Sad Shayari

maiñ bhī ruk ruk ke na martā jo zabāñ ke badle
dashna ik tez sā hotā mire ġham-ḳhvār ke paas

baḌe baḌe ġham khaḌe hue the rasta roke rāhoñ meñ
chhoTī chhoTī ḳhushiyoñ se hī ham ne dil ko shaad kiyā

dil nā-umīd to nahīñ nākām hī to hai
lambī hai ġham kī shaam magar shaam hī to hai

phir sar-e-sub.h kisī dard ke dar vā karne
dhaan ke khet se ik mauj-e-havā aa.ī hai

kaan meñ hai tere motī āb-dār
yā kisī āshiq kā aañsū bolnā

ġham-e-firāq meñ taklīf-e-sair-e-bāġh na do
mujhe dimāġh nahīñ ḳhanda-hā-e-bejā kā

chalī samt-e-ġhaib siiñ kyā havā ki chaman zuhūr kā jal gayā
magar ek shāḳh-e-nihāl-e-ġham jise dil kaho so harī rahī

ab ḳhushī hai na koī dard rulāne vaalā
ham ne apnā liyā har rang zamāne vaalā

ishq se tabī.at ne ziist kā mazā paayā
dard kī davā paa.ī dard-e-be-davā paayā

paas jab tak vo rahe dard thamā rahtā hai
phailtā jaatā hai phir aañkh ke kājal kī tarah

ho duur is tarah ki tirā ġham judā na ho
paas aa to yuuñ ki jaise kabhī tū milā na ho

chamak hai dard hai kauñdan paḌī hai huuk uThtī hai
mire pahlū meñ kyuuñ yaaro ye dil hai yā ki phoḌā hai

ġham-e-duniyā bhī ġham-e-yār meñ shāmil kar lo
nashsha baḌhtā hai sharābeñ jo sharāboñ meñ mileñ

ishrat-e-qatra hai dariyā meñ fanā ho jaanā
dard kā had se guzarnā hai davā ho jaanā

ye kahāñ kī dostī hai ki bane haiñ dost nāseh
koī chārasāz hotā koī ġham-gusār hotā

kis tarah apnī mohabbat kī maiñ takmīl karūñ
ġham-e-hastī bhī to shāmil hai ġham-e-yār ke saath

mirī jaan aaj kā ġham na kar ki na jaane kātib-e-vaqt ne
kisī apne kal meñ bhī bhuul kar kahīñ likh rakhī hoñ masarrateñ

ai chashm jo ye ashk tū bhar laa.ī hai kam-baḳht
is meñ to sarāsar mirī rusvā.ī hai kam-baḳht

haañ nukta-varo laao lab-o-dil kī gavāhī
haañ naġhmagaro sāz-e-sadā kyuuñ nahīñ dete

aa shitābī siiñ vagarna majlis-e-ushshāq meñ
zulm hai ġham hai qayāmat hai ḳharābī ai sanam

sitam to ye hai ki vo bhī na ban sakā apnā
qubūl ham ne kiye jis ke ġham ḳhushī kī tarah

duniyā ne terī yaad se begāna kar diyā
tujh se bhī dil-fareb haiñ ġham rozgār ke

jo baat hijr kī aatī to apne dāman se
vo aañsū poñchhtā jaatā thā aur maiñ rotā thā

ham ahl-e-qafas tanhā bhī nahīñ har roz nasīm-e-sub.h-e-vatan
yādoñ se mo.attar aatī hai ashkoñ se munavvar jaatī hai