Ghazal

"izhaar-e-sadaaqat mein asar kyon nahin hotaa ab meri taraf un kaa guzar kyon nahin hotaa khushbu kaa ye bikhraav bhi tauhin-e-chaman hai ehsaas tujhe baad-e-sahar kyon nahin hotaa kyon fikr se mahrum hain is daur ki naslein pahlaa saa zabaanon mein asar kyon nahin hotaa jo baat idhar hai vo udhar kyon nahin jaati jo karb idhar hai vo udhar kyon nahin hotaa is shahr-e-zabun-haal mein takhrib kaa ehsaas honaa to zaruri hai magar kyon nahin hotaa fankaar isi kashmakash-e-vaqt mein gum hain baazaar kharidaar-e-hunar kyon nahin hotaa allaah ko karte hain musibat mein sabhi yaad ye vird magar shaam-o-sahar kyon nahin hotaa khud-bin hain sabhi aur ye bataane se hain maa’zur aaine se nuqsaan-e-nazar kyon nahin hotaa peshaani-e-kohsaar pe suraj kaa hai milaad vaadi mein magar shor-e-sahar kyon nahin hotaa ho jis ke payambar kaa guzar ‘arsh-e-barin par ummat kaa sitaaron mein safar kyon nahin hotaa hairaan huun ki 'iqbaal' ki taa'lim kaa 'daanish' is shahr ke logon pe asar kyon nahin hotaa"

"hausle maayus zauq-e-justuju naakaam hai ye dil-e-naa-mahram-e-anjaam kaa anjaam hai aankh kyaa hai husn ki ranginiyon kaa aaina dil hai kyaa khun-e-tamannaa kaa chhalaktaa jaam hai dijiye bimaar-e-ulfat ki jigar-daari ki daad nazaa kaa aalam hai honTon par tumhaaraa naam hai phir vo yaad aae hui madhosh dil ki kaaenaat phir uThaa dard-e-jigar phir kuchh mujhe aaraam hai khaak-daan-e-dahr mein taskin kaa juuyaa na ho aah jab tak dil dhaDaktaa hai kahaan aaraam hai vo to dil mein dard ki duniyaa basaa kar chal diye mujh ko har taar-e-nafas ik maut kaa paighaam hai vaasil-e-mizraab-e-khaamoshi hai har taar-e-nafas us se kah do ab tire bimaar ko aaraam hai kar rahaa huun doston ke zoam par tark-e-vatan shaayad ab aaghaaz-e-daur-e-gardish-e-ayyaam hai"

"tiraa jamaal tiraa husn kaamgaar rahe vo kyaa kare na jise dil pe ikhtiyaar rahe hazaar kasrat-e-raaanaa ne chilmanein Daalin ba-har-hijaab-e-taayyun vo aashkaar rahe miri nazar kaa to kyaa zikr khud bahaar ke phuul fareb-khurda-e-rangini-e-bahaar rahe kisi maqaam pe dil ko sukun ho kyaa maani jo be-qaraar-e-azal hai vo be-qaraar rahe usi navaah mein ahl-e-nazar bhi mumkin hain kuchh aur der sar-e-tur intizaar rahe tamaam phuul the aur zarf-e-daaman-e-gulchin jo bach gae vo charaagh-e-shab-bahaar rahe miri nigaah mein hai vo harim-e-zebaai kaniz ban ke jahaan mariyam-e-bahaar rahe khizaan khizaan ho to daur-e-bahaar kyaa maani bahaar ho to khizaan kyuun bane bahaar rahe jahaan-e-husn ke asraar paa nahin saktaa jo ishq apni hadon tak hi be-qaraar rahe miri nazar se vo jalve na rah sake mastur jo zer-e-parda-e-pairaahan-e-bahaar rahe chhuDaa chukaa huun main dast-e-majaaz se daaman haqiqat apne hijaabon se hoshiyaar rahe main moDtaa huun isi rukh se kaarvaan apnaa kuchh aur der ufuq par abhi ghubaar rahe junun-e-shauq mein tahqiq-e-rang-o-bu kaisi rahe chaman mein to divaana-e-bahaar rahe hain is tarah ke zavaabit bhi be-qaraari mein ki tere saath zamaana bhi be-qaraar rahe vo sirf mere hain 'ehsaan' main faqat un kaa hai naagavaar kisi ko to naagavaar rahe"

"yuun us pe miri arz-e-tamannaa kaa asar thaa jaise koi suraj ki tapish mein gul-e-tar thaa uThti thiin darichon pe hamaari bhi nigaahein apnaa bhi kabhi shahr-e-nigaaraan mein guzar thaa ham jis ke taghaaful ki shikaayat ko gae the aankh us ne uThaai to jahaan zer-o-zabar thaa shaanon pe kabhi the tire bhige hue rukhsaar aankhon pe kabhi meri tarah daaman-e-tar thaa khushbu se moattar hai abhi tak vo guzargaah sadiyon se yahaan jaise bahaaron kaa nagar thaa hai un ke saraapaa ki tarah khush-qad o khush-rang vo sarv kaa paudaa jo sar-e-raahguzar thaa qatre ki taraai mein the tufaan ke nasheman zarre ke ahaate mein bagulon kaa bhanvar thaa is aadam-e-khaaki pe sitaaron ki nazar thi is khaak pe kuchh jalva-e-yazdaan kaa asar thaa main royaa to hansne ki sadaa aai kai yaar vo jaan-e-tamannaa pas-e-divaar-e-nazar thaa 'daanish' thaa ikahraa miraa pairaahan-e-hasti be-parda zamaane pe miraa aib-o-hunar thaa"

"jabin ki dhuul jigar ki jalan chhupaaegaa shuru-e-ishq hai vo fitratan chhupaaegaa damak rahaa hai jo nas nas ki tishnagi se badan is aag ko na tiraa pairahan chhupaaegaa tiraa ilaaj shifaa-gaah-e-asr-e-nau mein nahin khirad ke ghaav tu divaana-pan chhupaaegaa hisaar-e-zabt hai abr-e-ravaan ki parchhaain malaal-e-ruh ko kab tak badan chhupaaegaa nazar kaa fard-e-amal se hai silsila darkaar yaqin na kar ye siyaahi kafan chhupaaegaa kise khabar thi ki ye daur-e-khud-gharaz ik din junun se qimat-e-daar-o-rasan chhupaaegaa tiraa ghubaar zamin par utarne vaalaa hai kahaan tak ab ye bagula thakan chhupaaegaa khulegaa baad-e-nafas se jo rukh pe nil-kanval use kahaan tiraa ujlaa badan chhupaaegaa tire kamaal ke dhabbe tire uruuj ke daagh chhupaaegaa to koi ahl-e-fan chhupaaegaa jise hai faiz miri khaanqaah se 'daanish' vo kis tarah miraa rang-e-sukhan chhupaaegaa"

"zindagi mein us ko kaif-e-zindagi haasil nahin jis kaa dil raaz-o-niyaaz-e-ishq ke qaabil nahin husn ke parde mein ho saktaa nahin hargiz qaraar roz-e-avval se ye lailaa khugar-e-mahmil nahin qadr kar dil ki ki dargaah-e-khudaa mein ai nadim do-jahaan ki neamatein haazir hain lekin dil nahin hoshiyaar ai mast-o-madhosh-e-javaani hoshiyaar ishq vo dariyaa hai jo minnat-kash-e-saahil nahin zabt-e-naala zabt-e-girya zabt-e-ulfat zabt-e-shauq kis tarah kah duun ki ye aasaaniyaan mushkil nahin apnaa rasta apni dhun apnaa tasavvur apnaa shauq koi bhi rahbaro yahaan begaana-e-manzil nahin hai tasavvur ishrat-e-maazi kaa aaina-ba-dast dil vahi dil hai magar vo garmi-e-mahfil nahin der kyaa hai aa mire dil mein samaa jaa barq-e-naaz shikva-sanji fitrat-e-ehsaan mein daakhil nahin iltimaas-e-shauq par 'ehsaan' mahshar Dah gayaa un kaa sharmaa kar ye kahnaa main tire qaabil nahin"

"basaa-auqaat maayusi mein ye aalam bhi hotaa hai tabassum ki tahon mein ehtimaam-e-gham bhi hotaa hai khushi tanhaa nahin aati jilau mein gham bhi hotaa hai jahaan hansti hain kaliyaan girya-e-shabnam bhi hotaa hai nai tahzib ke meamaar shaayad us se ghaafil hain ba-in aasaar-e-aalam darham-o-barham bhi hotaa hai jo aankhein ghunghaTon mein roz ke faaqon se pur-nam hain un aankhon mein fusun-e-ismat-e-mariyam bhi hotaa hai ba-imaa-e-khirad tum dekhte ho jis ko nafrat se vo divaana khirad ki asl kaa mahram bhi hotaa hai rabaab-e-zindagi ke zamzamon par jhumne vaale har ik naghme mein naa-maalum saa maatam bhi hotaa hai vo insaan naaz kartaa hai jo avval se sharaafat par bahaktaa hai to nang-e-azmat-e-aadam bhi hotaa hai javaani sail-e-sher-o-baada-e-naghma sahi lekin ye tufaan-e-lataafat khud-bakhud maddham bhi hotaa hai jise koi samajh le saadgi se haasil-e-hasti vo jab haasil nahin hotaa to aakhir gham bhi hotaa hai tabassum phuul barsaataa hai jin rangin honTon se unhi honTon pe ik din naala-e-paiham bhi hotaa hai ba-juz zaat-e-khudaa 'ehsaan' koi bhi nahin apnaa sunaa thaa laakh dushman hon to ik hamdam bhi hotaa hai"

"apni rusvaai kaa ehsaas to ab kuchh bhi nahin honT hi sun hain khamoshi kaa sabab kuchh bhi nahin ye ujaalon ke jazire ye saraabon ke dayaar sehr-o-afsun ke sivaa jashn-e-tarab kuchh bhi nahin bah gae vaqt ke sailaab mein jismon ke suhaag ab na vo chashm na rukhsaar na lab kuchh bhi nahin reza reza hai kisi khvaab-e-zar-afshaan kaa tilism fasl-e-gul anjum-o-mahtaab ye sab kuchh bhi nahin mere aansu inhein karte hain ujaagar kuchh aur pahle jo log sabhi kuchh the aur ab kuchh bhi nahin ham pe to subh se raushan thi ye shaam-e-be-kaif tum ko is shaam se andaaza-e-shab kuchh bhi nahin shahr-e-dil shahr-e-khamoshaan ki tarah hai gunjaan kitnaa aabaad magar shor-o-shaghab kuchh bhi nahin ye jahaan aalam-e-asbaab hai naadaan na bano kaun maanegaa tabaahi kaa sabab kuchh bhi nahin rang-o-bu gul se mukar jaaein to rahtaa kyaa hai aag bujh jaae to suraj kaa laqab kuchh bhi nahin khol hi khol hai nau-khez dabistaan-e-khayaal shor hi shor hai takhliq-e-adab kuchh bhi nahin gum raho gum ki yahaan jurm hai izhaar-e-kamaal chup raho chup ki yahaan naam-o-nasab kuchh bhi nahin meri takhrib se yaaron kaa bhalaa kyaa hogaa meri punji to ba-juz zauq-e-adab kuchh bhi nahin us taraf vaa hai dar-e-rahmat-e-yazdaan 'daanish' is taraf vusat-e-daamaan-e-talab kuchh bhi nahin"

"jo le ke un ki tamannaa ke khvaab niklegaa ba-ijz-o-shauq ba-haal-e-kharaab niklegaa jo rang baanT ke jaataa hai tinke tinke ko adu zamin kaa yahi aaftaab niklegaa bhari hui hai kai din se dhund galiyon mein na jaane shahr se kab ye azaab niklegaa jo de rahe ho zamin ko vahi zamin degi babul boe to kaise gulaab niklegaa abhi to subh hui hai shab-e-tamannaa ki baheinge ashk to aankhon se khvaab niklegaa mire gunaah bahut hain magar taqaabul mein usi kaa lutf-o-karam be-hisaab niklegaa milaa kisi ko na 'daanish' kuchh aarzu ke khilaaf pas-e-fanaa bhi yahi intikhaab niklegaa"

"kal raat kuchh ajiib samaan gham-kade mein thaa main jis ko DhunDhtaa thaa mire aaine mein thaa jis ki nigaah mein thiin sitaaron ki manzilein vo mir-e-kaaenaat usi qaafile mein thaa rahgir sun rahe the ye kis jashn-e-nau kaa shor kal raat meraa zikr ye kis silsile mein thaa raqsaan the rind jaise bhanvar mein shafaq ke phuul jo paanv paD rahaa thaa baDe qaaede mein thaa chhiDkaa jise 'adam ke samundar pe aap ne sahraa tamaam khaak ke us bulbule mein thaa mannat-guzaar-e-ahl-e-havas ho sakaa na dil haail miraa zamir mire raaste mein thaa hai farz is ataa-e-junun kaa bhi shukriya lekin ye be-shumaar karam kis sile mein thaa ab aa ke kah rahe ho ki rusvaai se Daro ye baal to kabhi kaa mire aaine mein thaa suntaa huun sar-nigun the farishte mire huzur main jaane apni zaat ke kis marhale mein thaa hain sabt mere dil pe zamaane ki Thokarein main ek sang-e-raah thaa jis raaste mein thaa kuchh bhi na thaa azal mein ba-juz shoala-e-vajud haan duur tak 'adam kaa dhuaan haashiye mein thaa main ne jo apnaa naam pukaaraa to hans paDaa ye mujh saa kaun shakhs mire raaste mein thaa thi nuqta-e-nigaah tak aazaadi-e-amal parkaar ki tarah main ravaan daaere mein thaa zanjir ki sadaa thi na mauj-e-shamim-e-zulf ye kyaa tilism un ke mire faasle mein thaa ab ruuh e'tiraaf-e-badan se hai munharif ik ye bhi sang-e-mil mire raaste mein thaa 'daanish' kai nasheb-e-nazar se guzar gae har rind aaine ki tarah mai-kade mein thaa"

"apne be-nur charaaghon ko ziyaa di jaae na ki hamsaae ki qindil bujhaa di jaae subh-e-kaazib hai koi mil ke sadaa di jaae ye siyah dhuup ki divaar giraa di jaae naghma-o-nai se ubhaarein koi tasvir-e-junun jis mein sho'lon ki lapak ho vo sadaa di jaae raaz-e-gham majlis-e-ahbaab ki tafrih nahin aaina-khaane mein kyon sham' jalaa di jaae raaste qaafile vaalon ki nazar mein hain tamaam dhuul se laakh bagulon ko havaa di jaae shukriya tu miri fitrat hai magar saae to hon dasht se dhuup ki jaajim to uThaa di jaae jis kaa muddat se hai shishe ke makaanon mein rivaaj ham pe us 'ishq ki tohmat na lagaa di jaae yuun bhi hotaa hai kahin jaur-e-bahaaraan kaa 'ilaaj phuul ki shakl bhi kaanTe se milaa di jaae jin ke ash'aar se ho garm javaanon kaa lahu kyon musalsal unhein faaqon ki sazaa di jaae daar-o-zindaan kaa to ik shor bapaa hai lekin koi jiine ki to tadbir bataa di jaae har ufuq se miri aavaaz palaT aati hai kis dariche se unhein jaa ke sadaa di jaae ek afsaana hai haathon se garebaanon tak baat bahron ko sunaa kar na ganvaa di jaae ik musavvir ne jo saunpi thi amaanat ki tarah baa'z kahte hain vo tasvir miTaa di jaae jin ko be-vaqt muraa'aat ne bakhshaa hai junun un pe kuchh qaid-e-sharaafat bhi lagaa di jaae inqilaabaat hain khud apne usulon kaa javaaz ab ke aaiin mein ye shiq bhi baDhaa di jaae jis ki tahzib musalmaan se sanbhaali na gai phir usi ku-e-tajalli mein sadaa di jaae qabr ke chaukhTe khaali hain unhein mat bhulo jaane kab kaun si tasvir lagaa di jaae farz hai us pe mohammad ki ghulaami 'daanish' jis ki tahvil mein makhluq-e-khudaa di jaae"

"justuju rahrav-e-ulfat ki jo kaamil ho jaae shauq-e-manzil hi charaagh-e-rah-e-manzil ho jaae haae ye josh-e-tamannaa ye nigun-saari-e-ishq vo jo aise mein chale aaein to mushkil ho jaae justuju shart hai manzil nahin mashrut-e-talab gum ho is tarah ki gard-e-rah-e-manzil ho jaae vasl kaa khvaab kujaa lazzat-e-didaar kujaa hai ghanimat jo tiraa dard bhi haasil ho jaae zabt bhi sabr bhi imkaan mein sab kuchh hai magar pahle kambakht miraa dil to miraa dil ho jaae aah us aashiq-e-naashaad kaa jiinaa ai dost jis ko marnaa bhi tire ishq mein mushkil ho jaae kaamraan hai vo mohabbat jo bane ruh-e-gudaaz dard-e-dil had se guzar jaae to khud dil ho jaae mahfil-e-dost mein chaltaa to huun ai dida-e-shauq ishq kaa raaz na afsana-e-mahfil ho jaae qaabil-e-rashk bane zindagi-e-ishq us ki jis ki tu zindagi-e-ishq kaa haasil ho jaae apne 'ehsaan' ko tu hi koi tadbir bataa jis se ye nang-e-mohabbat tire qaabil ho jaae"

"rindaan-e-tishna-kaam ko jaa kar khabar karein aai bahaar abr-e-karam par nazar karein huun munfail zarur magar ai gunaah-e-ishq ab ashk bhi nahin hain jo daaman ko tar karein be-vajh kab hai pursish-e-haal-e-shab-e-firaaq maqsad ye hai izaafa-e-dard-e-jigar karein fursat ke din hain saaqi-e-mai-kash-navaaz uTh kyuun intizaar-e-mausam-e-divaana-gar karein mujh par uThaa rahe hain jo mahfil mein ungliyaan apni haqiqaton pe to aakhir nazar karein kaabe mein khaamoshi hai sanam-khaane mein sukut surat-parast ab tire sajda kidhar karein uf re jamaal-e-jalva-e-jaanaan ki taabishein dekhein unhein ki maatam-e-taab-e-nazar karein auraaq-e-do-jahaan pe bhi hogaa na ikhtitaam 'ehsaan' sarguzasht-e-alam mukhtasar karein"

"mausam se rang-o-bu hain khafaa dekhte chalo ye kyaa chali chaman mein havaa dekhte chalo ambaar har taraf hain andheron ke ye durust shaayad nahin ho aab-e-baqaa dekhte chalo taskin-e-sumbul-o-gul-o-laala ke vaaste kyaa de rahi hai baad-e-sabaa dekhte chalo jitne the jaan-nisaar-e-chaman baad-e-subh-e-nau kuchh ajr bhi kisi ko milaa dekhte chalo asnaam-e-zar ke paanv mein Daale hue jabin kitne hain bandagaan-e-khudaa dekhte chalo kis kis kaa e'timaad-e-vafaa ho gayaa shikast kis kis ko husn se hai gilaa dekhte chalo 'daanish' ko zid hai dair o haram bhi sahi magar kis ko milaa hai in kaa pataa dekhte chalo"

"kahaan mahfil mein mujh tak baada-e-gulfaam aataa hai jo meraa naam aataa hai to khaali jaam aataa hai na aao tum to phir kyuun hichkiyon par hichkiyaan aaein inhein roko ye kyuun paighaam par paighaam aataa hai ye saavan ye ghaTaa ye bijliyaan ye TuTti raatein bhalaa aise mein dil vaalon ko kab aaraam aataa hai adab ai jazba-e-bebaak ye aah-o-fughaan kaisi ki aisi zindagi se maut par ilzaam aataa hai madad ai marg-e-naakaami naqaahat kaa ye aalam hai baDi mushkil se honTon tak kisi kaa naam aataa hai khudaa rakkhe tujhe ai sar-zamin-e-shahr-e-khaamoshaan yahin aa kar har ik bechain ko aaraam aataa hai maaaz-allaah miri aankhon kaa izhaar-e-tang-zarfi Tapak paDte hain aansu jab tumhaaraa naam aataa hai zamaane mein nahin dil-daada-e-mehr-o-vafaa koi tujhe dhokaa hai ai dil kaun kis ke kaam aataa hai"

"kabhi kabhi jo vo ghurbat-kade mein aae hain mire bahe hue aansu jabin pe laae hain na sarguzisht-e-safar puchh mukhtasar ye hai ki apne naqsh-e-qadam ham ne khud miTaae hain nazar na toD saki aansuon ki chilman ko vo roz agarche mire aaine mein aae hain us ek shama se utre hain baam-o-dar ke libaas us ek lau ne baDe phul-ban jalaae hain ye dopahar ye zamin par lipaa huaa suraj kahin darakht na divaar-o-dar ke saae hain kali kali mein hai dharti ke duudh ki khushbu tamaam phuul usi ek maan ke jaae hain nazar khalaaon pe aur intizaar be-vaada ba-in amal bhi vo aankhon mein jhilmilaae hain fusun-e-sher se ham us mah-e-gurezaan ko khalaaon se sar-e-kaaghaz utaar laae hain risaala haath se rakhte na kyuun vo sharmaa kar ghazal paDhi hai to ham saamne bhi aae hain chale hain khair se un ko pukaarne 'daanish' magar vo yuun to na aaeinge aur na aae hain"

"uTThaa huun ik hujum-e-tamannaa liye hue duniyaa se jaa rahaa huun main duniyaa liye hue muddat se garche jalva-gah-e-tur se khamosh aankhein hain ab bhi zauq-e-tamaashaa liye hue duniyaa-e-aarzu se kinaara to kar ke dekh duniyaa khaDi hai daulat-e-duniyaa liye hue roz-e-azal se ishq hai naakaam-e-aarzu dil hai magar hujum-e-tamannaa liye hue ai kam-nigaah dida-e-dil se nigaah kar har zarra hai haqiqat-e-sahraa liye hue hasti ki subh kaun si mahfil kaa hai maaal aankhein khuli hain hasrat-e-jalva liye hue din-bhar miri nazar mein hai vo yusuf-e-bahaar aati hai raat khvaab-e-zulekhaa liye hue dil phir chalaa hai le ke tire aastaan ki samt apni shikastagi kaa sahaaraa liye hue vo din kahaan ki thi mujhe jiine ki aarzu phirtaa huun ab to dil kaa janaazaa liye hue"

"jalaa hai haae kis jaan-e-chaman ki sham-e-mahfil se mahak phulon ki aati hai sharaar-e-aatish-e-dil se ye daamaan-e-havaadis se qayaamat tak na gul hogaa charaagh-e-dil miraa raushan hai un ki sham-e-mahfil se janaab-e-khizr ham ko khaak raste par lagaaeinge ki manzil be-khudon ki hai muarra qaid-e-manzil se Thahar bhi ai khayaal-e-hashr aur ik jaam piine de saraktaa hai abhi zulmat kaa parda khaana-e-dil se sahar ne le ke angDaai tilism-e-naaz-shab toDaa falak par husn ki shamein uThin taaron ki mahfil se baDhaa hai kaun ye girdaab ki khuraak hone ko ki uTThaa shor-e-maatam yak-ba-yak amboh-e-saahil se miri baalin se uTh kar rone vaalo ye bhi sochaa hai chalaa huun kis ki mahfil mein uThaa huun kis ki mahfil se hai us kambakht ko zid soz-e-baatin se pighal jaaun nigaahon ne tumhaari kah diyaa hai kyaa mire dil se na daaman-gir-e-dil ho naa-khudaa phir koi nazzaara khudaa ke vaaste kashti baDhaa aaghosh-e-saahil se sipurd-e-be-khudi kar de faraaez aql-e-khud-bin ke haTaa de is siyah-baatin kaa pahraa khaana-e-dil se har ik zarra hai dil ai jaane vaale dekh kar chalnaa hazaaron hastiyaan lipTi paDi hain khaak-e-manzil se miri bebaak nazrein un ki jaanib uTh hi jaati hain abhi 'ehsaan' main vaaqif nahin aadaab-e-mahfil se"

"karte karte imtizaaj-e-kaaba-o-but-khaana ham us jagah pahunche ki ho kar rah gae divaana ham saans le sakte nahin afsos aazaadaana ham jaane kab se hain asir-e-kaaba-o-but-khaana ham vo mohabbat hi nahin jis mein na hon shikve-gile ik kahaani tum sunaae jaao ik afsaana ham der-paa nikli na faanus-e-khirad ki raushni baDh gai vahshat bil-aakhir ho gae divaana ham har do-jaanib ehtiyaat achchhi hai jab tak ho sake yuun to main aagaah sab tum shama ho parvaana ham ab haqiqat kyaa kahein kis se kahein kyuun kar kahein kuchh to dekhaa hai ki jis se ho gae divaana ham daaman-e-dil shabnam-o-gul se pakaD letaa hai aag khilqatan ham hain javaab-e-fitrat-e-parvaana ham paasbaan mafhum-o-maani ko bayaan karte rahein sunne vaale sun chuke hain kah chuke afsaane ham aa chukaa hogaa sar-e-tur-e-vafaa muusaa ko hosh ab tujhe taklif deinge jalva-e-jaanaana ham jite-ji ki anjuman hai jite-ji kaa soz-o-saaz ho gaiin jis vaqt band aankhein na phir duniyaa na ham ham jo miT jaaein to farq-e-dair-o-kaaba bhi miTe ek parda hain miyaan-e-kaaba-e-but-khaana ham iltijaa hi iltijaa baaqi hai shikva ho chuke ab mohabbat tum se karte hain parastaaraana ham jab vo karte hain mohabbat par musalsal guftugu aisaa kuchh mahsus hotaa hai ki hain begaana ham"

"mire miTaane ki tadbir thi hijaab na thaa vagarna kaun se din husn be-naqaab na thaa agarche naazkash-e-esaaghar-e-sharaab na thaa khumaar-khaane mein mujh saa koi kharaab na thaa khulaa tilism-e-tamannaa to khul gayaa ye bhi ki ik fareb-e-nazar thaa tiraa shabaab na thaa khayaal-e-dost tiri jalva-taabiyon ki qasam jo tu na thaa miri duniyaa mein aaftaab na thaa tire firaaq ki raatein thiin is qadar maghmum ki daagh-e-khaatir-e-mahzun thaa maahtaab na thaa buraa ho naala-e-paiham kaa kuchh dinon pahle khamosh raat ke dil mein ye pech-o-taab na thaa nigaah milte hi ghash khaa ke gir paDin nazrein thi ek barq-e-mushakkal tiraa shabaab na thaa azal ke din se hain ham mast-e-jalva-e-saaqi hamaare saamne kis roz aaftaab na thaa kuchh apne saaz-e-nafas ki na qadr ki tu ne ki is rabaab se behtar koi rabaab na thaa dil-e-kharaab kaa 'ehsaan' ab khudaa-haafiz kharaab thaa magar aisaa kabhi kharaab na thaa"

"main avaam mein huun lekin nahin khu-e-aamiyaana na amal khushaamdaana na sukhan khushaamdaana tiri aur zindagi hai miri aur zindagi hai main bulandiyon kaa juuyaa to asir-e-aashiyaana mujhe raas hi na aai kabhi naa-qishon ki sohbat mire jism-e-naa-tavaan mein nahin ruh-e-taajiraana mire khizr ke qadam hain mujhe mashal-e-manaazil mire dida-e-talab mein hai nigaah-e-mujrimaana gham-o-ranj kaa chhupaanaa bhi hai kaar-e-zarf lekin hai khushi ko zabt karnaa rah-o-rasm-e-aaqilaana tiri tamkanat agar hai kisi dusre ke bal par ye chalan hai baaghiyaana ye qadam hai mujrimaana mujhe khizr-e-nau ki haajat nahin raah-e-bandagi mein mire maslak-e-vafaa mein ye ravish hai kaafiraana"

"agar mohabbat ke muddai ho to ye ravayya ravaa nahin hai jo shikva hai ru-ba-ru nahin hai jo baat hai barmalaa nahin hai ye roz-e-tajdid-e-ahd-e-ulfat ye roz paimaan-e-dil-navaazi hazaar taslim kar rahaa huun magar yaqin-e-vafaa nahin hai hai tere kaafir-shabaab se khuub meri maasum mai-gusaari surur ki ek had hai qaaem ghurur ki intihaa nahin hai ajab nahin zahmat-e-vafaa se mujhe kisi din najaat de de yahi miri be-zabaan mohabbat jo dar-khur-e-e'tinaa nahin hai na jaane kis kis se dil lagaa kar vafaa se maayus ho chukaa huun nazar pareshaan-e-shash-jihat hai koi bhi dard-aashnaa nahin hai jataa ke majburi-e-mohabbat umid-e-mehr-o-vafaa ke maani main khud huun apnaa sukun-e-dushman kisi ki koi khataa nahin hai bajaa bajaa be-shumaar aariz nazar nazar ko taras rahe hain magar ye dil kaa moaamla hai nigaah kaa vaasta nahin hai"

"bichhaD kar un se yuun gham mein guzaari zindagi ham ne sahar taarik dekhi surkh paai chaandni ham ne hamein daavaa nahin tanhaa nibaahi dosti ham ne mohabbat ko sambhaalaa hai kabhi tum ne kabhi ham ne khushi gham mein nazar aai khushi mein gham nazar aayaa abhi duniyaa pe Daali thi nigaah-e-sarsari ham ne baDi bechaargi nikli bahut hi naarasi paai azal ke roz baDh kar le to li thi bandagi ham ne jahaan saaz-e-mohabbat par mughanni gaa nahin saktaa vahaan naghma alaapaa hai kabhi tum ne kabhi ham ne tumhein hoge nigaah-e-shauq kaa markaz tumhin hoge agar is zindagi ke baad paai zindagi ham ne hamaare saamne har-vaqt anjaam-e-shikaayat thi kahi ko an-kahi kar di suni ko an-suni ham ne bharegi is mein rang 'ehsaan' duniyaa inqilaabon se lahu se apne ik tasvir aisi khinch diin ham ne"

"ishq har-chand masaaib se pareshaan na huaa na huaa husn magar taaba-e-farmaan na huaa laakh duniyaa ne ye chaahaa ki pareshaan ho magar main tire gham ki hifaazat mein pareshaan na huaa dil ki aavaaz ho mahrum-e-asar kyaa maani ishq kaafir hai agar husn musalmaan na huaa darpai uqda-e-hasti hai azal hi se bashar lekin ik khaak ke zarre kaa bhi irfaan na huaa dil mein har khuun kaa qatra hai talaatum ba-kanaar jo magar aankh se Tapkaa vahi tufaan na huaa to vo aazaad ki be-vajh hai mujh se bhi gurez main vo majbur ki dushman se bhi naalaan na huaa apni paighaam-navaai ke nataaej mein mujhe fikr-e-zindaan to rahaa hai gham-e-zindaan na huaa jis ke mashrab mein mohabbat ho mohabbat kaa javaab meri taqdir mein aisaa koi insaan na huaa ek hi jalve se 'ehsaan' nazar haT na saki mujh se kuchh us ke sivaa kaar-e-numaayaan na huaa"