Ghazal

"dil se apne khud-ba-khud kuchh puchhiye mere liye faisla ab kijiye yaa sochiye mere liye fikr-e-duniyaa se na jaane aap kyuun hain ashk-baar in musalsal aansuon ko rokiye mere liye main to kab se muntazir huun aap ke ehsaan ki dard kaa aahon se saudaa kijiye mere liye aap kaa lahja shahad jaisaa tarannum-khez hai khaamushi ab toDiye aur boliye mere liye aap ko sab log kahte hain masihaa ai sanam zindagi mujh ko bhi de kar dekhiye mere liye"

"tire khayaal kaa charchaa tire khayaal ki baat shab-e-firaaq mein paiham rahi visaal ki baat tum apni chaaragari ko na phir karo rusvaa hamaare haal pe chhoDo hamaare haal ki baat kamaan si abru kaa aalam ajiib hai dekho falak ke chaand se behtar hai us hilaal ki baat yahi fasaana rahaa hai junun ke sahraa mein kabhi firaaq ke qisse kabhi visaal ki baat bahaar aai to khul kar kahaa hai phulon ne ye kis ne chheD di gulshan mein phir jamaal ki baat tu apne aap mein tanhaa hai meri nazron mein kahaan se DhunD ke laaun tire misaal ki baat binaa talab ke ataa kar rahaa hai vo mujh ko labon pe mere na aae kabhi savaal ki baat"

"us se mat kahnaa meri be-sar-o-saamaani tak vo na aa jaae kahin meri pareshaani tak main to kuchh bhi nahin karti huun mohabbat ke liye 'ishq vaale to luTaa dete hain sultaani tak kaise sahraa mein bhaTaktaa hai miraa tishna-lab kaisi basti hai jahaan miltaa nahin paani tak naakhudaa dekh chukaa kaali ghaTaa ke tevar baadbaan khol diye us ne bhi tughyaani tak pur-khatar raah meri hone lagi hai aasaan khauf kis kaa hai bhalaa teri nigahbaani tak"

"kabhi muD ke phir isi raah par na to aae tum na to aae ham kabhi faaslon ko sameT kar na to aae tum na to aae ham jo tumhein hai apni anaa pasand to mujh bhi shart kaa paas hai ye zidon ke silsile toD kar na to aae tum na to aae ham unhin chaahaton mein bandhe hue abhi tum bhi ho abhi ham bhi hain hai kashish dilon mein bahut magar na to aae tum na to aae ham shab-e-vasl bhi shab-e-hijr hai shab-e-hijr ab to hai mustaqil yahi sochne mein hui sahar na to aae tum na to aae ham vo jharoke pardon mein band hain vo tamaam galiyaan udaas hain kabhi khvaab mein sar-e-rahguzar na to aae tum na to aae ham usi shahr ki usi raah par the hamaare ghar bhi qarib-tar yunhi ghumte rahe 'umr bhar na to aae tum na to aae ham kabhi ittifaaq se mil gae kisi shahr ke kisi moD par to ye kah uThegi nazar nazar kyuun na aae tum kyuun na aae ham"

"dost jab zi-vaqaar hotaa hai dosti kaa meyaar hotaa hai ab tasavvur ki suuni vaadi mein roz jashn-e-bahaar hotaa hai gulshan-e-jaan mein un ke aane se gul-sifat kaarobaar hotaa hai jab bichhaD jaataa hai koi apnaa gham hi bas rozgaar hotaa hai chaand kaa raqs ho rahaa hai kahin dil yahaan se nisaar hotaa hai shaakh-dar-shaakh hoti hai zakhmi jab parinda shikaar hotaa hai"

"dil ke bechain jaziron mein utar jaaegaa dard aahon ke muqaddar kaa pata laaegaa mere bichhDe hue lamhaat sajaa kar rakhnaa vaqt lafzon mein ghazal ban ke Thahar jaaegaa us ki har baat jafaa-pesha hui hai aksar zakhm kaa khauf kabhi us ko bhi dahlaaegaa vaqt khaamosh hai TuuTe hue rishton ki tarah vo bhalaa kaise mire dil ki khabar paaegaa shaam-e-gham aaj bhi guzri hai hasin khvaabon mein gham-e-jaanaan to mohabbat mein sitam Dhaaegaa dil miraa aaj jafaaon pe bahut naazaan hai mere honTon pe tabassum hi nazar aaegaa us ke mizraab se jab raag baneinge dipak megh chupke se mire dil pe baras jaaegaa"

"ye shafaq chaand sitaare nahin achchhe lagte tum nahin ho to nazaare nahin achchhe lagte gahre paani mein zaraa aao utar kar dekhein ham ko dariyaa ke kinaare nahin achchhe lagte roz akhbaar ki jalti hui surkhi paDh kar shahr ke log tumhaare nahin achchhe lagte dard mein Duubi fazaa aaj bahut hai shaayad gham-zada raat hai taare nahin achchhe lagte meri tanhaai se kah do ki sahaaraa chhoDe zindagi bhar ye sahaare nahin achchhe lagte"

"mujhe rang de na surur de mire dil mein khud ko utaar de mire lafz saare mahak uThein mujhe aisi koi bahaar de mujhe dhuup mein tu qarib kar mujhe saaya apnaa nasib kar miri nikhaton ko uruuj de mujhe phuul jaisaa vaqaar de miri bikhri haalat-e-zaar hai na to chain hai na qaraar hai mujhe lams apnaa navaaz ke mire jism o jaan ko nikhaar de tiri raah kitni tavil hai miri ziist kitni qalil hai miraa vaqt teraa asiir hai mujhe lamha lamha sanvaar de mire dil ki duniyaa udaas hai na to hosh hai na havaas hai mire dil mein aa ke Thahar kabhi mire saath umr guzaar de miri niind munis-e-khvaab kar miri rat-jagon kaa hisaab kar mire naam fasl-e-gulaab kar kabhi aisaa mujh ko bhi pyaar de shab-e-gham andheri hai kis qadar karun kaise subh kaa main safar mire chaand aa miri le khabar mujhe raushni kaa hisaar de"

"vo ajiib shakhs thaa bhiiD mein jo nazar mein aise utar gayaa jise dekh kar mire honT par miraa apnaa sher Thahar gayaa kai sher us ki nigaah se mire rukh pe aa ke ghazal bane vo niraalaa tarz-e-payaam thaa jo sukhan ki had se guzar gayaa vo har ek lafz mein chaand thaa vo har ek harf mein nuur thaa vo chamakte misron kaa aks thaa jo ghazal mein khud hi sanvar gayaa jo likhun to nok-e-qalam pe vo jo paDhun to nok-e-zabaan pe vo miraa zauq bhi miraa shauq bhi mire saath saath nikhar gayaa ho taDap to dil mein ghazal bane ho milan to giit huun pyaar ke haan ajiib shakhs thaa 'indiraa' jo sikhaa ke aise hunar gayaa"

"kuchh balaa aur kuchh sitam hi sahi ishq mein furqat-e-sanam hi sahi jis ko chaahein use khushi de dein mere hisse mein un ke gham hi sahi kitni viraan hai sadaaqat bhi but-kada gar nahin haram hi sahi meri khuddaari-e-vafaa dekho sar jhukaane se sar qalam hi sahi zindagi aaj teraa lutf o karam kam agar hai to aaj kam hi sahi jaise mumkin ho baat rakh lenaa 'indiraa' kaa zaraa bharam hi sahi"

"mohabbat mein aayaa hai tanhaa abhi rang badalne lagi hai magar zindagi rang bahaaron ke aanchal mein khush-bu chhupi hai gulon ki qabaa mein bhare hain sabhi rang tumhaare binaa sab adhure hain jaanaan sabaa phuul khush-bu chaman raushni rang jo bhule se bachpan mein pakDi thi titli surur-e-vafaa mein bhi utraa vahi rang na jaane kahaan se barasti hai baarish sajaati hai tere agar dilbari rang mile 'indiraa' meraa paighaam un ko liye hai mukammal miri shaairi rang"

"hazaar khvaab liye ji rahi hain sab aankhein tire binaa hain magar meri be-sabab aankhein chamakte chaand sitaaro gavaah tum rahnaa lagi rahi hain falak se tamaam shab aankhein tumhaare saamne rahti hain nim-vaa hamdam Hayaa-shanaas bahut hain ye baa-adab aankhein bas ek diid ki hasrat sajaa ke palkon par mileingi tum se khayaalon mein be-talab aankhein sila diyaa hai mohabbat kaa tum ne ye kaisaa masarraton mein bhi rone lagi hain ab aankhein"

"shafaq ke rang nikalne ke baad aai hai ye shaam dhuup mein chalne ke baad aai hai ye raushni tire kamre mein khud nahin aai shama kaa jism pighalne ke baad aai hai isi tarah se rakho band meri aankhein ab ki niind khvaab badalne ke baad aai hai yaqin hai ki kabhi be-asar nahin hogi duaa labon pe machalne ke baad aai hai nadi jo pyaar se bahti hai regzaaron mein ye pattharon mein uchhalne ke baad aai hai thi jis bahaar ki uljhan tamaam muddat se vo 'indiraa' ke bahalne ke baad aai hai"

"tamaam fikr zamaane ki Taal detaa hai ye kaisaa kaif tumhaaraa khayaal detaa hai hamaare band kivaaDon pe dastakein de kar shab-e-firaaq mein vahm-e-visaal detaa hai udaas aankhon se dariyaa kaa tazkira kar ke zamaana ham ko hamaari misaal detaa hai ye kaisaa raat mein taaron kaa silsila niklaa jo gardishon mein muqaddar bhi Dhaal detaa hai bichhaD ke tum se yaqin ho chalaa hai ye mujh ko ki ishq lutf-e-sazaa be-misaal detaa hai"

"aaj phir chaand us ne maangaa hai chaand kaa daagh phir chhupaanaa hai chaand kaa husn to hai laa-saani phir bhi kitnaa falak pe tanhaa hai kaash kuchh aur maangtaa mujh se chaand khud gardishon kaa maaraa hai duur hai chaand is zamin se bahut phir bhi har shab tavaaf kartaa hai bastiyon se nikal ke sahraa mein justuju kis ki roz kartaa hai kis khataa ki sazaa mili us ko kis liye roz ghaTtaa baDhtaa hai chaand se ye zamin nahin tanhaa ai falak tu bhi jagmagaayaa hai aaj taaron ki bazm chamki hai chaand par baadalon kaa saayaa hai raushni phuuT nikli misron se chaand ko jab ghazal mein sochaa hai"

"ye mausam surmai hai aur main huun magar bas khaamushi hai aur main huun na jaane kab vo badle rukh idhar ko musalsal be-rukhi hai aur main huun taghaaful par taghaaful ho rahe hain kisi ki dil-lagi hai aur main huun tasavvur hi sahaaraa ban gayaa hai ajab tanhaai si hai aur main huun ye kaisi vaqt ne badli hai karvaT fareb-e-zindagi hai aur main huun labon pe naam chehra hai nazar mein baDi naazuk ghaDi hai aur main huun udaasi 'indiraa' itni baDhi hai hamesha shaairi hai aur main huun"

"shikasta-dil andheri shab akelaa raahbar kyuun ho na ho jab ham-safar koi to apnaa bhi safar kyuun ho kisi ki yaad mein aansu kaa rishta is tarah rakkho ki dil pahlu agar badle to chehra tar-ba-tar kyuun ho mire hamdam mire dilbar zaraa itnaa bataa denaa koi bedard ho to dard dil mein is qadar kyuun ho kabhi bhule se jo paighaam un kaa aayaa bhi ik din judaai ki taDap mein roz aisaa hi asar kyuun ho nashsha aankhon mein le kar so raho ai jaagne vaalo agar ye aankh khul jaae to khvaabon kaa guzar kyuun ho pareshaan raat mein dil hai charaagh-e-aas ki maanind shab-e-vaada na aae vo to raushan si sahar kyuun ho musalsal raat din chalnaa hai raah-e-ishq mein tanhaa kisi ke vaaste ye raah aakhir mukhtasar kyuun ho mohabbat mein sunaa hai raah dil ki dil se hoti hai agar yuun 'indiraa' taDpe to jaanaan be-khabar kyuun ho"

"kaash vo pahli mohabbat ke zamaane aate chaand se log miraa chaand sajaane aate raqs karti hui phir baad-e-bahaaraan aati phuul le kar vo mujhe khud hi bulaane aate un ki tahrir mein alfaaz vahi sab hote yuun bhi hotaa ki kabhi khat bhi puraane aate un ke haathon mein kabhi pyaar kaa parcham hotaa mere ruThe hue jazbaat manaane aate baarishon mein vo dhanak aisi nikalti ab ke jis se mausam mein vahi rang suhaane aate vo bahaaron kaa samaan aur vo gul-posh chaman aise maahaul mein vo dil hi dukhaane aate har taraf dekh rahe hain mire ham-umr khayaal raah takti hui aankhon ko sulaane aate"

"yuun vafaa ke saare nibhaao gham ki fareb mein bhi yaqin ho koi baat aisi kaho sanam ki fareb mein bhi yaqin ho ye dayaar-e-shisha-farosh hai yahaan aainon ki bisaat kyaa yahaan is tarah se rakho qadam ki fareb mein bhi yaqin ho miri chaahaton mein ghurur ho dil-e-naa-tavaan mein surur ho tumhein ab ke khaanaa hai vo qasam ki fareb mein bhi yaqin ho yahi baat kah do pukaar ke vahi silsile rahein pyaar ke isi naaz mein rahe phir bharam ki fareb mein bhi yaqin ho mire 'ishq kaa ye me'yaar ho ki visaal bhi na shumaar ho isi e'tibaar pe ho karam ki fareb mein bhi yaqin ho mire intizaar ko kyaa khabar tumhein ikhtiyaar hai is qadar mujhe do saliqa ye kam se kam ki fareb mein bhi yaqin ho jahaan zikr-e-mehr-o-vafaa mile vahin 'indiraa' kaa qalam chale ye kitaab-e-'ishq mein ho raqam ki fareb mein bhi yaqin ho"

"abhi se kaise kahun tum ko bevafaa saahab abhi to apne safar ki hai ibtidaa saahab na jaane kitne laqab de rahaa hai dil tum ko huzur jaan-e-vafaa aur ham-navaa saahab tumhaari yaad mein taare shumaar karti huun na jaane khatm kahaan ho ye silsila saahab kitaab-e-zist kaa unvaan ban gae ho tum hamaare pyaar ki dekho ye intihaa saahab tumhaaraa chehra mire aks se ubhartaa hai na jaane kaun badaltaa hai aaina saahab rah-e-vafaa mein zaraa ehtiyaat laazim hai har ek gaam pe hotaa hai haadsa saahab siyaah raat hai mahtaab ban ke aa jaao ye 'indiraa' ke labon par hai iltijaa saahab"