Ghazal

"baDh baDh ke bazm-e-naaz se saaghar uThaae jaa josh-e-junun mein aur zaraa laDkhaDaae jaa bahke na yuun qadam ki koi rind kah sake apni nigaah-e-naaz se mujh ko pilaae jaa baada-kashi ke baa'd huiin ne'matein tamaam naqsh-e-khayaal-e-khaam ko dil se miTaae jaa maayus ho gae hain jo is zindagi se aaj lutf-e-hayaat kaa unhein muzhda sunaae jaa tanhaaiyon ki bazm mein zinda-dili ke saath apne khayaal-o-khvaab ki duniyaa basaae jaa chhalke na dast-e-shauq se sahbaa-e-zindagi is ehtiyaat se mai-o-minaa lunDhaae jaa 'azm-o-yaqin ke saath sadaa bazm-e-naaz mein husn-e-sitam-shi’aar se daaman bachaae jaa miT jaaein zindagi ki sabhi talkhiyaan agar raqs-e-junun ke saath koi giit gaae jaa"

"baa'd muddat ke ye ehsaas huaa ho jaise dil ke sahraa mein koi phuul khilaa ho jaise khun-aashaami-o-barbaadi kaa baazaar hai garm har-su vahshat kaa nayaa baab khulaa ho jaise gardish-e-vaqt ne is tarh se angDaai li khvaab-e-vahshat se koi chaunk gayaa ho jaise ab to baaqi na rahaa mujrim-o-munsif kaa savaal ek hi saf mein har ik shakhs khaDaa ho jaise kaun batlaaegaa ab asl haqiqat kyaa hai chashm-e-binaa pe bhi parda saa paDaa ho jaise puchh mat mujh se miri haalat-e-dil ai 'bismil' dil ke zakhmon pe nayaa tiir chalaa ho jaise"

"kaarvaan aaj bhi sargarm-e-safar hai shaayad ab bhi pur-pech koi raahguzar hai shaayad mo'tarif vo bhi hain kal tak jo mukhaalif the mire ye miri kaavish-o-mehnat kaa samar hai shaayad log haathon mein uThaae hue patthar dauDe raaste mein kisi divaane kaa ghar hai shaayad maan se vaa'da thaa ki main lauT ke ghar aaungaa muntazir aaj bhi vo dida-e-tar hai shaayad log sahme hue baiThe hain makaan mein apne phir isi samt se tufaan kaa guzar hai shaayad mere qaatil ne mujhe dekh ke pahchaan liyaa ye to is daur kaa e’jaaz-e-nazar hai shaayad mal rahaa hai kaf-e-afsos baDi der se vo us ke TuuTe hue khvaabon kaa asar hai shaayad ab bhi har shai hai dhundalkon kaa labaada oDhe shaam-aagin miri duniyaa ki sahar hai shaayad nim-'bismil' saa mujhe kar gaiin jis ki nazrein vo koi aur nahin rashk-e-qamar hai shaayad"

"har hasin khvaab dam-e-subh bikharte dekhaa gesu-e-ranj-o-alam ko bhi sanvarte dekhaa husn-e-maghrur ko be-maut hi marte dekhaa ishq-e-majbur ko har dar se guzarte dekhaa qad baDhaane ke liye khabron mein aane ke liye husn-e-afkaar ke daaman ko kutarte dekhaa main ne aabaad hue dekhaa hai viraanon ko dil ki duniyaa ko kai baar bikharte dekhaa Dubtaa hai jahaan har roz chamaktaa dekhaa zulmat-e-shab mein vahin chaand ubharte dekhaa fasl-e-gul mein bhi hai ghunchon pe udaasi kaa samaan shaakh par kaanTon kaa bhi rang nikharte dekhaa fan ki dahliz pe is ahd ke fankaaron ko apni peshaani shab-o-roz ragaDte dekhaa"

"shagufta yaadon kaa mausam baDaa suhaanaa lage tumhein banaa luun main apnaa agar buraa na lage vo de na paaegaa meri mohabbaton kaa javaab use to meraa har ik lafz taaziyaana lage du'aa yahi hai mujhe bhuul jaao tum varna tumhein bhulaane mein mujh ko bahut zamaana lage qabaa gulon ki bahaaron mein chaak-chaak hai kyon havaa-e-sahn-e-chaman mujh ko baaghiyaana lage jalaaungaa main havaaon ki zad pe ab bhi diye ye 'azm chaahe zamaane ko khud-saraana lage sunaa chuke sabhi rudaad-e-gham unhein 'bismil' ab aisaa giit sunaao jo dil-baraana lage"

"mausam hai bahaaron kaa har ik zakhm haraa hai ehsaas-e-gham-e-soz-e-darun jaag uThaa hai baDh jaae na betaabi-e-dil sabr ki had se guzre hue lamhon ne tumhein yaad kiyaa hai badmast fazaaon mein bikharti hui khushbu ai dost ye shaayad tire aane kaa pataa hai ik tum se hi dil ko mire mil jaati hai Dhaaras varna yahaan har shakhs bahut mujh se khafaa hai apnon ne hi di hai mujhe har moD pe Thokar naazuk thaa miraa shisha-e-dil TuuT gayaa hai ab bhuul gayaa aariz-o-lab gesu-o-abru honTon kaa tabassum tire bas yaad rahaa hai sunte hain siyah-raaton mein luuTe gae sab log 'bismil' to magar din ke ujaale mein luTaa hai"

"jab bhi hui taamir-e-nasheman barq-e-tapaan tak baat gai aag lagi jab shaakh-e-chaman mein apne makaan tak baat gai zikr-e-lab-o-rukhsaar se aksar TuuT gayaa gulchin kaa bharam baat chali thi ghuncha-o-gul ki aur khizaan tak baat gai un ke gunaah-o-jurm-o-khataa par qad-aavar khaamosh rahe ham se zaraa si chuuk hui to khurd-o-kalaan tak baat gai kaisi vafaaein kaisaa vaada kis kis par ilzaam dharein zikr chhiDaa jab shahr-e-sitam kaa ku-e-butaan tak baat gai maah-rukhon mein charchaa thaa kal us ki jabin-e-raushan kaa arz-o-samaa se baahar nikli kaahkashaan tak baat gai"

"jab vo qurbaan ho gai hogi baat aasaan ho gai hogi aa gae honge jab vo mahfil mein sham' hairaan ho gai hogi tiir us chashm-e-naaz ke khaa kar maut aasaan ho gai hogi vo nigah kal jo hashr Dhaati thi ab nigahbaan ho gai hogi jab uThe honge mai-kade se ham bazm viraan ho gai hogi"

"zamaana de gayaa jo zakhm 'umr bhar ke liye 'ilaaj us kaa thaa dushvaar chaaraagar ke liye kare jo raah munavvar ye koi shart nahin diyaa zarur vo rakhtaa ho apne ghar ke liye jo ho sake to karo rahm khalq-e-baari par yahi hai zaad-e-safar aakhiri safar ke liye jinhein talaash hai manzil ki dhun ke pakke hain ruke raheinge bhalaa kab vo raahbar ke liye khataa mu'aaf jo karte hain zarf vaale hain zaraa saa shosha hi kaafi hai fitna-gar ke liye khulus-o-pyaar mohabbat karam ravaadaari shi'aar chaahiye har saahib-e-nazar ke liye shu’ur-o-fikr-o-nazar inkisaar aur tadbir bahut zaruri hai har ek chaaraagar ke liye"

"hamaare dard kaa darmaan kisi ko kyaa maa'lum hazaar zakhm hain pinhaan kisi ko kyaa maa'lum jise sajaayaa thaa dil ne baDe khulus ke saath chaman hai aaj vo viraan kisi ko kyaa maa'lum bahut dinon se nigaah-e-karam nahin uThti sitam hai yaa koi ehsaan kisi ko kyaa maa'lum khushi ke giit kabhi jis makaan mein gaae the banaa hai ab vahi zindaan kisi ko kyaa maa'lum guzar rahaa hai pur-aashob daur se 'bismil' hamaare daur kaa insaan kisi ko kyaa maa'lum"

"mushkil hai ab ye kaam tiri yaad ke baghair guzre jo subh-o-shaam tiri yaad ke baghair ab tak yahaan jo ziist ke lamhe guzar gae vo sab the tishna-kaam tiri yaad ke baghair likhne ko likh to duun main hikaayaat-e-zindagi hogi vo naa-tamaam tiri yaad ke baghair be-kaif-o-be-surur hai sahbaa-e-zindagi gardish mein go hai jaam tiri yaad ke baghair piine ko pi rahaa huun shab-o-roz khun-e-dil phir bhi huun tishna-kaam tiri yaad ke baghair"

"chaak har 'ahd mein zulmat ki ridaa ham se hui amn ki subh jahaan mein ba-khudaa ham se hui haq ko haq kahnaa agar jurm hamaaraa Thahraa ham ko taslim ki haan ye bhi khataa ham se hui jurm itnaa hai ki toDe hain buton ke paikar nafrat-aagin jo zamaane ki havaa ham se hui sar jhukaayaa hi nahin ham ne dar-e-haq ke sivaa is liye quvvat-e-baatil bhi khafaa ham se hui ham ne har dil mein jalaae hain sadaaqat ke diye kufr-o-zulmat mein bhi ye rasm adaa ham se hui ham ne hanste hue phulon pe sitam Dhaae hain aur is zulm ki ghammaaz sabaa ham se hui ye ulul-'azmi-o-haq-goi sadaa bebaaki zer-e-shamshir bhi ye rasm adaa ham se hui khaak aur khuun mein lipTi hui khaamosh zabaan shahr-e-bedaad mein bhi daad-rasaa ham se hui jab bhi khun-baar bahaarein yahaan aaiin 'bismil' fasl-e-gul raqs-kunaan jalva-numaa ham se hui"

"ranj-o-gham rah gayaa bebasi rah gai saath mere miri be-khudi rah gai un ke chashm-e-karam kaa asar dekhiye meri aankhon mein ab tak nami rah gai dekh kar un ke jalvon ki taabaaniyaan aankh meri khuli ki khuli rah gai mai-kade mein na mai hai na jaam-o-subu apne hisse mein tishna-labi rah gai kyon na ho meri aah-o-fughaan be-asar soz-e-gham mein kahin kuchh kami rah gai khud se milte hi 'bismil' hue gham ghalat dekh kar dam-ba-khud be-khudi rah gai"

"khaali hain jitne jaam vo bhar jaane dijiye tishna-labi kaa daur guzar jaane dijiye phir chheDiyegaa aap bhi vaa’da-shikan ki baat dil kaa har ek zakhm to bhar jaane dijiye us ki masaafaton ki huiin manzilein tamaam niklaa huaa hai subh kaa ghar jaane dijiye josh-e-junun mein shauq se patthar uThaaiye 'aql-o-khirad ko had se guzar jaane dijiye vaa'de pe jiite jiite hi 'umrein guzar gaiin tul-e-shab-e-firaaq kaa Dar jaane dijiye jis mein surur hai na haraarat na valvala behtar hai aise jiine se mar jaane dijiye zehnon pe ban ke bojh na rah jaae zindagi aankhon mein ban ke khvaab bikhar jaane dijiye yaadon ke saare zakhm na ho jaaein mundamil 'bismil' koi to zakhm ubhar jaane dijiye"

"fikr-o-nazar ki jang hai khud sar ke saamne ik sabz inqalaab hai patthar ke saamne dariyaa ubal paDaa hai samundar ke saamne shisha-garon ki bhiiD hai zar-gar ke saamne jhuTaa saa ek vaada-e-fardaa bhi hai bahut taskin ke liye dil-e-muztar ke saamne koi dalil koi na hujjat na hai javaaz us bad-qimaash khu-e-sitamgar ke saamne mausam ki dil-farebi ye kahti hai baar baar kam-tar hai un kaa husn bhi manzar ke saamne duniyaa kyon apne sar ko jhukaati hai aaj-kal kam-maaya bad-khisaal tavangar ke saamne 'bismil' na chheD ahl-e-duval ki bhi koi baat mujh jaise ik faqir qalandar ke saamne"

"jazba-e-shauq kam nahin hotaa un ke jaane kaa gham nahin hotaa saamnaa ho ke ho na paas-e-adab mujh se aisaa sitam nahin hotaa dil ne laakhon sahe hain ranj-o-alam phir bhi paaband-e-gham nahin hotaa kaise roti hain roz-o-shab aankhein un kaa daaman bhi nam nahin hotaa gardish-e-rozgaar ke haathon ranj-o-gham kuchh bhi kam nahin hotaa hain to khush-posh vaza-daar bahut har koi mohtaram nahin hotaa kaam lete hain vo bhi hikmat se jin mein jaah-o-hasham nahin hotaa"

"ab chaman mein ham-nafas aur ham-zabaan koi nahin ham-nashin koi nahin hai raazdaan koi nahin kis se haal-e-dil kahein kis ko sunaaein haal-e-zaar chaara-saaz-e-dard-e-dil-soz-e-nihaan koi nahin kal bhi main tanhaa rahaa huun aur tanhaa aaj bhi kal vahaan koi na thaa aur ab yahaan koi nahin fasl-e-gul aate hi uThti hai sadaa-e-zaagh o buum ghuncha-o-gul aur bulbul shaadmaan koi nahin nukta-chin mahfil ki raunaq ban gae hain aaj-kal bazm-e-yaaraan mein sitam hai nukta-daan koi nahin yuun to kahne ko sabhi the ham-safir-o-ham-khayaal ham-safar koi nahin ab ham-inaan koi nahin"

"bahr-e-ulfat kaa kahin koi kinaaraa hi nahin dasht-e-furqat kaa dil-afroz nazaaraa hi nahin ab na taDpaao mujhe chaaragari ki khaatir aa bhi jaao ki mujhe zabt kaa yaaraa hi nahin main ne paimaan-e-vafaa baandh liyaa hai us se jis ko ik lamha miraa saath gavaaraa hi nahin milte hi pher liin is tarah nigaahein sab ne aisaa lagtaa hai koi un mein hamaaraa hi nahin apni aashufta-sari kaa jo mudaavaa kartaa asr-e-haazir mein koi aisaa sahaaraa hi nahin aisaa kyaa thaa ki payambar use kahti duniyaa dast-e-maani ne koi naqsh ubhaaraa hi nahin ham ne 'bismil' gham-o-aalaam se bai'at kar li maa-sivaa in ke kisi ko bhi pukaaraa hi nahin"

"nigaah-e-shauq mein saudaa-e-justaju kyaa hai dil-e-shikasta mein ab aur aarzu kyaa hai nahin hai shart koi zauq-e-mai-kashi ke liye nigaah-e-rind mein mai-khaana kyaa subu kyaa hai bahaar shart hai gulshan mein zindagi ke liye gulon ke naam pe tafriq-e-rang-o-bu kyaa hai payaam-e-amn-o-mohabbat jo le ke aae the unhin se puchho ye har samt haao-hu kyaa hai ajiib aap kaa eajaaz-e-vaza-daari hai har ek baat mein kahte ho tum ki tu kyaa hai nigah mein bulbul-o-gulchin ki hai vaqaar abhi vagarna phulon ki gulshan mein aabru kyaa hai na koi shauq na hasrat na justuju na khalish bisaat-e-raqs pe bismil ki aarzu kyaa hai"

"apne hazaar rang badalne lagi hai shaam sher-o-sukhan se aaj bahalne lagi hai shaam phir apne rang-o-rup badalne lagi hai shaam soz-e-gham-e-firaaq mein jalne lagi hai shaam tanhaaiyon kaa shahr ab us kaa nasib hai jaam-e-shab-e-firaaq mein Dhalne lagi hai shaam aa jaao intizaar ke lamhon ko toD kar varna khayaal-e-khaam mein palne lagi hai shaam ahl-e-chaman se kah do bahaaron ke din gae ab bu-e-ru-e-gul ko kuchalne lagi hai shaam suraj kaa khuun rang-e-shafaq aur ru-e-shab fikr-o-nazar ki god mein palne lagi hai shaam ik chashm-e-intizaar se miltaa hai ye javaab mehr-o-vafaa kaa rang nigalne lagi hai shaam bazm-e-tarab mein dekhiye dipak ki taan par ru-e-ufuq pe shoala ugalne lagi hai shaam"

"yaad karte hain kabhi dil se bhulaa dete hain ham ko kis jurm ki aakhir vo sazaa dete hain ham vo saail hain jo har dar pe sadaa dete hain pyaar ki bhiik do ik haank lagaa dete hain 'aish-o-'ishrat mein shab-o-roz tumhaare guzrein jiine vaalo ye tumhein dil se du'aa dete hain teri duzdida-nigaahi ye tabassum tere sard jazbaat mein ik aag lagaa dete hain kaun rakh saktaa hai guzre hue lamhon kaa hisaab apne maazi ko sabhi log bhulaa dete hain"

"junun-e-shauq-e-mohabbat hai kyaa kiyaa jaae yahi to rang-e-tabi'at hai kyaa kiyaa jaae jo apne haath mein patthar uThaae phirte hain unhin se mujh ko 'aqidat hai kyaa kiyaa jaae zamaana mere fasaane se khuub vaaqif hai kisi ko phir bhi shikaayat hai kyaa kiyaa jaae koi ye jaa ke bataa de mire raqibon se mujhe to un se bhi ulfat hai kyaa kiyaa jaae main jab bhi miltaa huun dil meraa saaf hotaa hai udhar to sho’la-e-nafrat hai kyaa kiyaa jaae hai dil mein bughz-o-'inaad-o-hasad riyaa-kaari unhin ki sirf ye 'aadat hai kyaa kiyaa jaae samajh sake na vo ab tak havaaon ke rukh ko mizaaj-e-ahl-e-siyaasat hai kyaa kiyaa jaae ghasab jo kartaa hai ab bhi huquq auron ke sunaa hai saahab-e-sarvat hai kyaa kiyaa jaae hain but chhupaae hue apni aastinon mein zabaan pe kalma-e-vahdat hai kyaa kiyaa jaae usi ko aaj bhi 'bismil' navaaztaa hai jahaan jo nang-e-fahm-o-faraasat hai kyaa kiyaa jaae"

"hujum-e-gham mein bhi hoti hai jab chubhan tanhaa jabin-e-shauq pe aati hai phir shikan tanhaa bahaar aate hi phir qissa-e-gul-o-bulbul khizaan kaa jaur uThaataa rahaa chaman tanhaa fasaane jurat-o-himmat ke hain bahut lekin jahaan-e-'ishq mein farhaad kohkan tanhaa usi ke nuur se zulmat-kade munavvar hain jo ban ke jaltaa rahaa sham'-e-anjuman tanhaa khudaa ki zaat to sab par hai mehrbaan lekin buton kaa aaj bhi vaaris hai barhaman tanhaa khulus-o-mehr-o-muravvat bahut zaruri hai badal na paaegaa zehnon ko husn-e-zan tanhaa har ek daur mein rahtaa hai hukmaraan 'bismil' khayaal-o-khvaab ki duniyaa mein fikr-o-fan tanhaa"

"main hujum-e-gham se ghabraayaa nahin koi lamha garche raas aaya nahin vaqt ki badli hui qadron ke saath zindagi mein inqalaab aaya nahin jin ki zulfon kaa rahaa huun main asiir un ki yaadon ne bhi taDpaayaa nahin chamkaa hai har lamha ummidon kaa chaand vaqt ki gardish ne gahnaayaa nahin bad-nasibi Deraa Daale hi rahi phir bhi kuchh logon ne Thukraayaa nahin jis ke dar par muddaton sajda kiyaa us ne bhi kuchh faiz pahunchaayaa nahin"