Ghazal

"ghair-e-tavakkul nahin chaaraa mujhe apne hi dam kaa hai sahaaraa mujhe hirs-o-tama ne to Duboyaa hi thaa sabr-o-qanaaat ne ubhaaraa mujhe jo vo kahe us ko sazaa-vaar hai chun-o-charaa kaa nahin yaaraa mujhe be-adabon ki adab-aamoziyaan in ke bigaDne ne sanvaaraa mujhe koshish-e-be-sud mushavvash na kar qaar na ban jaae kinaaraa mujhe zishti-e-pindaar dilaataa hai yaad qissa-e-askandar-o-daaraa mujhe nang-e-muzillat se chhuDaa le gayaa josh-e-hamiyyat kaa haraaraa mujhe auj-e-maaali pe uDaa le gayaa tausan-e-himmat kaa taraaraa mujhe aah nahin rukhsat-e-ifshaa-e-raaz qissa to maalum hai saaraa mujhe fursat-e-auqaat hai bas mughtanim ye nahin milne ki dobaaraa mujhe"

"nahin maalum kyaa vaajib hai kyaa farz mire mazhab mein hai teri razaa farz shuur-e-hasti-e-mauhum hai kufr fanaa baad-e-fanaa baad-e-fanaa farz nahin aagaah mast-e-baada-e-shauq kahaan sunnat kidhar vaajib kujaa farz reh-e-taslim mein az-ru-e-fatvaa duaa vaajib pa tark-e-muddaaa farz na chhuTe kufr mein bhi vaz-e-imaan ki har haalat mein hai yaad-e-khudaa farz nahin dekhaa kisi ne husn-e-mastur ba-qadr-e-fahm lekin kar liyaa farz na maanungaa na maanungaa kabhi main mujhe karte hain kyuun us se judaa farz na kholungaa na kholungaa zabaan ko ki hai ikhfaa-e-raaz-e-dilrubaa farz balaa se koi maane yaa na maane chalo ham kar chuke apnaa adaa farz"

"hai be-lab-o-zabaan bhi ghul tere naam kaa mahram nahin hai gosh magar is payaam kaa khush hai malaamat ahl-e-kharaabaat kai liye is silsile mein naam nahin nang-o-naam kaa nakhvat hai jis ke kaasa-e-sar mein bhari hui kab mustahiq hai mahfil rindaan mein jaam kaa jaagir-e-dard par hamein sarkaar-e-ishq ne tahrir kar diyaa hai vasiqa davaam kaa vaadi-e-ishq mein na milaa koi ham-safar sunte the naam khizr alaihis-salaam kaa aasudgi na DhunD ki jaataa hai kaarvaan le mustaaar barq se vaqfa qayaam kaa kholaa hai mujh pe sirr-e-haqiqat majaaz ne ye pukhtagi sila hai khayaalaat-e-khaam kaa khaataa nahin fareb-e-tamannaa-e-do-jahaan khugar nahin hai tausan-e-himmat lagaam kaa mat rakh tamaa se chashm-e-tamatto ki hai yahaan daana har ek mardumak-e-dida-daam kaa pahunchaa diyaa hudud-e-do-aalam se bhi pare mutrib ne raag chheD diyaa kis maqaam kaa zulmat mein kyaa tamiz safed-o-siyaah ki furqat mein kuchh hisaab nahin subh-o-shaam kaa jis ki nazar hai sanat-e-abru-nigaar par hai vo qatil-e-tegh na kushta niyaam kaa khaane ko ai haris gham-e-ishq kam nahin ye ho to kuchh bhi fikr na kar qarz-o-vaam kaa main be-qaraar-e-manzil-e-maqsud be-nishaan raste ki intihaa na Thikaanaa maqaam kaa gar dekhiye to khaatir-e-naashaad shaad hai sach puchhiye to hai dil-e-naakaam kaam kaa uTThe tiri naqaab to uTh jaae ek baar sab tafraqa ye roz-o-shab-o-subh-o-shaam kaa"

"hai jaan-e-hazin ek lab-e-ruh-fazaa do ai kaash ki is ek ki ho jaaein davaa do thaa khaar-e-jigar hijr mein tanhaa gham-e-duri hain aafat-e-jaan vasl mein ab sharm-o-hayaa do mastaana-ravish kyuun na chale vo nigah-e-naaz aankhein hain ki hain jaam-e-mai-e-hosh-rubaa do ji tang hai kyaa kijiye aur josh-e-balaa ye dil ek hai kyaa dijiye aur zulf-e-dotaa do hai ain inaayat jo nishaan puchhiye meraa ye bhi nahin manzur to apnaa hi pataa do kyaa daam-e-fareb us ne bichhaayaa hai dil-aavez do aan phansein aur jo ho jaaein rihaa do gar naaz-khud-aaraa ko hai yaktaai kaa daavaa kyuun aaina dekhaa ki hue jalva-numaa do bebaaki-o-shokhi bhi hai aur sharm-o-hayaa bhi do mahram-e-asraar hain to parda-kushaa do do gesu-o-do zulf-e-balaa-khez hain chaaron haan kaakul-e-khamdaar bhi hain un ke sivaa do vo tarz-o-ravish haae vo andaaz-o-adaa haif kyaa bachte dil-o-jaan kujaa chaar kujaa do seri-e-nazar bhi na hui haae mayassar aankhein jo huiin chaar lage tir-e-qazaa do"

"zaraa gham-zadon ke bhi gham-khvaar rahnaa karein naaz to naaz-bardaar rahnaa faraakhi-o-usrat mein shaadi-o-gham mein bahar-haal yaaron ke tum yaar rahnaa samajh nardbaan apni naakaamiyon ko ki hai shart-e-himmat talabgaar rahnaa karo shukr hai ye inaayat khudaa ki balaaon mein aksar giraftaar rahnaa agar aadmi ko na ho mashghala kuchh bahisht-e-barin mein ho dushvaar rahnaa khabar bhi hai aadam se jannat chhuTTi kyuun khilaaf-e-jibillat thaa be-kaar rahnaa samajhte hain sheron ko bhi narm chaara ghazaalaan-e-shahri se hoshyaar rahnaa"

"saaqi-e-khum-khaana thaa jo subh-o-shaam roz-e-aadina thaa masjid mein imaam jis ne chashm-e-mast-e-saaqi dekh li taa-qayaamat us pe hushyaari haraam is lab-e-jaan-bakhsh ki baatein thiin yaa moajazaat-e-isi-e-gardun-maqaam ho gayaa us ko qayaamat kaa yaqin jis ne dekhaa sarv-qaamat kaa khiraam chashma-e-aab-e-baqaa ki lahr thi vo ibaarat vo ishaarat laa-kalaam marhabaa itr-e-garebaan ki shamim hai moattar jis se ruhaani mashaam thi zabaan yaa qaate-e-auhaam yaa zulfiqaar-e-haidari thi be-niyaam jis ne dekhaa nargis-e-shahlaa kaa khvaab is ne paayaa ramz-e-qalbi laa-yanaam qaala atmamto alaikum nemati ho gaiin sab khubiyaan us par tamaam jis ne chaaTi utba-e-uliyaa ki khaak talkhi-e-dauraan se ho kyuun talkh-kaam ai sabaa sahraa-e-jaan mein kar talaash kis taraf hain vo suraadiq vo khiyaam khalvat-e-lailaa mein tu guzre agar to ye kah denaa hamaaraa bhi payaam tishnigaan-e-shauq hain gum-karda-raah tu bhi chal bahr-e-khudaa do-chaar gaam bahr mein barpaa huaa josh-o-kharosh habbazaa rushhaat-e-kaasaatil-kiraam saunp di thi dast-e-qudrat ne tujhe naaqa-e-lailaa-e-maani ki zamaam"

"kis liye parvaana khaakistar huaa shama kyuun apni jalan mein ghul gai muntashir kyuun ho gae auraaq-e-gul chikhti gulshan se kyuun bulbul gai aabdida ho ke shabnam kyuun chali dam ke dam kaanTon mein aa kar tul gai sabza-e-tarf-e-khayaabaan kyaa huaa aah kyuun shaadaabi-e-sumbul gai kuchh na thaa khvaab-e-pareshaan ke sivaa is theater ki haqiqat khul gai raah ke ranj-o-taab kaa kyaa gila jab ki dil se gard-e-kulfat dhul gai"

"vo pairahan-e-jaan mein jaan hajla-e-tan mein huun vahm-e-judaai se ajab ranj-o-mehan mein maqsud ziyaarat hai agar kaaba-e-dil ki ho garm-e-safar naahiya-e-mulk-e-vatan mein vo qaamat-e-dilkash hai ajab fitna-e-aalam chhuptaa hi nahin pairahan-e-naud-kuhan mein ai shama bahaa ashk chhupaa raaz-e-mohabbat khaakistar-e-parvaana hai betaab lagan mein shorish miri bejaa hai na fariyaad nikammi raunaq hai zaraa naala-e-bulbul se chaman mein taasir ho kyaa khaak jo baaton mein ghaDat ho kuchh baat nikalti hai to be-saakhta-pan mein kam-tar hai do o daam se insaan ba-maraatib har dam jo taraqqi na kare chaal-chalan mein huun main to vahi moatakif-e-gosha-e-uzlat haalaanki miraa rekhta pahunchaa hai deccan mein ye sach hai ki saudaa bhi thaa ustaad-e-zamaana meri to magar 'mir' hi thaa sher ke fan mein"

"'aish ke jalse hujum aalaam ke sho'bade hain gardish-e-ayyaam ke himmat-e-mardaana tujh ko aafrin kar ke chhoDaa sar hue jis kaam ke subh ke bhule to aae shaam ko dekhiye kab aaein bhule shaam ke tu hi kar taklif o paik-e-sabaa muntazir hain vo mire paighaam ke haashaa lillaah mai-kade ke kaase lein mo'taqid huun zaahid-e-ullaam ke miT gai hai dil se aazaadi ki yaad kitne khugar ho gae ham daam ke ab to charche jaa-ba-jaa hone lage vaa'izon ki baang-e-be-hangaam ke"

"rusvaa hue baghair na naaz-e-butaan uThaa jab ho gae subuk to ye baar-e-giraan uThaa maani mein kar talaash maaash-e-dil-o-dimaagh haivaan-sifat na lazzat-e-kaam-o-dahaan uThaa gar khanda yaad aae to siine ko chaak kar gar ghamza yaad aae to zakhm-e-sinaan uThaa yaa aankh uThaa ke chashm-e-fusun-saaz ko na dekh yaa umr-bhar masaaib-e-daur-e-zamaan uThaa us anjuman mein jaaiye ab kis umiid par ham baiThne na paae ki vo bad-gumaan uThaa be-yaad-e-dost umr-e-giraami na sarf kar us ganj-e-shaaegaan ko na yuun raaegaan uThaa vasl-o-firaaq vahm sahi dil-lagi to hai phir ham kahaan jo parda-e-raaz-e-nihaan uThaa parvaane ki tapish ne khudaa jaane kaan mein kyaa kah diyaa ki shama ke sar se dhuaan uThaa"

"gar nashe mein koi be-fikr-o-taammul baandhe chashm-e-mai-gun ko tiri jaam-e-pur-az-mul baandhe zikr-e-qaamat mein agar fikr taraqqi na kare rashk-e-tubaa to likhe go ba-tanazzul baandhe taba ki silsila-jumbaan jo pareshaani ho gesu-e-ghaaliya saa ko tire sumbul baandhe naala to vo hai ki ghabraa ke uThaa de parda lek nazzaare ki himmat bhi tahammul baandhe kuchh na ban aaegi jab luuT machaaegi khizaan ghuncha har chand girah kas ke zar-e-gul baandhe ru-ba-ru us ke lab-e-arz-e-tamannaa na hile zor-e-afsun-e-nazar se gae bilkul baandhe hain tire band-e-qabaa uqda-e-dushvaar mire ki jo khole na khule aur jo gae khul baandhe na bache par na bache sail-e-fanaa se na bache gar koi kangura-e-charkh pe bhi pul baandhe aankh khulne bhi na paai thi ki us ne fauran band burqe ke ba-andaaz-e-taghaaful baandhe haae vo said ki sayyaad ke pichhe lapke sar ko fitraak pe har-dam ba-tafaavul baandhe"

"nikhat-e-turra-e-mushkin jo sabaa laai hai koi aavaara huaa hai koi saudaai hai be-khudi se hai yahaan be-khabari kaa aalam khud-numaai ko vahaan shaghl-e-khud-aaraai hai apni hi jalvagari hai ye koi aur nahin ghaur se dekh agar aankh mein binaai hai hai mujhe kashmakash-e-sai-o-talab se nafrat dil miraa tark-e-tamannaa kaa tamannaai hai juz dil-e-paak na paayaa haram-e-khaas kahin dair-o-kaaba mein abas naasiya-farsaai hai naaz ki jalvagari ke liye manzar hai niyaaz naa-tavaani miri ham-rang-e-tavaanaai hai jab tabiat hi na haazir ho to be-sud hai fikr sher-goi to kahaan qaafiya-paimaai hai munh pe laaun to ye kam-zarf bahak jaaein abhi baat jo pir-e-kharaabaat ne samjhaai hai khud munaadi o munaadaa huun na ghaibat na huzur aalam-e-ghaib se yuun dil mein nidaa aai hai dil ye kahtaa hai ki haasil ki hai tahsil abas na tamannaa koi shai hai na tamannaai hai"

"kaam agar hasb-e-muddaaa na huaa teraa chaahaa huaa buraa na huaa khaak uDti jo ham khudaa hote bandagi kaa bhi haq adaa na huaa sab jataayaa kiye niyaaz-e-qadim vo kisi kaa bhi aashnaa na huaa rakhsh-e-ayyaam ko qaraar kahaan idhar aayaa udhar ravaana huaa kyaa khule jo kabhi na thaa pinhaan kyuun mile jo kabhi judaa na huaa sakht fitna jahaan mein uThtaa koi tujh saa tire sivaa na huaa jo gadhaa khu-e-bad ki daldal mein jaa phansaa phir kabhi rihaa na huaa tu na ho ye to ho nahin saktaa meraa kyaa thaa huaa huaa na huaa rah-rav-e-maslak-e-tavkkul hai vo jo muhtaaj ghair kaa na huaa"

"kyaa yahi hai jis pe ham dete hain jaan yaa koi duniyaa-e-faani aur hai yuun to har insaan goyaa hai magar sheva-e-shevaa-bayaani aur hai chal rahi hai jis se jismaani machine koi poshida kamaani aur hai dil ne paidaa ki kahaan se ye tarang koi tahrik-e-nihaani aur hai ghair samjhaa hai kise ai ham-nashin mere dil mein bad-gumaani aur hai tum ne kab dekhaa hai be-rangi kaa rang be nishaani ki nishaani aur hai"

"aariz-e-raushan pe jab zulfein pareshaan ho gaiin kufr ki gumraahiyaan ham-rang-e-imaan ho gaiin zulf dekhi us ki jin qaumon ne vo kaafir banin rukh nazar aayaa jinhein vo sab musalmaan ho gaiin khud-faroshi husn ko jab se hui madd-e-nazar nirkh-e-dil bhi ghaT gayaa jaanein bhi arzaan ho gaiin jo banaain thiin kabhi aivaan-e-kisraa kaa javaab gardish-e-aflaak se gard-e-bayaabaan ho gaiin khauf-e-naakaami hai jab tak kaamyaabi hai muhaal mushkilein jab bandh gaiin himmat sab aasaan ho gaiin haae kis ko roiye aur kis ki khaatir piTiye kaisi kaisi suratein nazron se pinhaan ho gaiin kyaa unhein andoh-e-hangaam-e-sahar yaad aa gayaa shaam hi se bazm mein shamein jo giryaan ho gaiin ik farishte bhi to hain jin ko na mehnat hai na ranj khvaahishein dil ki balaa-e-jaan-e-insaan ho gaiin kyaa hai vo jaan-e-mujassam jis ke shauq-e-did mein jaama-e-tan pheink kar ruhein bhi uryaan ho gaiin thi vo taufiq-e-ilaahi main ne samjhaa apnaa feal taaatein bhi mere haq mein ain isyaan ho gaiin"

"vahi saail vahi masul vahi haajat-mand gar ho maqrun-e-ijaabat to savaal achchhaa hai hai tiri khu-e-karam talkh-navaai kaa ilaaj evaz-e-sang samar de vo nihaal achchhaa hai jumaa-e-aakhir-e-maah-e-ramzaan hai afzal yuun to jis vaqt mein ho bazl-o-navaal achchhaa hai ho gai makhmasa-e-qaht-o-giraani mein kami shukr hai saal-e-guzishta se ye saal achchhaa hai"

"jo bhale bure ki aTkal na miraa shiaar hotaa na jazaa-e-khair paataa na gunaahgaar hotaa mai-e-be-khudi kaa saaqi mujhe ek jura bas thaa na kabhi nasha utartaa na kabhi khumaar hotaa main kabhi kaa mar bhi rahtaa na gham-e-firaaq sahtaa agar apni zindagi par mujhe ikhtiyaar hotaa ye jo ishq-e-jaan-sitaan hai ye jo bahr-e-be-karaan hai na sunaa koi safina kabhi is se paar hotaa kabhi bhuul kar kisi se na karo suluk aisaa ki jo koi tum se kartaa tumhein naagavaar hotaa hai is anjuman mein yaksaan adam-o-vajud meraa ki jo main yahaan na hotaa yahi kaarobaar hotaa"

"kabhi taqsir jis ne ki hi nahin ham se puchho to aadmi hi nahin mar chuke jite-ji khushaa qismat is se achchhi to zindagi hi nahin dosti aur kisi gharaz ke liye vo tijaarat hai dosti hi nahin yaa vafaa hi na thi zamaane mein yaa magar doston ne ki hi nahin kuchh miri baat kimiyaa to na thi aisi bigDi ki phir bani hi nahin jis khushi ko na ho qayaam-o-davaam gham se bad-tar hai vo khushi hi nahin bandagi kaa shuur hai jab tak banda-parvar vo bandagi hi nahin ek do ghunT jaam-e-vahdat ke jo na pi le vo muttaqi hi nahin ki hai zaahid ne aap duniyaa tark yaa muqaddar mein us ke thi hi nahin"

"vahi kaarvaan vahi qaafila tumhein yaad ho ki na yaad ho vahi manzil aur vahi marhala tumhein yaad ho ki na yaad ho mutafaailun mutafaailun mutafaailun mutafaailun ise vazn kahte hain sher kaa tumhein yaad ho ki na yaad ho vahi shukr hai jo sipaas hai vo malul hai jo udaas hai jise shikva kahte ho hai gila tumhein yaad ho ki na yaad ho vahi naqs hai vahi khoT hai vahi zarb hai vahi choT hai vahi suud hai vahi faaeda tumhein yaad ho ki na yaad ho vahi hai nadi vahi nahr hai vahi mauj hai vahi lahr hai ye habaab hai vahi bulbula tumhein yaad ho ki na yaad ho vahi kizb hai vahi jhuuT hai vahi jura hai vahi ghunT hai vahi josh hai vahi valvala tumhein yaad ho ki na yaad ho vahi saathi hai jo rafiq hai vahi yaar hai jo sadiq hai vahi mehr hai vahi maamtaa tumhein yaad ho ki na yaad ho jise bhed kahte ho raaz hai jise baajaa kahte ho saaz hai jise taan kahte ho hai navaa tumhein yaad ho ki na yaad ho jo muraad hai vahi muddaaa vahi muttaqi vahi paarsaa jo phanse balaa mein vo mubtalaa tumhein yaad ho ki na yaad ho jo kahaa hai main ne maqaal hai jo namuna hai so misaal hai miri sarguzisht hai maajraa tumhein yaad ho ki na yaad ho jo chunaanche hai vahi jaisaa hai jo che-gona hai vahi kaisaa hai jo chunaan-chunin hai so haa-kazaa tumhein yaad ho ki na yaad ho vahi khvaar hai jo zalil hai vahi dost hai jo khalil hai bad-o-nek kyaa hai buraa bhalaa tumhein yaad ho ki na yaad ho"

"aaghaaz-e-ishq umr kaa anjaam ho gayaa naakaamiyon ke gham mein miraa kaam ho gayaa tum roz-o-shab jo dast-ba-dast-e-adu phire main paaemaal-e-gardish-e-ayyaam ho gayaa meraa nishaan miTaa to miTaa par ye rashk hai vird-e-zabaan-e-khalq tiraa naam ho gayaa dil chaak chaak naghma-e-naaqus ne kiyaa sab paara paara jaama-e-ehraam ho gayaa ab aur DhunDiye koi jaulaan-gah-e-junun sahraa ba-qadr-e-vusat-e-yak-gaam ho gayaa dil pech se na turra-e-pur-kham ke chhuT sakaa baalaa-ravi se murgh tah-e-daam ho gayaa aur apne haq mein taan-e-taghaaful ghazab huaa ghairon se multafit but-e-khud-kaam ho gayaa taasir-e-jazba kyaa ho ki dil iztiraab mein taskin-pazir bosa-ba-paighaam ho gayaa kyaa ab bhi mujh pe farz nahin dosti-e-kufr vo zid se meri dushman-e-islaam ho gayaa allaah-re bosa-e-lab-e-mai-gun ki aarzu main khaak ho ke durd-e-tah-e-jaam ho gayaa ab tak bhi hai nazar taraf-e-baam-e-maah-vash main garche aaftaab-e-lab-e-baam ho gayaa ab harf-e-naa-sazaa mein bhi un ko daregh hai kyuun mujh ko zauq-e-lazzat-e-dushnaam ho gayaa"

"vaan zerki pasand na idraak chaahiye ijz-o-niyaaz-e-dida-e-namnaak chaahiye aaina ban ki shaahid-o-mashhud ek hai us ru-e-paak ko nazar-e-paak chaahiye sair-o-suluk-e-jaan nahin be-jazba-e-nihaan is raah mein ye tausan-e-chaalaak chaahiye guzre ummid-o-bim se ye hausla kise rind-e-kharaab-o-aarif-e-bebaak chaahiye har chashma aaina hai rukh-e-aaftaab kaa haan sath-e-aab be-khas-o-khaashaak chaahiye nash-o-numaa-e-sabza-o-gul mein nahin darang abr-e-karam ko tishnagi-e-khaak chaahiye islaah-e-haal-e-aashiq-e-dil-khasta hai zarur maashuq jaur-pesha-o-saffaak chaahiye jo ain-e-naa-e-nosh ho us baada-nosh ko jaam-o-subu na khum-kada-o-taak chaahiye sayyaad ke asar pe ravaan ho to said hai vo said hi nahin jise fitraak chaahiye"

"ravish-e-saada-bayaani meri hai ye tegh-e-safhaani meri naa-shanaasaa ko na aae baavar daastaan us ki zabaani meri meri hasti hai mumayyaz ba-adam be-nishaani hai nishaani meri rakhna-gar hai miri aazaadi mein havas-e-baal fishaani meri sabaq-e-jahl ki takraar pe ab munhasir hai hama-daani meri dosti vaza-e-tan-aasaani ki ban gai dushman-e-jaani meri khaatma hai miri tamhid mein darj hai dil-aavez kahaani meri ziraki daam-e-fareb-e-dil hai hai tahayyur nigaraani meri dil ho saaqi lab-e-dariyaa saaghar sahl hai pyaas bujhaani meri subh-e-tifli hai buDhaapaa meraa shaam-e-piri thi javaani meri ek chakkar hai ba-shakl-e-gardaab band-barpaa hai ravaani meri vajh baaqi mire maani ko samajh surat albatta hai faani meri bazm-e-kasrat kaa tamaashaai huun vahdat-e-sarf hai baani meri"

"jahaan tegh-e-himmat alam dekhte hain mahaalaat kaa sar qalam dekhte hain jo baiThe the yaan paa-ba-daamaan-e-hasti unhein sar-ba-jeb-e-adam dekhte hain kamaalaat-e-saanea pe jin ki nazar hai vo khubi-e-masnua kam dekhte hain nahin mubtalaa jo tan-aasaaniyon mein unhein dam-ba-dam taaza-dam dekhte hain nahin jin ko jaah-o-hasham kaa takabbur vahi lutf-e-jaah-o-hasham dekhte hain shikam-parvari jin kaa sheva hai un ko asir-e-jafaa-e-shikam dekhte hain bas ai rang-o-bu tu na kar naaz be-jaa khudaa jaane kyaa baat ham dekhte hain uDaate hain jo rakhsh-e-himmat ko sarpaT vo manzil ko zer-e-qadam dekhte hain"

"ulTi har ek rasm-e-jahaan-e-shuur hai sidhi si ik ghazal mujhe likhni zarur hai vahdat mein e'tibaar-e-hudus-o-qidam nahin thaa jo butun mein ye vahi to zuhur hai taarik vahi hai jis ne kiyaa kal ko ikhtiyaar yaani haris-tar hai vahi jo subur hai mutlaq yagaangi hai to nazdik-o-dur kyaa pahunchaa hai jo qarib vahi duur duur hai asl-e-hayaat hai yahi kahte hain jis ko maut jiine ki aarzu hai to marnaa zarur hai iqraar-e-bandagi hai khudaai kaa iddaaa ijz-o-niyaaz kyaa hai kamaal-e-ghurur hai ummid kijiye agar ummid kuchh nahin gham khaaiye bahut jo khayaal-e-surur hai zulf-e-siyaah se rukh-e-taabaan kaa husn hai kahte ho jis ko dev haqiqat mein huur hai be-maasiyat khazaana-e-rahmat hai raaegaan sach puchhiye to jurm na karnaa qusur hai izhaar-e-jaan-e-paak hai jism-e-kasif se be-pardagi hijaab hai zulmat hi nuur hai bilittifaaq hasti-e-vahmi hai niyyati hushiyaar hai jo nashsha-e-ghaflat mein chuur hai aalaa thaa jis kaa rutba vo asfal mein hai asiir saff-e-naaal moqif-e-sadrussudur hai hai raah ki talaash to kar gumrahi talab aaqil vahi hai aql mein jis ki futur hai bedaari-e-vajud hai khvaab-e-adam mein gharq lab band ho gae yahi shor-e-nushur hai har chand shaghl-e-sher nahin aaj-kal zarur nazraana piir ji ke liye kuchh zarur hai"