Ghazal

"main khud saaqi huun apnaa mere pahlu mein hai paimaana vo paimaana ki khud miinaa bhi hai aur khud hi mai-khaana agar sham-e-haqiqat ki ziyaa-baari nahin har-su takhayyul ko kahaan se aa gae aadaab-e-parvaana par-e-parvaaz bakhshe mujh ko mere ishq-o-masti ne haqiqat se jabhi dilchasp-tar hai meraa afsaana maqaam-e-haif-o-hairat hai ki us ko hi masal Daalaa numu sidra ki apne siine mein rakhtaa thaa jo daana vahi is bazm-e-hasti se surur-andoz hote hain nigaahein jin ki hon bebaak aur atvaar mardaana mujhe ahl-e-nazar ki aankh hi pahchaan sakti hai ki surat to hai rindaana magar sirat hakimaana 'amin' hai daad ke qaabil vasi'-ul-mashrabi meri ki farzaanon mein farzaana huun divaanon mein divaana"

"aarzu-e-davaam ne maaraa jalva-e-subh-o-shaam ne maaraa sar-kashi gaam gaam par mujh se is dil-e-bad-lagaam ne maaraa ibtidaa ki na intihaa ki khabar qissa-e-naa-tamaam ne maaraa aql khud hi shikaar-e-jazba hui ghaznavi ko ghulaam ne maaraa hirs ne kuchh bhi dekhne na diyaa daana-e-zer-e-daam ne maaraa sach to ye hai ki ibn-e-aadam ko jazba-e-intiqaam ne maaraa main 'amin' kab fareb khaataa thaa dahr ke ehtimaam ne maaraa"

"chashm-e-maigun-e-yaar ke sadqe nigah-e-sehr-kaar ke sadqe nok-e-mizhgaan ki hai khalish pur-kaif nargis-e-khaar-daar ke sadqe ye adaa bhi hai kis qadar dilkash chashm-e-jaanaan ke pyaar ke sadqe hai takallum ki raqs-e-barq-e-shafaq hai dur-e-shaahvaar ke sadqe us khiraamaan-nihaal ke qurbaan aur us ki bahaar ke sadqe husn hi husn sar se paanv tak main saraapaa-nigaar ke sadqe main 'amin' un ki tamkanat pe fidaa vo mire inkisaar ke sadqe"

"jiinaa hai agar tujh ko khugar ho tamanna kaa andaaz khalili hai maslak hai ye muusaa kaa be-aab-e-tamanna dil jazbaat se aari hai manzar kabhi dekhaa hai sukhe hue dariyaa kaa mahbub hai mai-kash ko rindon ki baghal mein hai lekin ye taqarrub hai baada hi se miinaa kaa thaa jazb-o-kashish jis mein vo shama-e-tajalli thi zaaer koi kyunkar ho ab vaadi-e-sinaa kaa chaDhte hue suraj ke tevar kabhi dekhe hain aaghaaz hai aaina anjaam-e-tamannaa kaa islaah ki duniyaa mein us dil kaa khudaa-haafiz paidaa na huaa jis mein ehsaas hi tauba kaa sikhaa hai 'amin' main ne haatif se ghazal kahnaa ye naghma-e-jaan-parvar hai bulbul-e-sidra kaa"

"junun ke faiz se haasil hai ye kamaal mujhe na aastin kaa na daaman kaa hai khayaal mujhe banaa ho jab ki miraa siina aaina-khaana shikast-e-shisha-e-dil kaa ho kyon malaal mujhe miri balaa se koi laakh haatim-e-tai ho ki ibtidaa se nahin aadat-e-savaal mujhe ye bad-lagaam sahi main bhi kam savaar nahin zamaana kar nahin saktaa hai paaemaal mujhe kamaal-e-ishq kahun kyon na is tasavvur ko ki jis ke faiz se ho hijr bhi visaal mujhe main saaf-go huun ki dil mein nahin hai mail koi main raast-rau huun ki bhaati nahin hai chaal mujhe adab navaaz kahaa karte hain ‘amin-e-hazin' magar avaam mohammad masih paal mujhe"

"aankhon mein chhalakte hain ham-rang-e-hinaa aansu mahjur ke aansu bhi hote hain balaa aansu be-saakhta rone se taskin si hoti hai dard-e-dil-e-mahzun ki hain kuchh to davaa aansu ik khasta-jigar aashiq ro ro ke ye kahtaa thaa aasaan hai har mushkil gar dein na daghaa aansu sar khaak pe dhar dhar kar dete hain duaa dil se hain aashiq-e-saadiq ke paaband-e-vafaa aansu iksir-e-mujarrab hain kar zabt inhein yaani dil hi kaa ye jauhar hain dil hi ko pilaa aansu majbur hon bahne par be-saakhta gir jaaein qaanun-e-mohabbat mein hain jab hi ravaa aansu naasur-e-mohabbat kaa hotaa na 'amin' charchaa ghammaaz na ban jaate gar laal-numaa aansu"

"pasand-e-khaatir-e-jaanaan hai inkisaar miraa isi liye to mah-o-mehr hain ghubaar miraa mili hai mujh ko azal se kamand-e-yazdaan-gir shikaar-e-har-kas-o-naa-kas nahin shikaar miraa alassabaah mujhe bhar ke jaam-e-najm-e-sahar mudaam detaa hai saaqi-e-naam-daar miraa misaal-e-laala mohabbat ke daagh hote hue nahin hai daaman-e-dil dekh daagh-daar miraa mazaa hai vasl mein aur lutf hijr-e-yaar mein hai vo phal kaa vaqt ye hai mausam-e-bahaar miraa navaa-e-nur ho jab mere lab pe ahl-e-chaman to ehtiraam kare kyon na shaakh-saar miraa parakh sake jo mujhe vo nigaah-e-paak kahaan judaa 'amin' hai zar-o-sim se iyaar maraa"

"bhaDki hui hai sham-e-shabistaan-e-zindagi shoala na chuum le kahin daamaan-e-zindagi marne ke baad phulon se turbat navaaz di hotaa hai kaun ziist mein pursaan-e-zindagi aish-o-khushi nashaat-o-tarab raahat-o-sukun hain in se baDh ke kaun harifaan-e-zindagi baar-e-alam uThaane ke qaabil banaa diyaa kyaa kam huaa hai mujh pe ye ehsaan-e-zindagi aaghaaz-e-baab-e-nau hai miri maut ai 'amin' tabdil kar rahaa huun main unvaan-e-zindagi"

"main ye kab kahtaa huun kambakht unhein yaad na kar shevan-o-aah magar ai dil-e-naashaad na kar dard siine mein nihaan rah ke asar rakhtaa hai ham-nashin tak se bayaan husn ki bedaad na kar apni aankhon ko na khun-naaba-fashaan hone de muft mein laal-e-khudaa-daad ko barbaad na kar phunk de naghma-e-jaan-soz se saamaan-e-qafas bulbul-e-tafta-jigar shikva-e-sayyaad na kar lutf jiine kaa hai jab hi ki dil-e-mast-e-khudi aasmaan tak se ye kah de miri imdaad na kar aql-o-jazbaat ko rakh taaba-e-farmaan apne is ko sar par na chaDhaa aur inhein aazaad na kar yaas mein phoD ke sar marte hain kam-zarf 'amin' zarf aali hai tiraa bai'at-e-farhaad na kar"

"laale paDe hain jaan ke jiine kaa ehtimaam kar jin mein ho kaif-e-zindagi bahr-e-khudaa vo kaam kar taur-e-hayaat se uDaa jazba-e-zistan ki aag jab kahin jaa ke niyat-e-zindagi davaam kar pahle ye soch daam ke toDne ki sakat bhi hai baad ko dil mein khvaahish-e-daana-e-zer-e-daam kar tujh ko tiri hi aankh se dekh rahi hai kaaenaat baat ye raaz ki nahin apnaa khud ehtiraam kar haif samajh rahaa hai tu apni jhijak ko mohtasib mai-kada-e-hayaat mein shauq se mai-ba-jaam kar naqsh-navi nahin hai tu safha-e-rozgaar par miTne se gar nahin mafar miT hi ke apnaa naam kar banda-e-khvaahishaat ko kahtaa hai kaun abd-e-hur chaahiye hurriyat agar dil ko 'amin' ghulaam kar"

"afsaana-e-hayaat ko dohraa rahaa huun main yuun apni umr-e-rafta ko lauTaa rahaa huun main ik ik qadam pe dars-e-vafaa de rahaa huun main ye kis ki justuju hai kidhar jaa rahaa huun main yaa rab kisi kaa daam-e-hasin muntazir na ho par shauq ke lage hain uDaa jaa rahaa huun main is sehr-e-rang-o-bu ne to divaana kar diyaa daaman ke taar taar ko uljhaa rahaa huun main soz-e-darun-e-sina ko naghmon mein Dhaal kar saaz-e-nafas ke taar ko barmaa rahaa huun main raah-e-talab mein dekh mire dil ki hasratein saaye mein paa-e-khizr ko sahlaa rahaa huun main raste ki uunch niich se vaaqif to huun 'amin' Thokar qadam qadam pe magar khaa rahaa huun main"

"is liye zer-e-falak be-sabab aazaar hai husn jaae to jaae kahaan ishq ki sarkaar hai husn bulbul-e-sokhta-saamaan se sunaa hai main ne ishq ik aatish-e-be-shoala hai gulzaar hai husn saaf aataa hai nazar dida-e-binaa ko yahi ishq iqraar-e-haqiqat hai aur izhaar hai husn jalva-e-shama se parvaanon ko hosh aataa hai ishq kirdaar sahi jauhar-e-kirdaar hai husn ishq bechaara hi aagaah nahin hai varna roz-e-misaaq se khud is kaa talabgaar hai husn surat-e-daaera-e-kaun-o-makaan hai is se ishq nuqta hai aur is nuqte ki parkaar hai husn choli daaman kaa azal se hai 'amin' saath in kaa husn kaa ishq hai aur ishq kaa meaar hai husn"

"hai dil hi faqat jigar nahin hai shamshir to hai sipar nahin hai khaali hai sadaf guhar nahin hai hai aankh magar nazar nahin hai sar sar hai tiraa baghair saudaa saudaa jo milaa to sar nahin hai aahein nahin tere dil ki aahein jab in mein koi asar nahin hai be-daana uge to khaak se kuchh daane mein agar shajar nahin hai jiine ko to khvaahishein hain laakhon marne ko jigar magar nahin hai vo yaas ki hai 'amin' shab-e-taar jis shab ki koi sahar nahin hai"

"ishq mein be-aabru honaa paDaa do hi din mein tum se tu honaa paDaa thi ye kis ki aarzu jis ke liye taarik-e-sad-aarzu honaa paDaa laala-zaar-e-sina haan tere liye aankh hi ko aab-ju honaa paDaa kin balaa-noshon kaa bazm-e-dahr mein shisha-o-jaam-o-subu honaa paDaa taa-ba-kai luun kaam sabr-o-zabt se aasmaan se du-badu honaa paDaa ishq kaa anjaam rangin dekhiye ashk-e-saada ko lahu honaa paDaa andalib-e-baagh-e-hasti ko 'amin' mubtalaa-e-rang-o-bu honaa paDaa"

"jauhar-e-paak tiraa khaak mein gar khaak na ho taa-abad lab pe tire shikva-e-aflaak na ho aabru-rez-e-khudi ho na agar tu khud hi umr bhar aankh tiri ashk se namnaak na ho hai tiri sokhta-saamaani hi se us kaa vajud shoala rahtaa hai kahaan jab khas-o-khaashaak na ho azm-e-taskhir ke jazbaat hon aankhon mein agar munharif tujh se kabhi fitrat-e-chaalaak na ho rashk-e-jannat ho kahaan jauhar-e-daana ki numud haath se apne agar us kaa jigar chaak na ho is haqiqat ko khudaaraa nazar-andaaz na kar sard ho jaataa hai vo shoala jo bebaak na ho ghair-mumkin hai 'amin' hal ho moammaa-e-hayaat dil agar paak na ho dida-e-darraak na ho"

"tavaanaa huun dil-e-ranjur ki saugand kyon khaaun main jab mukhtaar huun majbur ki saugand kyon khaaun mujhe arsh-e-barin ke jalva-e-daaim se nisbat hai koi vaaiz huun main bhi huur ki saugand kyon khaaun miraa tur-e-tajalli raat din hai mere pahlu mein nahin jab aag lenaa tuur ki saugand kyon khaaun miraa har naa-chakida ashk kaa qatra hai be-saahil main tufaan-e-balaa tannur ki saugand kyon khaaun haqiqat mein miri khaamoshiyaan parda hain mahshar kaa huun khurshid-e-qayaamat suur ki saugand kyon khaaun anal-haq ki bajaae main alal-haq kaa huun aavaaza paDi hai kyaa mujhe mansur ki saugand kyon khaaun kulaah-e-faqr jab main ne azal se oDh rakkhi hai 'amin' tu hi bataa faghfur ki saugand kyon khaaun"

"tamanna muddaaa armaan dil ke azal se hain yahi saamaan dil ke ilaahi is dil-e-be-chain ki khair jo qaabu mein hai ik anjaan dil ke jafaa sahnaa magar uf tak na karnaa jigar ke main fidaa qurbaan dil ke nahin aate na aaein vo mire ghar tasavvur mein to hain mehmaan dil ke kisi kaa huun kisi kaa main abad tak ye hain vaade ye hain paimaan dil ke nabard-e-zindagi mushkil nahin hai khataa lekin na hon ausaan dil ke agar hai zindagi ke raag kaa shauq 'amin' khole raho tum kaan dil ke"

"numud-e-rang-o-bu ne maar Daalaa usi ki aarzu ne maar Daalaa na duniyaa hi kaa rakkhaa aur na diin kaa dil-e-madhosh tu ne maar Daalaa takallum kaa fusun allaahu-akbar kisi ki guftugu ne maar Daalaa na rudaad-e-hubaab-e-zindagi puchh khiraam-e-aab-ju ne maar Daalaa khudaa vaaiz se samjhe hashr ke din hamein us be-vazu ne maar Daalaa zamaane ke 'amin' munh kaun aataa khayaal-e-aabru ne maar Daalaa"

"khush nahin dard se jo ishq kaa daavaa na kare hosh khone hon to jalvon kaa taqaazaa na kare aatish-e-shauq nahin aatish-e-namrud se kam aag kaa Dar ho to but-khaane pe dhaavaa na kare ek aavaaz se khul jaataa hai sab Dhol kaa pol daulat-e-ishq mayassar ho to ghaughaa na kare rind vo moatakif-e-kaaba-e-hasti hai ki jo zaaer-e-dair na ho azm-e-kalisaa na kare husn vo husn hai jo ishq ki ramzein samjhe ishq vo ishq hai jo husn ko rusvaa na kare gham jise kahte hain vo khun-e-tamannaa hi to hai is se bachnaa ho kisi ko to tamanna na kare ham to kahte hi raheinge dil-e-murda se 'amin' khud agar ji na sake minnat-e-isaa na kare"

"zindagi ki bahaar dekhte hain gul ke pahlu mein khaar dekhte hain jalva-gar hain vo khashmagin ho kar nuur ke saath naar dekhte hain jis taraf bhi nigaah uThti hai jalva-e-ru-e-yaar dekhte hain pyaar hotaa hai jis se ai pyaare us ko hi baar baar dekhte hain ham samajhte hain us ko apnaa hi jis ki aankhon mein pyaar dekhte hain dukht-e-raz ki hain shokhiyaan qibla jubba-e-daagh-daar dekhte hain kyaa yahi dil hai jis ko pahlu mein ham 'amin' be-qaraar dekhte hain"

"ik barq hai hujum-e-taqaazaa liye hue jaane main aa gayaa huun yahaan kyaa liye hue mahmil ki oT mein lab-e-lailaa shafaq-farosh dasht-e-junun mein qais hai ghaughaa liye hue ik tu ki be-hijaab na honaa tiri adaa ik main ki shauq-e-did ki duniyaa liye hue ik tu ki apne husn ki hai aap hi dalil ik main ki tere ishq kaa daavaa liye hue ik tu ki teri mast nigaahon mein mai-kade ik main ki lab pe hasrat-e-sahbaa liye hue maqsud imtihaan hai rindon ke zarf kaa phirtaa huun bazm bazm main miinaa liye hue itnaa asar to shaikh ki sohbat kaa hai 'amin' haathon mein jaam lab pe huun tauba liye hue"