Zindagi Shayari

ab to ye aarzū hai ki vo zaḳhm khā.iye
tā-zindagī ye dil na koī aarzū kare

jo zahr pī chukā huuñ tumhīñ ne mujhe diyā
ab tum to zindagī kī duā.eñ mujhe na do

rāz-e-hayāt pūchh le ḳhizr-e-ḳhajista gaam se
zinda har ek chiiz hai koshish-e-nā-tamām se

go safedī mū kī yuuñ raushan hai juuñ āb-e-hayāt
lekin apnī to isī zulmāt se thī zindagī

zindagānī kī haqīqat kohkan ke dil se pūchh
jū-e-shīr o tesha o sañg-e-girāñ hai zindagī

zindagī merī thī lekin ab to
tere kahne meñ rahā kartī hai

rahegā saath tirā pyaar zindagī ban kar
ye aur baat mirī zindagī vafā na kare

yahī hai zindagī kuchh ḳhvāb chand ummīdeñ
inhīñ khilaunoñ se tum bhī bahal sako to chalo

phir usī bevafā pe marte haiñ
phir vahī zindagī hamārī hai

muflisoñ kī zindagī kā zikr kyā
muflisī kī maut bhī achchhī nahīñ

is zindagī meñ itnī farāġhat kise nasīb
itnā na yaad aa ki tujhe bhuul jaa.eñ ham

jannat kī zindagī hai jis kī fazā meñ jiinā
merā vatan vahī hai merā vatan vahī hai

hosh vāloñ ko ḳhabar kyā be-ḳhudī kyā chiiz hai
ishq kiije phir samajhiye zindagī kyā chiiz hai

zindagī phailī huī thī shām-e-hijrāñ kī tarah
kis ko itnā hausla thā kaun jī kar dekhtā

zindagī par is se baḌh kar tanz kyā hogā 'farāz'
us kā ye kahnā ki tū shā.er hai dīvāna nahīñ

dhuup meñ niklo ghaTāoñ meñ nahā kar dekho
zindagī kyā hai kitāboñ ko haTā kar dekho

silvaTeñ haiñ mire chehre pe to hairat kyuuñ hai
zindagī ne mujhe kuchh tum se ziyāda pahnā

ek musht-e-ḳhāk aur vo bhī havā kī zad meñ hai
zindagī kī bebasī kā isti.āra dekhnā

apne man meñ Duub kar pā jā surāġh-e-zindagī
tū agar merā nahīñ bantā na ban apnā to ban

kuchh is tarah se guzārī hai zindagī jaise
tamām umr kisī dūsre ke ghar meñ rahā

zindagī maiñ bhī chalūñgā tire pīchhe pīchhe
tū mire dost kā naqsh-e-kaf-e-pā ho jaanā

yahīñ tak laa.ī hai ye zindagī bhar kī masāfat
lab-e-dariyā huuñ maiñ aur vo pas-e-dariyā khilā hai

thā zindagī meñ marg kā khaTkā lagā huā
uḌne se pesh-tar bhī mirā rang zard thā

shaiḳh sāhab se rasm-o-rāh na kī
shukr hai zindagī tabāh na kī