Intezaar Shayari

vo na aa.egā hameñ ma.alūm thā is shaam bhī
intizār us kā magar kuchh soch kar karte rahe

maanā ki terī diid ke qābil nahīñ huuñ maiñ
tū merā shauq dekh mirā intizār dekh

bāġh-e-bahisht se mujhe hukm-e-safar diyā thā kyuuñ
kār-e-jahāñ darāz hai ab mirā intizār kar

ye daaġh daaġh ujālā ye shab-gazīda sahar
vo intizār thā jis kā ye vo sahar to nahīñ

bārhā terā intizār kiyā
apne ḳhvāboñ meñ ik dulhan kī tarah

muntazir us ke dilā tā-ba-kujā baiThnā
shaam huī ab chalo sub.h phir aa baiThnā

muntazir kis kā huuñ TuuTī huī dahlīz pe maiñ
kaun aa.egā yahāñ kaun hai aane vaalā

kabhī ai haqīqat-e-muntazar nazar aa libās-e-majāz meñ
ki hazāroñ sajde taḌap rahe haiñ mirī jabīn-e-niyāz meñ

yaqīn chāñd pe sūraj meñ e'tibār bhī rakh
magar nigāh meñ thoḌā sā intizār bhī rakh

aisī hī intizār meñ lazzat agar na ho
to do ghaḌī firāq meñ apnī basar na ho

jāntā hai ki vo na ā.eñge
phir bhī masrūf-e-intizār hai dil

ai nūr-e-nazar muntazir-e-vasl huuñ aa jā
do paaT palak ke nahīñ darvāza huā mahz

gar intizār kaThin hai to jab talak ai dil
kisī ke vāda-e-fardā kī guftugū hī sahī

tum aa.e ho na shab-e-intizār guzrī hai
talāsh meñ hai sahar baar baar guzrī hai

kis kā surāġh jalva hai hairat ko ai ḳhudā
ā.īna farsh-e-shash-jahat-e-intizār hai

rishtoñ kā e'tibār vafāoñ kā intizār
ham bhī charāġh le ke havāoñ meñ aa.e haiñ

jāñ-sapārī daaġh katthā chūnā hai chashm-e-intizār
vāste mehmān ġham ke dil hai biiḌā paan kā

phūñkā hai kis ne gosh-e-mohabbat meñ ai ḳhudā
afsūn-e-intizār tamannā kaheñ jise

ye na thī hamārī qismat ki visāl-e-yār hotā
agar aur jiite rahte yahī intizār hotā

tā phir na intizār meñ niiñd aa.e umr bhar
aane kā ahd kar ga.e aa.e jo ḳhvāb meñ

jān-levā thiiñ ḳhvāhisheñ varna
vasl se intizār achchhā thā

ab ḳhaak uḌ rahī hai yahāñ intizār kī
ai dil ye bām-o-dar kisī jān-e-jahāñ ke the

be-ḳhudī le ga.ī kahāñ ham ko
der se intizār hai apnā

ye jo mohlat jise kahe haiñ umr
dekho to intizār sā hai kuchh