Ghazal

"tum bhi the sar-e-daar sar-e-daar thaa main bhi tum dekh to lete ki numudaar thaa main bhi ye jism rukaavaT thaa mere ishq mein shaayad aur sach hai ki is jism se bezaar thaa main bhi mumkin hai ki betaab rahaa ho kabhi tu bhi yaadon ki aziyyat mein giraftaar thaa main bhi baazaar mein laayaa gayaa yusuf ki tarah main kuchh der sahi raunaq-e-baazaar thaa main bhi khud apne taaaqub mein nikal aayaa thaa ghar se khud apni adaavat mein giraftaar thaa main bhi chehron ki jagah sirf kharaashein hain numaayaan basti mein kabhi aaina-bardaar thaa main bhi ai gardish-e-dauraan ye taghayyur nahin achchhaa tu soch kabhi saahab-e-dastaar thaa main bhi khud bechne niklaa thaa safi' khud ko jahaan mein aur bhiiD mein khud apnaa kharidaar thaa main bhi"

"soch nikhri hai aagahi chup hai dekh kitni hari-bhari chup hai dard phailaa hai kahkashaaon mein sar sisakte hain raagni chup hai aise gunji hai tirgi shab ki sab sitaaron ki raushni chup hai mere honTon pe surkh naghme hain tere honTon pe surmai chup hai ik tahayyur ne us ko sinchaa hai mere lab par ugi hui chup hai ek chup hai jahaan mein phaili shahr viraan gali gali chup hai aabla-paa hain dasht mein donon qais rotaa hai aur 'safi' chup hai"

"charaagh-e-nur thaame dasht se jugnu nikal aae palaT kar dekh lein shaayad koi pahlu nikal aae tumhaare hijr mein pathraa gai hai aankh saavan ki milo ham se ki yuun shaayad koi aansu nikal aae hama-tan raqs rahtaa huun yahi main soch ke shaayad tamannaa-soz sahraa se koi aahu nikal aae ye ku-e-yaar hai koi karishma ho bhi saktaa hai agar is habs mein us samt se khushbu nikal aae jakaD rakhaa hai puure zor se kis ne shikanje mein mujhe lagtaa hai teri yaad ke baazu nikal aae anaaein tark karne kaa safi' bas ek rasta hai idhar se main agar niklun udhar se tu nikal aae"

"main agar naqsh banaaun vo miTaa saktaa hai ishq aandhi hai ghane peD giraa saktaa hai khvaab kyaa hai ye dahaktaa huaa angaara hai chashm-e-barfaab mein bhi aag lagaa saktaa hai sirf aankhein hi nahin saaraa badan khasta hai dekh ye hijr kisi samt se aa saktaa hai mere siine pe lage zakhm gavaahi denaa phuul khil jaae to maahaul sajaa saktaa hai vaqt marham hai ye hanstaa hai hansaataa hai miyaan ye to taqdir ke maatam ko bhulaa saktaa hai kyaa khabar kaun hai suufi hai qalandar hai ki ghaus mere andar hi to hai mujh ko bulaa saktaa hai kitnaa tanhaai kaa sannaaTaa hai chaaron jaanib saans lene se bhi ik shor saa aa saktaa hai khud se bichhDaa to tire dar pe chalaa aaya huun ek tu hai jo mujhe mujh se milaa saktaa hai main mohabbat huun azal aur abad mujh mein hain mujh sivaa kaun 'safi' mujh ko samaa saktaa hai"

"simTe hain khud mein aise ki vusat nahin rahi taskhir-e-kaaenaat ki himmat nahin rahi ab ke khizaan ke khauf se patte nahin jhaDe shaayad havaa ke dil mein kudurat nahin rahi main ne kahaa ki koi ho khidmat mire huzur us ne kahaa ki teri zarurat nahin rahi jakDaa huaa huun vaqt ki aakaas-bel mein is karb se faraar ki surat nahin rahi chehron ki baazyaaft se main thak gayaa safi' aur khuun mein bhi pahli haraarat nahin rahi"

"main vaarafta sitaaro kaa miri manzil to aage hai main raahi rahguzaaron kaa miri manzil to aage hai na phulon ki tamannaa hai na khushbu se koi matlab na main dushman huun khaaron kaa miri manzil to aage hai mujhe ghote lagaane hain mujhe gauhar se matlab hai nahin khvaahaan kinaaron kaa miri manzil to aage hai andheron mein chamaktaa huun sadaa gardish mein rahtaa huun main saathi shab ke taaron kaa miri manzil to aage hai na thak kar baiTh saktaa huun na shaaki huun muqaddar kaa asaa huun be-sahaaron kaa miri manzil to aage hai"

"khasta hain aziyyat mein hain bimaar bahut hain kuchh din se to ham khud se bhi bezaar bahut hain be-kaif udaasi mein Dhale khvaab suhaane taabir ke lamhon ke talabgaar bahut hain gulzaar mein khaaron pe gire ashk sahar ke shabnam ke muqaddar mein bhi aazaar bahut hain vo dil se nagine ko parakh hi nahin sakte ab jauhari kam kam hain kharidaar bahut hain buniyaad mein nafrat ki kahin iinT lagi hai divaar ke gir jaane ke aasaar bahut hain do rang mohabbat mein gavaaraa nahin karte ham log usulon mein vaza-daar bahut hain ai ishq paDaav pe kahin dam na nikal jaae ai chaaragaro raaste dushvaar bahut hain darvesh nahin koi 'safi' shahr-e-havas mein vaise to yahaan saahab-e-dastaar bahut hain"

"oDhaa hai jab se main ne tumhaare vajud ko ik aag lag gai mere saare vajud ko uThti hai mere jism se tere badan ki lau lagtaa hai chuum leinge sitaare vajud ko main ne badan utaar ke gaThDi mein rakh diyaa kaise sambhaaltaa main udhaare vajud ko ye ruuh kaa safar bhi samundar se kam nahin milte nahin hain is ke kinaare vajud ko thaa lamha-e-visaal kahin jism se pare ab is jagah se kaun pukaare vajud ko ik huuk si uThi hai tere vasl ki safi' samjhaae kaun hijr ke maare vajud ko"

"kyaa kahun kaise karishme dekhe main ne aavaaz ke saae dekhe meri hijrat hi na likkhi ho kahin main ne khvaabon mein parinde dekhe teri aankhon mein the jugnu raqsaan apni palkon pe sitaare dekhe main ne jaate hue dekhaa tujh ko tujh ko takte hue raste dekhe jin ki palkon pe sahife utrein main ne kuchh aise bhi chehre dekhe vasl vaalon ki aziyyat dekhi hijr vaalon ke saliqe dekhe muskuraahaT nahin dekhi meri tu ne bas paanv mein chhaale dekhe jis ne maathe pe rakhi hon aankhein vo koi aadmi kaise dekhe jis ne dekhaa na ho darvesh 'safi' vo mire ghar kabhi aae dekhe"

"dastaar bachaataa huun to sar bach nahin saktaa is karb-e-musalsal mein hunar bach nahin saktaa jo shaakh alag ho vo numu paa nahin sakti divaar se TuuTaa huaa dar bach nahin saktaa jalte hue suraj se musaafir ne kahaa thaa ab teri tamaazat se nagar bach nahin saktaa tu aks-e-maaani ke samandar kaa shanaavar nazron se tiri ahl-e-nazar bach nahin saktaa har moD pe main madd-e-muqaabil huun 'safi' ke bachtaa huun bahut khud se magar bach nahin saktaa"

"ashkon se jo likhi thi vo tahrir kho gai khvaabon bhare jahaan mein taabir kho gai aks-e-jamaal-e-yaar kahin aur jaa paDaa aaina chikhtaa rahaa tasvir kho gai raanjhaa thaa be-qaraar mire dasht-e-khvaab mein ro ro ke kah rahaa thaa miri hiir kho gai yunhi main khud ko qaidi samajhtaa huun aaj tak paanv mein jo paDi thi vo zanjir kho gai muddat se laD rahaa huun 'safi' apne aap se ab hausle ke haath se shamshir kho gai"

"aisaa mumkin hi nahin thaa main pukaaraa jaataa main na jaataa to koi aur hi maaraa jaataa lazzat-e-vasl se achchhi thi vo girya-zaari ab to is jiit se behtar thaa main haaraa jaataa ibn-e-aadam huun sar-andip ke saahil pe khaDaa meri khaatir koi duniyaa mein utaaraa jaataa us ki aankhon se paDhe the jo sahife main ne un sahifon se koi naqsh ubhaaraa jaataa ham junun-khez maraahil se na guzre varna ham jidhar jaate udhar vaqt kaa dhaaraa jaataa sunnaa chaahoge fanaa hote hue shakhs kaa khvaab jis ki hasrat thi tire naam pe vaaraa jaataa gar Dubotaa vo mujhe khud bhi na bachtaa dariyaa main jo tufaan mein Dhaltaa to kinaara jaataa 'ishq vaalon hi se nisbat miri likkhi jaati teri galiyon mein 'safi' kaash guzaaraa jaataa"

"khud hi chal kar to mire paas vo aane se rahaa main bhi ab apni anaa chhoD ke jaane se rahaa meri aankhon mein charaaghaan hai yahi kaafi hai tere qadmon mein nae phuul bichhaane se rahaa tum use jaa ke kaho aa ke manaae mujh ko khud se ruThaa huun to main khud ko manaane se rahaa aastinon se kaho apni hifaazat kar lein yaar saanpon se to main in ko bachaane se rahaa raaegaani kaa safar mujh se nahin ho saktaa ab mohabbat mein nayaa ranj uThaane se rahaa aabla-paai bhi gulshan hai mujhe dasht-mizaaj zakhm mahke hain to phulon ko dikhaane se rahaa dil mein ghaav hi sahi talkh tabiat bhi sahi apne yaaron pe to main haath uThaane se rahaa ret bhi chumti rahti hai mire paanv 'safi' main samandar ko to manzar ye dikhaane se rahaa"

"mere idraak mein sochon kaa guzar rahtaa hai jis tarah dahr mein lamhon kaa safar rahtaa hai jaane kis saazishi maahaul ki saughaatein hain koi muflis to koi saahab-e-zar rahtaa hai ham uchhaaleinge isi shab ke samundar se nujum ik yahi jazba-e-nau pesh-e-nazar rahtaa hai jabr-e-haalaat se larze na kahin saari zamin ajnabi khauf saa kyon shaam-o-sahar rahtaa hai raabta peD se kaT jaataa hai jis vaqt safi' khushk patte ko to jhonke kaa bhi Dar rahtaa hai"

"diyaa raushan hai lekin tirgi kaa raqs jaari hai khirad hairat-zada hai bebasi kaa raqs jaari hai tasavvur aaina-khaana hai har tasvir afsurda bikharti kirchiyon mein zindagi kaa raqs jaari hai musakhkhar kar liyaa insaan ne ujlat mein sitaaron ko mohabbat mar rahi hai aagahi kaa raqs jaari hai jo kahnaa thaa nahin kahte jo kahte hain vo be-maani kahi hai an-kahi aur an-kahi kaa raqs jaari hai duaa-e-nim-shab jugnu miri aankhon mein kyaa chamke qataar-andar-qataar ik raushni kaa raqs jaari hai jo mere lafz tum ko vajd mein mahsus hote hain mire andar miri divaangi kaa raqs jaari hai safi' chaaron taraf yaadon ke lashkar hamla-aavar hain junun andar junun hai be-khudi kaa raqs jaari hai"

"kaanch kaa TukDaa paDaa thaa dasht mein yaa miraa chehra paDaa thaa dasht mein lag rahaa thaa vasl ki tadfin hai hijr yuun bikhraa paDaa thaa dasht mein us ke qadmon ke nishaan mahfuz the yuun lagaa rasta paDaa thaa dasht mein mere andar thal basaa thaa ishq kaa so mujhe aanaa paDaa thaa dasht mein dasht bhi saare kaa saaraa mujh mein thaa main bhi to saaraa paDaa thaa dasht mein ek tanhaai bichhi thi ret par aur main TuuTaa paDaa thaa dasht mein bhiiD mein mujh se dilaasa gum huaa main ne jab DhunDaa paDaa thaa dasht mein dosti bhi shaaeri bhi ishq bhi meraa har rishta paDaa thaa dasht mein partav-e-khurshid dhundlaane lagaa chaand kaa saaya paDaa thaa dasht mein sirf meri hi kami thi ai 'safi' jo bhi thaa vaisaa paDaa thaa dasht mein"

"meri vahshat kaa nazaara nahin hotaa mujh se apnaa honaa bhi gavaara nahin hotaa mujh se main jo ye moajiza-e-ishq liye phirtaa huun ek jugnu bhi sitaara nahin hotaa mujh se gher rakhaa hai mujhe chaaron taraf se us ne is taalluq se kinaara nahin hotaa mujh se main huun dahliz pe rakhe hue patthar ki tarah ab mohabbat mein guzaara nahin hotaa mujh se kaam jitne bhi kiye saare adhure hi rahe aur ye ishq bhi saaraa nahin hotaa mujh se kyaa kahaa ishq karun vo bhi nae jazbe se ji nahin ab ye dobaara nahin hotaa mujh se sirf le de ke safi' saans bachaa rakhi hai ab koi aur khasaara nahin hotaa mujh se"

"aankh se jhaDne lage rukhsaar ko mahkaa gae kuchh sitaare ratjagon ki dastaras mein aa gae be-mahal si guftugu se raaste bujhne lage mere hamraahi mire afkaar ko bhi khaa gae jabr kaise rok paaegaa nai taa'bir ko khvaab jab aankhon ki divaaron se baahar aa gae main tumhaare shahr se guzraa to kuchh aise lagaa dil udaasi aaina patthar baham Takraa gae dard ke peDon pe baiThe jugnuon ki khair ho bebasi ke dasht mein ummid thaame aa gae chaandni aur dasht kaa kuchh to ta'alluq hai 'safi' be-sabab yunhi nahin palkon pe moti chhaa gae"

"aks khul jaataa hai lekin daaera khultaa nahin saamne chehra na ho to aaina khultaa nahin ruuh se mahrum-e-binaai pe manzar kyaa khule aankh ki dahliz par to ratjagaa khultaa nahin maslahat ke jugnuon ko saath rakhte hain miyaan ranjishon ke darmiyaan to raasta khultaa nahin zindagi aur maut donon hi anokhe bhed hain ek khul jaataa hai lekin dusraa khultaa nahin lafz jo dil se na niklein be-asar rah jaate hain be-yaqini mein kabhi harf-e-duaa khultaa nahin ishq se vaaqif nahin hai nukta-chin teraa safi' sher kyaa khultaa ki us par qaafiya khultaa nahin"