Ghazal

"kisi khaas tak na pahunche kisi 'aam tak na pahunche jo hain ranjishein hamaari vo avaam tak na pahunche tiri duriyaan salaamat tujhe chaahtaa rahun main mujhe maut aae tujh ko ye payaam tak na pahunche tire haath mein qalam hai to vo likh jo haq hai 'ahmad' vo na baat likh tu 'ahmad' jo nizaam tak na pahunche"

"tire bachchon mein aisi dilkashi maa'lum hoti hai ki jaise gul ke rukh par taazgi maa'lum hoti hai main sajde mein jo gir jaataa huun madhoshi ke 'aalam mein jahaan vaalon ko shaayad mai-kashi maa'lum hoti hai bataaun kyaa ki jab se mujh se naalaan hain vo bad-zan hain bahut ruThi hui ye zindagi maa'lum hoti hai tumhaare talkh lahje se pata chaltaa hai ye 'ahmad' tumhein mujh se koi naaraazgi maa'lum hoti hai"

"kal tak jo mire saath thaa aghyaar ki surat aane lagaa hai pesh vo ab yaar ki surat khadsha hamein hotaa hai vahaan kaun hai apnaa ik jaisi hi hoti hai jahaan chaar ki surat laachaar saa be-bas saa vo maasum saa bachcha phirtaa hai gali-kuchon mein akhbaar ki surat peshaani pe jo haath rakhegaa vo masihaa khil jaaegi sukDi hui bimaar ki surat jab yaad tiri aa ke sataati hai ai 'ahmad' jazbaat ubhar aate hain ashaar ki surat"

"kaam honge na kuchh bhi du'aa ke sivaa yaa'ni koi nahin hai khudaa ke sivaa sach kahungaa to maslub kar degaa vo aur degaa bhi kyaa is sazaa ke sivaa bhuul kar bhi na un se ulajhnaa kabhi jin kaa koi nahin hai khudaa ke sivaa ye andhere mein raushan hai jo ik diyaa is kaa koi nahin hai havaa ke sivaa vo jo uTh kar gayaa meri dahliz se us ko kyaa chaahiye thaa vafaa ke sivaa aaj 'ahmad' ye ehsaas ham ko huaa koi apnaa nahin hai khudaa ke sivaa"

"jo le ke haath mein apne tabar bhi aataa hai har ek zulm ko vo raund kar bhi aataa hai tamaam din jo bhaTaktaa hai dasht-o-sahraa mein sunaa hai shaam ko vo baam par bhi aataa hai vo ek rind jo rotaa hai teri chaahat mein usi ki aankh mein khun-e-jigar bhi aataa hai main us faqir se rakhtaa huun silsila apnaa jahaan baDe se baDaa taajvar bhi aataa hai akele mujh ko kahin jaane vo nahin detaa jahaan main jaaun vahaan ham-safar bhi aataa hai ye sukhaa peD nishaani hai ek qudrat ki khudaa ke hukm se is mein samar bhi aataa hai shikan si aati hai 'ahmad' kabhi jo maathe par main aise rotaa huun chehra nikhar bhi aataa hai"

"'aashiqi apni jagah hai dil-lagi apni jagah hans ke miltaa huun main us se dushmani apni jagah dekhne ko dekhiyegaa ye tamaashaa shauq se saahiri apni jagah hai shaa'iri apni jagah ye samajhne mein hui hai der bhi shaayad mujhe tumtaraaq apni jagah hai saadgi apni jagah kyaa haraj hai jugnuon se dosti gar ho gai raushni apni jagah hai chaandni apni jagah jugnuon se dosti par kyon khafaa hain aap log raushni apni jagah hai chaandni apni jagah kis tarah jiinaa hai 'ahmad' ye saliqa siikh lo ji ke marnaa hai kisi din zindagi apni jagah"

"vo mujh se is qadar sahmaa huaa hai khudaa jaane use ye kyaa huaa hai main tere ru-baru huun yaar phir bhi tiraa chehra bahut utraa huaa hai muqaddar hai ki phir meri khataaein ghamon ne jo mujhe gheraa huaa hai manaane ki use koshish hai jaari jo mujh se aaj-kal ruThaa huaa hai tasavvur mein basaa hai koi shaayad tabhi chehra tiraa nikhraa huaa hai koi to baat hai aisi yaqinan vo insaan aaj-kal badlaa huaa hai vo meri zindagi thi zindagi hai tabhi to shahr mein charchaa huaa hai nahin suntaa kisi ki bhi sadaa vo ye haakim qaum kaa bahraa huaa hai saliqe se ghazal likhni thi 'ahmad' magar haalaat ne jakDaa huaa hai"

"mohabbaton ki kitaab mein jo likhaa huaa hai vo shaa'iri hai yaqin maano nazar se ojhal jo ho gayaa hai vo shaa'iri hai main phuul shabnam se mil ke aayaa bahut sataae hue hain ye bhi jo zakhm kaanTon se khaae sab ne mujhe pata hai vo shaa'iri hai mujhe khabar hai mujhe pata hai du'aa se baDh kar nahin hai kuchh bhi magar main ye bhi to jaantaa huun jo ratjagaa hai vo shaa'iri hai main lauT aayaa huun qatl-gah se nahin hai koi masihaa meraa jo girte girte mujhe sanbhaale mujhe pata hai vo shaa'iri hai bhaTak rahaa huun main sahraa sahraa na jaane kis ki talaash mein ab jo mil gayaa hai nasib meraa jo rah gayaa hai vo shaa'iri hai gulaab champaa chanbeli nargis hain mograa bhi chaman mein lekin vo jis ki khushbu se saaraa 'aalam mahak rahaa hai vo shaa'iri hai jo mere hisse mein likh diyaa hai hai meraa imaan mujhe milegaa magar main kaise bataaun tum ko jo kuchh bachaa hai vo shaa'iri hai qadam qadam par jo saath mere chalaa hai us ko bataaun kaise sukhanvaron ki jo Thokaron mein paDaa huaa hai vo shaa'iri hai mujhe na daa'vaa hai shaa'iri kaa na huun main shaa'ir qasam khudaa ki jo 'mir'-o-'ghaalib' 'faraaz' 'hasrat' ne likh diyaa hai vo shaa'iri hai vo thartharaate se honT us ke ghazaal aankhon pe zulfein us ki hasin manzar ko dekh kar vo jo likh rahaa hai vo shaa'iri hai use zamaane kaa khauf kyaa ho ki jis pe 'ahmad' karam ho us kaa basaa ho jis ke khayaal mein rab mujhe pata hai vo shaa'iri hai"

"saath vahshat ho to purvaai kahaan se aae rut khizaan ki ho to raanaai kahaan se aae tu ne dekhe hi nahin ishq mein pech-o-kham jab phir tire sheron mein gahraai kahaan se aae jis ke honTon pe sadaa jhuuT rahaa kartaa hai us ke kirdaar mein sachchaai kahaan se aae mere har zakhm ki gahraai samajhne vaale sochtaa huun ki masihaai kahaan se aae jis makaan mein bhi panapti hai buraai logo us makaan mein bhalaa achchhaai kahaan se aae meri shorida-mizaaji ko parakhne vaale puchhte hain ki tamaashaai kahaan se aae zindagaani ki alaamat hai sadaaqat 'ahmad' dil hi kaalaa ho to daanaai kahaan se aae"

"meri aankhon se khvaab le ke gayaa niind bhi mahtaab le ke gayaa chhoD kar tirgi mein kyon mujh ko vo miraa aaftaab le ke gayaa main ne ghibat jo ki thi us ki kabhi badle meraa savaab le ke gayaa de ke mujh ko vo hijr ki raatein meraa husn-e-shabaab le ke gayaa mujh ko khanjar dikhaa ke vo 'ahmad' mere dil ki kitaab le ke gayaa"

"mohabbat rang laati hai sanam jab dam nikaltaa hai zarurat par kisi maasum ke zamzam nikaltaa hai yahaan aabaad kiDon ki hain naslein bhi bahut saari kahaan har ek kiiDe se magar resham nikaltaa hai yahaan aane kaa matlab bas nahin jiinaa jahaan vaalo kisi din mar ke duniyaa se bani-aadam nikaltaa hai kisi ne meri ghazlon ko kiyaa hai aaj copy paste kaho shaair ke siine se kabhi ye gham nikaltaa hai mujhe lagtaa hai 'ahmad' ki tabiat hi nahin lagti tabhi to aaj-kal baahar vo ghar se kam nikaltaa hai"

"sochtaa huun koi kitaab likhun jis mein saare adhure khvaab likhun kaise TeDhe savaal puchhe hain koi batlaae kyaa javaab likhun ye jo kaanTe hain meri raahon mein tum kaho to inhein gulaab likhun itnaa tujh ko to paDh liyaa main ne tai kiyaa main ne is pe baab likhun kis qadar intishaar hai tujh mein kyon na ab tujh ko iztiraab likhun kis ko kis ko kiyaa nahin hai yaad kis kaa kis kaa bhalaa hisaab likhun 'ilm se jis kaa vaasta hi nahin kaise us ko bhalaa janaab likhun itnaa naadaan main nahin 'ahmad' jo khataaon ko bhi savaab likhun"

"nazar kisi se mili hai shaayad tabhi ghazal ik hui hai shaayad main jis gali mein bhaTak gayaa thaa yahi vo yaaro gali hai shaayad falak se utre hain chaand taare phir un ki mahfil saji hai shaayad havaa ki khushbu bataa rahi hai ye un ko chhukar chali hai shaayad main ghair ke aib gin rahaa huun mire hi andar kami hai shaayad dhuaan badan se uThaa hai 'ahmad' lo aag dil mein lagi hai shaayad"

"apni 'izzat kaa kuchh khayaal rakho ye baDi shai ise sanbhaal rakho laazmi hai ki ziist mein ho rang maut kaa bhi to kuchh khayaal rakho bhuuk kyaa hai kabhi pata na chale munh mein luqma agar halaal rakho ye paDosi bhi kaam aaeinge in se rishta sadaa bahaal rakho ek din khud hunar bhi nikhregaa kuchh to haathon mein tum kamaal rakho laao dariyaa-e-fan se kuchh moti saamne khalq ke misaal rakho fikr logon ki kab talak 'ahmad' apnaa bhi tum zaraa khayaal rakho"

"adaavat pakaDte chale jaa rahe hain vo mujh se jhagaDte chale jaa rahe hain musalsal na rah mahv-e-fikr-e-sukhan yuun tire baal jhaDte chale jaa rahe hain zaraa chaar paise jo aae to kam-zarf sunaa hai akaDte chale jaa rahe hain baDon mein hi koi kami rah gai thi jo bachche bigaDte chale jaa rahe hain jo shaana bashaana the kal har qadam par vo kyon ab bichhaDte chale jaa rahe hain sabhi ek kunbe ke hain log 'ahmad' jo aapas mein laDte chale jaa rahe hi"

"sar pe aafat hai musibat hai bachaa le mujh ko laDkhaDaate hain qadam koi sanbhaale mujh ko main masaaib mein bhi jiine ki duaa maangungaa log kahte hain ki duniyaa se uThaa le mujh ko main vo gauhar huun jo siine mein dabaa huun us ke koi mallaah samundar se nikaale mujh ko main kamaataa huun magar ab bhi mazaa dete hain mere maan baap ke haathon ke nivaale mujh ko ik baDe arse se main ruuTh gayaa huun khud se ho sake garche koi aa ke manaa le mujh ko naaz aaegaa muqaddar pe mujhe tab 'ahmad' jab koi aa ke nasib apnaa banaa le mujh ko"

"kyon mili hai sazaa nahin maalum mujh ko apni khataa nahin maalum main samajhtaa thaa baa-vafaa jis ko kyon huaa bevafaa nahin maalum muskuraahaT hai sab ke chehre par kaun rusvaa huaa nahin maalum maan ke qadmon ko gar nahin chumaa tum ko jannat hai kyaa nahin maalum baagh mein aaj ek titli ne phuul se kyaa kahaa nahin maalum ho gayaa hai mariz-e-ishq 'ahmad' kyaa hai is ki davaa nahin maalum"

"dil to kahtaa hai naql-e-makaani karun naam tere main apni javaani karun jab koi she'r teri tabi'at kaa ho bhejne ki tujhe mehrbaani karun us ke bachpan ki tasvir mil jaae gar yaad taaza main phir se puraani karun vo tasavvur mein aae to pahle zaraa zikr us kaa main apni zabaani karun khvaab mein mujh se milne kaa vaa'da to kar raat main bhi to apni suhaani karun be-jhijak khaana-e-dil mein aa jaa kabhi sidq-e-dil se tiri mezbaani karun aarzu hai vo 'ahmad' mile bazm mein us ke lahje mein paidaa ravaani karun"

"zahr shaayad fazaa mein shaamil hai ik ghuTan si havaa mein shaamil hai mere dushman tujhe khabar hi nahin tu miri har du'aa mein shaamil hai ik qalandar ne jaate jaate kahaa meri khushbu vafaa mein shaamil hai yaad 'ahmad' abhi talak meri us ke dast-e-hinaa mein shaamil hai"

"mujh ko afsos hai bas isi baat kaa kar na paayaa main izhaar jazbaat kaa un se milne ki khvaahish hai dil mein mire DhunDhtaa huun bahaanaa mulaaqaat kaa uljhanon se ulajh jaao be-khauf ab saamnaa kijiye DaT ke haalaat kaa raat bhar ik qalandar ke hujre mein rind tazkira kar rahe the miri zaat kaa kaise behtar banegi miri zindagi tajraba kar rahaa huun main is baat kaa us ki fitrat mein 'ahmad' nahin hai vafaa hai mujhe bhi pata us ki auqaat kaa"

"mai-kade jaane ki himmat bhi nahin kar sakte ham kabhi aisi himaaqat bhi nahin kar sakte apni ghalati ko jo taslim nahin karte ham aise logon ko nasihat bhi nahin kar sakte ham jahaan jaa ke chale aaein salaamat vaapas tum kabhi itni jasaarat bhi nahin kar sakte zindagi ne hamein us moD pe laa ke chhoDaa tum se ham khul ke mohabbat bhi nahin kar sakte us ne jaate hue saunpi hai hamein vo daulat us mein ham koi khayaanat bhi nahin kar sakte itnaa uljhaa diyaa haalaat ne logon ko yahaan ek duuje ki hifaazat bhi nahin kar sakte vaqt ne kar diyaa 'ahmad' hamein masruf bahut baiTh kar saath ziyaafat bhi nahin kar sakte"

"khud mein ik aaftaab the abdurrashid lone yaani khuli kitaab the abdurrashid lone jis jaa vo jaate khushbu luTaanaa hi kaam thaa mahkaa huaa gulaab the abdurrashid lone kyaa kahiye ham ko ham ne na gauhar ki qadr ki jab tak ki dastiyaab the abdurrashid lone jis zaaviye se dekhiye aayaa hamein nazar har rukh se kaamyaab the abdurrashid lone aataa nahin samajh mein jo paDhne ke baavajud ulfat kaa vo nisaab the abdurrashid lone taabir-e-khvaab jis ki batlaa na sakaa koi aisaa hi ek khvaab the abdurrashid lone un ko khudaa ne bakhshaa thaa aisaa hunar ki sab kahte hain laa-javaab the abdurrashid lone jab bhi paDheinge maani nayaa de hamein koi aisaa hi ek baab the abdurrashid lone vaqt-e-vidaaa kalima-e-tayyab zabaan pe thaa maqsad mein kaamyaab the abdurrashid lone majlis mein sab ki hoti thi 'ahmad' zabaan band rakhte har ik javaab the abdurrashid lone"

"uThaaegi jo rukh-e-yaar se naqaab havaa karegi diid se mujh ko bhi faizyaab havaa bharosa kar ke main uljhaa huun mauj-e-dariyaa se likhegi azm kaa mere bhi kyaa nisaab havaa uDaa ke le gai manzar sabhi nigaahon se dikhaa rahi hai mujhe dekho kaise khvaab havaa kiyaa hai shikva andheron ne aaj basti mein sataa rahi hai charaaghon ko be-hisaab havaa khile hain phuul adaavat ke har taraf 'ahmad' zamaane-bhar mein chali hai baDi kharaab havaa"

"ham khushi saamne gham-khvaar ke rakh dete hain hans ke do bol bhi phir pyaar ke rakh dete hain jab bhi uThti hai nai dil mein tamanna koi ham jagah par hi use maar ke rakh dete hain masale ghar ke agar hain to karo hal ghar mein masale biich mein kyon chaar ke rakh dete hain ham jahaan karte hain taqrir vahaan par qisse apne aslaaf ke kirdaar ke rakh dete hain jis ko jis chiiz ki hoti hai zarurat 'ahmad' ru-baru ham vo talabgaar ke rakh dete hain"