Ghazal

"istaada hai jab saamne divaar kahun kyaa haasil bhi nahin rauzan-e-darkaar kahun kyaa lagtaa to hai kuchh diid ko naa-did ke pichhe khultaa nahin manzar koi us paar kahun kyaa huun tang zaraa jeb se ai hasrat-e-ashyaa shaamil to hai fahrist mein baazaar kahun kyaa jis baat ke inkaar kaa had-darja gumaan hai vo baat yaqin ke liye sau baar kahun kyaa main un ke javaabaat se aur ahl-e-zamaana hain mere savaalaat se bezaar kahun kyaa jis baat pe thi bahs hui bahs se khaarij ab rah gai aapas mein hai takraar kahun kyaa ham-saae ki ham-saae se pahchaan nahin hai paivast hai divaar mein divaar kahun kyaa ghaafil nahin aisaa bhi main ab apni rasad se is dil mein talab kaa hai jo ambaar kahun kyaa gulzaar saa khil uThtaa hai khushbu-e-sukhan se jaadu hai vo is kaa dam-e-guftaar kahun kyaa hai rang badan kaa lughat-e-rang mein naapaid laa-saani hai qaamat mein qad-e-yaar kahun kyaa"

"tham gai vaqt ki raftaar tire kuche mein aise saabit huaa sayyaar tire kuche mein manzar-e-baam sar-e-did nahin khultaa hai kuchh hai naa-dida kaa asraar tire kuche mein har talabgaar ko hai haasil-e-guftaar-e-sukut na hai inkaar na iqraar tire kuche mein aaina shaam kaa raushan rukh-e-mahtaab se kar aks chamke to ho didaar tire kuche mein vaslat-e-kaar baham ho ki hain jama din raat pesha-e-hijr ke be car tire kuche mein nafaa ke khel mein samjhaa gayaa thaa taaq jise vo khasaare mein hai hoshyaar tire kuche mein aakhir-e-umr ne ki raunaq-e-baazaar tamaam na dukaan hai na kharidaar tire kuche mein ek muddat se hai tartib mein be-tartibi na durusti ke hain aasaar tire kuche mein"

"usi jannat jahannam mein marungaa gae mausam ko aavaazein na dungaa nae jismon se maqtal jaagte hain nae logon ke raste par chalungaa miri aankhein salaamat hain to phir main paraae khvaab le kar kyaa karungaa lahu ki surkhiyaan mere alam hain khizaan ke zard lashkar se laDungaa kisi khitte mein qatl-e-raushni ho main apne shahr par nauha kahungaa aur us par jo sitam TuTegaa us ko tumhaare naam likkhungaa sahungaa"

"phailaa ajab ghubaar hai aaina-gaah mein mushkil hai khud ko DhunDhnaa aks-e-tabaah mein jal-bujh chukaa hai khvaahish-e-naakaam se vajud parchhaain phir rahi hai makaan-e-siyaah mein main vo ajal-nasib ki qaatil huun apnaa-aap hotaa huun roz qatl kisi qatl-gaah mein rakkhaa gayaa huun izzat-o-tauqir kaa asiir baandhaa gayaa hai sar ko ghurur-e-kulaah mein halkaan mein nahin tiri khaatir sar-e-hujum sab mar rahe hain hasrat-e-yak-do-nigaah mein"

"ham tum jab bhi pyaar kareinge jaan-o-dil sadqe honge ruhon ki khushbu mein hongi baahon ke gajre honge peshravo tum biit chuke ab ham logon ki baari hai zindaanon ke dar to vaa hon ham aage aage honge gumnaami ki galiyon mein taarikh kahaan tak pahunchegi ek tumhi suqraat nahin ho aur bahut guzre honge husn agar zanjir kiyaa hai ishq bhi phir zanjir karo varna baat bahut phailegi duur talak charche honge ai chakvaal se aane vaalo kuchh to haal-ahvaal kaho phuul se aariz chaand se chehre tum ne bhi dekhe honge"

"pechaak-e-umr apne sanvaar aaine ke saath baaqi ke chaar din bhi guzaar aaine ke saath haasid bahut hai pal mein huvaidaa kare khizaan itnaa na lag ke baiTh bahaar aaine ke saath pathraa gae hain log tajalli se husn ki thoDaa saa Daal rukh pe ghubaar aaine ke saath kartaa hai aks zer-o-zabar naa-muraad vaqt jab ghumtaa hai ulTe madaar aaine ke saath paayaa na kuchh khalaa ke sivaa aks-e-hairati guzraa thaa aar-paar hazaar aaine ke saath maadum ho rahe hain khad-o-khaal kis sabab guft-o-shunid kar mire yaar aaine ke saath viraan saa khanDar hai magar sair ke liye lagti hai ik tavil qataar aaine ke saath maakus o aks kaise hain paivast dekh tu aaina kar rahaa hai singhaar aaine ke saath"

"DhunDhtaa huun roz-o-shab kaun se jahaan mein hai ik makaan ki raushan saa basti-e-gumaan mein hai sust-rau musaafir ki qismaton pe kyaa ronaa tez chalne vaalaa bhi dasht-e-be-amaan mein hai khush bahut na ho sun kar saahilon kaa aavaaza ik fasil paani ki aur darmiyaan mein hai lauTne nahin detaa ye tilism raston kaa jaantaa huun main varna sukh bahut makaan mein hai raaz kuchh nahin khultaa is ajab nagar kaa yaan suud mein na thaa din bhi raat bhi ziyaan mein hai dekhtaa nahin hai kyaa saat aasmaan vaalaa kaun dhuup ke andar kaun saaebaan mein hai"

"surat-e-sahar jaaun aur dar-ba-dar jaaun ab to faisla Thahraa raat se guzar jaaun vaahimon ke zindaan kaa zehn zehn qaidi hai bol fikr-e-taabinda main kidhar kidhar jaaun meri naa-rasaai se qaafila na ruk jaae main ki paa-shikasta huun raaste mein mar jaaun ishq ki sadaaqat par jabki meraa imaan hai kaise khud-kushi kar luun kyuun bikhar bikhar jaaun"

"jo qissa-go ne sunaayaa vahi sunaa gayaa hai agar thaa is se sivaa to nahin kahaa gayaa hai musaafirat kaa hunar hai na vaapsi ki khabar so chal rahaa huun jidhar bhi ye raastaa gayaa hai amaan ko niil mayassar na main koi muusaa mujhe supurd-e-faraain kar diyaa gayaa hai sabab nahin thaa zamin par utaarne kaa mujhe sabab baghair hi vaapas uThaa liyaa gayaa hai ye muntahaa hai miri naa-rasaai kaa shaayad jo duur hadd-e-nazar se pare khalaa gayaa hai mahak uThe hain mire baagh ke khas-o-khaashaak koi Tahaltaa huaa surat-e-sabaa gayaa hai"

"aks ubhraa na thaa aaina-e-dil-daari kaa hijr ne khinch diyaa daaera zangaari kaa naaz kartaa thaa tavaalat pe ki vaqt-e-rukhsat bhed saae pe khulaa shaam ki ayyaari kaa jis qadar kharch kiye saans hui arzaani nirkh girtaa gayaa rasm-o-rah-e-baazaari kaa raat ne khvaab se vaabasta rifaaqat ke evaz raasta band rakhaa din ki numudaari kaa aisaa viraan huaa hai ki khizaan roti hai kal bahut shor thaa jis baagh mein gul-kaari kaa be-sabab jamaa to kartaa nahin tiir o tarkash kuchh hadaf hogaa zamaane ki sitamgaari kaa paa-ba-zanjir kiyaa thaa mujhe aasaani ne marhala ho na sakaa tai kabhi dushvaari kaa mutmain dil hai ajab bhiiD se gham-khvaaron ki silsila tuul pakaD le na ye bimaari kaa"

"yahin thaa baiThaa huaa darmiyaan kahaan gayaa main ki mil rahaa nahin apnaa nishaan kahaan gayaa main na kar rahaa hai fulaan ko fulaan khabar meri na puchhtaa hai fulaan se fulaan kahaan gayaa main nishaan miltaa hai haazir mein kab guzishta kaa bataa sakeinge na aaindagaan kahaan gayaa main saje hue hain piyaada o asp o fiil tamaam bichhi hui hai bisaat-e-jahaan kahaan gayaa main main kab nahin thaa akaarat magar rahaa haazir huaa huun ab ke ajab raaegaan kahaan gayaa main jise yaqin thaa har suud mein khasaare kaa thaa apne-aap mein sharh-e-ziyaan kahaan gayaa main agar thaa pahle hi naam-o-nishaan miraa mafqud to ho ke baar-e-digar be-nishaan kahaan gayaa main na bhejtaa hai koi naama-e-firaaq mujhe na DhunDhtaa hai pata khat-rasaan kahaan gayaa main jo kar rahaa thaa guzishta ke vaaqiaat durust sunaa rahaa thaa ulaT daastaan kahaan gayaa main liyaa gayaa huun hiraasat mein be-amaani ki ki be-amaan thaa shahr-e-amaan kahaan gayaa main uThaa ke le gayaa daarogha-e-fanaa shaayad khulaa huaa hai dar-e-khaak-daan kahaan gayaa main bujhi nahin mire aatish-kade ki aag abhi uThaa nahin hai badan se dhuaan kahaan gayaa main nahin huaa huun magar is tarah kabhi ghaaeb rahaa hamesha nihaan dar-ayaan kahaan gayaa main"

"ye ghumtaa huaa aaina apnaa Thahraa ke zaraa dikhaa miraa rafta tu charkh palTaa ke hai kaaenaat muamma judaa tariqe kaa faqat sulajhtaa hai aapas mein girhein uljhaa ke natija ek saa niklaa dimaagh aur dil kaa ki donon haar gae imtihaan mein duniyaa ke musaafiron se rahaa hai vo raastaa aabaad palaT ke aae nahin jis se pesh-rau jaa ke ye hijr-zaad samajhtaa hai kam visaal ki baat bataa jo ramz-o-kinaaya hain khuub phailaa ke ki band rahtaa hai shahr-e-talab kaa darvaaza yaqin aayaa mujhe baar baar jaa aa ke khafif ho ke main chehre ko pher letaa huun agar guzartaa hai tujh aashnaa saa katraa ke javaab meraa ghalat thaa savaal us kaa durust khulaa ye mujh pe kisi naa-samajh ko samjhaa ke"

"khaashaak se khizaan mein rahaa naam baagh kaa varna to har darakht pe qabza hai zaagh kaa hairat hai sab talaash pe us ki rahe musir paayaa gayaa suraagh na jis be-suraagh kaa hai irtikaaz-e-zaat mein vaqfa zaraa si der TuuTaa nahin hai raabta lau se charaagh kaa kab kis pe mehrbaan ho aur kab ulaT paDe kis ko yahaan pataa hai kisi ke dimaagh kaa hotaa hai phir vo aur kisi yaad ke supurd rakhtaa huun jo sambhaal ke lamha faraagh kaa mashq-e-sukhan mein dil bhi hamesha se hai sharik lekin hai is mein kaam ziyaada dimaagh kaa"

"itnaa tilism yaad ke chaqmaaq mein rahaa raushan charaagh duur kisi taaq mein rahaa makhfi bhi thaa visaal kaa vo baab-e-mukhtasar kuchh dil bhi mahv hijr ke asbaaq mein rahaa sahraa ke ishtiraak pe raazi the sab fariq mahmil kaa jo fasaad thaa ushshaaq mein rahaa mafqud ho gayaa hai siyaaq-o-sabaaq se jo harf-e-umr saikaDon auraaq mein rahaa main thaa ki jis ke vaaste paaband ahd-e-hijr vo aur ek hijr ke misaaq mein rahaa atvaar us ke dekh ke aataa nahin yaqin insaan sunaa gayaa hai ki aafaaq mein rahaa khufta the daaein baaein kai maar-e-aastin zahraab kaa asar mire tiryaaq mein rahaa taarikh ne pasand kiyaa bhi kisi sabab yaa bas ki shaah-e-vaqt thaa auraaq mein rahaa"

"rah rahe hain makin shabon ke kyaa hue Dher surajon ke aankh mein khvaab munjamid hain rang barsaao hauslon ke khuun se tai kiye gae hain raaste zard mausamon ke maqtalon se uThaae main ne phuul se jism doston ke ai zamin teri azmaton mein bah gae shahr vaahimon ke"

"kise khayaal thaa aisi bhi saaatein hongi ki mere naam se bhi tujh ko vahshatein hongi sazaa-e-marg ki surat visaal guzraa thaa bichhaD gae hain to kyaa kyaa qayaamatein hongi judaaiyon mein zamaane ne kyaa suluk kiyaa kabhi dobaara mile to hikaayatein hongi khushaa ki apni vafaa faaslon ki nazr hui hamaare baad zamin par rifaaqatein hongi ujaD gayaa huun magar hausle salaamat hain ki ek din tujhe shaayad nadaamatein hongi"

"nahin shauq-e-kharidaari mein dauDe jaa rahaa hai ye gaahak sair-e-baazaari mein dauDe jaa rahaa hai mayassar kuchh nahin hai khel mein laa-haasili ke yunhi be-kaar bekaari mein dauDe jaa rahaa hai uThaae phir rahaa hai kotvaal-e-umr chaabuk badan majbur laachaari mein dauDe jaa rahaa hai khaDi hai manfaat hairaan baahar daaere se ziyaan apni ziyaan-kaari mein dauDe jaa rahaa hai Thaharnaa bhi kahaan hai sahl in sayyaargaan ko na saabit se hi sayyaari mein dauDe jaa rahaa hai utaaraa khvaahishon kaa hai izaafi bojh sar se to aasaani se dushvaari mein dauDe jaa rahaa hai nahin himmat ki jis mein ho zamaane ke muqaabil vo apne ghar ki rahdaari mein dauDe jaa rahaa hai nahin miltaa magar rauzan ki nikle 'aks baahar pas-e-aaina-zangaari mein dauDe jaa rahaa hai sameTaa jhuuT ki parkaar ne hai pesh-o-pas ko ki ab har sach riyaa-kaari mein dauDe jaa rahaa hai khabar hai rut badalne ki agar rashk-e-sabaa vo khiraam-andaaz gulzaari mein dauDe jaa rahaa hai"

"galiyon mein bhaTaknaa rah-e-aalaam mein rahnaa yaan sab ko hai naakaami-e-yak-gaam mein rahnaa pahle to bikhar jaanaa guzargaahon ke hamraah phir hasrat-e-divaar-o-dar-o-baam mein rahnaa baaghaat mein phirnaa khas-o-khaashaak pahan kar har silsila-e-sabz ke anjaam mein rahnaa har saans mein ghulnaa tiri dahliz ki khushbu har aankh kaa duuri ke siyah daam mein rahnaa aavaaz na aanaa kisi aabaad makaan se har haath kaa yaan dastak-e-naakaam mein rahnaa kuchh der mein khul jaaegaa basti kaa nasiba kuchh der hai aur sakhti-ayyaam mein rahnaa 'ejaaz' bahut din se hai shohrat kaa bulaavaa tum ho ki vahi qarya-e-gumnaam mein rahnaa"

"manzar-e-vaqt ki yaksaani mein baiThaa huaa huun raat din ek si viraani mein baiThaa huaa huun koi saamaan-e-safar hai na masaafat dar-pesh mutmain be-sar-o-saamaani mein baiThaa huaa huun kabhi naayaaft kaa hai to kabhi kam-yaaft kaa gham vajh-be-vajh pareshaani mein baiThaa huaa huun kaar-e-dushvaar hai aaghaaz se munkir jab tak kaar-e-be-kaar ki aasaani mein baiThaa huaa huun kal kahin rafta mein thaa haal ki hairat kaa asiir ab kisi fardaa ki hairaani mein baiThaa huaa huun khair ham-zaad miraa duur tamaashaai hai shar huun aur fitrat-e-insaani mein baiThaa huaa huun jism huun aur nafas Thahraa hai zaamin meraa saaat-e-umr ki nigraani mein baiThaa huaa huun ek baazaar-e-tilismaat hai jis ke andar jeb-e-khaali tiri arzaani mein baiThaa huaa huun reg-taa-reg huun phailaa huaa sahraa ki tarah aur saraabon ki faraavaani mein baiThaa huaa huun aisaa sannaaTaa hai aavaaz se haul aataa hai ik bayaabaan saa bayaabaani mein baiThaa huaa huun na main bilqis ki ho shahr-e-sabaa ki khvaahish na gham-e-takht-e-sulaimaani mein baiThaa huaa huun"

"qaafila utraa sahraa mein aur pesh vahi manzar aae raakh uDi khema-gaahon ki khuun mein luThDe sar aae galiyon mein ghamsaan kaa ran hai maarka dast-ba-dast hai yaan jise bhi khud par naaz bahut ho aangan se baahar aae ik aaseb saa lahraataa hai basti ki shah-raahon par shaam Dhale jo ghar se nikle lauT ke phir nahin ghar aae dinon mahinon aankhein roiin nai ruton ki khvaahish mein rut badli to sukhe patte dahlizon mein dar aae ek diyaa raushan rakhnaa divaar pe chaand sitaaron saa abr uThe baarish barse yaa havaaon kaa lashkar aae varna kis ne paar kiyaa thaa rasta bhari dopahron kaa kuchh ham se divaane the jo tai ye masaafat kar aae"

"mahmil hai matlub na lailaa maangtaa hai chaak-girebaan qais to sahraa maangtaa hai hijr sar-e-viraana-e-jaan bhi mohr-ba-lab vasl gali-kuchon mein charchaa maangtaa hai is aaina-khaane kaa har raqs-kunaan apne saamne apnaa tamaashaa maangtaa hai naa-ummidi laakh qafas ijaad kare taair-e-dil parvaaz-e-tamannaa maangtaa hai umr bitaataa hai imroz mein aur makin darvaaze par dastak-e-fardaa maangtaa hai dhuup javaani kaa yaaraana apni jagah thak jaataa hai jism to saaya maangtaa hai baandh sag-e-aavaara chaukhaT ke andar ek musaafir tujh se rastaa maangtaa hai log tavaalat se ghabraate hain varna ek zamaana sidhaa rastaa maangtaa hai"

"zaraa batlaa zamaan kyaa hai makaan ke us taraf kyaa hai agar ye sab gumaan hai to gumaan ke us taraf kyaa hai agar patthar se bikhre hain to aakhir ye chamak kaisi jo makhzan nuur kaa hai kahkashaan ke us taraf kyaa hai ye kyaa rasta hai aadam gaamzan hai kis masaafat mein nahin manzil to phir is kaarvaan ke us taraf kyaa hai ajab paataal hai darvaaza o divaar se aari zamin-andar-zamin be-nishaan ke us taraf kyaa hai tah-e-aab-e-ravaan suntaa huun ye sargoshiyaan kaisi sukunat kis ki hai aur aastaan ke us taraf kyaa hai samajhte aa rahe the jis khalaa ko shahr-e-gum-gashta vo shai kyaa hai khalaa-e-be-karaan ke us taraf kyaa hai nahin khultaa ki aakhir ye tilismaati tamaashaa saa zamin ke is taraf aur aasmaan ke us taraf kyaa hai"

"chal rahaa huun pesh-o-pas-manzar se uktaayaa huaa ek se din raat ke chakkar se uktaayaa huaa be-dili hoshyaar pahunchi mujh se pahle thi vahaan mein gayaa jis anjuman mein ghar se uktaayaa huaa ho nahin paayaa hai samjhauta kabhi donon ke biich jhuuT andar se hai sach baahar se uktaayaa huaa ab muzayyan hai talaffuz se avaamunnaas ke sher sarf-o-nahv ke chakkar se uktaayaa huaa khvaahish-e-ijaad hai apne maaani ki use lag rahaa ye feal hai masdar se uktaayaa huaa chubh rahe hain aankh mein khvaab-e-pareshaan raft ke jism hai is niind ke bistar se uktaayaa huaa umr lekin raaegaan ki us ke jamaa o kharch mein thaa hamesha zehn chize-zar se uktaayaa huaa aaj phir paDhtaa huun maktab mein nae ustaad se kal thaa jin asbaaq ke azbar se uktaayaa huaa zaat apni in mein rakhtaa huun baraabar munqasim dil miraa hai bahs-e-khair-o-shar se uktaayaa huaa"

"pesh-tar jumbish-e-lab baat se pahle kyaa thaa zehn mein sifr ki auqaat se pahle kyaa thaa vaslat o hijrat-e-ushshaaq mein kyaa thaa avval nafi thi baad to isbaat se pahle kyaa thaa koi gardish thi ki saakit the zamin o khurshid gumbad-e-vaqt mein din raat se pahle kyaa thaa main agar pahlaa tamaashaa thaa tamaashaa-gah mein mashghala us kaa miri zaat se pahle kyaa thaa kuchh vasila to rahaa hogaa shikam-seri kaa rizq-e-khufta ki nabaataat se pahle kyaa thaa main agar aadam-e-saani huun to virsa hai kahaan zarf-e-ajdaad mein amvaat se pahle kyaa thaa har mulaaqaat kaa anjaam judaai thaa agar phir ye hangaama mulaaqaat se pahle kyaa thaa main bhi maghlub thaa haajaat ki kasrat se magar lutf us ko bhi munaajaat se pahle kyaa thaa"