul kaa baseraa hogaa ik sadaa sang mein taDpi hogi ik sharar phuul mein larzaa hogaa tujh ko har phuul mein uryaan sote chaandni-raat ne dekhaa hogaa dekh kar aaina-e-aab-e-ravaan patta patta lab-e-goyaa hogaa shaam se soch rahaa huun 'naasir' chaand kis shahr mein utraa hogaa"

"gham-fursati-e-khvaab-e-tarab yaad rahegi guzri jo tire saath vo shab yaad rahegi har-chand tiraa ahd-e-vafaa bhuul gae ham vo kashmakash-e-sabr-talab yaad rahegi siine mein umangon kaa vahi shor hai ab tak vo shokhi-e-yak-jumbish-e-lab yaad rahegi phir jis ke tasavvur mein barasne lagin aankhein vo barhami-e-sohbat-e-shab yaad rahegi go hijr ke lamhaat bahut talkh the lekin har baat ba-unvaan-e-tarab yaad rahegi"

"rah-e-junun mein khudaa kaa havaala kyaa kartaa ye khizr ranj-e-safar kaa izaala kyaa kartaa guzaarni thi tire hijr ki pahaaD si raat main taar-e-resham-o-zar kaa do-shaala kyaa kartaa na shaghl-e-khaaraa-taraashi na kaarobaar-e-junun main koh-o-dasht mein faryaad-o-naala kyaa kartaa hikaayat-e-gham-e-duniyaa ko chaahiye daftar varaq varaq mire dil kaa risaala kyaa kartaa main tishna kaam tire mai-kade se lauT aayaa kisi ke naam kaa le kar pyaala kyaa kartaa"

"jab talak dam rahaa hai aankhon mein ek aalam rahaa hai aankhon mein gar ye paiham rahaa hai aankhon mein raat bhar nam rahaa hai aankhon mein us gul-e-tar ki yaad mein taa-subh raqs-e-shabnam rahaa hai aankhon mein subh-e-rukhsat abhi nahin bhuli vo samaan bas rahaa hai aankhon mein dil mein ik umr jis ne shor kiyaa vo bahut kam rahaa hai aankhon mein kabhi dekhi thi us ki ek jhalak rang saa jam rahaa hai aankhon mein"

"daur-e-falak jab dohraataa hai mausam-e-gul ki raaton ko kunj-e-qafas mein sun lete hain bhuli-bisri baaton ko reg-e-ravaan ki narm tahon ko chheDti hai jab koi havaa suune sahraa chikh uThte hain aadhi aadhi raaton ko aatish-e-gham ke sail-e-ravaan mein nindein jal kar raakh huiin patthar ban kar dekh rahaa huun aati jaati raaton ko mai-khaane kaa afsurda maahaul to yunhi rahnaa hai khushk labon ki khair manaao kuchh na kaho barsaaton ko 'naasir' mere munh ki baatein yuun to sachche moti hain lekin un ki baatein sun kar bhuul gae sab baaton ko"

"gham hai yaa khushi hai tu meri zindagi hai tu aafaton ke daur mein chain ki ghaDi hai tu meri raat kaa charaagh meri niind bhi hai tu main khizaan ki shaam huun rut bahaar ki hai tu doston ke darmiyaan vajh-e-dosti hai tu meri saari umr mein ek hi kami hai tu main to vo nahin rahaa haan magar vahi hai tu 'naasir' is dayaar mein kitnaa ajnabi hai tu"

"jalva-saamaan hai rang-o-bu ham se is chaman ki hai aabru ham se dars lete hain khush-khiraami kaa mauj-e-dariyaa-o-aab-ju ham se har sahar baargaah-e-shabnam mein phuul milte hain baa-vazu ham se ham se raushan hai kaar-gaah-e-sukhan nafas-e-gul hai mushkbu ham se shab ki tanhaaiyon mein pichhle pahar chaand kartaa hai guftugu ham se shahr mein ab hamaare charche hain jagmagaate hain kaakh-o-ku ham se"

"din kaa phuul abhi jaagaa thaa dhuup kaa haath baDhaa aataa thaa surkh chanaaron ke jangal mein patthar kaa ik shahr basaa thaa piile pathrile haathon mein niili jhiil kaa aaina thaa ThanDi dhuup ki chhatri taane peD ke pichhe peD khaDaa thaa dhuup ke laal hare honTon ne tere baalon ko chumaa thaa tere aks ki hairaani se bahtaa chashma Thahar gayaa thaa teri khamoshi ki shah paa kar main kitni baatein kartaa thaa teri hilaal si ungli pakDe main koson paidal chaltaa thaa aankhon mein tiri shakl chhupaae main sab se chhuptaa phirtaa thaa bhuli nahin us raat ki dahshat charkh pe jab taaraa TuuTaa thaa raat gae sone se pahle tu ne mujh se kuchh puchhaa thaa yuun guzri vo raat bhi jaise sapne mein sapnaa dekhaa thaa"

"koi surat-aashnaa apnaa na begaana koi kuchh kaho yaaro ye basti hai ki viraana koi subh-dam dekhaa to saaraa baagh thaa gul ki taraf shama ke taabut par royaa na parvaana koi khalvaton mein roegi chhup-chhup ke lailaa-e-ghazal is bayaabaan mein na ab aaegaa divaana koi ham-nashin khaamosh divaarein bhi sunti hain yahaan raat Dhal jaae to phir chheDeinge afsaana koi"

"koi aur hai nahin to nahin mire ru-ba-ru koi aur hai baDi der main tujhe dekh kar ye lagaa ki tu koi aur hai ye gunaahgaaron ki sar-zamin hai bahisht se bhi sivaa hasin magar is dayaar ki khaak mein sabab-e-numu koi aur hai jise DhunDhtaa huun gali gali vo hai mere jaisaa hi aadmi magar aadmi ke libaas mein vo farishta-khu koi aur hai koi aur shai hai vo be-khabar jo sharaab se bhi hai tez-tar miraa mai-kada kahin aur hai miraa ham subu koi aur hai"

"qafas ko chaman se sivaa jaante hain har ik saans ko ham sabaa jaante hain lahu ro ke sinchaa hai ham ne chaman ko har ik phuul kaa maajraa jaante hain jise naghma-e-nai samajhti hai duniyaa use bhi ham apni sadaa jaante hain ishaaraa kare jo nai zindagi kaa ham us khud-kushi ko ravaa jaante hain tiri dhun mein koson safar karne vaale tujhe sang-e-manzil-numaa jaante hain"

"ye bhi kyaa shaam-e-mulaaqaat aai lab pe mushkil se tiri baat aai subh se chup hain tire hijr-nasib haae kyaa hogaa agar raat aai bastiyaan chhoD ke barse baadal kis qayaamat ki ye barsaat aai koi jab mil ke huaa thaa rukhsat dil-e-betaab vahi raat aai saaya-e-zulf-e-butaan mein 'naasir' ek se ek nai raat aai"

"khamoshi ungliyaan chaTkhaa rahi hai tiri aavaaz ab tak aa rahi hai dil-e-vahshi liye jaataa hai lekin havaa zanjir si pahnaa rahi hai tire shahr-e-tarab ki raunaqon mein tabiat aur bhi ghabraa rahi hai karam ai sarsar-e-aalaam-e-dauraan dilon ki aag bujhti jaa rahi hai kaDe koson ke sannaaTe hain lekin tiri aavaaz ab tak aa rahi hai tanaab-e-khema-e-gul thaam 'naasir' koi aandhi ufuq se aa rahi hai"

"patthar kaa vo shahr bhi kyaa thaa shahr ke niche shahr basaa thaa peD bhi patthar phuul bhi patthar pattaa pattaa patthar kaa thaa chaand bhi patthar jhiil bhi patthar paani bhi patthar lagtaa thaa log bhi saare patthar ke the rang bhi un kaa patthar saa thaa patthar kaa ik saanp sunahraa kaale patthar se lipTaa thaa patthar ki andhi galiyon mein main tujhe saath liye phirtaa thaa gungi vaadi guunj uThti thi jab koi patthar girtaa thaa"

"phuul khushbu se judaa hai ab ke yaaro ye kaisi havaa hai ab ke dost bichhDe hain kai baar magar ye nayaa daagh khulaa hai ab ke pattiyaan roti hain sar piTti hain qatl-e-gul aam huaa hai ab ke shafaqi ho gai divaar-e-khayaal kis qadar khuun bahaa hai ab ke manzar-e-zakhm-e-vafaa kis ko dikhaaein shahr mein qaht-e-vafaa hai ab ke vo to phir ghair the lekin yaaro kaam apnon se paDaa hai ab ke kyaa sunein shor-e-bahaaraan 'naasir' ham ne kuchh aur sunaa hai ab ke"

"zabaan sukhan ko sukhan baankpan ko tarsegaa sukhan-kadaa miri tarz-e-sukhan ko tarsegaa nae piyaale sahi tere daur mein saaqi ye daur meri sharaab-e-kuhan ko tarsegaa mujhe to khair vatan chhoD kar amaan na mili vatan bhi mujh se gharib-ul-vatan ko tarsegaa inhi ke dam se farozaan hain millaton ke charaagh zamaana sohbat-e-arbaab-e-fan ko tarsegaa badal sako to badal do ye baaghbaan varna ye baagh saaya-e-sarv-o-saman ko tarsegaa havaa-e-zulm yahi hai to dekhnaa ik din zamin paani ko suraj kiran ko tarsegaa"

"nae des kaa rang nayaa thaa dharti se aakaash milaa thaa duur ke dariyaaon kaa sonaa hare samundar mein girtaa thaa chalti nadiyaan gaate nauke nokon mein ik shahr basaa thaa nauke hi mein rain-baseraa nauke hi mein din kaTtaa thaa naukaa hi bachchon kaa jhulaa naukaa hi piiri kaa asaa thaa machhli jaal mein taDap rahi thi naukaa lahron mein uljhaa thaa hanstaa paani rotaa paani mujh ko aavaazein detaa thaa tere dhyaan ki kashti le kar main ne dariyaa paar kiyaa thaa"

"mumkin nahin mataa-e-sukhan mujh se chhin le go baaghbaan ye kunj-e-chaman mujh se chhin le gar ehtiraam-e-rasm-e-vafaa hai to ai khudaa ye ehtiraam-e-rasm-e-kohan mujh se chhin le manzar dil o nigaah ke jab ho gae udaas ye be-fazaa ilaaqa-e-tan mujh se chhin le gul-rez meri naala-kashi se hai shaakh shaakh gulchin kaa bas chale to ye fan mujh se chhin le sinchi hain dil ke khuun se main ne ye kiyaariyaan kis ki majaal meraa chaman mujh se chhin le"

"main ne jab likhnaa sikhaa thaa pahle teraa naam likhaa thaa main vo sabr-e-samim huun jis ne baar-e-amaanat sar pe liyaa thaa main vo ism-e-azim huun jis ko jinn-o-malak ne sajda kiyaa thaa tu ne kyuun miraa haath na pakDaa main jab raste se bhaTkaa thaa jo paayaa hai vo teraa hai jo khoyaa vo bhi teraa thaa tujh bin saari umr guzaari log kaheinge tu meraa thaa pahli baarish bhejne vaale main tire darshan kaa pyaasaa thaa"

"gali gali miri yaad bichhi hai pyaare rasta dekh ke chal mujh se itni vahshat hai to meri hadon se duur nikal ek samay tiraa phuul saa naazuk haath thaa mere shaanon par ek ye vaqt ki main tanhaa aur dukh ke kaanTon kaa jangal yaad hai ab tak tujh se bichhaDne ki vo andheri shaam mujhe tu khaamosh khaDaa thaa lekin baatein kartaa thaa kaajal main to ek nai duniyaa ki dhun mein bhaTaktaa phirtaa huun meri tujh se kaise nibhegi ek hain tere fikr o amal meraa munh kyaa dekh rahaa hai dekh is kaali raat ko dekh main vahi teraa hamraahi huun saath mire chalnaa ho to chal"

"aaj to be-sabab udaas hai ji ishq hotaa to koi baat bhi thi jaltaa phirtaa huun main dopahron mein jaane kyaa chiiz kho gai meri vahin phirtaa huun main bhi khaak-basar is bhare shahr mein hai ek gali chhuptaa phirtaa hai ishq duniyaa se phailti jaa rahi hai rusvaai ham-nashin kyaa kahun ki vo kyaa hai chhoD ye baat niind uDne lagi aaj to vo bhi kuchh khamosh saa thaa main ne bhi us se koi baat na ki ek dam us ke honT chuum liye ye mujhe baiThe baiThe kyaa sujhi ek dam us kaa haath chhoD diyaa jaane kyaa baat darmiyaan aai tu jo itnaa udaas hai 'naasir' tujhe kyaa ho gayaa bataa to sahi"

"tire aane kaa dhokaa saa rahaa hai diyaa saa raat bhar jaltaa rahaa hai ajab hai raat se aankhon kaa aalam ye dariyaa raat bhar chaDhtaa rahaa hai sunaa hai raat bhar barsaa hai baadal magar vo shahr jo pyaasaa rahaa hai vo koi dost thaa achchhe dinon kaa jo pichhli raat se yaad aa rahaa hai kise DhunDoge in galiyon mein 'naasir' chalo ab ghar chalein din jaa rahaa hai"

"shoala saa pech-o-taab mein dekhaa jaane kyaa iztiraab mein dekhaa gul-kadon ke tilism bhuul gae vo tamaashaa naqaab mein dekhaa aaj ham ne tamaam husn-e-bahaar ek barg-e-gulaab mein dekhaa sar khule paa-barahna koThe par raat use maahtaab mein dekhaa fursat-e-mausam-e-nashaat na puchh jaise ik khvaab khvaab mein dekhaa"

"shabnam-aalud palak yaad aai gul-e-aariz ki jhalak yaad aai phir sulagne lage yaadon ke khanDar phir koi taak-e-khunak yaad aai kabhi zulfon ki ghaTaa ne gheraa kabhi aankhon ki chamak yaad aai phir kisi dhyaan ne Dere Daale koi aavaara mahak yaad aai phir koi naghma gulu-gir huaa koi be-naam kasak yaad aai zarre phir maail-e-ram hain 'naasir' phir unhein sair-e-falak yaad aai"